كُلنا كُنّا بنحِب السيِّد وينسكوت ، كلمناه مرة عشان نستخدِم التلة اللي في حديقته الأمامية لمّا إتغطِّت بالثلوج عشان نتزلج عليها و الحقيقة السيِّد وينسكوت ممانعش إطلاقًا و فتح لنا باب حديقته بإبتسامة لطيفة ، دا غير إنه أكرَّم شخص في الحي كُله و بيقدملنا أحسن أنواع الحلوي في الهالويين ، عشان كِده بمُجرَّد ما سمعنا إن الراجل الطويل أخده كُلنا أُصبنا بخيبة أمل و إحباط شديدين
غالبًا و بنسبة كبيرة أغلبكم مسمعش عن الراجل الطويل قبل كده فخلوني أشرح لكُم الموضوع ، الراجل الطويل دا أسطورة في المدينة بتاعتنا و أسطورة عُمرها طويل و بيمتد لعقود طويلة ، الناس القُليلين اللي شافوه أو لمحوه بيقولوا إن طوله 9 أقدام يعني تقريبًا 2.75 متر ، نحيف جدًا و بشرته شاحبة ، دايمًا مرسوم علي وجهه إبتسامة لطيفة و مؤدبة ، بابا قالي مرة إن الراجل الطويل بيحب ياخد الحاجات و بيجمعها و يفرض سيطرته عليها ، و أكتر حاجات بيحب ياخدها هي الأشخاص الحزانى و الأحلام ، يعني إنت لو نمت و صحيت مش فاكر الحلم اللي حلمته فده عشان الراجل الطويل هوّ اللي سرقه
لمّا السيِّد وينسكوت مراحش الكنيسة يوم الأحد الناس كُلهم بدأوا يقلقوا عليه ، دي أول مرة يعملها في حياته ، لمّا إستمر غيابه لحَد يوم الإتنين و مظهرش في أي مكان في المدينة القلق بدأ يزيد ، الناس بدأت تهمس و تتسائل ، دي أول مرة السيِّد وينسكوت يعملها ، بعد يومين تقريبًا واحد من الأطفال قال إنه شاف الراجل الطويل واقف في شباك السيِّد وينسكوت و الخوف و الإشاعات بدأوا ينتشروا في المدينة كُلها ، لمّا حكيت لبابا عن كلام الولد ده إبتسم و هز راسه و معلقش بولا كلمة
.
أنا و تايلور صاحبي بنعدي كُل يوم من أدام بيت السيِّد وينسكوت بالعجل بتاعنا و إحنا رايجين المدرسة ، بس من يوم ما سمعنا الإشاعة بقينا بنزوِّد سُرعتنا أدام بيت السيِّد وينسكوت ، كُنا خايفين لدرجة إن ولا مرة فكرنا نبُص علي البيت أثناء مرورنا !
في يوم خرجنا من المدرسة و رحنا نزور صديقنا المريض روري ، و إتأخرنا عنده ، إتصلنا بأهلنا عشان نستأذن منهم إننا نبات عند روري بدل ما نروَّح في الظلام ، أهل تايلور سمحوا له .. أهلي رفضوا !!
كُنت ماشي بالعجلة بتاعتي جنب بيت السيِّد وينسكوت و بقاوم بكل قوتي إني مبُصش علي البيت ، لكن فضولي كان أقوي مني ، بمُجرد ما عدِّيت البيت بصيت ورايا في نظرة سريعة عليه ، نور البيت كُله كان منوَّر و عينيّا علي طول ثبتت علي الوجه اللي كان بيبُصلي من النافذة ، قلبي وقف من شدة الخوف و رجليّا بدأت تزود السُرعة عشان أهرب من هنا بأسرع طريقة مُمكنة ، برغم كده عُمري ما قدرت أنسي النظرة اللي كانت في عينين الوجه اللي كان بيبُصلي من النافذة
تاني يوم الصُبح في المدرسة حكيت لتايلور و روري عن اللي شُفته ، ضحكوا عليّا و محدش صدقني ، بالظبط زي ما ضحكوا علي الولد اللي حكي الموضوع في الأول خالص ، كان لازم آخدهم معايا يشوفوا بنفسهم و إلا هيقولوا عليّا كذاب ، إتفقنا علي ميعاد بالليل و خرجنا بالعجل لحَد ما وصلنا أدام بيت السيِّد وينسكوت ، و زي ما حكيت لهم ، الوجه الغاضب المُخيف كان واقف في شباك الدور العلوي بيبُص علينا ، لو إفترضنا إن ده الراجل الطويل و إن طوله واصل من الدور الأرضي للدور العلوي فمعني كده إن طوله تقريبًا 3 أمتار ، برغم النظرة المُخيفة اللي في عينيه إلا إنه كان بيبتسم ، تايلور وقع علي الأرض من شدة الخوف بمُجرد ما شافه !
حاول يقف و هوّ بيركب عجلته بسرعة و بيصرخ بخوف : " اللعنة .. إهربوا .. حالًا "
و هربنا بأقصي سُرعة فعلًا ....
.
