السكه شمال بقلم / لولو_محمد ( كامله )

الحلقه ١٥٥

(((((((((السكة شمال ))))))))))
#لولو_محمد
الحلقه 155
شريف / و بصراحه يا تيته احنا كمان خايفين عليكى اوى انتى كمان لازم ترتاحى
سميحه / انا مرتاحه يا ولاد صدقونى
محمود / يا تيته انتى من امتى و انتى قاعده عالكرسى ده اخر حاجه دخلت بطنك كانت ايه
شريف / بصى يا تيته اوعدك انى مش هتحرك من هنا بس عشان خاطرى عشان خاطر مازن و مرام لو لينا ذره غلاوه عندك روحى كلى لقمه و ارتاحى ساعه و لا اتنين و تعالى تانى
سميحه / عاوزنى اسيب بنتى لوحدها جوه و امشى انت عاوزنى ارتاح و بنتى فى العنايه
محمود / يا تيته مانتى لو مرتحتيش هتخشى جنبها بعد الشر يعنى و هى محتاجاكى على رجليكى دلوقت ان كانت هى و لا مازن
..................................
شريف / يا تيته متقلقيش والله مهتحرك من هنا و لو فى اى حاجه حصلت اوعدك هكلمك
سميحه / انتوا بتقولوا ايه يا ولاد مش هقدر والله مهقدر
محمود / طب انا هكلم ماما تيجى تقعد مكانك هنا
سميحه / سيب امك فى حالها زمانها نايمه هو انتوا غاويين تعب و خلاص
محمود يبص لشريف بحرج و يبص فى الارض
سميحه / الله يعينها من ساعه اللى حصل مرتاحتش عماله رايحه جايه عليا كل شويه تجيبلى فى اكل مره و تجبلى فى غيار مره و هى مش صغيره على كل ده
شريف / مانتى كمان مش صغيره يا تيته مع انك يعنى نمسك الخشب ميبانش عليكى بس برده يعنى
سميحه / هههههههههههههه يا بكاش
شريف / عشان خاطرنا يا تيته لو لينا ذره غلاوه عندك بالله عليكى يا شيخه تروحى ترتاحى ساعتين تلاته بس و ارجعى تانى
سميحه تبصلهم محمود يسندها تقوم
سميحه / هخلى التليفون جنبى
شريف / و انا مش هتحرك من هنا
سميحه  / ربنا يباركلى فيكوا يا ولادى و لا يحرمنى منكوا ابدا
سميحه تمشى مع محمود و شريف يقعد قدام الباب و عينه عليه ثوانى و يمسك الموبايل و يتصل بحد
شريف / ازيك عامل ايه دلوقت
مازن / كويس مرام عامله ايه
شريف / احسن الحمد لله بس لسه فى العنايه
مازن / خليك جنبها يا شريف انا عارف انك مرهق و تعبان و انى تقلت عليك اوى بس انت الوحيد اللى اقدر اثق فيه فاى حاجه تخص مرام مليش غيرك
شريف / بطل عبط دى اختى الصغيره انا قاعد قدام باب العنايه اهو لو فى جديد هبلغك طمنى انت بس عليك انا بجد مخنوق اوى بسببك
مازن / انا كويس احسن كتير جابولى اكل و بحاول اهو بس والله يا شريف مبيتبلع
شريف / حاسس بيك بس لازم تدوس على نفسك البت الغلبانه اللى جوه دى اكيد هتسال عنك لازم تبقى جنبها
مازن / باذن الله يا شريف باذن الله
شريف / روح ارتاح و انا اى جديد هكلمك
مازن / تمام تمام مع السلامه
شريف يقفل و يتصل بحد تانى
شريف / ازيك يا ماما عاملين ايه
الست / احنا كويسين يابنى انت عامل ايه طمنى عليك
شريف / انا كويس الحمد لله
الست / و مازن و مرام عاملين ايه
شريف / مدمرين عالاخر ادعيلهم يا ست الكل الموضوع هنا صعب اوى
الست / طبعا يابنى فرحتهم اتكسرت بس ربنا بيهون يابنى و انت خليك جنبهم و باذن الله خير
شريف / لو عوزتى اى حاجه او حصل اى حاجه
الست / هكلمك متقلقش انت خالص و خليك فى اللى انت فيه
شريف / هههههههههه ماشى يا ست الكل هتعوزى حاجه
الست / هعوز سلامتك يا ضنايا مع السلامه يا حبيبى لا اله الا الله
شريف / محمد رسول الله سلام سلام
شريف يقفل التليفون و يفرد ضهره لورا يطرقع و هو بيتمطع و يرجع راسه عالحيطه و يربع ايديه و ينام عالكرسى و هو قاعد
..........................
