معذبني غرامك ( قصة جريئة)

24

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 24

و دازت ديك الليلة و دازو ليالي وراها ... كانت الناس باقي مكهومة بلحم العيد و العرايض باقي شابكة ..

الا فداك بن عيسى .. كان جالس هو و ولدو فلمرح ديال الدار.. الراس فالراس مجموع هو و وياه على المجمر كيشويو وياكلو و يتهاودو.. مني منك .. مني منك .. تا وصلو تاني لموضوع زواج العربي ومغنية ...

بن عيسى : و ما بقا والو اولدي و طيح العقد .. 3 يام بلحساب.. خاص نديو لبنت صداقها ..

العربي تنهد و حرك راسو بالإجاب و نطق : واخا ابا...

بن عيسى شاف فيه و ضحك و ضرب ليه على كثفو و نطق : و بشحال سخاك الله اسي العربي لصداقها.. راه خلاو لينا كلشي فيدينا ما تشرطوش...

العربي تبسم ابتسامة خفيفة و نطق : و كلشي فيديك ابا نت باش سخيتي..

بن عيسى تبسم بخفة و نطق : اسيدي ميات ألف ريال .. مزيانة ؟

العربي اكتفى بتحريك راسو بالإجاب .. و بن عيسى كمل : بلا الذهب و الدهاز .. هادي "مبلغ الصداق " تبقا ليها هي.. دير بيها لي بغات ...

العربي كب ليه كاس دأتاي يدوز بيه الشوا و نطق : يكون خير ابا .. دوز ليهم الأمانة غدا ..

بن عيسى مد ليه تا هو كاسو يكب ليه مكمل معاه الحديث فالتفاصيل : و عبر اولدي بيتك و شوف شي بيت نعاس مزيان خودو .. راه داك الشي لي عندك فداك البيت ما صالحش .. و شوف مع ولد الشرادي راه صباغ خدمتو مزيانة .. و عاود الصباغة لبيت راه ما بقاش بزاف...

العربي تنهد و حرك غير راسو كيسمع لباه مكمل كلامو : غير طيح العقد نت و البنت تمشي معاكم منانة لمدينة شوفو شي بيت نعاس .. و ديها منها نيت تبدا تاخد دهازها..

العربي زفر و حرك راسو تاني بالإجاب اش غيقول ليه لا زعما .. راه جرب يقولها مرة و جوج و ثلاثة و باه وااقف على هضرتو تا عيا هو و سلم امرو لربي ...

و دازت حتى هاد الليلة باشما جاب الله .. و جا نهار جديد .. و هاد النهار صبحو الناس فخداميهم و لي عندو شي بلاد طلع ليها يحركها ..
و العربي كان حالو من حال الفلاحة كاملين .. فاق قبل لفجر طلع ديمارا الموتور و حل لفانات لكوتاكوت.. و بيلاما ودن لفجر و بدا الصباح يطلع .. عاد دخل لبس عليه حوايج الخدمة .. و دار تارازتو فوق راسو و خرج يبدا ..

و شويا بشويا بداو الخدامة نسا و رجال كيوصلو .. سكدهم فخدمتهم شي يجني الكرعة شي يجني الفلفلة .. حيت السوق غدا غيعمر و خاصو ما يوجد ليه ..

و مشا هو هز لبغل ركب ليه المحراث اليدوي.. و دخل بيه الواحد الطرف من الأرض عندهم محروثة بالتراكتور و الكوفير .. بقا ليه غي يطراسيها هو ...

بدا خدمتو و كان الصهد و الشمس كتخرق.. كانو الخدامات حانيين على خدمتهم و مرة مرة بهزو فيه العين .. تا نطقات وحدة فيهم : شوفي تبارك الله عاد صغير و مسيير الأرض على حقها و طريقها ..

نطقات وحدة أخرى : و يييه و راه عريس يا ختي .. بعد غدا ولا غيعقد..

شافت فيها صاحبتها مصدومة و نطقات : اويلي خلفي بالله .. طاااارو بيه .. !!!

حركات ليها صاحبتها راسها بآه هازا حجبانها و نطقات : و غيخليوه .. راجل كامل مكمول شهوة منو .. الطولة و التجريدة و المعقووول .. عمر كلا شي وحدة فينا فعرقها .. مي حنان مسكينة لي كانت كابرانا و مرضات.. هاد العيد هو لي دخل عليها الضحية .. جاب ليها نعجة صردية غزاالة.. و تقدا ليها التقدية دالعيد ..

نطقات وحدة اخرى مشاركاهم الحديث : باينا فيه راجل ديكوردي و معقول .. سعدات لي داتو ..

بقاو مكملين حديث و مغزل.. و هو خدام على راسو.. ضرب النص فداك الجهة ... تا وصلات ديك العشرة د الصباح .. عاد حط لبغل عطاه يورد و هبط هو لدار يفطر عاد يرجع يكمل خدمتو ...

#يتبعععع ...