معذبني غرامك ( قصة جريئة)

61

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 61

صباح جديد ... كان صباح الجمعة ... مع فطر بن عيسى مع مغنية .. و ناض لبيتو .. جبد احسن حلابة عندو ... لبسها و قاد حالتو و تعطر بريحة المسك و خرج كي لعربس غادي يصلي بأحسن حلة... و هادي هي عادتو نهار الجمعة ..

تعرضات ليه مغنية فالباب مادا ليك بلغتو كان عطاها ليها تمسحها : عمي هاهي بليغتك..

بن عيسى تبسم فوجها بحنان و نطق : الله يكون منك ابنتي .. الله يعطيك تا يرضيك...

مغنية تبسمات بخجل و نطقات برقة : امين اعمي .. ما تنساناش من دعيواتك فالجامع ...

بن عيسى طبطب على كثفها و نطق : ضروري ابنتي .. جا العربي ولا باقي ..

مغنية : باقي اعمي ..

بن عيسى جلس فواحد لكليسة بسدادر فلمراح و نطق : اوا نتسناوه تا وكان يجي يدببني لجامع ..

مغنية : واخا اعمي .. نجيب ليك شي كويس د للبن...

بن عيسى شاف فيها و نطق بذهول : علاش ابنتي مخضتي...

مغنية حركات راسها : اه اعمي قبيلا فالصباح فاش فقت مخضت واحد خمسة يطرو لقيتها فالتلاجة ..

بن عيسى تبشر و نطق برضى : الله ابنتي الله يرضي عليك ... جيبي شي كاس

مغنية تبسمات بخجل و نطقات : واخا اعمي ..

و دارت دخلات لاكوزينة .. دارت ليه صينية فيها كاس
ري د اللبن .. و معاها طرف د الخبز و خرجاتهم ليه ...

مع حطاتهم و هو يام العربي داخل مع باب الدار.. من مضهرو كان جاي مدوش و موجد راسو من لبلاد..
قرب عندها باه مبتاسم برجولية و نطق : با .. السلام عليكم ..

بن عيسى ردها عليه ببشاشة : وعليكم السلام المرضي الله يعاون ،.

العربي جلس حداه و باس ليه يدو : عوينا و عينك ابا .. وجدتي راسك ...

بن عيسى : اه اولدي .. تبغي شويا د اللبن راه مغنية مخضات ..

العربي هز فيها راسو لقاها كترمقو بنفس اللمعة و الحب باين من عويناتها و نطق بهداوة : اهاه جيبي ..

مغنية حركات راسها بآه بالزربة : واخا ...

و دخلات جابت ليه حتى هو كاس د اللبن و طرف د الخبر و حطاتهم ليه .. بدا كياكل تا هو مع باه .. و هي جالسا معاهم تا نطق العربي موجع كلامو ليها : وجدي راسك هاد لعشية عارضة علينا مك و براهيم ..

مغنية شافت فيه مخرجة عينيها : بصاح

العربي حرك غير راسو بآه و بن عيسى نطق : اهاه نمشيو اولدي .. منها نيت مغنية تشوف مها وتفوج شويا ..