معذبني غرامك ( قصة جريئة)

119

..
                         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏                                  Part : 119

هاد الأخير لي كان غادي و كيتلفت وراه و كأنو كيودع ديك الأرض الى الأبد.. كيوعدها بدموعو لي ما قدرش يحبسهم .. هادي ارضو لي واخا ملكها ما عطاتوش ديك القيمة لي كان كيحلم بيها .. بقا ديما فعينين الناس .. غير خماس .. بن عيسى الخماس ...

هبطو لدار .. و مشا العربي وجد لباه الحمام كيف طلب منو ..و وجد ليه حويجات نقيين و جداد تحت طلبو .. و دخلو دوش ليه .. كيحك ليه فضهرو و يهضرو ويضحكو ..بقا بن عيسى كيضحك حتى الدموع كينزلو ليه ..و العربي شاد ليه الخاطر.. و كيحمد ربي باه رجع ليه ..

خرجو لبس عليه حوايجو .. و رش ليه من لعطر ديالو بحال شي عريس ..و فطر هو وياه فاش أدنات المغرب... و بقاو مقصرين ... تا بن عيسى بان ليه العربي جاه النعاس .. داتو عينو و هو جالس ... ناض قرب لعندو كيفيقو بصوت حنين : نوض اولدي نوض سير لبيتك ترتاح راك عيان..

العربي حل عينيه  :واخا ابا .. يالله حتى نت لبيتك ترتاح و تاخد الدوا ديالك ..

بن عيسى : الله يرضي عليك اولدي بلاش عليا من داك الدوا غير هاد الليلة ...

العربي : ولكن ابا ر..

بن عيسى قاطعو : وصافي العربي .. ليلة ما دات ما جابت ...

العربي تنهد و حرك راسو : صافي غير هاد الليلة من غدا اترجع لدواك ..

بن عيسى تبسم و حرك راسو حتى هو : صافي ابا ..

خلا العربي غير كيضحك و يحرك فراسي بلا حولا. ..مشا معاه لبيتو كيف العادة .. غطاه ..و بقا معاه غير شويا و نطق : يالله ابا تصبح على خير عييت انمشي نروح..

بن عيسى : صافي سير اولدي انا راضي عليك ..

العربي هبط باس ليه على راسو و نطق :الله يحفضك ابا ..

خرج من عندو غادي لبيتو بخطوات ثقال .. حاس بصدرو مزير عليه .. دخل لبيتو كيتنهد و يستغفر..

عند بن عيسى فبيتو .. غير خرج العربي و هو يحل عينيه .. و دموعو نزلو .. تقاد فالجلسة و هز التسابيح ديالو فيدو حاس بالنفس كضيق فيه .. حقيقة الأمر انو ما كان لا مزيان لا والو كان المرض هشم ضلوعو ..  ضغط على نفسو و عض على اللحم الحي باش يعيش ايامو الأخيرة مع ولدو .. موتو كان امر محتم ..قبل جوج سيمانات من دابا و هو حاس بيها جايا ..

بلع ريقو و الألم كيجهاد فصدرو ..و النفس كتزيد تضيق فيه ... زير على التسابيه بين يديه .. و رفع سبابتو  كيردد الشهادتين بهمس .. و هو راضي بحكم الله كيفما بغا يكون ...

مع آذان الفجر .. ضرباتو الفيقة و الآذان كيتردد فمسامعو.. ناض دخل لحمام توضا و صلى صلاتو..و خرج قاصد لبلاد .. و كيف العادة قبلما يخرج كيمشي يطل على باه فبيتو هو الأول ..

دخل مع الباب كان الضلام ... عقد حواجبو و شعل الضو د البيت و هو يـ....

يتبع غدا ... 💔✨

يا ترى بن عيسى غنودعوه ؟. هادشي لي غنعرفو غدا .. 
درت كونط جديد فأنسطا .. اذا دخلتو عندي كلكم و وصل ل 1k. من هنا لغدا عندكم بارت زايد فوق لحساب يالله دخلو .. ليوم غنرهيهوها ستوريات فيه
@itsimaneimy

https://www.instagram.com/itsimaneimy?igsh=MWV2NDJrcGg2NGd2Mw%3D%3D&utm_source=qr