ဗီလိန်ကငါ့ကိုအရမ်းချစ်တယ်(Arc 1 to 4)

Arc 1.21

unicode

အပိုင်း(၂၁) (လွှမ်းမိုးနိုင်စွမ်းကြီးတဲ့ဥက္ကဌက ငါ့ကိုလုယူချင်နေတယ်-၂၁)

နျဲ့လင်းယွီ သူ၏လက်ချောင်းများကို တင်းတင်းဆုပ်လိုက်မိသည်။ သူ၏နှလုံးသားကလဲ နာကျင်နေရသည်။ ဂုဏ်သိက္ခာကြီးမားသောဥက္ကဌနျဲ့ချစ်ရသူတွင် ဤမျှမဖြစ်စလောက် ငွေကြေးပမာဏသာရှိမည်ဟု မည်သူကမှ စိတ်ကူးမိလိမ့်မည်မဟုတ်ပေ။

တကယ်တမ်းတွင် သူကိုယ်တိုင်လဲ မတွေးမိခဲ့ဖူးပေ။ သူ၏ဘဝတွင် ကလေးအရွယ်မှစ၍ ငွေကြေးရှားပါးပြတ်လပ်မှုမျိုး လုံးဝမရှိခဲ့ဖူးဘဲ အလိုရှိရာကို ပြောလိုက်ရုံသာလိုသည်။ သို့သော် ပိုင်ယွီ၏အနေအထားကို တစ်ခါမှမတွေးခဲ့မိပေ။

ချလန်ကိုကြည့်လိုက်မိချိန်တွင် ပိုင်ယွီထံ၌ ယွမ်ဆယ်ဂဏန်းမျှသာကျန်တော့သည်။

တစ်ချိန်လုံး ခက်ခက်ခဲခဲစုဆောင်းခဲ့ရပြီး ငွေပမာဏပြည့်သွားချိန်၌ စိတ်လှုပ်ရှားစွာဖြင့် ဝယ်ယူခဲ့ခြင်းဖြစ်လိမ့်မည်။

သူ့အား လက်ဆောင်ပေးနေချိန်၌ဖြစ်နေသည့် ပိုင်ယွီ၏မျက်နှာကို နျဲ့လင်းယွီမှတ်မိနေဆဲပင်။ ထိုအပြုံးက အလွန်တောက်ပနေပြီး မျက်လုံးထဲမှ စိတ်လှုပ်ရှားမှုနှင့် မျှော်လင့်တကြီးဖြစ်နေမှုတို့က အထင်းသားပေါ်နေသည်။

သို့သော် ထိုလက်ဆောင်အား သူကိုယ်တိုင် အမှိုက်သဖွယ် လွှင့်ပစ်ခဲ့သည်။

ချလန်ကိုကိုင်ထားသော နျဲ့လင်းယွီ၏လက်များက တုန်ရီလာသည်။ ထိုလက်ဆောင်သည် သူ့အားပေးသော ပိုင်ယွီ၏ရိုးသားဖြူစင်မှုဖြစ်သည်။ သို့သော် သူကဆုံးရှုံးစေခဲ့သည်။

ယခင်က ပိုင်ယွီသည် သူ့အားမုန်းတီးပြီး ထွက်ပြေးချင်နေသည်က အံ့သြစရာမရှိတော့ပေ။ ယခုအခါ သူ့ကိုယ်သူပင် မုန်းတီးလာမိသည်။

ဘော်ဒီဂတ်သည် နျဲ့လင်းယွီကိုကြည့်ကာ တစ်ခုခုပြောချင်နေသော်လဲ ဘာမှမပြောနိုင်ခင်မှာပင် နျဲ့လင်းယွီသည် ပိုင်ယွီရှိရာအခန်းသို့ ပြေးထွက်သွားသည်ကို တွေ့လိုက်ရသည်။
-

အခန်းထဲတွင်မူ ပိုင်လင်သည် ပိုင်ယွီအား စော်ကားနေဆဲပင်။ ပိုင်လင်၏အမြင်တွင်မူ ပိုင်ယွီအတွက် နေရာမရှိတော့ပေ။