فى شقه ميار
لبنى بتتكلم فى التليفون
لبنى / والله العظيم
احمد / اعمل ايه طيب مهو انا مكنتش متخيل انك هتكلمينى بالسرعه دى
لبنى / بطل استظراف انت هتجننى ازاى تروح العزا و الكل يعرف انك جيت
احمد / ماكيد الكل هيعرف انى جيت هو انا داخل تهريب انا داخل بطياره يعنى لو سالوا فى اى جهه هيعرفوا انى وصلت و هيعرفوا وصلت امتى كمان مش حوار يعنى و بعدين انا معملتش حاجه استخبى منها
لبنى / انت هتستهبل
احمد / بصى يا لبنى لو عندك دليل واحد عليا انا مستعد اروح اسلم نفسى حالا تمام يا قلبى
لبنى / متقولش قلبى
احمد / امال اقول ايه
لبنى / دانت انسان مستفز
احمد / صحيح يا لبنى انتى كنتى ناويه تروحى لمامتك فعلا و لا لما عرفتى ان زياد بيرقبك غيرتى وجهتك و روحتيلها
صمت ثوانى
لبنى / دانت كمان بتراقبنى بقى
احمد / انا عينى عمرها متشالت من عليكى حاولت والله بس للاسف مش قادر
لبنى تروح تبص مالبلكونه العربيات راكنه بطول الشارع عالناحيتين
احمد / سكتى ليه
لبنى / انا مكنتش اعرف ان زياد بيراقبنى مقاليش حاجه تفتكر هو بيشك فيا زياد مجنون و لو عرف انى خنته معرفش ممكن يعمل فيا ايه و يا ترى كان بيراقبنى من امتى
احمد / من ساعه مخرجتى مالفيلا مش قبل كدا متخافيش انا واخد بالى كويس
لبنى / طب افرض كنت جيتلك الفندق
احمد / مكنتيش هتلاقينى انا سبت الفندق و روحت فلتى الجديده هتعجبك اوى
لبنى / نقصاك انا
احمد / صحيح يا لبنى هو انا اسجل النمره دى عندى و لا انتى جيباها تمويه
لبنى / تليفونى لازم يكون متاح زياد هيتجنن اصلا من يوميها انه معرفش يوصلى خفت يتصل عليا يلاقينى مشغول يعمل حاجه مش مظبوطه
احمد / انتى بتخافى من زياد ده زياده عن اللزوم عملاله قيمه عالفاضى
لبنى / انا اعرف زياد اكتر منك زياد مش بالبساطه اللى انت متخيلها زياد مش سهل و مش اهبل هو اه ميبانش عليه و لعلمك هو فخور جدا ان الكل بيستهفائه و بيبذل مجهود انه يفضل فى عنين الكل كدا بالنسباله ده بيخليه بره دايره الشك بس الحقيقه انه بيحرك الكل على مزاجه حتى مازن
احمد / ههههههههههههههههه و ايه كمان
لبنى / ابعد يا احمد سيب البلد و امشى
احمد / تعالى معايا
لبنى / مش هاجى مش هسيب زياد انا مش هسيب زياد فهمت ولا لا
احمد / ههههههههه لو كان مازن اللى بيكلمك دلوقت
لبنى / و انت هتجيب نفسك لمازن و لا ايه
احمد / انتى شايفه كدا
لبنى / مع السلامه يا احمد
احمد / هقتلهولك يا لبنى
لبنى / لو قربت منه لو لمست منه شعره قسما بالله المرادى اقتلك قسما بالله يا احمد لخليك تتمنى الموت و متطولوش لو قربت منه يا احمد لو بس فكرت هسلخك حى انت فاهم و لا لا
احمد / سلام يا لبنى
لبنى / احمد ... احمد انا بكلمك ... احمد رد عليا ... الو الو ..... يابن الكلب يابن الكلب والله مهرحمك يابن الكلب والله مهسيبك
لبنى تفضل تروح و تيجى و هى هتتجنن
..........................
