معذبني غرامك ( قصة جريئة)

40

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 40

قربات مغنية لعندهم سلمات على بن عيسى هو لول كتشوف فرحتو بيها فعينيه .. جبد من جيبو ربعالاف ريال و حطها ليها فيدها لحلاوة د لعروسة ... و باس ليها راسها ..

و هنا دارت عند العربي هزات فيه عويناتها كترمش فيه .. قابلها هو بنضرات هاادية ... و هبط بهداوة طبع قبلة على جبينها و بعد ... و دوز ليها ديك السبنية ورا ضهرها بقا محاصرها بيها .. و هي غير كتشوف فيه بعويناتها .. كتتأمل وسامتو و الحد الآن كتسول راسها واش صافي دابا ولا راجلها ...؟

و هو حط ديك السبنية فوق من راسها ساترها كلها باش تا حد ما يشوفها .. و شدها من .. و شاف فباه و نطق : نمشيو ...

بن عيسى حرك راسو مبتاسم و نطق : نمشيو اولدي ...

و ديك الشي لي كان تعالا صوت التعشاق و الزغاريت.. و مع الخرجة بداو ولاد الدوار يطرطقو فالبارود فالسما .. سعة د البارودات بالحساب و لعيالات كيزغترتو.. و الرجال كيصليو على النبي : العاشق فالنبي صليو عليه .. اللهم صلي عليك ارسول الله ...

كيكملوها و لعيالات كيردو عليهم بالتعشاق و الزغاريت.. تا ركب العربي و منانة العرسان فالطموبيل ديال ابراهيم لي كانو مزينينها ..

و ركب ابراهيم و منانة لقدام غيمشيو معاهم ... ديمارا الطوميل ديالهم .. و زادت مروحين مغنية و حيت الدار قريبة الناس تبعوهم غير على رجليهم لعيالات بلبنادر كيطبلو و يشطحو... تا روحو مغنية لدارها ..

مع نزلات مغنية من الطوموبيل وقفات كتشوف فالدار ديالها الجديدة من تحت ديك السبنية لي كانت شفافة الى حد ما.. الدار لي شحال حلمات تكون هي السيدة ديالها .. تبسمات.. و حدرات عينيها كيبانو ليها شي ولاد من الدوار متكيين صردي قدو قداش و مقبلينو لد.. بيحة .. حسات بالعربي وقف حداها و شد ليها فيدها و هي تهز فيه راسها و رجعات بالزربة حدراتو فرحتها ربي لي عالم بيها ...

دوزو على داك الحولي و خلاوة كيفركل تا خرجات منو الروح.. و زادت مغنية هازا جلايلها خلفات عليه .. و دخلات برجلها ليمن قلبها حرفيا كيدردك بين ضلوعها ...

زادت دخلات لداخل هي و العربي .. وقفو شويا وسط لمراح ديال الدار مخليين لعيالات يديرو الباروك ديالهم بلبنادر..

العربي حيد ليها ديك السبنية من على وجها و مدها لمنانة ... و خرح خلاها منها لعيالات تا تخوا ليه الدنيا باش يدخل ..

و ديك الشي لي كان دخلاتها منانة و الحاجة و حليمة لبيتها .. لقاو ليفاليز ديالها تماك محطوطين وصلهم ابراهيم قبيلا ...

جلسات فوق الناموسية كدور عينيها على البيت و الأثاث ديالو .. كان بيت واااسع كولو مصلوح .. باين اصلاح جديد و الأثاث ديالو حتى هو باين جديد.. عجبها بزااف ..

تنهدات و شافت فالحاجة لي كانت هازا فيديها واحد الخرقة مطروزة مداتها ليها و نطقات : هاهو ابنتي هادا .. فرشيه تحتك فاش يبغي يدخل بيك راجلك ... صافي ..

مغنية حنيكاتها توووردو بالحشمة و شداتو من عندها يديداتها كيرجفووو و الحاجة نطقات : و هانتي ابنيتي غي يسيل الد.. م قولو يحبس ما يجيبش ماه فيك .. باش ما تمرجيش ابنتي ..

نغنية حركات راسها بالإجاب حادراه و علين تمووو.. ت بالحشمة ...

و الحاجة نطقات تاني : يالله احليمة زيدي حنى نخرجو.. خلي معاها منانة تعاونها ..

حليمة تنهدات مقندشا خاااايفة لا بنتها توطي راسها فالغيس: واخا الحاجة ...

و زادت معاها خلاو منانة و مغنية الراس فالراس ..

منانة غير خرجو و هي تسد لباب وراها و رجعات عند مغنية : نوضي بدلي عليك حيدي هاد القفطان و لبسي ديك لاشوميز يالله ..

مغنية شافيت فيها و حركات راسها بلا : ويلي لا اش كتقولي .. خليني غير هاكدا .. غنمووو.. ت بالحشمة و الخوف اصاحبتي صافي رجليا تحشو ليا ..

منانة جلسات حداها حيدات ليها ديك الخرقة لي كانت على شكل سروال بيض مطروز بالطرز الفاسي باللون الأخضر و بدات كتقرشو: مالك اصاحبتي ما عندك مناش تخافي راه والله تا القضية ساااهلة نتي غير رخي راسك خليه هو يدير كلشي .. راه فاهم و قاري تا هو ما يتخافش عليه ..

مغنية حركات راسها بالإجاب و هوما يسمعو الدقان ورا الباب .. و صوت حليمة كتعيط على منانة :منانة .. سربي خلاص العريس داخل ..

مغنية خرجات فيها عنيها و شدات فيها مزيرة عليها و نطقات : لا خليك عافاك ..

منانة كتجر يدها : اويلي على لا خليك .. تسطيييتي..طلقي السيد داخل ..

و جرات يدها منها .. و خرجات خلاتها كترعد صافي الرجلين ديالها ما بقاوش هازينها .. سمعات الباب فاش حلاتو و سداتو منانة باش خرجات..شويا دام واحد الصمت مرررررعب .. تا كتسمع خطاويه بالبلغة كتحك مع الأرض .. و الباب تحلات .. و دخل و رجع سد و هاد المرة دوز الساروت ...

#يتبعععع بعد شي تفاعل زوين 🫶