السكه شمال بقلم / لولو_محمد ( كامله )

الحلقه 27

(((((((((((((السكة شمال))))))))))))
#لولو_محمد
الحلقه السابعه و العشرون
محمود و مازن يمشوا
مديحه / سبحانه الهادى من امتى ده
سميحه / انتى اللى اتصلتى بمازن يا مرام
مرام / اه انا
مديحه / يا حزنى مش محمود شوف و انا اللى فاكره
سميحه / ربنا يستر بقى
................................
فى الكافيتريا
محمود / شاى ؟؟
مازن / قهوه مظبوط
محمود / اتنين شاى وواحد قهوه مظبوط
محمود يروح يفتح التلاجه و يجيب ازازه ميه و اتنين عصير مانجه و باكت مناديل و يحطهم الراجل فى الكيس
الراجل / تلاتين جنيه
محمود يحاسب
محمود / انت عارف انا خليتك تيجى معايا الكافتريا ليه
مازن / غالبا عشان تضمن انى مكونش مع مرام بعيد عن عنيك صح هههههههههههههههههههه
محمود ميبتسمش
مازن / اسف ليه
محمود / عشان اعتزرلك على اللى عملته عندك فى البيت ... ده بيتك صح
مازن / اه شقتى
محمود / حلوه و منطقه حلوه و هاديه
مازن / شكرا
محمود/ و اه عشان برده تبقى تحت عينى
مازن يدحك و يبص الناحيه التانيه الراجل يدى محمود القهوه يديها لمازن و ياخد كبايتين الشاى و يمشوا
مازن / شكرا عالقهوه
محمود / العفو
...............................
تانى يوم الصبح فى شقه مازن
باب الشقه يتفتح و لبنى تدخل تبص يمين و شمال تلاقى نور الليفينج منور تروح الليفنج تلاقى نورا نايمه تروح تقعد جنبها و تلعب فى شعرها تصحى تلاقى لبنى مبتسمه تتخض
لبنى / ايه شوفتى عفريت
نورا / خضيتينى يا لبنى بتعملى ايه هنا
لبنى/ انتى اللى بتعملى ايه هنا
نورا / مازن فين
لبنى / معرفش قوليلى انتى
نورا / شكلى راحت عليا نومه امبارح و احنا بنتفرج عالتى فى
لبنى / دى تانى مره تباتى هنا زياد كان قالى انه شافك قبل كدا يوم مسبتينا و مشيتى فاكره لما سعيد خطب
نورا / عادى يعنى
لبنى / على فكره نوفى زعلانه منك خالص و فاكره انك يعنى ههههههههههههههه شوفى الهبله قال ايه خطفتى مازن منها
نورا / ايه الهبل ده مش هى اللى سابته
لبنى / بناء على نصيحتك ان مازن لعبى و مش بتاع جواز و انها زيها زى غيرها و بكره يرميها يعنى قالت تنسحب بكرامتها مكنتش تعرف ان صحبتها الانتيم هتضربها فى ضهرها
نورا / انتى دخلتى ازاى
لبنى / بالمفتاح ايه انتى معكيش مفتاح للشقه و لا ايه
نورا / متصيعيش عليا انا و انتى عارفين كويس ان مازن عمره مهيديكى مفتاح الشقه
لبنى / اداه لزياد و انا و زيزو ايه مش واحد
نورا / انا هقوم اغسل وشى
لبنى / وشك بس مش تاخدى دوش سريع كدا بالمره حتى تنزلى فرش كدا و فايقه
نورا / هاخده بس لما اروح هبقى عن اذنك
نورا تمشى و لبنى تنفخ
...........................
