إسمي لوري ، عندي بنت عندها 4 سنين إسمها أورورا ، مؤخرًا بدأت ألاحظ إنها مُختلفة شوية عن بقية الأطفال اللي في سنها ، أورورا مش إجتماعية إطلاقًا سواء مع الأطفال اللي من سنها أو مع الكُبار كمان ، مش بتركز مؤخرًا و بتسرح كتير ، و كمان بتقضي أغلب وقتها في أوضتها لوحدها
وديتها لأطباء أطفال و لأطباء نفسيين و لمعالجين نفسيين ، إفترضت إن إنطوائها و عدم تركيزها هو نوع من أنواع التوحد ، لكن الأأطباء و الإختبارات النفسية كُلها أجمعوا علي إنها مش متوحدة خالص
أنا لسّه محافظة علي ذهابنا للطبيب النفسي الخاص بيها مرة واحدة كُل أسبوع علي الأقل ، لكن رده كُل مرة بيكون إنه مش شايف أي حاجة مش طبيعية فيها ، بس أنا لاحظت حاجة غريبة ، تصرفاتها و حركتها برا البيت مُختلفة تمامًا عن تصرفاتها و حركتها جوا البيت ، برا البيت بتتكلم مع الناس ، بتلعب ، بتتحرك ، بتضحك زي أي طفلة في سنها ، لكن بمجرد دخونا البيت بترجع مُنعزلة تاني
الموضوع ده بدأ من كذا شهر ...
قبل كده كانت طفلة سعيدة و مرحة ... و بتضحك !
.
مش قادرة أقولكم أنا خايفة عليها أد إيه أو قدر القلق اللي بحس بيه ناحيتها ، أنا مش بدللها لدرجة إني أفسدت شخصيتها أكيد ، هل أنا أم سيئة ؟
هل فيه حاجة حصلت لها و هيّ مخبياها عني ؟
أنا عارفة إننا فيزمن الناس فيه بقوا سيئين جدًا و أنا مراقبة بنتي كويس عشان أقدر أحميها ، لكن مش قادرة أبطَل قلق خصوصًا إن كُل الأخبار بقت مليانة بقتلة و مٌغتصبين ، التفكير و القلق هُمّا أسوأ حاجة الأم مُمكن تتعرض ليهم
أنا بشتغل مُمرضة في مُستشفي كبير عشان كده ساعات شُغلي طويلة و مُرهِقة ، جوزي ميت و عايشة أنا و أورورا في البيت لوحدنا ، في حديقة البيت في غُرفة صُغيّرة عايشة فيها المُربية بتاعة أورورا عشان تبقي معاها طول الوقت ، المُربية كانت قلقانة علي البنت زيي بالظبط و مش هكون ببالغ لو قُلتلكم إنها مُمكن تكون قلقانة عليها أكتر مني ، أكتر من مرة حكتلي حاجات مُريبة بتحصل فيالبيت أثناء تواجدي برا
.
حكتلي إنها في مرة شافت القُط بتاعنا واقف علي باب أوضة أورورا و بيعمل صوت مُزعج ، شعر فروه كُله كان مُنتصب بخوف ، لمّا كاري المُربية حاولت تهديه و تطمنه بدأ يضربها و يخربشها قبل ما يهرب منها بعيد ، لمّا فتحت باب الأوضة و دخلت لقت أورورا قاعدة علي الأرض بترسم في هدوء
الرسم اللي فجأة ظهر في حياتنا و تحول لهواية أورورا المُفضلة بدون مُقدمات ، جوا أوضتها فيه أكوام و أكوام من الرسومات اللي ممنوع علي أي حَد يبُص عليها و إلا هتغضب جدًا و هتصرخ فينا كُلنا !
أكتر من مرة بنسمع صريخ أورورا من أماكن مُختلفة في البيت بدون أسباب أو مُقدمات ، لكن لمّا بنجري عليها عشان نتطمن عليها بنلاقيها قاعدة في سلام و هدوء !
من كام يوم القُط بتاعنا مات ، المُربية قالتلي إنها لقته عايم في حمام السباحة ، كان فيه حاجة غريبة و لمّا أخدناه للطبيب البيطري قال إن فيه ثُقب غريب ورا رجله اليمين أول مرة يشوف حاجة زيه و ده مسبب نزيف للقُط و مخليه فقد كمية كبيرة من الدم ، القُط مات تقريبًا و إحنا عند الدكتور البيطري ، الشيء الغريب كان رد فعل أورورا علي موت القط بتاعها ، كان واضح إن الموضوع مش فارق معاها إطلاقًا برغم إنها تقريبًا متربية مع القُط ده من يوم ما إتولدت ، أورورا كانت دايمًا رحيمة و حُنينة مع الحيوانات ، رد فعلها كان مُفاجئ و غريب و مُخيف !
