ဂန္တဝင်ဂိုဏ်းချုပ် အတွဲ(၄) Unicode

အပိုင်း ၈၀၇ မှ ၈၁၀

စာစဥ် ၄၂ : အပိုင်း ၁၇

အပိုင်း ၈၀၇ : အဆိပ်တစ္ဆေ

ဖန်းထင်း၏ အကြည့်သည် ထုံထိုင်းသွားခဲ့ကာ သူမသည် ကြောက်မက်ဖွယ်ရာ စူးရှသော အသံတစ်ခုဖြင့် ညည်းတွားလိုက်သည်။

သူမ၏ ခန္ဓာကိုယ်မှ တဆင့် အစိမ်းရောင် အလင်းတန်းများ တစ်ခုပြီးမှ တစ်ခု ထွက်ပေါ်လာခဲ့ကာ သူမ၏ ခန္ဓာကိုယ် တစ်ခုလုံးအား ဖုံးလွှမ်းသွားခဲ့သည်။ သူမသည် ဖြည်းဖြည်းချင်း ဆယ်ပေခန့်မြင့်သော ဘီလူးကြီး အဖြစ်သို့ ပြောင်းသွားခဲ့သည်။ သူမ၏ ခန္ဓာကိုယ်တွင် မှေးမှိန်သော ကျောက်စိမ်းရောင် အလင်းတန်းများ လင်းလက်လာခဲ့ကာ မရေမတွက်နိုင်သော ထူးခြားဆန်းကြယ်သည့် မှော်သင်္ကေတများ ထွက်ပေါ်လာခဲ့သည်။

သူမ၏ ခန္ဓာကိုယ်သည် အဆပေါင်းများစွာ ကြီးထွားလာခဲ့သော်လည်း ထိုဘီလူးကြီး၏ မျက်နှာ အသွင်အပြင်များသည် ဖန်းထင်းနှင့် အတူတူပင် ဖြစ်သည်။ သို့သော်လည်း သူမသည် အသက်၂၀ခန့် အရွယ်မဟုတ်တော့ပေ။ ထို့အစား သူမသည် အသက် ၁၃နှစ်၊ ၁၄နှစ်ခန့်သာ ရှိနေသည်ဟူ၍ ထင်နေရသည်။

သို့သော်လည်း သူမ၏ ယခင်မှ နူးညံ့သိမ်မွေ့မှုတို့မှာ ပျောက်ကွယ်သွားခဲ့၏။ သူမ၏ မျက်လုံးအစုံမှ ခက်ထန်ကြမ်းတမ်းသော အလင်းတန်းများ ထိုးထွက်လာကြသည်။ သူမ၏ ကြည့်၍ကောင်းသော မျက်နှာသည် တွန့်လိမ်သွားခဲ့ကာ နာကျင်စွာနှင့် ရုန်းကန်နေခဲ့သည်။ သူမသည် အနည်းငယ် ရုပ်ဆိုးသွားသည့်ပုံပင် ပေါက်သွားခဲ့သည်။

ပြီးတာနှင့် သူမ၏ ခန္ဓာကိုယ်မှ အခိုးအငွေ့ပုံစံ အရာတစ်ခု ထွက်လာခဲ့သည်။ သူသည် ဖြူဆွတ်နေကာ သူမ၏ ခန္ဓာကိုယ် တစ်ခုလုံးအား ဖုံးလွှမ်းသွားခဲ့သည်။ သူမ၏ ခန္ဓာကိုယ် တစ်ခုလုံးသည် နှင်းလူသား အသွင်သို့ ပြောင်းသွားခဲ့၏။ သူမ၏ ခန္ဓာကိုယ်မှနေ၍ ရနံ့တစ်မျိုး ထွက်လာခဲ့သည်။

သူမနှင့် အနီးကပ်ဆုံး ဖြစ်သော ယန်ချင်သည် ထိုရနံ့ကို ရှူမိလိုက်သောအခါ မူးဝေလာခဲ့သည်။ သူ၏ စွမ်းအားများကို စုစည်း၍ ခုခံလိုက်ပြီး သူ၏ ဝမ်းနည်းမှုများအား ထိန်းချုပ်၍ မရနိုင်တော့ချေ။