معذبني غرامك ( قصة جريئة)

118

..
                         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏                                  Part : 118

نهار جديد .. نهار ما كانش عادي .. نهار كانت فيه طاقة غريبة ....

حل عينيه مفزوع من واحد من كوابيس لي  راودوه هاد الليلة .. بلع ريقو حاس براسو عطشان بزااف  ما تسحرش لبارح اصلا  ما بقات عندو شهية للماكلة ..

تنهد و ناض كيرمي فلخطاوي قاصد البيت د باه ..  دخل و هو يتصدم لقاه لابس عليه و جالس فوق النموسية ديالو و التسابيح المفضل ديالو فيدو .. سرعنما تحولات صدمتو لإبتسامة رجولية و نطق : با ..

بن عيسى هز فيه راسو حتى هو مبتاسم و نطق : صباح الخير المرضي ..

العربي قرب باس ليه على راسو و على يديه بجوج و جلس حداه  و نطق : صباح الخير ابا .. ها نت صبحتي مزيان .. تخطيتيها..

بن عيسى حرك راسو ونطق بهداوة : الحمد الله اولدي .. جابك الله طلعني لبلاد نسرح رجليا قنطت بزاف ..

العربي حرك راسو بالإجاب و نطق : هي لولا ابا .. انا نمشي نبدل عليا و نجي صافي ..

بن عيسى : صافي اولدي ..

و داك الشي لي كان .. مشا لبيتو لبس عليه بالزربة و عينو كتتسارا بين حوايج مغنية لي باقين كيفما خلاتهم .. تنهد بعمق .. عندو الأهم دابا هو باه يشد صحيحتو.. و هي طال الزمان ولا قصار غيرجعها ليه يا بالخاطر يا بزز ..

خرج لعند باه لقاه باقي فبلاصتو .. كيستغفر .. مد ليه يدو و نطق : با يالله ..

بن عيسى تبسم كيف عادتو بشوش و حنين و نطق : على مولانا .. يا حفيض يا ستار..

شد للعربي فيدو مزير ليه عليها .. و وقف على رجليه من بعد سيمانة د المرض و نطق : الله يرضي عليك اولدي .. فاش نرجعو لدار عاوني بغيت ندوش ..

العربي حرك راسو بالإجاب : واخا ابا ...

و زاد هو وياه غادي غير بالشويا و شادو كون  لقا كون دارو فضهرو .. تمو طالعين كانت الدنيا خاوية ..
تنفس بن عيسى بعمق مدخل لهوا النقي لريتو.. تبسم برضى و هو كيشوف كيفاش الغلة كثيرة و كيفاش لبلاد منورة و كيفاش ولدو عارف يسيرها و يزيد بيها للقدام و بدال البير وهو حافر جوج ..

طبطب ليه على يدو و نطق برضى : تبارك الله عليك المرضي .. انا لي ولدت الراجل ...

ضحك العربي برجولية من ديما مدح باه كينشطو : الله يحفضك ابا ..

تنهد بن عيسى بعمق كيشوف فهاد الأرض امتى ملكها و شحال دوز فيها  و شحال كان فرحان بيها ..  و الحاجة لي كتفرحو كثر انو ضمن بيها المستقبل لولدو : شوف اولدي هاد الأرض ما كتباع ما كتشرا هاد الأرض لاما غناتك تعيشك ... ما تبيعهاش اولدي و ما تتخلاش عليها .. زيد خدم فيها ...

العربي : ما تخافش ابا عمر نفكر نبيعها هادي هي الأرض لي دايرا لينا قيمة ...

بن عيسى غمض عينيه مخلي داك النسمة الباردة المنعشة ختارقو مسامو و تنعش حواسو. ...

كانو شوفاتو عميقين بزاااف و غرااب.. و كأنو كيلقي آخر نضرة على هاد الأرض .. و كأنو كيتوادع مع ارضو .. و كأنو كيوصيها على ولادو .. و كيوصي ولدو عليها ...

زادو طلعو بين الشجر ديال الزيتون الطويل و لكبير لي الما د السواقي كيكب عند جدورهم لكبااار .. تا وصلو لحدا لبئر لكبير   لي حداه البيت دلبلاد .. جلسو بجوج على الصنادق لي كانو تماك ..

تنهد بن عيسى مبتاسم براحة و طبطب للعربي على يدو بحنان و نطق : مرتك اولدي سايس معاها تا ترجعها لدارها.. و بقا تحضر عقلك .. لعيالات ماشي دلعصى .. لعيالات غير د لهداوة.. ماشي بحالنا حنى الرجال لعيالات هشاش و وصنا عليهم الحبيب الشفيع ..

العربي حرك راسو بالإجاب : غنرجعها ابا .. يا بالخاطر يا بزز ما تزوجتش بيها باش نطلقها ..

بن عيسى ضحك تا تهزو كثافو مقهقه برجولية و نطق : ياك ديتها ليك بزز ما كنتيش باغيها اش تبدل

ضحك العربي بهداوة و حدر راسو مستحيي من باه و نطق :  تبدلو بزاف دلحوايج..

بن عيسى تبسم برضى كيشوف فولدو و يحقق فيه شوفاتو حنان و دافيين ولكن كانو هاد المرة غير عن كل المرات : اوا سبحان مبدل الأحوال اولدي .. هاديك بنت الناس درويشة و كتبغيك ...

العربي حرك راسو و شاف فباه مطولا لاحض كيفاش كيبان مرتاح .. تنهد حتى هو براحة كيقول مع راسو يكون غير با بيخير و الباقي فيد مولانا ...

عم الصمت فواحد اللحضة تا كسرو بن عيسى فاش نطق : لا تزاد ليك وليد مع ديك بنت الناس .. سميه عبد الله ..

العربي وسع ابتسامتو كثر و حرك راسو بالإجاب .. كانت هادي سميت جدو و رجع بن عيسى نطق : والا كانت بنت سميها على سمية مك .. الكاملة ..

ضحك العربي بالجهد مخلي تا بن عيسى يضحك و نطق : سمية المرحومة قديمة الوليد ..

بن عيسى حرك و نطق : عندك الصح صافي خلي مها تسميها..

ما عرفوش شحال من ساعة بقاو تماك كيدويو من هنا لهنا .. عاد تمو هوادين و غير بالشويا عليهم العربي مراعي لبن عيسى ..

#يتبعععع ... تفاااااعلكم البنات بلبلوووووهاااا