النهاردة هنتكلم عن تشارلز إدموند كولين القاتل المُتسلسل اللي إتولد في 22 فبراير 1960 ، تشارلز كان مُمرض سابق في واحدة من مُستشفيات نيو جيرسي ، معروف إن تشارلز هو القتلا المُتسلسل الأكثر غزارة في تاريخ الولايات المُتحدة الأمريكية ، لمّا تم القبض عليه إعترف بقتل 40 ضحية من ضحاياه أثناء مُمارسة مهنة التمريض لمدة 16 سنة ، لكن أثناء التحقيقات و المُقابلات التليفزيونية إعترف إنه قتل أكتر من 400 ضحية و إنه إعترف بس بالـ 40 اللي فاكر أسمائهم
بأكتر من 400 جريمة قتل تم تصنيف تشارلز إنه القاتل المُتسلسل الأكثر غزارة في تاريخ أمريكا !
.
تشارلز وُلد في ويست أورانج بولاية نيو جيرسي ، كان الطفل الأصغر بين 8 أشقاء ، والده اللي كان بيشتغل سائق شاحنة مات لمّا كان عنده 58 سنة و وقتها تشارلز كان عنده بس 7 شهور !
تشارز دايمًا بيوصف طفولته إنها كانت بائسة و مُثيرة للشفقة ، حاول ينتحر لأول مرة لمّا كان عنده بس 9 سنين عن طريق سرقة تركيبة كيميائية من معمل المدرسة و دي بس كانت أول مرة في سجله المليان بمحاولات الإنتحار الفاشلة ، لأن أثناء عمله كممرض كان بيسرق المخدرات و بيتناول جرعات زايدة عشان ينتحر
سنة 1977 والدة تشارلز ماتت في حادثة عربية هيّ و أختها ( خالته ) ، وفاة والدته كانت الدافع الأكبر في تدمير حياته ، ساب المدرسة لمُدة سنة تقريبًا وسنة 1978 تطوّع في البحرية الأمريكية كمحاولة لإنقاذ ما يُمكن إنقاذه ، كان شاطر في شغله لدرجة إنه إترقي بسُرعة مذهلة لكن فجأة و بدون أي أسباب بدأت تظهر عليه علامات عدم الإستقرار النفسي و العقلي و من سنة 1980 لحَد سنة 1984 حاول ينتحر أكتر من 7 مرات ، إلي أن تم تسريحه في مارس 1984
ميأسش و تطوّع لدراسة التمريض في مستشفي منتينزايد للتمريض في مونتكلير في ولاية نيو جيرسي ، كان الذكر الوحيد اللي بيتدرب عشان يبقي مُمرض ، تشارلز كان الأول علي دفعته دايمًا و إتخرج بنجاح ساحق سنة 1987 و إستلم وظيفته كمُمرض في قسم الحروق بمركز سانت برنابا الطبي في ليفينجستون بولاية نيو جيرسي و هنا بدأت كُل حاجة تتغيّر ...
للأسوأ .....
.
شهر يونيو سنة 1988 كانت أول جريمة قتل لتشارلز لمّا زوّد جرعة المخدر زيدة عن اللزوم للقاضي جون وينجو اللي كان داخل المُستشفي في صدمة بسيطة نتيجة تناول دوا غلط ، تشارلز بعد كده إعترف إنه إستلذ الموضوع و مارسه كتير و طوال الوقت و قتل العديد من ضحاياه في المركز الطبي ده بدايةً من القاضي إنتهاءًا بمريض الإيدز اللي أعطاله جرعة أنسولين زايدة و تسبب في موته و بعدها سحي عينة من دمه الحامل لفيروس الإيدز و حقن بيها كُل أكياس الدم الموجودة في المُستشفي و ده أدي لحالات وفيات بالعشرات !
ساب بعدها المركز الطبي و راح يشتغل في مستشفي وارن في فيليبسبورج بنيو جيرسي ، أول أسبوع ليه قتل 3 نساء مُسنات عن طريق إعطائهم جرعة زايدة من دوا القلب بتاعهم ، و قتل مُمرضة زميلته أثناء نومها بحجة إنها مسترجلة ، في الفترة دي مراته مقدرتش تتحمّل تقلباته و توتره و طلبت الطلاق بشكل رسمي ، و الموضوع أخد وقت في المحاكم
سنة 1993 تشارلز إقتحم بيت مُمرضة زميلته في وقت مُتأخر من الليل أثناء نومها هي و إبنها و سرق حاجات شخصية تخصها و خرج من غير ما تصحي ، لكن يبدو إنه كان مهووس بالست دي فبدأ يطاردها لحَد ما بلغت الشُرطة اللي إعتقلوه ، تاني يوم مُباشرةً حاول الإنتحار جوا زنزانته و تم نقله لمُستشفي عشان يٌعالج لكن حتي في المصحة النفسية اللي إتنقل ليها حاول ينتحر مرتين في شهرين !
