" عشان خاطري نام بقي "
كُنت بترجاه .. بتذلل له .. عملت معاه كُل حاجة مُمكن تتعمَل و مُمكن تتخيلوها ..
أنا بربيه لوحدي ، جوزي مات و سابني مع طفل رضيع ، بشتغَل وظيفتين عشان أقدر أوفر ليّا و له مستوي معيشة لائق ، ولادة إبني إتأخرت شوية ، بيني نوّر الدُنيا لمّا كان عندي 27 سنة ، بعد سنة تقريبًا من الزواج عرفت إني حامل ، أنا و سكوت زوجي كُنا مُتحمسين جدًا للبيبي اللي جاي
بعد سنة بحالها حاولنا فيها مرات كتير ، ربنا رزقنا أخيرًا بالحمل ، الحمل بالنسبة لي كان تجربة سهلة ، زي أمي برضه هيّ قالتلي إن حملها بيبقي سهل و مش مُتعب ، خلال شهور الحمل بدأت أنا و سكوت نقرا كُل الكُتب اللي إتكلمت عن إزاي نربي الطفل و نهتم بيه من أول يوم للدُنيا ، حضرنا ندوات و مُحاضرات و كورسات عن تربية الطفل من أول يوم ليه في الدُنيا
كُنا عايزين نبقي مُتأكدين تمامًا إننا قادرين نجيب طفل للدُنيا دي و نهتم بيه و نرعاه علي أكمَل وجه
و كان اليوم اللي بيني نوّر فيه دُنيتنا هوّ أسعد يوم في حياتنا ...
.
بيني كان طفل شاطر و نشيط من أول يوم ليه ، بيحب يتحرك كتير و يتعلم كُل حاجة ، بدأ محاولات الكلام بدري شوية ، كان بيلقُط الكلمات السهلة و يحاول يكررها تلقائيًا بدون ما نُطلب منه ده ، مشي يوم عيد ميلاده الأول لوحده ، و فجأة تحوّل بيني لإعصار حركة محدش قادر يوقفه
كان نشيط و حركته كتير جدًا ، بيني كان شقي بس أنا كُنت بحبه و بحب شقاوته
إكتشفت لمّا بيني كان عنده 10 شهور إن سكوت جوزي بيخونني ، كُل حاجة في حياتي إتدمرت ، مقدرش أثق في راجل خاين لأن اللي بيخون مرة بيخون ألف مرة ، و قبل ما أفوق من صدمة خيانته ليّا بلغوني بخبر موته
كان راجلع من الشُغل سايق عربيته و دخل في شجرة و للأسف مقدروش ينقذوه
سكوت دمر حياتي كُلها و مات قبل ما يساعدني في أي حاجة ...
لمّا فقت من الصدمة إضطريت أشتغل في وظيفة تانية جنب وظيفتي عشان أقدر أعوض رحيل سكوت و أعيش و أعيّش بيني في مستوي لائق ، قررت إني قوية و لازم أفضل واقفة علي رجليّا و مستسلمش للحُزن أبدًا
.
لمّا تكون بتشتغل في وظيفتين و بتربي إبنك في نفس الوقت بيبقي لازم تدفع تمن ، في حالتي التمن ه كان في حرماني من النوم ، مباخدش كفايتي من النوم و علي طول حاسّة إني تعبانة بس واجبي كأم إني أتأكد إن إبني نايم مرتاح و حاسس بالأمن
بحُكم وقتي الضيق معنديش أصدقاء و وقتي الفاضي بقضيه في التحوّل علي الفيس بوك و تويتر ، لكن أكتر حاجة بتاخد من وقت فراغي هيّ محاولات إني أنيّم بيني
هوّ ليه إنك تقنع طفلك بالنوم بقت حاجة صعبة .. طالما عاوز ينام يدخُل ينام .. إيه الصعب في ده ؟
نيمته في سريره و حطيت الدبدوب بتاعه في حضنهو بهدوء خرجت من الأوضة ، و بعد مرور دقايق فوجئت بيه قاعد في سريره من غير نوم ، قاعد في سريره باصصلي و علي وشه تعبير غريب جدًا ، نيمته تاني و حاولت أقفِل عينيه عشان يعرف ينام لكن زي ما إنتم عارفين محدش بيقدر يجبر حد إنه يقفِل عينيه !
بيني طفل غريب ، خلال السنة اللي فاتت تقريبًا نموّه توقف تقريبًا ، دي حاجة مضايقتنيش كتير ، أنا مش هجبره يكبر أو ينمو يعني ، هوّ هياخد وقته و هينمو أكيد زي بقية الأطفال
نرجع لموضوع النوم ، أنا عارفة إنتم بتفكروا في إيه ، طفل رافض ينام يبقي لازم أحكيله حدوتة ، بس أنا مبحبش أدخُل أوضته كتير ، الأوضة ريحتها غريبة شوية ، بس بصراحة و بيني و بينكم ..
أنا السبب ، أنا مش بسمح لبيني ياخد شاور من كذا شهر ، هو دلوقت في مرحلة مُعينة مقدرش أحميه فيها و إلا هسببله أذي و أنا مبحبش أؤذي إبني الوحيد
من كذا أسبوع و إحنا قاعدين سوا خياطة رقبته إتفكت و راسه وقعت ، معنديش وقت أخيطها تاني ، بيني لازم يتعود علي الوضع
مؤخرًا جيمي بقي طفل كويس و بيسمع الكلام ، مش بيتحرك كتير و لا بيسبب مشاكل و قلق كتير زي الأول ، كمان بقي هادي و مش بيتكلم ، و أنا فرحانة إنه بقي ولد مثالي كده و فرحانة عشان سكوت مات ، كويس إنه مات قبل ما ربنا يكافئه بولد صغيّر بيسمع الكلام زي بيني كده
إنتم فاكريني مجنونة عشان بقول كده .. صح ؟
مش هرد عليكم و بعد إذنكم بقي أنا لازم أمشي دلوقت
بيني هيجنني ، حد يعرف منكم طريقة كويسة لتخييط الرقبة و إخفاء الريحة السيئة دي ؟
و الأهم ... حد يعرف طريقة كويسة أنيمه بيها ؟؟
.
.شرح القصة
.
كان فيه قصة نشرتها زمان شبه دي شوية ، ساعات من كتر ما بنحب الناس و بنتعلق بيهم بنرفض نصدق انهم هيمشوا و يسيبونا حتي لو عن طريق الموت
الست دي ابنها مات بعد جوزها بشوية و هي رافضة تعترف بموته و داخلة تسأل الناس علي موقع من المواقع ازاي تخيّط رقبته عشان متتفكش و تعرف تنيمه .. طبعًا قابلت سيل من السخرية و التهكم و الضحك لكن الناس بعد شوية بدأوا ينتبهوا إنها ممكن تكون بتتكلم جد و بالفعل بلغوا النجدة اللي تتبعوها لحد ما وصلوا ليها
هي حاليًا في مصحة نفسية و رافضة تصدق ان ابنها مات
و معرفش ابنها مات ازاي و الله
.
#بتاع_الرعب
#حدث_بالفعل
#قصص_حقيقية_حول_العالم
