معذبني غرامك ( قصة جريئة)

35

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 35

داخلا عاضا على شفايفها و مزنكة كتتفكر تصرفاتو و حركاتو الرجولية و ديك الوسامة الخشنة الرجولية ديالو .. و مخليتها كتتخايل ليها شي افكار كيرفعو حرارتها و تفكيرها غير كيفاش هي غتموووو.. ت منو بالحشمة غير فاش كتوقف معاه .. و غدا دخلتها معاه ..

تنهدااات سااهية تا حسات بتلييعة من دراع خرجاتها من سهوها و رداتها للواقع ... صرخات بألم و صوت مها تغلغل فودنها :فيييين كنتي خارجة عندو يا السايبة هاه ..

مغنية بلعات ريقها كتحك فبلاصت القرصة و نطقات : اااي امي .. وراه راجلي امي مالك ..

حليمة خرجات فيها عينيها : يعطيك الدل .. تعززي لا بغا يشوفك تا الغدا و راه غيجي يروحك.. مالك مزروبة على رزقك ..

مغنية بقات غير حادرة راسها و قابطا فبلاصت الفرصة ما تفاحئتش نهائيا من مها عارفاها هاكدا دايرا .. تخطاتها و رجعات دخلات عند منانة لصالون ..

داز الوقت ..

ما بقا لفجر والو و يودن.. ناض بن عيسى هز عكازو خارج لحمام لي فالبورنية.. و هو يلمح العربي جالس فوق واحد الكرسي بوحديتو و سااارح ... كيبان ساهي جالس و عقلو ما معاهش ..

تنهد و تم غادي لعندو بهداوة كيعكز على حمارو تا وقف عليه مخرجو من سهوتو و كاسر عليه ديك الخلوة ديالو مع افكارو : العربي ..

العربي تنهد و شاف فباه مبتاسم ابتسامة خفيفة و نطق : با .. الفجر باقي ليه ساعة ... كون غي رتاحيتي شويا ..

بن عيسى خدا حتى هو كرسي و جلس حداه : ما عليش اولدي نفيق نسبح و نستغفر شويا و نصلي شي ركعات ..

العربي حرك راسو و نطق : الله يتقبل ..

بن عيسى : امين ...

و سكت شويا مخلي الصمت يسود لثواني و كسرو تاني فاش نطق : انا راضي عليك اولدي .. مفرشك و معطيك بالرضى ..

العربي تبسم و شد يدو باسها و نطق : هاديك هي الدنيا و ما فيها ...

بن عيسى بقا شد ليه فيدو و نطق : غتعيش مرتاح مع هاد بنت الناس .. و مع الوقت غتولف بيها و غتلقا فيها شي حوايج زوينين .. الحب كيجي مع العشرة اولدي ..

خدا واحد تنهيدة من اعماقو و كمل : انا كان فيا و ما يزوجك لوحدة من الطرف فهاد الدوار .. ولكن ختاريت ليك هاد بنت الناس .. حيت تربات قدامنا .. عارفينها اش كتسوا.. انا متأكد غيجي واحد الوقت غتقول الحمد الله لي با بزز عليها الزواج .. فاش غتشوف وليداتك و مرتك واقفا معاك فالكبيرة و الصغيرة .. يقدر انا نكون مشيت عند ربي داك الساع ولكن طال الزمان ولا قصار اتعرف ربي شحال كيبغيك لي جمعك مع هاد لبنية ..

العربي بقا ساااكت ما نطق بحتى حرف .. كلام باه ما ستوعبوش.. و ما دخلوش لراسو ..
بن عيسى تنهد و وقف معكز على العكاز ديالو و نطق : خليت ليك الراحة اوليدي .. دخل رتاح ليك راك عييتي و باقي تابعك عرسك نوض ..

العربي حرك راسو و وقف :واخا ابا .. نتسنى الفجر نصليه و نحط راسي نرتاح ..

و داك الشي لي كان .. تسنا تا ودن لفجر.. صلاه ..و عاد دخل غا لبيت الكلاس نعس فيه .. حيت بيتو مجموع و مستف تا تجي ليه مغنية عروسة ..

صباح جديد .. و نهار العرس ...

#يتبعععع