معذبني غرامك ( قصة جريئة)

64

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 64

العربي شاف فيها و رجع مشا قاصد ضروبة و نطق : داي الصغار يضربو...

مغنية ميلات شفايفها و اشارت ليه لواحد التور مربوط تماك و نطقات : و هاهو التور غير هنا .. لاش غتديهم لبلاصة اخرى...

العربي شاف فيها و مد ليها الطوال دوحدة من دوك البقرات تشدوها و نطق بخشونة : هاداك بارد منو من البقرة ..

مغنية خرجات عويناتها فيه كترمش و التزنيكة طلعات ليها على وجها سرعنما جاها الضحك و نطقات بلاما تحس : يعني ما فيدوش..

و طلقاتها بضحكة طويييلة كتشوف فالتور لي ما دايهاش فيهم كياكل .. و هي جاتها هستيريا ديال الضحك .. تا كتبغي تحبسها و ترجع تشوف فداك التور و ترجع تاني تضحك ...

خلات العربي غير كيسمع و يشوف فيها .. تا ضحكات على خااطرها و بردات عاد جا خارج هو و جار وراه 3 ديال لبقرات .. و هي توقفو بصوتها لحنين : العربي ...

وقف و دار لعندها و هي نطق: فاش تسالي تديني نشوف مي قالت ليا منانة البارح راها مريييضة..

العربي حرك راسو و نطق : و يكون خير ...

تبسمات مغنية حيت فاش كيقول ليها هاد يكون خير فيعلا كيدير ليها اش بغات و نطقات بنعومة : الله يعاونك ..

العربي نده دوك البقارات يخرجو و نقل السطلات ديال لحليب ب 4 عارفهم ثقال عليها و ثقال حتى على باه .. خرجهم لقدام لباب و حطهم باش يدوز مول لحليب يهزهم ...

و نده تاني داك البقرات لدوار عند واحد من صحابو الفلاحة لي عندهم التور سخون يضرب لبقر ديالو تا هو ..

و مغنية دارت دخلات بدات فلفطور و فنفس الوقت عمارات لدجاج يشربو و عطاتهم ياكلو .. و جبدات من عندهم سلة كبيرة دالبيض...
كانت واخا كتعيا حيت روتينها صعيب ولكن كانت فرحانة بزاااف بدارها .. سيغتو انو بن عيسى كيحسسها انو هي كلشي فهاد الدار .. و هي بدورها ما مقصراش فحقو... كتهلا فيه حاطاه فعويناتها حاسباه فمقام باها ..

داز الوقت و طاح الضلام .. و فدار القايد ..

كانت عند مها جالسا معاها فالبيت ..كانت مريييضة و المرض بان من عينيها لي ما ممكحلينش كيف عادتها..

حليمة كتنطق بصوت عيان : اوا ابنتي كي غادا مع دارك و ناسك ..

مغنية تبسمات :الحمد الله امي هاحنا غاديين مع الدنيا ...

حليمة تبسمات بتعب و نطقات : اوا الحمد الله ابنتي .. الحمد الله لي شفتك فدارك على خير و بيخير .. لا بغات المو.. ت تجي دابا مرحبا بيها ..

مغنية شدات ليها فيدها و نطقات بلهفة : لا لا امي اش كتقولي غير ريح و غيدوزك مزال دكي و الدردكي...

ضحكات حليمة تا شداتها الكحة و نطقات : و نتمناو الشفاء ابنتي ...

مغنية هزات يدها باسها : الله يشافيك امي .. باقي تشدي حفايدك نجيب ليك بجاغطي تربيهم ...

حليمة تبسمات و نطقات : اجي فكرتيني واش كتشربي الفانيد ابنتي حضي منو راه كيعكر... " العقم"

مغنية حركات راسها بلا و نطقات : لا امي كاعما كناخدو من لي تزوجت ...

حليمة ضيقات عينيها عاقدا حواجبها و نطقات : و باقي ما حملتي ؟؟

مغنية حركات راسها بلا : باقي امي...

حليمة : امتى جاتك الحيضة ...

مغنية تزنكات حادرا راسها و نطقات : راها عليا دابا ...

حليمة دخل معاها الزايد : و راجلك كيعاشرك ديما ابنتي و كيجيب فيك ماه ..

مغنية خرجات عينها و كانت علين تطرطق بالحشمة كون صابت الأرض كون تشقات و بلعاتها ... ما توقعاتش نهائيا هاد الأسئلة الحساسة من مها ..بلعات ريقها و حركات راسها بالإجاب و بقات ساااكتة ..

و حليمة رجعات نطقات : و تعطيلتي ابنتي راه طالعا ف 3 شهور باش تزوجتي ..

مغنية بلعات ريقها باغا غير تسد هاد الموضوع قبلما تسخف بالحشمة و نطقات كتتلعتم: عادي امي تا منانة وقعات ليها ..و هاهي دابا حاملة ...

حليمة تنهدات تنهيدة طويلة نطقات : اوا نتمناو ابنتي ...

#يتبعععع ...