معذبني غرامك ( قصة جريئة)

23

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 23

العربي مد ليها تا هو يدو دون تفكير و رد عليها بخو كلامها بصوت رجولي خشن : الله يبارك فيك ..

ثلاثة د الكلمات ما فاتهمش ليها.. ماقل و دل ...كمش يدو عندو و هي جلسات من الطرف حدا مها .. حادرة راسها كتفرك فصبيعاتها من كثرة التوتر... و حشمااانة و طايح عليها السر..

تا نغزاتها مها و داوات بينها و بينها : اوا نوضي ابنتي نجمعو الطبلة باش نحطو لعشا...

مغنية بنفس الرقة : واخا امي ..

و ناضت هزات الصينية لكبيييرة و خرجات من البيت .. تحت أنضار العربي كيطلع فيها و ينزل كيحاول يدخل لراسو انو هاد السيدة لا كتاب عتشرك معاه حياتو ...

زفر بضيق كيحاول ما يبين والو .. تا تحط لعشا و هاد المرة تعشاو مجموعين ... كياكلو و يتهاودو و بن عيسى عجباتو التقلية بزااف .. مدح طياب مغنية و حداكتها ...

هي لي بقوة الفرحة ما ركزاتش كاع مع الماكلة و ما كلاتش بزاف .. كانت غير مرة مرة كتسرق شوفة من العربي كتلقاه كيخشي فوجهو عاطي لماكلا حاقها كيااكل نيت ...

حليمة كانت غير حاضياها و فينما تبان ليها عيقات بعينيها لي كيدورو على العربي تخرج فيها عينيها تا كتحدر راسها هي و ترجع تنقب شويا معاهم ..

تا سالاو و ناضت مغنية و منانة جمعو الطبلة و جابو الديسير ...

عم الصمت ثواني و نطق بن عيسى كاسرو : اوا اسيادنا حجة و زيارة .. مدام جينا نتافقو على نهار يكون فيه العرس...

ابراهيم حط الموس من يدوو شاف فيه و حرك راسو بالإجاب : اايه اسي بن عيسى ما قلتي عيب .. لي دتوها حنى معاكم .. امتى يناسبكم و تكونو واجدين ..

بن عيسى : حنى ما كرهناش من دابا يعقدو و نديرها معانا ... ولكن ما جاتش ... باقي خاص ما يتوجد.. البيت لبنية و العرس و المسائل...

ابراهيم حرك راسو آه و بن عيسى كمل : انا قلت اولدي نديرو ضريب الصداق السيمانة الجاية ... و العرس من هنا شهر ولا ... اش قلتو ...

ابراهيم شاف فمغنية لي بانت عليها الصدمة من ديك ضريب الصداق من هنا سيمانة جابت ليه الضحك و نطق : واش غنقوليك اسي بن عيسى .. فاش كيحضر لما كيترفع تايموم.. ها حليمة و لبنية كيسمعو فيك ... لي قالوها هي لي كاينا ...

و شاف حليمة و نطق : حليمة اش بان ليك ...

حليمة تبسمات حنيكاتها مزنكين بالحشمة و حادرة عينيها و نطقات : حاشا اسي براهيم واش نقولو كلام فوق كلامك .. نت والي لبنية و النايب عليها .. لا كلام فوق كلامك لي درتوها نتوما الرجال مزيانة ..

ابراهيم تبسم كان متوقع جوابها غير بغا ياخد رأيها باش يريح نفسو .. و رجع شاف فمغنية لي ذابت فحوايجها بالحشمة و وجها كولو تزنك تزنيكة وحدة : ونتي امغنية اش بان ليك ..

مغنية بلعات ريقها و بزز قدرات تنطق قبلما تنوض تخرج من تماك : لي بان ليك اعزيزي..

بقاو متبعبن ابها العين و كيضحكو على تصرفها الخجول و منانة ناضت تبعاتها .. و هوما كملو كيتافقو على اشنو غيديرو ... كان العربي قدام باه محطوط بحال شي ديكور كيجاوب غير بآه و ب لي ليكم .. كان مخلي باه يدير لي بغا .. عيا من هاد السيرة ...

#يتبعععع 🔥🔥🔥🔥