إيه اللي بيحصَل؟
قعدت ورا مكتب الأمن بتاعي في مكتبة الجامعة، كُنت ماسِك ظرف افترضت إنه مبعوت ليَّا، مكتوب عليه (تعليمات للموظف الجديد) بخط يدوي غريب على مُقدمة الظرف، مش مكتوب اسم الشخص الموجَّه ليه، بس غالبًا دا أنا لأني استلمت شُغلي إمبارح بس، ودا يخليني الموظّف الجديد، المفروض أكون مسؤول عن وردية الليل، من الساعة 12 مساءً لحَد الساعة 5 صباحًا، كحارس أمن هنا في مكتبة الجامعة، ساعات العمل المُتأخرة مكانتش مُشكلة بالنسبة لي، بما إني لسَّه بدرس في نفس الجامعة، ظبطت مواعيد محاضراتي بحيث تكون بعد الشُغل على طول، اضطريت أقبل الشُغل دا غصب عني لأني محتاج أي فلوس عشان الديون اللي عليّا بسبب مصروفات الدراسة
صديقتي فاليري جاتلي في يوم وقالتلي على موضوع وظيفة حارس الأمن الليلية دي، كانت مُناسبة ليَّا جدًا، كدا هقدر أنظَّم وقتي بين الشُغل والدراسة، مش هقدر أقول اسم الجامعة لكن أقدر أقولكم إنها واحدة من أكبر وأعرق جامعات الولايات المُتحدة الأمريكية، المُهم.. فاليري بتشتغل في وردية النهار، من الساعة 5 صباحًا لحَد الساعة 10 صباحًا، قالتلي إن مسؤول الحراسة الليلية اللي كان اسمه فلاندرز، ساب الشُغل واختفى من كام يوم، قالتلي على ساعات الشُغل وعلى المُرتَّب.. فوافقت فورًا، مُستحيل أضيَّع الفرصة دي من إيديا، قالتلي كمان إني لازم أشتغل أسبوع كامل قبل ما أبعت الورق بتاعي عشان يتم إعتمادي رسميًا كموظَّف أمن وأقدر أقبض
على أي حال.. إمبارح كان أول يوم ليَّا في الشُغل، النهاردة ليلة يوم الجُمعة، وطبيعي جدًا إن المكتبة تكون فاضية وهادية في اليوم دا وفي الساعة المُتأخرة دي من الليل، استلمت الشُغل من زميلتي توري، كُتيبات العمل قالتلي كُل حاجة هعملها خلال الخمس ساعات اللي هشتغلهم كُل يوم، هبدأ من مكتب الأمن، مكتب ضخم من الخشب محطوط أدام شباك زجاج كبير جدًا عليه اللوجو بتاع الجامعة، هقضي هنا أول نُص ساعة من ورديتي، وهعمل فيها الأعمال الإدارية المطلوبة مني زي إني أتأ:ِّد إن جهاز تسجيل وفحص الكُتب شغَّال، وإن الدفاتر بتاعة الإستعارة متسجِّل فيها كُل حاجة بشكل مظبوط، بعد النُص ساعة دي المفروض أقوم بجولة في المكتبة عشان أتطمِّن إن كُل حاجة تمام، وصدقوني.. المكتبة ضخمة ومكوَّنة من أربع أدوار، فالموضوع دا مش سهل أبدًا، لمَّا رجعت لقيت الظرف على مكتبي، عظيم.. تعليمات مُملة تانية هقراها عشان أنفذها، فتحت الظرف ولقيت جواه ورقة لونها أصفر وشكلها غريب، مكتوبة بنفس الخط الغريب اللي على الظرف من برا
.
عزيزي الموظَّف الجديد..
مترميش الرسالة دي تحت أي ظرف من الظروف، اعتبرها الرسالة اللي هتنجيك، الخريطة اللي هتقودك وسط كُل القرف اللي هيحصَل، الدليل اللي بسببه هتفضل على قيد الحياة، وخليك عارف.. أنا مش مُضطر أكتبلك الرسالة دي، مُمكِن أسيبك وأريَّح دماغي، بس إنت شكلك جديد ومليان أمل، وكان لازم أحذرك، أو بمعنى أصح.. لازم أعلمك، ربنا وحده اللي عالم إنك من غير الرسالة دي مش هتكمِّل يومين، لكن على أي حال.. القواعد اللي مذكورة هنا مش إختيارية، بص اعتبرها نصائح أو اقتراحات أو أي حاجة، المُهم تحفظهم كويس، حاجات لازم تلتزم بيها عشان تنجو من القرف اللي بيحصل عندك، مش هتفهم كلامي إلا ما تتعرَّض لواحدة من التجارب دي، ولو تعرضت لموقف منهم مش هتعيش عشان تفهم، عشان كدا.. اسمعني كويس، القواعد دي مُهمة أوي
القاعدة الأولى: ممنوع تبُص في اي مراية من المرايات الموجودة في الممر بتاع قبو المكتبة مهما حَصَل، كُل ما تعدي من جنبهم بص في الأرض وامشي ببطء وبدون صوت
القاعدة التانية: ساعات كتير هتقابل راجل طويل وغامض لابس بدلة رمادي، متبصُش في وشه مهما حَصَل، أي سؤال يسألهولك تجاوب عليه بإجابة واحدة مهما كان السؤال: " لا يا فندم "
بعد شوية هيزهق ويمشي ويسيبك
القاعدة التالتة: إبعد عن قاعدة المحاضرات الرئيسية كُل يوم من الساعة 2:15 للساعة 2:16، هي صحيح دقيقة واحدة، بس صدقني إنت مش هتحِب تشوف اللي بيظهر جواها في الدقيقة دي
القاعدة الرابعة: هتسمع صوت ضوضاء مُخيفة من القاعة رقم (219-ج)، إوعى تفتح الباب أو تبُص جوا القاعة.. أبدًا
القاعدة الخامسة : تمشي جنب صفوف الكتب من برا، إوعى تمشي بينهم، فاهم؟
القاعدة السادسة: لو سمعت صوت حد بيخبَّط على الإزاز اللي ورا المكتب بتاعك، أرجوك بلاش تبُص، وإفتكر دايمًا إنك في الدور الرابع
القاعدة السابعة: الساعة 12:15 هتشوف راجل لابس بدلة توكسيدو وشايل شنطة سودا، هيمشي من جنبك كأنه مش شايفك، أول ما تشوفه قوله: " يومك مش النهاردة يا صديقي "
هيرتاح ويمشي، لو طلع على السلم يبقي الأوان فات، اهرب.. ومتجيش هنا تاني
.
كُنت مشغول بقراية الرسالة لدرجة إني مشوفتش الراجل اللي لابس التوكسيدو اللي عدى من جنبي، على ما رفعت عيني من على الرسالة وبصيت عليه كان طلع على السلم، بصلي وابتسم وهو بيغمز
أنا لازم أهرب من هنا..
.النهاردة مش عايز أشرح القصة، عشان هي مش محتاجة شرح أوي، مكتبة مسكونة، موظف اختفى في ظروف غامضة، وحد بيحذّر الموظف الجديد وبيديله الروشتة اللي هيمشي بيها عشان ينجو ويطلع سليم
النهاردة عايز أسألكم.. لو إنتم مكانه.. تعملوا إيه؟
تهربوا وتنفدوا بجلدكم؟
ولا تكملوا شُغل ويا روح ما بعدك روح؟
قولولي في الكومنتات
.
.
.