فى المستشفى
البنت اللى كانت ماسكه الموبيل مع امل فى الفصل تدخل
امينه / تعالى يا مها يا حبيبتى
مها / ازيك يا طنط ازيك يا امل
امل تهز راسها
مها / انا زعلانه منك اوى دى عمله تعمليها
امينه / الحمد لله قدر و لطف
مها / تعرفى المدرسه النهرده مقلوبه على اللى حصل امبارح و فى مدرسه دخلت الفصل و قالت لو اى بنت حكت حاجه من اللى حصلت السنه اللى فاتت هيسقطوها
امينه / حسبى الله و نعم الوكيل
مها / و الاكتر من كدا ان اصلا مس نجلاء امبارح قالت اللى هتقول حرف ماللى حصل هيحصلها زى اللى حصلك
امينه و امل يبصولها
مها / امل انا صورت اللى حصل بس مينفعش تقولوا ان انا اللى صورته انتى عارفه ظروفى و ظروف اهلى هبعتلك الفيديو واتس بس اوعدينى ان رجلى مش هتيجى فالموضوع
امينه / اوعدك محدش هيجيب سيرتك ابدا
مها / هبعته
امينه تمسك ايد امل و تبتسم
...................................
فى مكتب صفوت فى الشركه
صفوت قاعد مع راجل
الراجل / حضرتك عارف حساسيه الموقف
صفوت / انا الحقيقه اول مره اعرف اى حاجه عن الموضوع ده دلوقت من حضرتك
الراجل / انا جيت اكلم حضرتك شخصيا عشان انا عارف ان الموضوع مش صغير بس برده لازم حضرتك تفهم ان التوقيت بتاعه صعب جدا احنا فحاله حرب و حضرتك فاهم
الباب يخبط و مازن يدخل
مازن / حضرتك طلبتنى يا خالو
صفوت / تعال يا مازن عاوزك اقعد
مازن يدخل
صفوت / استاذ ماجد عبد الله مساعد وزير الداخليه
مازن / اهلا وسهلا
صفوت / مازن هو ايه علاقتك بحوار البنت اللى اسمها امل دى
مازن / اه امل طب لو حضرتك هنا بخصوص الموضوع ده احب اورى حضرتك فيديو جديد لسه مضيفناهوش للمحضر
مازن يورى ماجد الفيديو
ماجد / مين اللى صورت الفيديو ده
مازن / المهم المحتوى
ماجد / تعرف يا مازن و انا فسنك كنت زيك كدا كلى حماس و طاقه و مكنتش بعرف اوجهها للاتجاه الصح
مازن / انا مش عارف ده مدح و لا زم الحقيقه
ماجد / ههههههههههههههههههه اللى صورت الفيديو ده خدت اذن نيابه
مازن / و هى اللى ضربت البنت فى الفصل فوسط زميلاتها خدت اذن من مين دا كان وليده لحظه
ماجد / صدقنى كلهم هياخدوا جزائهم حتى الظابط فى القسم
مازن / كويس يبقى الموضوع منتهى
ماجد / بس مش دلوقت
مازن / مش فاهم
ماجد / بص انت عارف العيال و الموضوع كله ان
مازن / الموضوع حضرتك ان فى بنت انضربت وسط صحباتها و مخدتش حقها
صفوت / مازن
ماجد / سيبه يا صفوت بيه حماس الشباب دا طاقه و لازم ندعمها و نوجهها فالاتجاه الصح اللى ينفع البلد مش يضرها و لا ايه يا مازن
مازن / و انا بضر بلدى فايه
ماجد / لا اسمحلى بقى انت مش صغير عالسؤال ده لما تدعم بنت كل هدفها تسؤ سمعه الجيش و الشرطه و القضاء فوقت مصر بتحارب فيه الارهاب و الف عين عليها و الف واحد مستنى هفوه صغيره زى دى عشان يعمل منها فرقعه و يحط رجله فالبلد و يدخل فى شؤنها اشى منظمات حقوق انسان و اشى حقوق المراه و فالاخر تلاقى دوله معاديه بتدعم البنت و تاخدها عندها و تكفلها و تديها فلوس عشان بس تبين ان مصر مش بتهتم بولادها يبقى بتضر بلدك يا مازن
