معذبني غرامك ( قصة جريئة)

147

..
                         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏                                  Part : 147

مغنية غير سمعات اش قال  بلعات ريقها و القلب ديالها دق بالجهد بين ضلوعها .. و شافت فيه كتتسناه يكمل و يقول ليهم شكون سبابهم حتى عاشو هادشي كامل ..

شاف فيها العربي كيفاش شافت فيه و تنهد و نطق مكمل كلامو : بنت الشرادي و خطيبها ..

شهقات بالجهد حاطا يديها على فمها و سرعنما الدموع بداو كينزلو من عينيها دون سابق انذار ..
اما منانة زيرات على فكها و نطقات بحقد : كنت عارفاها هي .. هي الله ياخد فيها الحق .. الله يعطيها شي تشتيتة.. يا ربي سمع مني ...

تنهد العربي تنهيدة اخرى و عينو غير على مغنية لي ما نطقات بحتى حرف بقاو غير دموعها كينزلو .. معبرين على داك الألم لي حسات بيه فديك اللحضة .. كان مزيج بين الغضب و الحزن و الإستياء.. و احاسيس اخرى ما لقات ليهم تفسير .. بلعات ريقها بمرارة .. كتسمع لمنانة لي كيف العادة و على عكسها هي .. كانت  اندفاعية و قوية و كتقدر تواجه كلشي بحدة على عكسها هي لي كانت كتردها غير على لبكا ..

نطقات منانة بتسأل : و شدرتو معاهم دابا ..

العربي جلس حتى هو : جاو الجادارميا داوها هي .. اما تا خطيبها هرب ما بانش راه روشيرشي..

منانة : اوا الله ياخد فيها الحق هي وياه .. حسبنا الله و نعم الوكيل .. خرجو علا شحال من بنت مسكينة .. بنت بوشتا طلقوها من راجلها .. لاحها فدار باها تا ولادها بعدها عليهم داهم معاه اسبانيا ..

العربي حرك راسو كيسمع ليها و عينو على مغنية .. لي باقي دموعها ما حبسو ..

و رجعات منانة نطقات بتسأل باغا تعرف كثر : و شكون لي قال ليكم بعدا راه هوما ..

العربي شاف فيها و نطق : واحد صاحبتها سميتها خولة ..

منانة وسعات فيه عينيها : ويلي ما تقولهاش.. هاديك هي وياها كانو صحابات من الروح لروح .. و هي لي كان خاطبها ولد عيادة .. ويلي دات ليها الراجل داك الشي لاش بيعات بيها الكل.. بة .. الله ياخد فيها الحق .. تا هي خاصها الحبس معاهم هي لي صورات ..

العربي : قالك هي صورات بحسن نية لوخرا لي خدات من عندها لفيديو ..

منانة حركات راسها بالنفي  : يكدب عليك لكااادب اخويا العربي .. والله تا كانت عااارفاها غتنشرو.. راهم كانو صحابات..