معذبني غرامك ( قصة جريئة)

08

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 8

غير دارت مع الباب و هوما دموعها ينزلو... حطات يدها هلا فمها كاتما شهقتها و حلات باب الدار و خرجات كتجري من تماك ...

بن عيسى خنزر فالعربي و نطق : ما حشمتي علا عرضك ..نت راجل دابا هاه .. نت راجل ..

العربي زير علا فكو و علا الطيليفون يديه و نطق : اش وصلنا لهاد الهضرة ابا..

بن عيسى بنضرة كلها عتاب : نت راجل دابا لي تقهر ولية يتيمة كتحك علينا النيف و حاطا علينا الراس ... شوف قدامك

اشر ليه اطبلا لي منشورين فوقها الخيرات لي جابت : مصاوبا هادشي بيديها و جايباه فهاد الشتا و السم د البرد كلها ساردة و جايا فرحانة..و نت ختشي فيها هضرة كي السم ..

العربي حدر راسو مخنزر و مكرررره و بن عيسى كمل و هاد المرة نطق بحدة : تكعد تبع لبنت طيب خاطرها و وصلها لدار القايد .. يالله ..

شاف العربي فباه مزييير هلا فكو و ناض لابس عليه دجايط ديالو لبوط و خرج لقاها مخليا لباب محلولة... زدحها سدها وراه ... و تم غادي مع الطريف كيزرب فخطواتو باغي يلحقها كتبان ليه بعيدة كتتمشا و مكمشة على راسها باينا فيها كتتمشا بالشويا ... بقا كيزرب فخطواتو تا لحق عليها ...

هي دورات راسها مفزوعة حيت حسات بشي حد تابعها .. و هي تصدم فاش لقاتو هو .. بلعات ريقها و رجعات تشوف قدامها و المشية تلفات ليها ...كتحس بخطواتو و كتسمعهم كي كتسمع قلبها لي كيخفق بجهد وسط ضلوعها ...

هو ما هضر ما تكلم حدو بقا غادي وراها مخنزر... تا وصلها قدام باب دار القايد و شافها فاش دخلات عاد رجع بحالو ...

دخلات هي و عينيها حمرين و منفوخين بلبكا لي بكات بقات فيها الحال بزاف من هضرتو ...

دخلات لدار فازكة كتقطر .. مع الدخلة مع تعرضات ليها مها كطلع فيها و تنزل بإستهزاء و نطقات : مشيتي المدلولة ديتي ليه ما يحنجر و جلاك هاه ...

مغنية بقات ساكتا و خادرة راسها و حاسا بالريق السم فحلقها بلمرورية ديالو .. نزلو دموعها تاني واخا عيات ما حابساها لي بداه ليها العربي كتزيد تكملو ليها مها بالإهانات ديالها ...

حليمة شداتها من لحوايج لي كانت لابسا من الجهة د لكثف بحركة تحقيرية و تنقيصية و نطقات : شتي الدل ابنت كرشي شتي ... ما كتهاناي تا كيقمعك و يجليك .. و نتي تابعاه كي لكلبة الدوار كولو جايب خبارك و كلشي كيضحك عليك و نتي كي لحمارة ضلي غادا كتزعرطي لدارو كنتي دايرا السبة بختو .. هاه تزوجات سيد الرجال دايها بالعز و نتي بقاي تابعا لعربي .. بقاي تابعاه تا نهار تسيفي خبارو تزوج تسطاي كي البرتقالة المرة ...

طلقات منها و طلعاتها و نزلاتها بإحتقار و لمحات لعكر فشفايفها و نطقات : لعكر فوق لخنونة ... اوا الله يشويني فيه ابنتي ...

لاحت ليها هاد الهضرة زادت سمماتها و لي خلاه ليها كلام العربي كملو كلام مها لي كان كي لخناجر فقلبها
تنهدات بحرقة و حطات بيديها علا صدرها حاسا بلحريق تماك و زادت طلعات لبيتهم هي و مها لفوق. و سدات عليها ... و الدمعة ما بغاتش تحبس فعينيها ...

مقهووووورة بزاااف و احساسها ربي لي عالم بيه ... لبسات لباس الصلاة و فرشات سجادتها و بدات كتصلي .. فينما تتقهر تدور للقبلة تفضفض لسيدي ربي حيت كتحس بتا شي حد ما كيفهمها و عارفها قدو ...

دازت يام الله و بالضبط داز شهر علا زواج منانة و ابراهيم... و سيرة الزواج ما بقاش ذكرها بن عيسى للعربي حيت تلها لعربي مع لبلاد رجع كيجي مهدود بتمارة ...

‎#يتبعععع ...