بمُجرد ما وصلنا الشارع الرئيسي و إتطمنّا لوجود ناس بدأنا نتكلم بخوف و رعب ، تايلور كان بيترعش و هوّ بيقول : " أنا مش مصدَّق إننا شُفنا الراجل الطويل ! "
روري قال بخوف : " شُفتوا النظرة اللي علي وشه ؟ "
و أنا قلت بهلع : " إحنا لازم نبلغ الشُرطة "
الصُبح بلغنا عد كبير من الأصدقاء و لمّا رُحنا سوا بالنهار للبيت مشُفناش أي حاجة ، الراجل الطويل مكانش موجود ، تاني يوم رُحنا بعد المدرسة و برضه مكانش موجود ، بدأنا نقول لبعض إن الراجل الطويل مش بيظهر غير بالليل بس ، قررنا نقضي الليلة عند روري و نروح بالليل عشان نتأكد من النظرية بتاعتنا
بالليل ركبنا العجل و إنطلقنا ، جوانا إحساسين بيتصارعوا ، أمل إن الراجل الطويل مبيقاش هناك و خوف إنه يبقي موجود بس كان لازم نروح عشان نحسم المُشكلة و نتأكد من النظرية بتاعتنا
بمُجرد ما وصلنا لمحناه واقف في نفس الشباك ، المرة دي كان مكشِّر و الغضب باين علي وشه ، روري قال بصوت واطي مليان خوف : " شايفين الغضب علي ملامحه .. هوّ عاوزنا منجيش هنا تاني "
تايلور طلّه تليفونه و بدأ يصوره و هوّ بيقول : " هوّ ليه مش بيظهر غير بالليل بس ؟ "
صرخت فيه و أنا بحاول آخد التليفون : " بطّل تصوره ، متخليهوش يغضب أكتر من كده "
روري قال : " هو ليه مش بيظهر بالنهار ؟ "
فكرت شوية و قلتله : " يمكن عشان بالليل الدُنيا بتبقي ضلمة و الأضواء بتاعة البيت بتبقي ساطعة فبنقدر نشوفه ؟ "
قررنا نتأكد من النظرية دي تاني يوم علي طول ، جينا الصُبح و كالعادة الراجل الطويل مكانش واقف في الشباك ، بدأنا نقرب من البيت بخطوات بطيئة لكن فجأة تايلور قال بخوف إن الراجل الطويل واقف في الشباك ، صرخ بصوت مرعوب : " يلا نهرب "
و بدأ يجري علي العجلة بتاعته ، جرينا وراه و ركبنا العجل بتاعنا و هربنا من أدام البيت بسُرعة ، صرخت فيه بغضب : " إيه اللي حصلّك ؟ "
قالي بخوف و هوّ بيترعش : " كان فيه راجل طويل في الشباك بس شكله مُختلف خالص !! "
روري سأل بفضول : " مُختلف إزاي ؟ "
تايلور قال : " معرفش .. شكله كان مُخيف .. كان فيه حاجة غلط "
.
تاني يوم قررنا نروح مع بعض عند البيت بس المرة دي مات أخو تايلور الكبير كان معانا ، مات مكانش مصدق نظرياتنا و قصصنا بس قرر ييجي معانا عشان نسكُت شوية
الراجل الطويل كان في الشباك زي كُل يوم ، وقفنا من بعيد نبُص عليه بخوف و نترعش لكن مات قرر يقرب من الشباك و هوّ بيبص بقلق ، بدأنا نمشي وراها و إحنا مرعوبين ، مات فتح باب البيت و دخل ، مشي لحد سلم الدور التاني و طلعه ببطء و سمعنا صوت باب الأوضة اللي فوق بيتفتح ، سمعناه بيصرخ بخوف : " اللعنة "
بعد ثواني كان نازل يجري علي السلم ، خرج يجري لحَد ما وصل للعجل بتاعنا ، تايلور سأله بخوف : " فيه إيه ؟ "
قال من وسط أنفاسه : " مفيش راجل طويل و لا حاجة .. لازم نتصل بالشُرطة .. حالًا "
و كان عنده حق ...
الشُرطة قالت إن السيِّد وينسكوت كان شانق نفسه في أوضته أدام الشباك ، الجُثة كانت بدأت تتعفن و تتآكل و دا سبب نظرات الغضب اللي كُنا بنشوفها علي وجه الجثة من بعيد ، كان ملامح العفن هي اللي بتظهر مش ملامح الغضب ، السيِّد وينسكوت مسابش أي خطاب إنتحار أو مذكرة أو جواب أخير ، مات وحيد و حزين !
مكُناش بنشوفه بالنهار للسبب اللي أنا قلته فعلًا
.
بمرور الوقت بدأت المدينة تنسي السيِّد وينسكوت و الحياة رجعت تستمر بشكلها الطبيعي مرة تانية ، كُل الناس نست الموضوع تمامًا
كُل الناس إلا أنا ......
حاجة واحدة بس خلتني منساش الموضوع
حاجة واحدة بس ميعرفهاش تايلور أو روري
أول مرة لمّا شُفت الراجل الطويل لمّا كُنت لوحدي مشوفتوش في الشباك اللي كُنا بنشوفه فيه قبل كده
شُفته في شباك أوضة تانية .. نحيل .. شاحب .. و علي وجهه إبتسامة لطيفة و مؤدبة !
.
.شرح
إحنا أدامنا حل من إتنين :
إما إن فعلا فيه راجل طويل بيخطف الناس الحزاني و هو اللي خطف حياة السيِّد وينسكوت و هيبقي فيه دليل علي كده إن اللي بيحكي شافه في شباك تاني
أو إن الموضوع كله كان تهيؤات بسبب الأسطورة و خيال الأطفال دول
إن شاء الله بكرة آخر قصة جديدة و هاخد أجازة العيد بقي .. كُل سنة و إنتم طيبين و عيدكم سعيد إن شاء الله
.
#بتاع_الرعب
#حدث_بالفعل
#قصص_حقيقية_حول_العالم
