صباح جديد ... فلبلاد عند العربي ... كان صباح بااارد و الجو مغيم و الشتا كتصب .. كان فرحان و كيحمد الله هلا هاد الشتيوة لي جات فقتها تسقي ليه الزرع ..
جلس تحت واحد الشجرة ديال التوت ذكر .. كبييييرة ... و جبد السبسي ديالو و الشقيفات و بدا كيقاد فالمسائل... و شعل ... تا كيبان ليه باه بن عيسى طالع بالعكاز ديالو بالشويا عليه تحت ديك الشتيوة عرفو تا هو فرحااان بيها و طالع كيحمد ربي عليها ... و هادا حال كاااع الفلاحة... كيكون عندهم العيد فاش ربي كيكرمهم بالشتا...
وقف احتراما لباه باس ليه علا راسو و نطق : با علاش عذبتي راسك ..
بن عيسى جلس فوق واحد الصندوق تا هو و نطق: فرحان بالروا اولدي .. مبروك علينا ربي ما خيبش صلاتنا فالجمعة " صلاة الاستسقاء "
العربي تنهد داير يديه ورا ضهرو و نطق بصلابة صوتو الرجولي : اوا الحمد الله ربي كبير ...
وقع الصمت بقاو ساكتين بجوج بيهم غير كيتمنضرو فديك الشتا لي كتنزل .. تا كسر داك الصمت بن عيسى فاش نطق : الدار خوات اولدي ختك كانت معمراها علينا ...
العربي تنهد و حرك راسو بالإيجاب حتى هو حس ببلاصتها: هادي هي سنة الحياة ابا .. عكوبة البنت دار راجلها ...
بن عيسى عويناتو دمعو ما ساخيش بيها كاع : ولدت و ربيت و كبرتها يتيمة و تخليت فيها .. علا الله ما يضلمهاش ولد القايد ...
العربي حرك راسو بلا : لا الوليد ما تخافش ولد القايد الله يعمر ليه الدار .. قاري و واعي و فاهم ما غيضلمهاش ..
بن عيسى كيمسح دموعو : نتمناو .. اوا و نت لوليدي امتى ناوي ...
العربي شاف فيه بعدم فهم و نطق : ننوي اش ابا...
بن عيسى : الزواج اوليدي ما ناريش تعمر الدار .. ما ناويش دير وليداتك .. حنى اوليدي بقينا غير. رجال فالدار .. و انا ما كرهتكش تتزوج اولدي و تجيب لي تعمر لينا الدار ... تا من الطياب اولدي لا انا لا نت كنعرفو ليه ... شكون غيكون بينا اولدي .. الدار لابد تكون فيها مرة ... خاصك تتزوج ...
العربي تنهد بملل .. الزواج اخر همو : و يكون خير ابا ...
بن عيسى : خير البر عاجلون لولدي .. بالي .. ما تقولش ليا يكون خير ... ما حاط العين علا حتى وحدة ما مقيد حتى وحدة ...
العربي ترسمات على شفايفو واحد الإبتسامة صغيرة و حرك راسو بلا مستحي من باه : لا ابا .. ما كاين تا وحدة ... ختار ليا ابا لي شتيها مناسبة و نمشيو نخطبوها ...
بن عيسى تنهد و وقف معكز علا عكازه و قرب منو : يكون خير اولدي .. الحياة ما بغاتش بنادم يعيشها وحداني اولدي .. الراجل من سهم لمرا و لمرا من سهم الراجل .. و انا بغيت نشوف وليداتك اولدي هانا كتشوف لعمر قصاف و الصحيحة قلالت ..
العربي دار عندو باس ايه علا راسو و نطق : الله يطول لعمرك ابا.. ما يكون غي خاطرك شوف ليا شي بنت الناس و من غدا نمشيو نخطبوها ..
بن عيسى تبسم و نطق بهداوة : كاين بنت الناس اولدي و كبرات بين عينينا تا ولات عزبة تبارك الله ..
العربي قوس حواجبو الكثيفين بتسأل: شكون هادي ...
بن عيسى نطق بفخر تقول بنتو من لحمر و دمو : مغنية اولدي بنت دار القايد صاحبت ختك ..
العربي عقد حجبانو و بقا ساكت كيتفكرها و بن عيسى كمل كلامو : بنتنا و منا و فينا اولدي و كبرات مع ختك .. و عينها فيك اولدي الدوار كولو عارفها كتبغيك ...
العربي عض علا باطن حمكو و شاف فباه و نطق : و با شنكول ليك .. ديك السيدة ما كدخلش ليا لراسي اصلا باقي صغيرة..
بن عيسى : و مالها اولدي لي ما دخل ليك لراسك البنت كاملة و مكمولة ما خلاتها من زين ما خلاتها من حداكة ما خلاتها من ضرافة درويشة بنت باب الله ..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
