في التوقيت اللي هتقروا فيه البوست دا هكون ميت ، و للأسف مفيش أي حاجة هتقدروا تساعدوني بيها
أنا ضحية لعبة ، لعبة خطيرة جدًا و كان الثمن هو حياتي
للأسف اللي مكُنتش أعرفه إنك بمُجرّد ما تبدأ اللعبة وقتك هيبدأ هوّ كمان ، مدة اللعبة كاملة حوالي ٣ أسابيع ، و مهما عملت مش هتقدر تنهي اللعبة قبل ٣ أسابيع من بدايتها و
بالتحديد هتنتهي الساعة ٣:٣٣ صباحًا
خلوني أحكي لكُم قصتي
أنا بالصدفة بالبحتة لقيت لينك لبوست علي موقع قديم مهجور ، الموقع مهجور و معليهوش أي نشاطات ، البوست بتاع اللعبة نفسه مكانش عليه أي تعليقات ، علي ما أعتقد إن أنا أول واحد يفتح البوست علي الإطلاق ، البوست كان عنوانه " الباب المُغلق " ، زيي زي أي حد في الدُنيا فضولي كان أقوي مني و فتحت البوست .....
.
البوست كان زي ما يكون متفصّل علي مقاسي ، بيتكلِّم عني ، بيوصف البيت اللي المفروض تحصل فيه أحداث اللعبة شبه بيتي بالظبط ، مشيت علي التعليمات بالظبط ، أول حاجة رُحت للباب الخلفي اللي في المطبخ ، قلبي كان بيدُق بقوة ، يمكن حماس .. يمكن خوف ، بس في الأول و في الآخر هوّ مجرد بوست عن لعبة علي الإنترنت ، الشبه بين بيتي و بين البيت اللي بيوصفوه ؟
أعتقد إنها صُدفة مش أكتر ، هجرب .. هخسر إيه يعني ؟
في البداية فضيت ذهني من أي أفكار سلبية ، طردت أي تشكيكات من خيالي ، وقفت عند الباب الخلفي بتاع البيت في المطبخ ، كان فيه قائمة بشوية شروط لازم أتبعها ، لحَد اللحظة دي أنا مش عارف إيه الهدف من اللعبة أو هستفاد منها إيه بالظبط ! ، بس زي ما قُلتلكم قبل كده فضولي كان أقوي مني ، بدأت أتّبع الشروط بالترتيب
أولًا : حطيت إيدي الشمال علي الباب الخلفي للبيت و بصوت عالي قول " أ بورتا ديابولي
أ بورتا ديابولي
سنتيو إيجو إيكي إيجو نوفي
إت ريدي بورتا إنيم ديابولي "
ثانيًا : شيلت إيدي الشمال من علي الباب و ببطء خبطت علي الباب ٣ خطوات بإيدي اليمين
ثالثًا : لفيت وشي و أعطيت ضهري للباب لمُدة دقيقة كاملة
رابعًا : طلبت الإذن إني أبُص من فتحة الباب
خامسًا : لو أخدت الإذن و بقي مسموح ليّا لازم أبُص من فتحة الباب بعيني اليمين
.
بس في الحقيقة أنا لمّا بصيت مشُفتش أي حاجة عكس ما كُنت متوقع ، بس مؤخرًا أنا فهمت أنا ليه لمّا بصيت مشُفتش حاجة ، قالولي إنهم ما أعطوليش الإذن عشان أبُص ، بمُجرد ما خلصت أول ٣ خطوات نسيت أطلب الإذن عشان أبُص ، الحماس سرقني !
قالولي إنهم غضبانين عشان مطلبتش الإذن برغم إني فعلًا مشُفتش أي حاجة ، قالولي إني هتعاقب بسبب فضولي
أول ٣ أيام بعد اللعبة محصلش حاجة خالص ، الرعب كُله بدأ بعد اليوم التالت ، بعد كده بدأت أحس إني مش لوحدي في الأوض الفاضية ، مستويات القلق و الحوف بدأت تزيد جوايا و تسيطر عليّا ، بقيت أحس إني متراقب و إن فيه حد ماشي ورايا ، الموضوع إستمر معايا ٣ أيام مُتتالية
الـ ٣ أيام اللي بعد كده بدأت أسمع أصوات ، أصوات غضبانة ، أصوات مليانة شر و حقد ، بدأت أشوف خيالات غريبة ، زي الراجل اللي شكله غريب و مُخيف اللي بيقف في الركن المُظلم من أوضتي يراقبني أثناء نومي ، نظرة عينيه مُخيفة و مليانة غضب
بعد كده مبقيتش أقدر أنام ، بكلمكم دلوقت و أنا بقالي ٣ أيام منمتش خالص ، الأمور بتبقي أسوأ و مُخيفة أكتر ، و مع مرور الايام كان الموضوع بيزيد و بيبقي مُخيف و مُرعب ، بقيت بخاف أتحرك ، حركاتي بتستفزهم ، عينيّا بقت حمرا من العياط و السهر و الخوف ، الدُنيا بتلف بيّا و نفسي بيتقطع كأني بغرق ، أنا عارف إن خلاص ...
كُل شيء بينتهي !!
.
حياتي بتنتهي و عمري بيخلص ، حاسس إن نهايتي بتقرب مع مرور عقارب الساعة ، أنا عارف إني هموت ، خلاص الـ ٣ أسابيع بيخلصوا ، قررت أحط أنا نهاية تناسبني
فدي الطريقة اللي أنا شايف انها تصلُح للنهاية :
بعد بحث طويل و شاق لقيت طريقة تقدروا تنقذوني بيها ، أنا إضطريت أقولكم إني هموت و مفيش طريقة لإنقاذي عشان فضولكم يجبركُم تكملوا قراءة ، إسمعوني كويس عشان تقدروا تنقذوني
لازم تلعبوا اللعبة
لازم تنفذوا الخطوات
لازم تاخدوا الإذن
لو وصلتوا عند الخطوة الرابعة و حسيتوا إنكم ما أخدتوش الإذن ، لازم تمشوا بعيد عن الباب بدون ولا كلمة ، متبصوش من أي ثقب باب خالص طول الليلة دي
ساعتها هياخدوك مكاني و يسيبوني أعيش
لازم حد يضحي بنفسه عشان ينقذني
أرجوكم
.
.شرح القصة
حبيت أترجملكم القصة دي لسبب مهم
دايمًا الفضول بيغلبنا و بنحب نجرب الالعاب دي و بنضحك و نقول مبيحصلش حاجة بس الراجل دا كان ضحية للعبة من الالعاب المخيفة دي
ارجوكم يا جماعة بلاش تهاون في الالعاب دي و التعاويذ و كتب السحر و الحاجات دي
كمان عاوز اقولكم ملحوظة مهمة انهم في الغرب بيقولوا علي
الساعة ٣:٣٣ صباحًا انها ساعة الشيطان
في اعتقادي الشخصي ان اللي قالوله انهم غضبانين دول ممكن يكونوا شياطين
.
#بتاع_الرعب
#حدث_بالفعل
#قصص_حقيقية_حول_العالم
