اللي جاي دا لقوه مكتوب في دفتر مُذكرات بتاع بنت صُغيرة عُمرها 8 سنين، البنت دي اختفت بدون ما تسيب أي أثر، لكن لمَّا قروا المكتوب في الدفتر بتاعها لمِّا لقوه، عرَّفهم هي راحت فين!
.
إسمي جيسيكا بريدج، عندي 8 سنين!
أختي بتقول إني لسَّه صُغيَّرة أوي على اللي أنا فيه دا، بس أنا بتجاهل كلامها كأنها مش بتقول حاجة
الدكتورة النفسية بتاعتي قالتلي أخلي الدفتر دا معايا طول الوقت، وأكتب فيه كُل اللي بيحصل، دا هيخليني أحس بشعور أفضل، وهيساعدني على التحسُّن
بس أنا بحب أقضي الوقت مع أهلي ومع أختي أكتر من الكتابة في الدفتر دا
أقولك سر؟
أهلي بيقولوا إن فيه شيطان عايش جوايا، ساعات بيحبسوني في الأوضة وبيقولولي إن دا عشان سلامة الجميع، بيخافوا أؤذي حد، بس أنا مش ببقي عايزة أو بيبقي قصدي أؤذي حد منهم
مبيحبوش أختي لمَّا بتيجي، بيقولوا إن وجودها بيساعد الشيطان اللي جوايا إنه يكون أقوى وأشرس
بس هي بتقول إنهم مجانين، وإنهم فاكريني أنا اللي مجنونة، عشان كدا ودوني للدكتورة النفسية
دكتورتي النفسية ست لطيفة جدًا، كُل مرة بروحلها بتديني حاجة حلوة وبتخليني ألوِّن
لمَّا بكون مش عايزة أتكلِّم مش بتجبرني على الكلام، على عكس أهلي اللي دايمًا بيجبروني أتكلِّم
الدكتورة النفسية بتاعتي بتقول إن عندي مرض تعدُّد الشخصيات، مش فاهمة هي تقصد إيه بالكلمة دي، بس أنا لمَّا سألتها قالتلي إن فيه حد تاني عايش جوايا وبيتشارك معايا في جسمي
أنا بس مش عارفة مين الشخص دا؟ ... وليه عايش جوا جسمي؟؟
بس هي بتقولي إن دا السبب في اللحظات اللي مش بفتكرها من حياتي، لأن ساعتها بيكون هو اللي بيتحكِّم فيَّا وفي كُل حاجة، ساعات لمَّا برجع بلاقي لعبي مرمية في كُل مكان في الأوضة
لكن ساعات تانية لمَّا برجع بلاقي نفسي وسط الغابة المُظلمة بالليل وجسمي كُله غرقان دم
أنا بخاف أوي في الليالي دي
طبعًا مش بحكي لحَد على الليالي دي، أنا لو حكيت ليهم هيحبسوني في مكان بعيد ... صح؟
الدكتورة النفسية اللي قالتلي كدا
لو عملت حاجة وحشة هياخدوني بعيد ويحبسوني ... حتى لو ماليش ذنب أو تحكُّم في نفسي
الشخص اللي بيشاركني جسمي بيجبرني أعمل حاجات مش عايزاها
أنا فاكرة مثلًا في ليلة من الليالي صحيت في أوضة نوم بابا وماما، ماما كانت بتصرخ بوحشية، مكُنتش عارفة إيه اللي حصل، بس على ما يبدو إني أذيتها
بقي عندها ندبة كبير في وشها من ناحية الشمال، باينة وواضحة ومخلية وشها مُنتفخ، بتحاول دايمًا تداريها بالمكياج لكن مهما عملت بتفضل باينة
أنا حاسَّة بشعور سيء
ساعات لمَّا بكون برسم، فجأة ببدأ أرسم رموز شيطانية وطلاسم مُخيفة، بحس ساعات إني مش قادرة أتحكِّم في إيدي، ساعات بحس إن فيه حد تاني هو اللي بيتحكِّم فيها!
ساعات برضه لمَّا بصحى بلاقي الرموز دي في كُل مكان في الأوضة بتاعتي، على الحيطان والأرضية، وساعات بلاقيها مرسومة على السقف، مين بيطول السقف عشان يرسم عليه؟
دا عالي أوي!
بابا وماما دايمًا بيدهنوا الأوضة كُل ما دا بيحصل
أقولكم سر تاني؟
دايمًا بسمعهم بالليل بيتخانقوا سوا، ببقي عارفة إن أنا السبب وإنهم بيتكلموا عني
سمعت بابا في مرة بيقول إنه مش هيقدر يساعدني أكتر من كدا، وإنهم لو متخلصوش مني في أقرب وقت، هتخلَّص أنا منهم
ساعتها ماما قالتله إني بنتهم الوحيدة ولازم يحبوني مهما حصل ولازم دايمًا يحاولوا يحموني
أنا وبابا كُنا صحاب وقريبين من بعض، كُنا بنفطر سوا ونلعب سوا ونتكلِّم سوا
بس دلوقتي خلاص ...
مبقيناش قريبين، أختي بتقول إنهم خايفين مني لأنهم مش عارفين أنا بعاني من إيه، وإنهم لو عرفوا هنعيش كلنا سوا بأمان
أنا مضطرة أسيب الدفتر، بابا بيندهلي وبيقول إننا هنروح نلعب في الغابة سوا
سلام ...
.
.
.البنت عندها مرض تعدُّد الشخصيات، وشخصيتها التانية هي أختها لأنها قالت في الآخر إنها طفلة وحيدة مالهاش إخوات
لكني برضه أعتقد من وجهة نظري إنها بتعاني من حالة إستحواذ شيطاني لأن ببساطة إزاي طفلة عندها ٨ سنين هتقدر توصل للسقف وترسم عليه؟
ومتقوليش حطت حاجة عالية وطلعت فوقها لأن أهلها كانوا هيحسوا بيها ويشوفوها
طبعًا مش محتاج أقولكم إن والدها قتلها وإتقبض عليه عشان دا واضح جدًا
.
.
.
#بتاع_الرعب
#حدث_بالفعل
#قصص_حقيقية_حول_العالم