مازن / مخرمتش الاوزون بالمره
صفوت / ولد يا مازن
مازن / اسف اسف بس اندمجت شويه اسمحلى حضرتك لو كانت زوجه المستشار المحترمه تعاملت على انهم شويه عيال بيلعبوا او حتى اشتكت للاداره بتاعه المدرسه و سابتهم يتعاملوا كان الموضوع هينتهى و كان ممكن امل تتفصل مالمدرسه ظلم و تنقل مدرسه تانيه و برده ساعتها الموضوع كان هينتهى لكن اداره المدرسه اللى حضرتك مش عاوز تعاقبها عشان رجل المستشار متجيش فالموضوع سمحت لوليه امر انها تدخل تضرب بنت فقلب فصل و مش بس كدا شلت اسم البنت من الغياب عشان تخلى مسؤليتها و هددت زميلاتها ان اللى هتتكلم هيحصل فيها كدا و هتنضرب و هتنفصل و فالاخر انا اللى بضر بمصر انا اللى بطلع جيل كاره البلد و فاكر انها مش بلده
ماجد / الكلام ده مش كلامك انت شاب مكبر دماغه للدنيا كل يوم مع مزه شكل و الحقيقه احييك على زوقك انت بتوقعهم ازاى دول يا ولد ههههههههههههههههههههههه
مازن / دا ايه علاقته بموضوعنا
ماجد / لا له علاقه و علاقه كبيره كمان انت ايه علاقتك بالبت دى مش مقامك و لا مستواك و كمان عيله اوى عليك
مازن / على فكره الحوار ماشى فسكه مش عجبانى
ماجد / معاك حق انا بعتزر شوفت انا ديمقراطى ازاى عشان مترجعش تقول انى منحاز لحد ضد حد لما غلطت اعتزرت و انا اوعدك ان هايدى ووالدتها هيروحوا لامل البيت يعتزرولها و ينتهى الموضوع عند كدا و اقولك كمان هايدى هتسيب المدرسه خالص
مازن / و المدرسه و الناظره
ماجد / لا بقى يا مازن كلو الا قطع الارزاق بس هنلفت نظرهم و نخليهم تحت عنينا و اى غلطه منهم اوعدك انهم هياخدوا اسوء عقاب
مازن / الموضوع مش فايدى لازم امل تقبل الصلح
ماجد / و هى كانت تحلم اصلا اسمع يا مازن الحوار ده لو وصل للصحافه انا مش هقدر اساعدها و لا اساعدك و هتفتح عليك و عليها سكه منتش قدها مصر فى حاله حرب و لانا و لا غيرى هنسمح لموقف اهبل زى ده انه يستغل باى طريقه لتشويه سمعه مصر
مازن / حتى لو على حساب
ماجد / لو على حساب اى حد انا اتكلمت كتير مع صفوت بيه قبل مانت تيجى و انا متاكد انه هيقدر يقنعك بس الحقيقه انا لازم امشى مرتبط بمواعيد تانيه ... هستنى تليفون منك يا صفوت بيه
صفوت / باذن الله يا ماجد بيه شرفت اتفضل
صفوت يقوم
ماجد / خليك انا عارف السكه متتعبش نفسك سلام يا مازن
ماجد يمشى و مازن بيبص عليه صفوت يقوم يقعد قدامه و هو متعصب جدا
صفوت / انت اتجننت و لا جرا لعقلك ايه اى كان الهبل اللى انت كنت بتعمله انا مكنتش بتكلم و اقول بكره يكبر و يعقل لكن سياسه لا انت فاهم سياسه لا
