معذبني غرامك ( قصة جريئة)

37

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 37

و مع سالاو و تهز لحم حطو تاني الديسير .. و الرجال ما كاينافقوش فالماكلة لي قاد على شي كياكلو و يطيح فيه عمى...

سالاو حتى الديسير اوا هنا تجمعو الطبالي ...  و تمو الدراري تاني مخرجين الصواني د آتاي و التعامر ديالو .. و حطوهم فواحد الجهة برا من لخزانة غير بواحد الشرية .. فين مفشرين حصيرة ...

حطوهم و جا واحد من الرجال د الدوار .. كان خصوصي فتعمار آتاي فلعراسات.. و ما كاينش العرس لي كيدار فالدوار بلا بيه و بلا آتاي ديالو ... اتاي ديا بو سلهام...

بدا كيعمر اتاي .. و هنا بداو لباردية يبانو و لي عندو شي عود زين معلفو غير لنهارات لكبار و لماسم.. سرجو بآجود و احسن ما كاين فالسرج المغربي الأصيل  المطروز ...  و جرو وراه و جابو لساحة... 

جابو البارود و بداو الرجالة يعمرو فلمكاحل.. و العربي ما كانش خارج منهم تا هو بعودو حجر الواد عااالي و عالف مزيان كان عندو لعمر فالعود ديالو لدجة مخليه فالبورنية باني ليه بيت فين يكون و عازلو على لبهايم لوخرين فالزريبة ...

بداو لباردية كيتجمعو على الخنشة د البارود باش يعمرو لمكاحل ديالهم .. تا نطق واحد من الدراري فاش شاف فالعربي تا هو ماد يدو نقية لخنشة د البارود : لا لا اخاي العربي ارا ديك لمكحلة اما نعمرها .. غتكرفص حالتك و نت عريس..

العربي تبسم و مد ليها لمكحلة و نطق : الله يحفضك اودي اصرغيني...

خدا الصرخيني لمكحلة بدا كيعمر فيها كان بقوة ما متمرس.. تا من الكمية ديال لبارود عابرها غا بيدو .. عمر لمكحلة العربي و مدها ليه : هانا لعريس .. طلع تبورد ليا مع راسك ..

العربي ضحك برجولية و شدها من عندو كيتحسسها بيديه و بحال كاع لبارضي التبوريشة طلعات معاه .. قصد عودو هو لول .. و بداو الدراري كيتقادو فالصربة.. و ابراهيم القايد كان هو القايدهم فالصربة..

شدو الصف و نخزو العودان فدقة و بداو بعد اشارة من ابراهيم ...

وبداو غاديين و ابراهيم كيوجهم بكلامو .. و هوما مررركزين خاص يجيبو البارود قد قد ..

ابراهيم : واااا المكاااحل.. وااا الحفيص الله ..

مع نطقها مع تسمع صوت البااارود المدوييي فالسما ... و معاه تهزو الرجال د الدوار كلهم كيسفقو .. كان منهم لي مسكوووون بهاد الفن .. لدرجة توارتو ابا عن جد ..

تسوخرو الرجال .. و خلاو المجال لعريس بوحديه خواو ليه الساحة يدير الباروك ديالو مفرررد ... 

كان مفاهم هو و العود ديالو و شاد ليه لحساب ... مع تطلق هو وياه .. بدا العربي كيلعب بلمكحلة بين يديه بسلاااااسة بحركة استعراضية رجولية .. و قبلما يطرطق الباروووودة فالأرض نطق بصوت رجولي خشن :وااا الحفيض الله ...

و تسمعات وراها مباااشرة ديك الطلقة لي زهزعاااات الأرض حرفيا .. و رجع هو ضااحك و ناشط و عودو بحالو كيتمختر بيه و يركز بحوافرو الأمامية و يتعلا بيهم .. كنوع من الإحتفال ..

احتفالات رجولية 100% فريييدة من نوعها و غتلقاها عند المغاربة فقط... و ماشي كاع لمغاربة غير الرجااال الشلافمية ... مثال العربي و براهيم ..

#يتبعععع 🫶🔥🔥🔥