شغاله ممرضة في احد المستشفيات الاستثمارية، شغلي ملوش مواعيد ثابته او شفت ثابت ساعات كتير بطبق باليومين.
اليوم ده كنت مطبقه فيه، رجعت البيت مجهده جدا، دخلت الحمام غسلت وشي وبعدها دخلت المطبخ، شوية و لقيت ماما صحيت، ندهت عليا وقالت لي:
- استني انا صحيه هاجي احضر لك حاجه تكليها اكيد انتي مكلتيش حاجه من الصبح ف المستشفى
رديت عليها وقلت:
- لا يا ماما خليكي نايمه مش عاوزه اتعبك انا هاكل اي حاجه خفيفة وهنام على طول
اصرت اكيد انها تحضر لي الاكل، حضرت لي الاكل واكلنا انا وهي، بعدها ماما راحت على اوضتها تكمل نوم ودخلت انا كمان انام.
مش عارفه نمت أد ايه، صحيت على صوت غريب، صوت كأن حد بيكتب بقلم فلومستر على ازاز وعامل صوت مزعج جدا.
قومت من على السرير، دعكت عيني، عيني جت على المرايا، شوفت كلمه مكتوبة بلون احمر زي الدم على ازاز المرايا!
" انا جاسر صدقيني يا رباب اللي معاكم ده مش جاسر ده شيطان "
دي الكلمة اللي كانت مكتوبة على الازاز
حطيت ايدي على عيني ودعكتها كذا مره وبصيت تاني على المرايا، لقيت جمله بتتكت على المرايا، حروف بتتشكل، لحد ما كونت الجملة دي؛
" لازم تصدقيني لانكم في خطر الشيء اللي معاكم ده شيطان "
اكيد ده مش حقيقي انتي بتحلمي يا رباب ده كابوس
الامر بدأ يتطور اكتر من كدا، الجملة بقت تتكتب على الحيطان بسرعة اوي، كل حاجه في الاوضة بدأت تتحرك من تلقاء نفسها! المرايا اتشالت من مكانها وبقت ثبته على الهوا كأن في شيء خفي مسكها!! نزلت على الارض بكل عنف واتكسرت!..
كنت مشلولة مش عارفه اعمل ايه خايفه اوي بحاول افتكر اي اية من القران مش عرفه..
لحد ما قدرت اصرخ بعلو صوتي عشان الاقي الباب اتفتح وبابا وماما وجاسر اخويا قدامي.
ماما جريت عليا وحاولت تهديني، مسحت باديها على شعري وهي بتردد ايات من القران، كانت بتبص برعب على الاوضة اللي مقلوبة، المرايا متكسره، الهدوم بره الدولاب ومرميا على الارض.
هديت وحكيتلهم على اللي حصل
على وش ماما وبابا قلق وخوف معادة جاسر اخويا. بيبص لي بلامبالا ولا هو مرعوب من اللي شايفه قدامه من قلبة الاوضة، ولا هو خايف من الكلام اللي قلته، رد فعله برود تام ومش بينطق بحرف واحد.
ماما قررت انها هتنام معايا لان كنت متدمرة وخايفه جدا.
****
مر يومين على اللي حصل معايا، جاسر اخويا مش طبيعي ابدا، مش بيروح شغله، حتى خطبته بتشتكي لي منه انه مش بيكلمها ويوم ما تكلمه يشخط فيها.
قلتلها سيبي الموضوع ده متكلموش الفترة دي خالص لانه مضغوط.
في اخر مكالمه بينا قالت لي انها حصل معاها حاجه غريبة، قلت لها ايه هي، ردت عليا وقالت لي:
- كنت براجع شوية محاضرات الكلية كنت قاعده على المكتب، فجأة لقيت هوا جامد دخل الاوضة، لدرجة ان الهوا طاير كل الورق من ع المكتب، ورقه كانت فاضية، لقيت جُمل بتتكتب من تلقاء نفسها على الورقه! صدقيني يا رباب، الجملة المكتوبة كانت بتقول " انا جاسر صدقوني، اللي معاكم ده مش جاسر ده شيطان"..
هو ده اللي حصل يا رباب ومش فهماه!!