مازن / الموضوع مش سياسى و لا له اى علاقه بالسياسه و لا حتى فى اى اهانه لا لجيش و لا لشرطه و لا لقضاء و لا لمصر اللى بيعملوه هو اللى بيهنهم لما يحافظوا على عنصر فاسد عشان ميشوهوش سمعتهم هو ده الغلط بعينه
صفوت / احنا عندنا شغل كتير مع الحكومه مينفعش نعاديهم
مازن/ فى ايه انا مش قادر افهم موقف زى ده هياثر عالحكومه فى ايه
صفوت / مالراجل مالصبح بيشرحلك
مازن / حجه هبله اوى متقنعش عيل صغير انا ياللي مليش فالسياسه شايف
صفوت / مهو عشان ملكش فى السياسه مش قادر تشوف
مازن / و انت ليك يا خالو
صفوت / معاك حق لانا و لا انت لينا يبقى نسمع كلام الناس اللى ليهم
مازن / مش مقتنع برده
صفوت / لو الدنيا اسودت و البلد قلبت علينا انا و انت هناخد بسبوراتنا و نسيب البلد بس العيال الهبله اللى فاكرين انك اقوى مالنظام مش هيبقى عندهم اى مكان تانى يروحوه امل و امها محمود و مرام و عيلتهم تفتكر هيقدروا يواجهوا و يكملوا الهبل ده عشان ايه عشان كام قلم البت خدتهم من زميلتها
مازن / و ايه علاقه مرام و محمود بالموضوع
صفوت / انت فاكرهم بيلعبوا الراجل قلهالى صريحه مزاوله مهنه بدون تصريح و ممكن يسببوا اذى للناس ببيع اكل فاسد بعيد عن عيون وزاره الصحه
مازن يسيب المكان و يمشى
صفوت / مازن انت يا مازن يا ولد يوووووه
............................
فى شقه نورا
نورا مشغله اغانى فى الهيد فون و عماله ترقص جرس الباب بيضرب مش سمعاه و بعدين تحس ترفع السماعه من على ودانها و بعدين تنزلها على رقبتها و تروح تفتح الباب تلاقى ست نورا الابتسامه تروح من وشها
الست / ايه هتسيبينى واقفه عالباب
نورا / ايه اللى فكرك بيا
الست / انا عمرى منسيتك يا نورا
نورا تبص فى الارض و تنفخ
الست / اسمعى يا نورا انا امك و عمرى منسيتك و انا عارفه ان اللى حصل مش سهل و انك كنتى صغيره و مش عارفه اللى بتعمليه بس
نورا / انتى اخترتيه هو
الست / محصلش
نورا / لا حصل انتى السبب فكل حاجه وحشه حصلتلى فحياتى انتى
الست / انا !!! عشان اتجوزت طب مابوكى اتجوز تانى يوم طلقنى فيه و بدل المره اتنين و تلاته و عشره و انتى سافرتيله بنفسك و اكيد شوفتى
نورا / انا مالى و مال بابا انا ليا باللى الحيوان جوزك عمله فيا و انتى
الست / برده يا نورا نفس الاسطوانه الهبله دى
نورا ترزع الباب فوشها الست تخبط
الست / نورا افتحى خلينا نتكلم انا مكنتش اعرف انك رجعتى مصر غير النهرده ارجوكى افتحى بقى ارجوكى
نورا تفتح الباب
الست / ارجوكى كفايا فضايح ارجوكى خلينى ادخل
نورا / اتفضلى مع انى متاكده انك مش هتقولى اى حاجه
الست / للدرجادى ابوكى شحنك نحيتى
نورا / ابوكى ابوكى ابوكى
الست / قوليلى عملك ايه فحياتك قوليلى عمره صرف عليكى جنيه عمره جابلك حتى قلم روج عمره رماكى و انتى حته لحمه حمرا و مفكرش يوم واحد ينزل مصر يسال عليكى و عايش بره عمال يتجوز فعيال صغيره يصرف عليهم فلوسه
