معذبني غرامك ( قصة جريئة)

13

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 13

منانة كتنش عليها بيديها حيت بانت ليها السيدة تبلونطات: اسبحان الله .. ويلي مال هادي تبوهلات... هييهو وااا الدبة...

مغنية حركات راسها و شافت فيها و اخيرا رجعات للواقع و بدات كتخرج من ديك الصدمة لي جاتها : هاني معاك ..

منانة ضحكااات ضحكة طويلة و نطقات : اويلي مالك تصدمتي و كلستي اسبحان الله الفقيه ...

مغنية بلعات ريقها و هزات يديها قدامها كتشوف فيهم كيترعدر و رجعات شافت فيها و نطقات : واش بصح لي سمعناه منانة..

منانة حركات راسها بآه مبتاسما بحب و نطق : ايه بصااااح اصحيبتي با خطبك لخويا لعربي ..

مغنية بقات كتشوف فيها و تحاول تستوعب كلامها .. عينيها غرغرو بالدموع حرفيا ما متيقاش بيلا صافي حلمها تحقق و العربي خطبها رسميا ...

بقات منانة كتعنق فيها فرحاااانة ليها بزااف .. تا هي وقفااات معاها وقفة صحيحة باش طيحات ابراهيم و خلاتو يموو.. ت فيها ...

داز الوقت و تدفع لعشا .. و تعشاو فجو عادي .. العربي كان مكالمي راسو ما باغيش يطيح ب باه و يدير ليه شي فرشة ..

حنحن بن عيسى و شاف فالعربي و نطق : اوا اولدي عيط على لالة حليمة نتشاورو معاها ..

ابراهيم حرك راسو بالإجاب و نطق: هي لولا اسي بن عيسى ..

و رفع صوتو كثر كينادي عليهم : الحاجة .. حليمة ..

انو داخلين تم تم حيت كانو حاطين ودنهم على لباب ابراهيم ديجا علمهم .. خلاو منانة و مغنية واقفين شادين العسة ما فالت ليهم تا حرف ..

جلسات حليمة حادرا راسها قلبها مغير ما عارفاش واش تفرح و لا تكعا .. بقات ساكتا تا نطق ابراهيم : اوا احليمة .. اش بان ليك .. العربي راه ماشي براني .. و مغنية تربات قدام عينيه ..

حليمة هزات راسها فيه ورجناتها محمرين بالخجل ما كانتش موجدا راسها نفسيا لهادشي و نطقات باين فيها التوتر و الحشمة : اولدي نت الراجل ديال الدار كلمتك ما خاصش تطيح لأرض .. و ما نلقاوش حسن من سي بن عيسى نتناسبو معاه ...

بن عيسى بتاسم و حط يدو على صدرو بالصواب و نطق : لهلا يحاشمنا...

ابراهيم : اوا مبروك عليك اسي العربي .. عطيناكم اسيدي ...

العربي كتفى بإبتسامة بزز راسمها على شفايفو و كيشوف فباه و فهاد التوريطة لي ورطو...

بن عيسى كان داير شرع يدوما مسوقش ليه : الله يبارك فيك اولدي .. مين تافقنا .. نديرو خطبة هاد ليامات .. و العرس ورا العيد لكبير .. نبيعو شي خرفان نوجدو الصداق و لقوام لبنتي مغنية .. عزيزة و غاليا ..

ابرهيم تبسم من ديما كيجيه بن عيسى انسان حنين و بسيط : لي جات من عندكم هي هاديك اسي بن عيسى الأهم هو البنت تعيش فالخفض و الأمان و الصون ..

بن عيسى حرك راسو : لهلا يحاشمنا اولدي ..

تنهد العربي بضيق كيشوف الحيط قدامو كيبان ليه لخيال ديال مغنية و منانة عرفهم كيتصنتو...
كيفاش غيعيش مع انسانة فيها كاع الصفات لي كيكره... حرفيا كاع الصفات لي ما كيحملش.. الخفة .. السهالة... الفم الخانز " كتخصر الهضرة " ... كتجيه سايبة مبعرة و قليلة الترابي ... ما عندها حكام ...