من خلال تجاربي العديدة، هقدَر اقولكم إن على مدار السنين سمعت حاجات غريبة ومجنونة الناس بيقولوها، وأغلب الوقت الناس بيعتقدوا إن ورا الحاجات دي أمور خارقة وما ورائية، كُل الناس بيعملوا كدا، الكُبار والصُغيّرين، كُلهم لمّا بيسمعوا الأصوات دي بيختبؤوا في سرايرهم وبيترعشوا من الخوف، مع إنها أصوات عادية وطبيعية جدًا، وهقولكُم دلوقتي إيه الأصوات دي وإيه السبب الحقيقي والطبيعي ليها، عشان لو إتحطيت في المواقف دي أو سمعت صوت من الأصوات دي تبقي فاهم وعارف إيه اللي بيحصل
.
التأوهات الأثيرية:
ساعات بتكون نايم في سريرك وبتسمع صوت تأوه خافت أو زئير هامس جاي من مكانٍ ما في البيت، ساعتها بتخاف، إيه دا؟، أنا عندي شبح في البيت
لا، تسع مرات من أصل كُل عشرة بتسمَع فيهم الصوت دا، بيكون جاي من تلاجتك، لسّه إمبارح مثلًا سمعت تلاجتي بتعمل صوت زي الأصوات اللي مالية أفلام الرُعب
هفهمك، تلاجتك فيها مُبرِّد بيحرَّك الهواء البارد في كُل مكان جواها، نظام التبريد بيضغط الهوا دا من خلال ثقب صُغيَّر جدًا، لمّا بتكون على وشك تنام وكُل حاجة بتبقي مقفولة والدنيا هادية، الصوت دا بيكون صوت غريب ومُخيف
.
أصوات الصرير والخبطات:
ساعات بتسمع صوت حاجة بتعمل صوت صرير، أو صوت خبطة بسيطة وسريعة، وساعتها برضه بتخاف، إيه دا؟، فيه حد بيتحرَّك في البيت
لا، دا بيتك بيريَّح، البيوت هنا أغلبها مصنوع من الخشب، الخشب ساعات بيتمدَّد وبيتقلص مع درجة الحرارة، يعني أثناء النهار درجة الحرارة بتكون عالية شوية، دا بيخلي الخشب يتمدَّد بنسبة بسيطة جدًا، وبالليل الجو بيكون بارد، فبالتالي بيرجع يتقلَّص مرة تانية، دا بيخلي الخشب ساعات يلمس بعضه ويُصدِر صوت الصرير أو الخبطات الصُغيَّرة اللي إنت بتسمعها دي، وساعات الصوت بيكون أعلى من اللازم، لكن دا شيء طبيعي، متقلقش خالص
.
الهسيس والأصوات الخافتة:
كُلنا شُفنا فيلم مملكة الخواتم، وطبعًا كُلنا قلقانين من فكرة وجودهم حوالينا في كُل مكان، وبتخاف لمّا بتسمع الأصوات دي
لا متقلقش ...
على الغالب صوت الهسيس دا جاي من التكييف المركزي، لمّا التكييف بيشتغل بينزل منه مية، في حالة التكييفات المركزية المياه دي بتتجمَّع طول اليوم في حاوية ضخمة، لمّا بتتملى بيبقي لازم تفضي، الحاوية دي بيكون فيها مضخَّة صُغيَّرة بتضُخ كميات بسيطة من المياه باستمرار في المواسير الخاصة بتصريف المية دي لخارج البيت، والمضخة دي هي سبب الأصوات الخافتة والهسيس دا، مفيش داعي للخوف أو للقلق
.
أصوات خدش وخبط عالي جدًا من تحت الأرض:
حاجة بتزحف تحت البيت، لا!، الموتى هيخرجوا من قبورهم وهيمدوا إيديهم من تحت الأرض عشان يقبضوا عليك ويقتلوك في أي لحظة
لا ...
على الغالب دا صوت السخَّان بتاعك أو صوت الفرن بتاعك، ساعات قبل ما يقرَّب يبوظ بيطلَّع أصوات عالية ومُزعجة بالشكل دا، ساعات بتكون الأصوات خطيرة لدرجة إنك بتحس إن فيه حاجة على وسط تنفجِر
لكن الموضوع مش خطير، أي عامل تصليح هيخلص لك الموضوع دا كُله وبالكامل
متخافش!
.
أصوات خبط معدنية:
أوه!، لا!، دا شبح عيد الميلاد، صوت السلاسل بتاعته بتخبَّط في بعض وهو جايلك!
أقولك حاجة؟
دا صوت المواسير، لمّا المية بتمشي جوا المواسير بالليل بتعمِل الصوت دا، لمّا درجة الحرارة بتتغيَّر أو لمّا الضغط بيتغيّر سُرعة مشي المية بتتغيَّر بشكل غريب، لمّا بتمشي بسُرعة بتعمِل صوت خبط جامد قوي، دا صوت طبيعي ومنطقي، وحاجة مش بتخوِّف خصوصًا لو إنت عارف سببها
.
الهمس:
إيه الصوت دا؟، مفيش حد جنبي!، بس أنا سمعت حد بيهمس، أنا سمعت الصوت بوضوح، أنا مفهمتش هو قال إيه؟، أكيد دا شبح وبيتكلِّم بلُغة غريبة، هو أنا هتلبس؟
لا ...
هفهمك حاجة مُهمة، في 99% من المرات اللي بتسمع فيها أصوات همس وإنت لوحدك، دا بيكون عقلك بيخدعك، لو إنت قاعد في غُرفة ومشغَّل مروحة أو تكييف، فانت كدا بتملى الغُرفة بحاجة اسمها الضوضاء البيضاء، عقلك بيكون متضايق من الصمت والصوت اللي بيقطعه دا، فيعمل جاهدًا إنه يحوِّل الصوت دا لحاجة مفهومة أو واضحة، أغلب الوقت بيكون صوت همس مش مفهوم، أو أي صوت تاني غريب
عقلك بس بيكون بيحاوِل يتغلب على الضوضاء البيضاء دي
.
صوت خطوات أقدام بتقرَّب من غُرفتك:
ناس كتير منكُم بتسمع الصوت دا، دا شيء مفهوم جدًا، بس اللي لازم تعرفه إن دا مش صوت شبح أو عفريت، مش صوت مذؤوب أو مصَّاص دماء، عقلك بس بيحاوِل يوهمك بالأفكار المجنونة دي
بس استني ...
دا مش معناه إنك متخافش لمّا تسمَع الصوت دا
غالبًا دا بيكون صوتي أو صوت حد زيي
أنا متعوِّد أقتحِم بيوت كتير مؤخرًا، مش بعمِل حاجة غير إني براقبك وإنت نايم، بتمشى في بيتك
بس حاول متصحاش واعمل نايم
عشان لو شُفتني ...
دي هتكون آخر حاجة تشوفها
.
.
.
#بتاع_الرعب
#حدث_بالفعل
#قصص_حقيقية_حول_العالم
