82

1K 72 4

بواسطة Swispicy

بقلم Swispicy

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 82

ما هزات راسها من على السجادة .. حتى خوات قلبها و فشات خاطرها و شكات همها و ضرها ل لي خلقها .. دعات و عاودات ربي يجبر بخاطرها و يبرد نارها و يدير ليها لي فيها الخير .. حيت حرفيا ما بقاش عندها هي الجهد فين تزيد ..

وقفات كطوي فزربيتها حاطتها غير تماك و حطات معاها حتى حوايجها دالصلاة .. وخرجات بنفس جديد و راحة نفسية كانت حاسة بالسكينة كتنزل على قلبها ..

كملات نهارها عادي جدا .. تا تعاشات لعشية و الليل طاح .. حطات لعشا و تعشات معاهم فجو هادء كتحاول ما تبين والو قدام بن عيسى .. سالاو جمعات عليهم و مشات لبيتها .. صلات شي ركعات .. و هي كتبدل عليها دخل لعربي ..متبعها بعينيه بانت لي مكالميا.. ستغرب موالفا كتكوت يا منهارة كتبكي .. يا كتكون موجدا ليه راسها باش هي تراضيه لا وقع بيناتهم شي خصام ..

ولكن هاد المرة كانت غير .. بدلات عليها كيف عادتها نقية فحالتها مخصصة بيجامات لنعاس كتلبسهم ..
كان متكي فوق الناموسية متبعها بعينيه .. تا تكات حداه ردت عليها لغطا .. و دارت عاطياه بالضهر و طفات لأبجورة لي قدامها و تقادات فبلاصتها و غمضات عينيها حيت اصلا كان فيها النعاس بزاف دغيا داتها عينها ..

مخليا العربي وراها كيشوف فيها و عاقد حجبانو و مصدوم عمر دارت ليه بحال هاكدا عمر عطاتو بالضهر ديما هو لي كينعس و يعطيها بالضهر.. عرف هاد المرة تقلقات بزاف من لبلان دبنت الشرادي .. تأفف بجهد ... و تكا حتى هو فبلاصتو مافيه لي يفرع راسو معاها...

و من ورا ديك الليلة .. دازو ايام و ليالي .. و بالضبط جوج سيمانات .. فيهم مغنية رجعات علاقتها بسيدي ربي كيف كانت ما كتفلتش حتى فرصة انها تتقرب منو .. ولات كدير قيام الليل و كبدعي بدعوة وحدة يا ربي دير ليا غير لي فيها الخير ...

طلقات لحبل لي كان مقصحها فيدها بزاااف .. و خلاتها فيد الله.. بعد المرات كيرجع الشيطان بوسوس ليها بنفس الأفكار السوداوية و السلبية ولكن كترجع تستغفر و تقوي ايمانها بالله..
حتى نهار ولدات منانة و مشات تشوفها و شافتها هازا وليدها بين يديها و فرحااانة فعلا حسات بغصة و سولات علاش غير هي لي ما حملاتش ولكن رجعات لله ...

كانت واقفا فالكوزينة كتغسل لماعن حتى دخل عليها العربي .. قرب منها و نطق : سربي و سيري لبسي عليك ..

مغنية شافت بهداوة و نطقات: علاه فين غنمشيو ..

العربي : غنهبطو لمدينة ناخدو لكادو لمنانة ..

مغنية سالات اخر ماعون حطاتو فالشبكة مع خوتو يتسقطر و دارت كتمسح فيديها و نطقات: نيت حطني عندهم نبقا معاها هاد الأيام قبل السبوع..

العربي قرن حجبانو فيها و نطق : غتخوي دارك تاني يومين و نتي تما عاد جيتي ..

مغنية شاف فيه و نطقات: و مالها اش فيها راه لوستي و صاحبتي ولدات نمشي نقابلها ..

العربي : لوستك عندها عكوزتها و الالة حليمة ..

مغنية تبسمات بهداوة: ماشي بحالي انا .. اصلا راه شتي فرقاتني بالدموع ...

العربي زفر بجهد:و سيري لبسي طلقي راسك .. لبسي جلابة مفضفضة حيدي عليا من دوك الإفازي..

مغنية ما علقاتش على كلامو .. حدها خرجات مشات لبيتها تلبس عليها ..

✨

خليو تعليق على كل فقرة عجباتكم .. و خليو نجمة ⭐️ على اي بارت قريتوه