معذبني غرامك ( قصة جريئة)

28

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 28

سمعات شي حد جاي يحل ليها لباب ... و هي تبدا تقاد فالوقفة و تسبل فعويناتها .. تا سمعات صوتو من ورا الباب... كان بن عيسى ... تلاشات ابتسامتها .. و تنهدات بخيبة امل و نطقات : انا اعمي بن عيسى حسناء بنت الشرادي ...

حل عليها بن عيسى الباب و علا وجهو ديك الإبتسامة الوقرة و نطق : حسناء بنتي مرحبا بيك زيدي دخلي ...

حسناء تبسمات فوجهو و زادت بخطوات محسوبة كتمشا على روس صبعانها : ترحب بيك الجنة اعمي بن عيسى .. عرفت الدار عندكم ما فيها عيالا ..و خويا خدام ليكم قلت نقرا حسنتكم نجيب ليكم غديوة ..

بن عيسى حرك راسو بهداوة كيضحك بصوت رجولي باين فيه التقدم فالسن و نطق : اوا الله يخلف عليك ابنتي .. راه ما بقا قدما فات و تجي لمرا لدارها .. راه العربي تزوج .. بقا غير تروح لدارها ...

حسناء تبسمات ابتسامة صفرة و نطقات : اوا مبروك عليه ..

و بدات كدور فعينيها كتقلب عليه فن هو تا نطق بن عيسى : كتقلبي على خوك ابنتي راهو فالبيت لداخل مع العربي .. راه تغدينا ولكن شوفي دخليه ليهم ..

حسناء حركات راسها بالزربة و نطقات : اه اوا مزيان انا ندخل ليهم لماكلا ..

و مشات في اتجاه البيت لي كان محطوط قدامو دوزان الخدمة .. مخليا بن عيسى متبعها بعينيه كان قااادر يمييز نيتها .. عارفها ما صافياش و عينها فالعربي من زمان .. و عارف تا زبايلها فجنان و ورا نوادر القايد...

حرك راسو بلا حول ولا قوة الا بالله.. و رجع لبيتو هااز التسابيح فيديه ...

فبيت العربي ... كان واقف على ولد الشرادي .. كيتهاود هو وياه و يمد ليه و يعاونو باش يسربيو يساليو البيت فنهارو .. تا دخلات عليهم ببلاطوها فيديها : السلام عليكم .. الله يعاونكم ..

دارو بجوج لمصدر الصوت عاقدين حجبانهم دايرين نفس ردة الفعل .. و خوها فاش شافها زاد خنزر فيها و نطق بهمس: حسناء ..

حسناء تبسمات وًشافت فيه و رجات شافت فالعربي كتسبل فعويناتها ناطقا بطبقة صوت انوثية ناعمة : جبت ليكم لغدا .. عرفت اتكونو باقي ما تغديتو ..

العربي حرك راسو بهداوة و نطق : غي عذبتي راسك تغدينا ..

حسناء ضحكات ضحيكة خفيفة و نطقات : اوا ماعليش هاهو خليوه لعشاكم ..

خوها زير على فكو و نطق بشيء من الحدة : صافي حطيه و تهزي لدار ..

حسناء هزات فيه حاجبها و نطقات متجاهلا كلامو : العربي سمعت بيلا تزوجتي .. مبروك عليك ..

العربي هز براسو و نطق بهداوة حادر عينو : الله يبارك فيك لعقبا لعندك ..

حسناء تنهدات كتمدغ فالهضرة باغا طول لحديث: بحضورك انشاء الله ..

و حطات اخيرا داك لبلاطو بلعاني عطاتهم بالضهر مكوزة قدامهم ما هامهاش خوها ... همها كان هو العربيتعاول تثير انتباهو .. و رجعات وقفات و نطقات : اوا خليت ليكم الراحة.. الله يعاونكم...

لقات اخر نضرة على العربي لي حادر عينو منها و خرجات من تماك كتتمختر و تبسم غايتها من العربي ما كانتش تزوج بيه حيت باها اسيدي ما يرضاش ليها بولد الخماس .. ولكن غايتها منو كانت تطيحو فشباكها و تخليه مسلوب بيها كيف حال كاع ولاد الدوار لي حطاتهم فراسها ..

مكانش عندها المشكل فالراجل يكون مزوج او لا المهم لي حطاتو فراسها تطيحو فيها و ربي كبير .. و العربي كان واحد من لي حطاتهم فراسها غير الهو العربي ما كانش بحالهم .. العربي كان بعيد على كلشي و داخل سوق راسو .. قليل فاش كتلقا شي سبة مين دوز ليه و تشرك معاه لكلام ..

و مع حلات الباب ديال الدار باش تخرج بحالها .. و هي تبان ليها منانة جايا .. طلعاتها و نزلاتها و شافت وراها الطوموبيل لواعرة ابراهيم مين نزلات..

#يتبعععع