إشترينا البيت ده أنا و مراتي من حوالي 5 سنين ، بيت كبير ، دورين علي مساحة واسعة ، جنينة أمامية و جنينة خلفية ، و قبو واسع فيه مساحة كبيرة لتخزين النبيذ ، وجهة نظري كانت إن إحنا فردين بس فمش محتاجين مخزن نبيذ و لا محتاجين القبو الكبير ده في حاجة
.
من حوالي شهر إقترحت علي مراتي إننا ننضف القبو و نفضيه و نستغل المساحة الكبيرة دي في حاجة لها لازمة بدل ما هو مقفول ، نعمله جيم صغير أو صالة ألعاب أو حتي سينما صغيرة نقضي فيها وقتنا سوا ، نزلنا أنا و هي و بدأنا فعلًا ننضفه
نضفنا الأرضية لكن حيطان القبو كانت متغطية كلها بورق حائط لونه أصفر و قديم و شكله بشع جدًا ، بصينا لبعض و بعدين بدأنا نشيل الورق من علي الحيطان ، و ... و لقينا باب !!
.
باب خشب داخل لجوا زي ما يكون محفور في الحيطة ، متغطي تمامًا بورق الحائط بطريقة مخلياه مش باين ، حتي أكرة الباب متشالة عشان متبانش ، حسيت بحماس مش طبيعي خصوصًا إن أنا اللي إكتشفته ، بصيت لمراتي و علي وشي إبتسامة كبيرة من شدة الحماس
في البداية فكرت إن الباب ده باب ممر سري بيوصل بين بيتي و البيت اللي جنبي ، كنت عاوز أكلم جاري في الموضوع ده و لو فعلا ده ممر بين البيتين كنت هقفله لأني مش برتاح لفكرة إن حد يقدر يدخل بيتي و أنا مش عارف و أعتقد إنه مكانش هيمانع حاجة زي كده !
.
مكان أكرة الباب اللي إتشالت فيه فتحة ، مراتي حاولت تبص منها عشان تشوف إيه اللي ورا الباب ، الدنيا ضلمة جدًا و الضلمة مسيطرة علي الموضوع
فتحت كشاف الموبايل بتاعها و نورت بيه و بصت تاني ، رجعت لورا و هي بتقولي بقلق إن ده مش ممر سري بين البيتين ، صممت إني لازم أبص بنفسي ، اللي شفته كان سلم حجري منحوت نازل لتحت ، دا مش ممكن يكون ممر خالص ، الباب ده وراه سر
جبت كشاف كبير و فتحت الباب ، بمعني أصح كسرته و نزلت أشوف السر اللي ورا الباب ده
و يا ريتني ما نزلت !
.
نزلت السلم ببطء ، الهوا كان مكتوم و السلم مش مظبوط ، الكشاف بيترعش في إيدي و أنا بنزل ببطء
السلم مكانش طويل و في آخره و قدام نور الكشاف كان فيه باب تاني خشب قديم مقفول بسلسلة !
.
مراتي قالتلي إنها هتروح لجارنا تشوف الموضوع ده إيه و لو هو كمان عنده باب سري في القبو بتاعه ، مسكت القفل بايدي و حاولت أشده ، القفل كان قديم لدرجة إنه إتفتح في إيدي علي طول !
فكيت السلسة و فتحت الباب ببطء و دخلت الأوضة الصغيرة اللي ورا الباب ، الباب ده كان المدخل أو المخرج الوحيد للأوضة ، مشيت بالكشاف جوا الأوضة و فجأة وقفت !
جسمي إترعش ، جسمي كان بيتنفض ، إيي إترعشت لدرجة إني مقدرتش أسيطر علي الكشاف !
قدام عيني و في ركن من أركان الأوضة كان واقف راجل قصير لابس أود ، باصص في الأرض و مش بيتحرك ، باصص لركن الأوضة كأنه متعاقب ... شكله كان مرعب أوي
كنت مفكره تمثال أو مانيكان ... لحد ما إتحرك !
.
ببطء شديد رفع رجل من رجليه و بدأ يرجع بيها لورا ، ببطء كأن جسمه متصلب من قلة الحركة ، بطء مخيف ... مرعب
جسمي كله إتشل من الخوف ، مكنتش قادر أتحرك ، كنت براقبه و هو بيحرك رجله لورا في الهوا ببطء لحد ما حطها علي الأرض ، جسمه كان متشنج و هو بيتحرك بطريقة غريبة أوي
حط رجله علي الأرض و ثبت لدقيقة تقريبًا ، جسمه بيترعش و جسمي مشلول من الخوف ، بعد شوية رفع رجله التانية ، بنفس الطريقة و بنفس البطء
كنت حاسس إن الدنيا بتلف بيا ، جسمه متشنج و بتحرك بطريقة غريبة زي ما يكون ناسي الحركة !
حط رجله التانية علي الأرض
كده كان رجع خطوة لورا
صوت ضحكة شريرة خرج منه لثانية و هنا فقت من الصدمة ، حسيت بالخوف بيجتاح جسمي كله ، بدأ فجأة يتحرك بسرعة ، كان بيجري لورا و ضهره ليا بسرعة مخيفة ، مفيش حد قدر يجري بالتشنج ده و السرعة دي ، ضحكته كان بتخلي قلبي يترعش من الخوف ، جريت !
.
قفلت الباب ورايا بسرعة بس من غير السلسة و جريت علي السلم ، قفلت الباب التاني ( اللي قفله مكسور ) و طلعت برا القبو خالص و قفلت بابه هو كمان ورايا
سمعت صوت الخطوات التقيلة طالعة السلم و صوت الباب السري بيتفتح ، قفلت باب القبو كويس و أنا سامع الضحك المجنون المخيف بتاعه بيقرب ، خرجت من البت و لقيت مراتي بتكلم جاري ، جريت عليهم ، طلعت تليفوني من جيبي و كلمت 911 و حكيتلهم علي كل حاجة !
.
ملقوش أي حد في البيت ، باب القبو كان مكسور و باب البيت الخلفي كان مفتوح ، خطوات مقلوبة ماشية لحد نص الحديقة الخلفية قبل ما تتقطع تمامًا و كأن صاحب الخطوات إختفي !
نزلوا للأوضة اللي تحت لقوا علي الباب مكتوب حاجة زي تعاويذ أنا مكنتش شايفها ، جوا الأوضة الحيطان كانت مليانة رموز محفورة عليها بلغة لحد دلوقت محناش عارفينها خالص !
.
الشيء اللي جوا ده كان محبوس لسبب و أنا حررته !
أنا خايف جدًا ... أنا حاسس إنه هيرجع عشاني !
.
.
.
شرح القصة
بصراحة وصفه للشيء اللي لقاه و كونه محبوس من فترة كبيرة ... علي الأقل هو شاري البيت من 5 سنين ... كون الشيء ده محبوس لمدة 5 سنين بدون أكل و لا شرب ... وصفه لطريقة حركته و ضحكه ، التعاويذ اللي علي الباب و الكتابة اللي علي الحيطان
أنا مش عارف ده ايه بس و الله فعلا من الحاجات اللي قلقتني ... انا مقتنع المرة دي ان ده كيان شرير و بطريقة ما حد حبسه هنا و لما الراجل ده فتح الباب قدر يخرج ... الله أعلم إيه ده بس هو فعلًا مخيف
#حدث_بالفعل
#قصص_حقيقية_حول_العالم
.