نورا / يا ماما
الست / مين اللى اشترالك الشقه دى حسابك فى البنك اللى مبيخلصش مين اللى ملاهولك فلوسك اللى بتبعزقى فيها يمين و شمال عالشوبينج و الكوافيرات مين بيدفعها مش انا
نورا / مش عاوزه منك حاجه تقدرى تخديهم كلهم
الست / انا مسمحاكى يا نورا صدقينى مسمحاكى
نورا / انتى اللى تسامحينى ؟؟؟ انتى مصدقتينش و انا جيالك فدمى و اصرخ و اقولك جوزك اغتصبنى
الست / انتى مبتزهقيش مالكدبه دى
نورا / اطلعى بره
الست / نورا حبيبتى انا عارفه انك بتكرهى اونكل وليد انا عارفه انك مش قادره تتخيلى ان فى اى راجل ممكن يحل محل بابى انا عارفه ده و مقدراه عمرك محبيتيه و لا حتى
نورا تعيط
الست / نورا انا طول عمرى مدياكى حريتك انك تعيشى حياتك بس برده ياما قولتلك العيال اللى انتى مصحباهم دول عيال مش كويسه لو كنتى جيتى قولتى الحقيقه انا كنت هفهم و هساعدك لكن انك تيجى تتهمى وليد
نورا / انتى عاوزه ايه يا ماما
الست / عاوزه بنتى
نورا / بنتك ماتت اوفردوز
الست / اونكل وليد كمان هو اللى كان بيجيبلك المخدرات و لا الديلر اللى كنتى مصحباه
نورا / لا اونكل وليد معملش حاجه انا كدبت خلاص ارتاحتى
الست تحضن نورا و نورا عنيها مليانه دموع
الست / انا جيبالك هديه هتعجبك اوى
نورا / ميرسى
الست / ايه رايك تيجى تتعشى معانا النهرده
نورا / سورى مش هينفع
الست / خلاص هاجى انا اتعشى معاكى بالليل ايه رايك
نورا / تنورى
الست / بصى يا نورا ايه رايك ننسى كل اللى فات اى كان بقى مين اللى غلطان
نورا تبصلها
الست / انتى روحتى عند ابوكى و عيشتى معاه و مستحملتيش تقعدى هناك سنه على بعضها
نورا / خلاص يا ماما ارجوكى
الست / ايه رايك نروح انا و انتى البيوتى سنتر ماذر اند دوتر ليك اولد تايمز
نورا / لا حقيقى مش قادره بقى انتى بتتعاملى كان مفيش اى حاجه حصلت لا فى حاجات حصلت حاجات مش قادره انساها و مش هقدر مفيش حاجه هترجع زى زمان
الست / و اخرتها
نورا / زى ماحنا طول مانتى متمسكه بالراجل ده هنفضل زى ماحنا
الست / هو ده الحل الوحيد من وجهه نظرك انى اطلق من وليد عشان تنبسطى و ابوكى كمان يكون مبسوط لكن انا مش مهم عندكوا صح سعادتى ملهاش اى قيمه لا عندك و لا عند ابوكى
نورا / انا لو منك اعمل زينا و ادور على سعادتى بنفسى و اختار الشئ اللى يسعدنى و دى مش هتكون اول مره تعمليها محضرتك اخترتى قبل كدا اختاريه تانى و انسينى و لو مصاريفى زياده عليكوا بناقص انا مطلبتش منكوا فلوس و مش هطلب و لو عاوزه الشقه خديها و لو عاوزه روحى كمان خديها
الست / مفيش فايده مالكلام معاكى زى ابوكى بالظبط
نورا / شكرا نورتى
الست تمشى و ترزع الباب وراها و نورا تقعد تعيط
..................................