بس أكتر مُخيفة حصلت ، حصلت النهاردة الصُبح !!
.
رجعت البيت بعد وردية مُرهقة جدًا إستمرت لـ 12 ساعة تقريبًا ، وصلت البيت تقريبًا الساعة 8:40 صباحًا ، كاري المُربية كانت قاعدة علي الكنبة دافنة راسها بين إيديا و جسمها بيترعش ، بصتلي لمّا قفلت الباب ورايا ، عينيها حمرا جدًا و وشها شاحب بطريقة غريبة ، عينيها كان فيها خوف مش طبيعي ، جريت عليها و قعدت جنبها و حضنتها و سألتها إيه اللي حصل ؟ ، قالتلي إنها طول الليل سهرانة بتسمع أورورا في أوضتها من خلال شاشة المُراقبة ، البيت واسع عشان كده في كاميرات مُراقبة في كًل أوضة و كُلها متوصلة بالشاشة بتاعة البيت و بنقدر نفتح أي كاميرا و نسمع منها اللي بيحصل في أي أوضة
قالتلي إن الموضوع بدأ بالظبط في مُنتصف الليل ، سمعت صوت بيتكلم بلُغة غريبة ، و الصوت عميق و قوي مش مُمكن يكون صوت بنت عندها 4 سنين أبدًا ، الصوت ده كان جاي من أوضة أورورا ، الأوضة في الكاميرا كانت هادية لكن كاري كانت بتروح تجري علي أوضة أورورا عشان تلاقيها نايمة بهدوء و كُل حاجة تمام
بعد كده و طول الليل و كُل ساعة بالظبط كانت بتسمع نفس الجُملة بنفس الصوت المُخيف ، و كل مرة بتجري علي الأوضة و تلاقي أورورا نايمة في سلام في سريرها و الأوضة فاضية تمامًا ، قضت باقي الليلة بتسمع الصوت كُل ساعة و هي بتعيّط من الخوف
سألتها هيّ ليه ما إتصللتش بيا و حكتلي اللي حصل ، قالتلي إنها مكانتش شايفة إن دي حاجة طارئة خصوصًا إن أورورا بخير و مفيش حاجة حصلت لها ، الصوت توقف الساعة 6 صباحًا بالظبط أخيرًا ، خليتها تروح أوضتها عشان تنام و ترتاح و طلعت أوضة أورورا عشان أتطمن عليها
كانت لسّه نايمة فصحيتها ، لمّا فتحت عينيها كانت بيضا تمامًا و لكن بعد لحظات ظهر لون عينيها ، حضنتها و أنا حاسة بخوف من شكل عينيها اللي ظهر الأول ، كانت متضايقة إني صحيتها بدري كده ، سألتها لو كانت سمعت أي أصوات غريبة بالليل ؟
إبتسمت إبتسامة مُريبة و هيّ بتقول : " آه ، إنتم سمعتوه ؟ ، ده صديقي "
سمعت بعدها صوت ضحكة شريرة بيتردد في البيت كُله
.
شرح قصة
.لوري أخدت البنت و المُربية و خرجوا من البيت ، أجروا شقة صُغيرة لحد ما جابوا بيت جديد و نقلوا حاجتهم فيه
عرضوا البيت للبيع و حتي الآن مفيش مشتري راضي يشتريه
اضطرت تجيب كاهلن و بعد عدة محاولات جوا البيت خرج و امرها تقفل البيت نهائيًا لان الروح اللي فيه شريرة و قوية و هتؤذيهم
البنت حالتها إتحسنت بعد ما خرجوا من البيت و قالت إن صديقها ده كان بيؤمرها ترسم ناس بتموت و كوارث بتحصل و كان بيؤمرها متتكلمش مع حد و قتل القط عشان حس بيه
و لحد دلوقتي هما عايشين بشكل كويس و البيت مقفول تمامًا
.
دليلك للحصول علي الدرجة النهائية في القصة :
س / الجملة الغريبة اللي كانت بتسمعها ايه و معناها ايه ؟
ج / للاسف مش عارفين
.
س / الكاهن شاف ايه جوا البيت ؟
ج / للأسف مش عارفين و الله
.
س / إيه بالظبط اللي جوا البيت ؟ و ليه ما أذاش البنت ؟
ج / للأسف مش عارفين و الله معلش
.
#بتاع_الرعب
#حدث_بالفعل
#قصص_حقيقية_حول_العالم
