معذبني غرامك ( قصة جريئة)

57

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 57

دخل التقدية كاااملة تحت عينيها لي علين ياكلوه.. تفاصيلو الرجولية كانت كتجدبها.. هاكداك عرقااان بتمارة تا من عروق نواضرو متورمين..

تنهدات و قربات منو ناطقة برقة : عراقيتي بزاف .. نوجد ليك الحمام دوش العربي ..

العربي شاف فيها و طلعات مع نيفو ريحتها و نطق بخشونة : ما مكرهش..

مغنية تبسمات فوجهو و نطقات بنفس الرقة و الأنوثة : واخا .. سير رتاح ليك شويا انا اندفي ليك لما و نوجد ليك الحمام ..

العربي حرك راسو بالموافقة وزاد خرج مخليها متبعاه بعينيها كان حرفيا عشقها ليه رتقا للهوس ... تنهدات نطقات بهمس: كتبغيييييه اعباد الله كنموووو.. ت فيه ..

ضحكات على نفسها .. و دارت هزات البرمة لكبيرة دارتها تحت السقاية تعمر.. وردت لديك التقدية كتفرغها من الصيكان ديالها .. علاما عمرات البرمة و دارتها فوق
لفورنو و شعلات عليها و دارت تاني لتقدية ..

ستفات لي خاصو يتستف و غسلات لي خاصو يتغسل علاما حسات بالبرمة دفات و هي تمشي للحمام وجدات ليه الشومبوان ديالو و داك الشي لي غيحتاج .. و خرجات مشات عندهم لبيت لقات بن عيسى ناااعس من لعيا د السوق ..

شاف فيها العربي حاط صبعو على شفايفو بمعنى سكتي .. و هي دارت ليه اشارة بيديها باش ينوض ..

ناض خرج عندها : مالك ..

مغنية : الما راه دفا و الدوش واحد العربي ..

العربي حرك راسو بواخا و زاد هو بنفسو للكوزينة يجيب البرمة تحت انضارها و هي تابعاه تا دخل و نطقات كتشير ليه لجهة د الناموسية : وجدت ليك تا حوايجك صافي ..

العربي حرك راسو و نطق قبلما يدخل: صافي ..

دخل للحمام و هي تنهدات كتبسم و قلبها علين يفرفررر بالفرحة ..هادو كانو اقسى احلامها و هاهي حققاتهم...

رجعات للكوزينة تكمل شغلها .. و ما تاواها حال .. رجعات لعندو تاني .. وقفات ورا الباب كتسمع الما كيتكب و نطقات برقة : العربي واش ندخل نحك ليك ضهرك...

ناداها من ورا الباب ناطق بخشونة : دفعي الباب ..

مغنية خرجات عينيها و بالزربة حيدات زيف حياتي من فوق راسها و قرصات حناكها .. و دفعات الباب و تمات داخلا .. لقاتو واقف و عاطيها بالضهر كيكب عليه الما ... سهااات فضهرو و كثافو العرااض و هي كتشوف فطولتو و صلابة عودو..

العربي حس بيها و هو يدو غير بنص عين و نطق : را هي الخرقة " الكيس "

مغنية حركات راسها بواخا و هزاتها لابساها فيدها ليمنة .. و حطات يديداتها بجوج على ضهرو و بدات كتحك ليه...

كتتتبسم غير بوحديتها و تعض على شفايفها .. حابسة الضحكة .. عيات ما تحك ما خرج لا وسخ لا والو .. حيت الدوش عندو كل نهار ورا الخدمة فلبلاد...

بعدا علبه و حيدات الكيس من يدها و نطقات برقة : ضهرك نتي ما خرج منو والو ...

العربي حرك راسو و دار لعنقها و هي تبلع ريقها كترمش فعويناتها بالزربة و هو جاري معاها بعينيه ... تا نطقات تاني : يالله بالصحة ...

و خرجات مخلياه متبعها بعينيه ..

رجعات تاني لشغلها كتقلب بين داك الشي لي جاب .. لقاتو جاب ليها كلشي .. الا حاجة. وحدة: قطبات حجبانها كتعاود تقلب والو ما لقاتش : ويلي علاش ما جابهمش...

زادت كتقلب تاني بين لحوايج لي ستفات لا تكون دارتو معاهم بالغلط و ما وداتش ليه البال و لكن والو ما كاينش : ويلي والله ما جابو و بعد غدا غتنزل الكافرة بالله ..

حطات يديها على فمها كتتنهد : واش نساها .. ولا ياكما انا تضبعت و ما قيدتهاش ليه ..

و هي باقي كتتخبط وسط أسئلتها.. تم داخل عليها العربي و فيدو ديك البرمة و نطق : هاهي رجعي عمريها لبا نعاونو يدوش...

مغنية حركات راسها بواخا و قربات ليه شداتها من عندو : واخا ..

مدها ليها و جا غارج و هي توقفو : العربي ..

العربي رجع شاف فيها بمعنى مالك و هي تبلع ريقها و نطقات متحاشيا النضر فعينيه : كتبت ليك فالورقة اولويز تجيبو ليا من السوق ساعا ما جبتيهش ليها ..

العربي داك الساع خنزر فيها فاش تفكر و نطق : قلت لحيى لي معلماها خليها فدار القايد الله يرحم باك ..

مغنية هزات فيه عويناتها كترمش بدهول و نطقات : ويلي اشنو درت ...

العربي زاد خنزر و نطق عينيه خارجين فيها : انا قدر مصبفطاني وسط السوق نجيب ليك داك لمسخ هاه ...

مغنية تحجرو الدموع فعينيها و قلبها تزير : ماشي وسخ هاداك راه أي مرا كتحتاجو ... كلشي كيشريه ..

العربي : كتحتاجيه تا نخرك تاخديه براسك .. ماشي تصيفطيني انا لوسط السوق ..

مغنية بلعات ريقها و حدرات راسها هاربا من قسوة عينيه و دموعها شاقين طريقهم و نطقات بنبرة مرتجفة : صافي سمح ليا .. ما غنبقاش نعاود ..

العربي طلعها و نزلها ضراسو كيتحاكو مع بعضياتهم و نطق: طلقي راسك ديري الما يسخن خلاص ...

لاح ليها هاد الهضرة و خرج خلاها مقهووورة و كاع لي كان ليها فرحة تكسر فنفسها ... بقات كتبكي بصمت كيف عادتها .. جاتها ردة فعلو مبررة.. او هي عطاتو من عندها عذر و تبرير و انو فعلا دورة لمرا خاص تبقا بينها و بين نفسها و ما تحسس بيها حد ...

بقات كتبكي و تمسح فدموعها و تعاتب فنفسها على تسرعها و تصرفاتها .. ما فكراتش تلومو هو نهائيا حيت كاع تصرفاتو معاها كيجرها عاديين مع الأسف ... و هادشي كولو سبابو هوسها بيه .. حبها ليه كان كخليه فعينيها يبان مثالي .. حباتو لدرجة قدساتو و حباتو كثر من نفسها كاع ...

#يتبعععع غدا .. مغنية مهووسة بالعربي لأقصى حد ... مازال غتشوفوها كتقدم تنازلات اكثر غيرصل بيكم الحد لأنكم تكرهوها.. ولكن كلشي عندو تفسير .. و تا حاجة ما تبقا علاما هي عليه .. و دوام الحال من الموحال... كنبقا قصتها للعبرة و المتعة ايضا .. كنتمنى تكونو مستمتعين بيها و ايضا كتاهدو العبرة منها ...