فى شقه امل
امل قاعده و مرام قاعده جنبها و معاها كيكه شيكولاته
مرام / يا بت خلى عندك دم و كلى اى حاجه دانا عملاهالك مخصوص
امل / يا بنتى مانا كلت
مرام / الشوكتين دول كلتى الله يرحم اما كنتى بتضربيلك حتتين تلاته فالقاعده
امل / ههههههههههههههه
مرام / ايوه كدا يا بت ادحكى محدش واخد منها حاجه
امل / فدى معاكى حق محدش هياخد منها حاجه على الاقل محدش مننا
مرام / و لا منهم يا امل بالعكس تبات مظلوم و لا تباتش ظالم ليكى رب اسمه المنتقم الجبار 
امل / و نعم بالله
مرام / تعرفى يا بت انا لو منك اقعد ادعى و استغفر يا بت دا سيدنا يونس خرج من بطن الحوت عشان كان بيستغفر انتى مش هتطلعى مالمشكله الهبله دى استغفرى
امل / لا اله الا انت سبحانك انى كنت من الظالمين
تليفون مرام يرن مرام تبص
مرام / شوفتى اديكى يادوب بتنوى و مازن بيتصل ثوانى اشوفه تلاقيه جايب اخبار حلوه باذن الله
مرام تقوم تقف جنب الشباك
مرام / الو ازيك
مازن / عاوز اشوفك ضرورى
مرام / طب متيجى
مازن / انتى عند امل صح
مرام / اه عرفت منين
مازن / المكان الطبيعى واحده زيك تكون فيه
مرام / تقصد ايه بواحده زيي يعنى مش فاهمه
مازن / مقصدش حاجه وحشه اهدى ايه انتى قاعده على بوتجاز انا اقصد واحده جدعه يعنى
مرام / بغض النظر اسلوبك مش حلو
مازن / طب نسيب كل حاجه بقى و نمسك فاسلوبى بقى هو يوم باين من اوله
صمت ثوانى و تكسره مرام بحماس
مرام / ايه ده بجد عندك اخبار حلوه
مازن / انتى بتقولى ايه
مرام / عاوز تيجي تبلغها لامل بنفسك طب متيجى دلوقت
مازن / امل جنبك طيب انا مش هينفع اجى بس لازم اتكلم معاكى ضرورى فاى حته بصى محمود معاه العنوان بتاعى
مرام / يا خساره طب خلاص على العموم على الاقل اطمنا لما تخلص الحوار اللى وراك ده بقى ابقى تعال
مازن / هستناكوا متتاخروش
مرام / حاضر هبلغها مع السلامه
مازن / سلام
مرام تقفل و تروح تقعد جنب امل
امل / انتى كدابه فشله على فكره
مرام / انا ؟؟؟ انا عمرى مكدب على فكره
امل / انا قولت مفيش فايده
مرام / بصى احنا منعرفش فى ايه فلحد منعرف ممكن تعملى اللى اتفقنا عليه و تستغفرى و باذن الله باذن الله خير
امل تهز راسها
مرام / انا هنزل هتعوزى حاجه
امل / مرام
مرام / نعم
امل / الناس دى واصله اوى و احنا مش قدهم
مرام / معانا ربنا اقوى منهم كلهم متخافيش يلا سلام
امل / سلام
مرام تطلع تقابل امينه بره
امينه / ها كلت حاجه
مرام / شوكتين بس على الاقل بقت احسن شويه
امينه / ربنا يكرمك دنيا و اخره يا مرام يا بنت صابرين
مرام تبتسم و تفتح باب الشقه و تنزل
................................
فى شقه نورا
جرس الباب يضرب تروح تفتح تلاقى انس
انس / ايه روحتى و قولتى عدولى
نورا / انا مش فالمود ماشى خلي هزارك لوقت تانى
انس / بقولك ايه الدنيا والعه بره فمن فضلك بلاش الاسلوب ده معايا
نورا/ خير يا انس
انس /  هيجي منين الخير انتى مقولتليش ليه ان نيفين حامل
نورا / انا معرفش انها مقالتلكش اصلا
انس / مقالتش زياد اللى قالى و بيقولى انه ابنى و لازم اتصرف و حوار كدا انتى عارفه انى مليش فيه
نورا / تيبكال انت
..........................................