خرج من المصحة و إستقال من شُغله ....
إشتغل في مستشفي هنتيردون في فليمنجتون و تحديدًا في العناية المُركزة ، لو وثقنا في كلامه فهو بيقول إن أول سنتين في شُغله هناك ما أذاش حد لكن إعترف برضه إنه في الفترة من يناير لـ سبتمبر 1996 قتل 5 أشخاص عن طريق جرعات زايدة من الديجوكسين و سُرعان مل مل من المُستشفي دي فقرر ينتقل لمُستشفي موريستاون بنيو جيرسي و اللي رفدوه بسُرعة لسوء أدائه
فضل سنة تقريبًا بدون شُغل و تردد فيها علي مصحة نفسية لكن في بداية سنة 1998 إستغل في مُستشفي بألينتاون ببنسلفانيا و سُرعان ما تم إتهامه بالتلاعب في جرعات الدوا بعد ما شافوه داخل غرفة مريض و في إيده حقنة مجهولة المصدر ، و مات المريض و قدر يهرب منها و تحملت ممرضة مسكنة اللوم علي الموضوع
في آواخر سنة 1998 تم إتهامه رسميًا بقتل مريض بعد ما لقي الطب الشرعي كمية عالية من الديجوكسين في دم المريض و أجروا تحقيق رسمي ضعيف جوا المُستشفي و قدر ينجو من الموضوع برضه !
و برغم تاريخه في المصحات النفسية و أعداد المرضي اللي بيموتوا في المُستشفيات اللي بيشتغل فيها إلا إنه كان بيقدر يلاقي شُغل بسبب نقص أعداد المُمرضين الذكور ، و إشتغل في مُستشفي تانية بنفس الولاية و خلال شهر واحد كان قتل مريض و حاول يقتل آخر
و في أبريل 1999 إشتغل في مُستشفي جديدة و خلال 3 سنوات من العمل فيها كان قتل 5 مرضي و حاول يقتل 2 آخرين ، و تم رفده
سنة 2000 حاول ينتحر مرة كمان لكن تم إنقاذه ، بعدها إشتغل في مُستشفي سانت لوك و اللي واحد من زمايله لقي زجاجات مُخدر مُستعملة في دولابه و بلّغ عنه ، إتهموه بسرقتها و إتحول للتحقيق و سابوه بعدها ، إستقال من شُغله في 2002
سبتمبر 2002 إشتغل في مركز سومسرت الطبي و قتل 8 مرضي ، و حاول يقتل واحد و كالعادة كانت بيستخدم عقار الديجوكسين ، المريض اللي نجا كان إسمه فيليب جريجور و بدأ يلفت النظر لشارلز لكنه مات بعد 6 شهور !
سنة 2003 و بعد مُراقبة مُكثفة إتهموه بقتل 4 مرضي لكنه كان قتل 5 فعلًا و في أكتوبر 2003 إتحط تحت المُراقبة بدون ما يعرف
.
تم القبض عليه في سبتمبر 2003 بتهمة قتل شخص و محاولة قتل آخر و إعترف تحت الضغط بقتل 40 مريض خلال 16 سنة و مع مرور الوقت أقنعوه بإنه لو إعترف فمش هياخد حُكم الإعدام فإعترف خلال 3 سنوات من التحقيقات بـ 62 جريمة قتل
في 2006 أثناء مُحاكمته كان باين عليه الإستياء من القاضي و فضل يكرر جُملة : " إنت لازم تتنحي " لمُدة 30 دقيقة لدرجة إنهم إضطروا يقفلوا فمه بشريط لاصق و تم الحكم عليه بـ أكتر من 100 سنة سجن
الحاجة الغريبة إنه قبل ما يتسجن طلب يتبرع بكليته لأخت صديقه المريضة عشان ينقذ حياتها !!
في إعترافاته قال إنه مش بينحمل عذاب و آلام المرضي و بيصعبوا عليه فبيقرر يريحهم و يقتلهم قتل رحيم ، لكن الحقيقة إن أغلب ضحاياه كانوا بيعانوا من حاجات بسيطة جدًا !
بعد موضوع تشارلز ده إتحط 35 قانون جُداد بينظموا عملية تعيين و تنقل الممرضين بين المُستشفيات و ضرورة الكشف العقلي علي المُمرضين قبل تعيينهم
.
.
#بتاع_الرعب
#حدث_بالفعل
#القتلة_المتسلسلين
