جوزي بيخونني
اكتشفت دا لمّا رجعت البيت فجأة في ميعاد غير ميعادي عشان اتفاجئ إنه هو كمان رجع البيت بدري، كُنت سامعه صوتهم، دخلت بهدوء واتحركت في البيت بحرص وبطء، فتحت باب الأوضة وشُفتهم، كانوا مشغولين لدرجة إنهم ما أخدوش بالهم مني غير بعد دقايق، لحظات مرّت وهو بيبصلي بخوف، بعد عنها بسُرعة وهو بيحاول يتكلّم
كانت واحدة من أقرب وأقدم أصدقائه، وأنا كان سَبَق وقابلتها أكتر من مرة قبل كدا، أنا فاكرة كمان في مرة كُنا معزومين عندها هي وزوجها على العشا في بيتهم، يعني ببساطة مكانتش شخص برئ جوزي ضحك عليها وقالها إنه أعزب، دي عارفاه وعارفة كويس إنه متجوّز
حاول يشرح أو يبرّر لكني شاورتلي بصابعي علي فمي عشان يسكُت تمامًا
لمّا سكت قُلتله بهدوء: " الأكل جاهز، تعالوا كلوا "
وقفوا جنب السرير مكانهم، مش عارفين المفروض يعملوا إيه
قُلتلهم بهدوء: " تعالوا أقعدوا هنا، في أكل لينا كُلنا، الأكل هيكفي "
قعدوا بهدوء
جوزي بدأ يتكلّم: " حبيبتي، أنا ... أنا مش عارف أقول إيه، إحنا ... الموضوع ... الموضوع حصل غصب عننا فجأة "
هزيت راسي، إديت لكل واحد فيهم طبقه وقعدت أدامهم أتفرّج عليهم وهُمّا بياكلوا، كانوا بياكلوا كأنهم مشافوش أكل قبل كدا، كُل واحد فيهم باصِص في طبقه وبياكل في صمت، أنا عاملة مكرونة سباجيتي بالصلصة، وجبته المُفضلة، وعلى ما يبدو هي وجبتها المُفضلة هي كمان
كان باصصلي، بيدوّر على الكلام المُناسِب اللي المفروض يقوله، وهي كانت قاعدة ساكتة، باصّة في طبقها ومش قادرة ترفع وشها
سألتهم: " بقالكم أد إيه سوا؟ "
رد بسُرعة: " حبيبتي، أنا عايزك تعرفـ ... "
صرخت فيه: " أنا بسأل ... بقالكم أد إيه سوا؟ "
خلاني صرخت بغضب، وأنا مكُنتش عايزة أصرخ، هي شهقت بخوف وكأني هضربها
قال: " تلت شهور ... إحنا بس كُنا بنتكلّم ... والأمور تطوّرت بسُرعة "
فجأة بدأت تعيّط وهي بتقول: " أرجوكي ... أرجوكي بلاش تقولي لزوجي "
بدأت أضحك، دمها خفيف أوي، بس بصراحة عرفت تكون عشيقة لعوب باقتدار، ورغم كدا مازالت خايفة على جوازها، جوزي حاول يستعيد سيطرته على الأمور، لكن أنا كُنت في حالة هيستيرية، بدأت أعيّط من غير ما أحِس، مكُنتش قادرة أتنفس بشكل كويس
جوزي حس إني بفقد سيطرتي على الأمور، فقرر إن دا الوقت اللي هو يسيطر فيه، وقف وهو بيمسك إيدها وبيقول: " أنا مش هعمل دا، يلا بينا "
سألته وأنا بضحك بسُخرية: " إنت بتعمل إيه؟ "
رد ببساطة: " همشي، هوصلها بيتها وأرجعلك نتكلّم سوا "
