معذبني غرامك ( قصة جريئة)

15

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 15

و رجع بحالو لدارو هز شي تواشا من تلاجا سخنهم و قادهم فبلاطو ...و تم عند العربي لبلاد كانت الكيالة و النهار د الخدمة سالا عندهم عرفو غيكون فداك البيت ناعس ..

تم غادي العندو و فعلا لقاه ناعس على كرشو باااينا فيه مدكدك بتمارة ... تبسم بحنان و قرب عندو كيتفحصو بعينيه...

بن عيسى كان المعنى الحقيقي د الوفاء ...لأنه من نهار ما.. تت ليه مراتو و هي كتولد منانة ..ما قدرش يرجع يتزوج وراها ..حزن عليها بزاااااف ... و ما طاوعاتوش خاطرو يجيب مرة لي تقلبو على ولادو ولا تضلمهم ليه و هو عندو غير هوما فهاد الدنيا...

كان فارق السن بينو و بين ولاد كبير بزاف .. حيت تزوج تا كبر ... ولكن هادشي ما منعوش يكون هو سندهم و يربيهم بوحدو و يتكلف بيهم ما يخليهم مخصوصين من حتى شي حاجة واخا كان غير خماس عند دار القايد ولكن كان كيجيبها حلالية و قبل ما يمو..ت القايد بات ابراهيم وهب ليه هاد الأرض و رجع تا هو فلاح منو من الفلاحة ولكن لقب الخماس بقا متالبو و عمرو غيحيد ...

حط ليه داك لبلاطو تماك و خرج مخليه يرتاح تا يفيق و ياكل .. كان العاصر فاليد .. خرج هز الما نقية من واحد البوطة .. و توضى و جلس كيسبح تماك و يتمنضر فبلادو كيفاش منورة و تمارة العربي كيفاش باينا عليها تنهد براااحة عرف راسو ربا راااجل ما يتخافش عليه ...ودن العاصر... و صلى بن عيسى صلاتو

و رجع قصد البيت عند ولدو حيت شافو ما فاقش .. عرفو غا من تمارة .. دخل عليه لقا لبلاطو باقي فبلاصتو ... تنهد و وقف عليه كيفيق فيه بصوت رجولي حنين: ولدي العربي فيق .. فيق ... فيق اولدي ..

العربي عز روسو من المخدة لي كان دافنو فيها .. مخررربق ديال بصح نعاسو خسر ليه و اعصابو مشدودا.. شاف فباه حال عين بزز و مخنززززر و نطق ببحصة صوت رجولية قاصحة و غليضة : با !؟

بن عيسى تبسم : نوض اولدي باكا عليك من النعاس .. نوض تاكل شويا باش نخرجو نقضيو واحد الغرض نوض المرضي ..

العربي حرك راسو بلا و نطق قبلما يرجع يغرس راسو فوسادتو : ما فياش ابا..

بن عيسى حقد حواجبو و نطق : هاااء اوا نوض العربي عندنا ما يتقضا تكعد ...

العربي زير على سنانو و على القبطة ديديه مااانع نفسو من التأفف.. كيجي بين عينيه انو باه و خاصو يبر بيه ... تا ديك اوف ما خاصش بسمعها منو ...

ناض على سعدو ودعدو صحتو مدكدكااااا عليه بهاد النعسة لي ماشي فوقتها .. شاف فباه باقي واقف عليه و مبتاسم برضى معكز على عكازو ...

العربي تفوه و طرطق عنقو يمين و شمال و شاف فباه و نطق : خديتي دواك ابا...

بن عيسى حرك راسو الإيجاب : خديتهم كلهم اولدي .. نوض طرف حالتك و جي تغدا ... و نوض تاني وجد راسك غندخلو لمدينة ...

العربي قطب حجبانو تاني مين خرجات هاد الخرجة لمدينة.. و باقي تما لحق يسول كان بن عيسى خرج و خلاها .. تنهد تنهيدة طويييييلة كيدوز يديه على وجهو و نطق : يا ربي عطيني صبر سيدنا أيووب يا رب ...

ناض خرج كيتكسل توضا و صلا وقاتو لي دازوه .. و تغدا .. و هبط لدار هو و بن عيسى لبس عليه و خرجو هو وياه لطوموبيل ديالو بيكوب قديمة ... داك النوع لي كيكون عندو غير بلاصة د الشيفور و جوج ركاب حداه .. و لور دايرا بلحدايد فين كيهزو السلعة ...

ديمارا و شاف فباه و نطق بجدية : ما ناويش ابا تقول ليا فين غاديين ..

بن عيسى نطق و عينو على الطريق كيتلف فالدقة : لدار القايد .. نطركو ختك و مرتك ..