معذبني غرامك ( قصة جريئة)

75

          مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 75

بلعات ريقها و حركات راسها بواخا و نطقات : هانا فالكوزينة لا حتاجيتي شي حاجة عيط ليا ...

حرك راسو بالإجاب مخنزر و ملامح المرض و التعب وااضحة عليه ولكن ما راضيش بضعفو يبان قدامها ..

شاف فيه و تنهدات و ناضت لكوزينتها .. تا هاد ردك الفعل ديالو كانت متوقعاها.. حيت منانة قالت ليها فاش كيكون مريييض كيسد عليه فبيتو ما كيحمل حد يشوفو مريض..

قادات لفطور و خدات ليه تا هو يفطر لقاتو نعس عرفاتو لقا الراحة من لحريق ..

دوزات نهارها بين الشقى و مرا مرا طل عليه تشوف اش خاصو ... و هاكدا دازت المرضة ديالو لي متدات على طول 3 ايام كتبات فايقة معاه بالكمادات و دوا لعرب لي حتى هو بزز كيبغي يشدو من يدها ..

حلات عوناتها على ضو الصباح داخل من الصرجم د البيت صوت الدجاج كيصبح ناشط .. دارت لبلاصتو كتفتف بيديها لقاتها  خاوية ناضت بالزربة مخلوعة عليه ..

لبسات عليها و خرجات من لبيت كتقلب عليه تا بان ليها فالبورينة مع العود ديالو كيحك ليه على نيفو و يدوي معاه .. حوار رجولي بيناتهم .. و العود بقوة ما مربي الكبدة على العربي كيحك عليه النيف و كأن. كيعاتبو على هاد الغيبة د دمرضة لي غاب عليه .. و عربي شاد لبه الخاطر و كيحك ليه ..

تبسمات كترمقو بنضرات كلها حب .. قربات منو بهداوة و نطقات بصوت ناعم : صباح الخير ..

العربي دار شاف فيها و نطق برجولية : صباح الخير ...

مغنية قربات منو كثر و حطات يدها على جبينو مرورا بخدو كتفحص حرارتو : كي صبحتي مزيان .. السخانة هبطات ليك ..

ناضرها بهداوة متأمل ملامحها المنتفخة بعض شيء بالنعاس ونطق : الحمد الله مزيان دابا ..

مغنية بعدات يديها و شافت فعود كيفاش حاط راسو على كثف العربي و نطقات : اوا الحمد الله على سلامتك ..  انا نمشي نقاد ليك لفطور ..

العربي حرك راسو بالإجاب كيشوف فيها عن قرب كيتأمل وجها كثر و هي قريبة منو كيشوف بياضها الناصع و ديك التزنيكة لي فحنيكاتها و نويفها .. ما عمر رد ليها لبال قبل زواجهم انها زوينة بزاف .. عمر حقق فيها او كمل فيها الشوفة .. كانت كيسمع المدح فجمالها بين لمجامع ولكن عمر عطاه اهتمام او رد ليه البال... حيت هو عندو مولات لعقل هي كلشي اش يدير بزين لا كان بلا عقل ...

و هي بعدات عليه مزنكة و حشمانة من قربهم و شوفاتو   .. و  دخلات بحالها و هو دار مكمل الجلسة ديالو مع عودو ..