فى فيلا زياد
مونى / هتفضل قاعد كدا لا منك صاحى و لا منك نايم
مازن / خالو مات و مرام فى العنايه فاضل ايه يا مونى مين تانى من حبايبى هيتاذى بسببه
مونى / مش بسببك يا مازن
مازن / بسببى يا مونى تعرفى انا فضلت كتير اوى بتابع مرام من بعيد بحبها من بعيد بس كنت عارف انى لما هقرب منها لما الكل يعرف انى بحبها ان الكل هيحاول ياذيها ان الكل هيحاول يدمرنى بيها و ده اللى حصل
مونى / دا نصيب
مازن / تعرفى دى العربيه رقم كام فى كام شهر .. التالته تلت عربيات ادمروا من ساعه ممرام دخلت حياتى
مونى / قول كدا بقى انت زعلان عالعربيه ههههههههههههههههههههه
مازن / زعلان على نفسى يا مونى على حياتى اللى مش عارف افرح فيها على حبايبى اللى مش قادر احميهم على فرحتى اللى ماتت من قبل حتى متتولد
مونى / متقولش كدا قوم بالسلامه و كملها ايه يعنى لما اتاجلت شويه هو يعنى خالو صفوت مش كان نفسه يفرح بيك يا مازن
مازن / اكمل ؟؟ مع مرام ؟؟ لحد امتى لحد ميقتلوها بجد مرام مكنش المفروض تدخل حياتى يا مونى مرام حياتها باظت و اتلخبطت حياتها بقت فى خطر
مونى / انت بتقول ايه يا مازن انت و مرام بتحبوا بعض و اللى بيحصل ده كلو مرحله و هتعدى مينفعش اللى بتقوله ده مرام لو سمعته هتزعل اوى
مازن / لما كنا فى السخنه مرام كانت عاوزه تسبنى فى حاجات حصلت هناك متعرفيهاش اولجا حاولت تقتلها
مونى / انت بتقول ايه
مازن / اللى حصل مقولنالكوش عشان منكبرش الموضوع و عشان كدا انا و مرام و صافى و شريف مكناش معاكوا معظم الوقت عشان مرام كانت منهاره هى نفسها قالتلى الكلام ده قالتلى ان حياتها كانت بسيطه و انا كلكعتهالها كانت عاوزه نطلق
مونى / انا مش قادره اصدق
مازن / انا هطلق مرام يا مونى هبعدها عن كل ده مش هقدر اشوفها بتتاذى بسببى اكتر من كدا مش هقدر ادمرلها حياتها اكتر من كدا
مونى / دا كلام بتقوله فى لحظه ضعف بس صدقنى يا مازن لما تقوم بالسلامه هتنسى كل الهبل ده
مازن / خالو صفوت مات يا مونى هستنى ايه تانى لما مرام تموت هى كمان انا عشت كتير قوى من قبل ما تدخل حياتى و انا معجب بيها كنت عارف ان قربى منها هياذيها الاشكال الزباله اللى احتكيت بيهم فى حياتى اللى كنت بشوط فيهم على اساس ان معنديش اللى اخسره دلوقت بقى عندى و مش هستحمل يجرالها حاجه
مونى / للدرجادى بتحبها
مازن / انتى اللى بتسالى يا مونى
مونى / امال ازاى هتستحمل بعدها ازاى هتقدر تطلقها ازاى اصلا هتقنعها بحاجه زى دى هتهون عليك تجرحها بالشكل ده انت متخيل ان انت او هى ممكن تكونوا سوعدا بعاد عن بعض فوق يا مازن انت بتعذب نفسك و هتعذبها عالفاضى و بعدين اسمحلى يعنى بمبداك ده انت ليه مش خايف عليا انا و بابا و زياد هو احنا مش مهمين بالنسبالك ليه مش بتحاول تخرجنا بره حياتك
مازن / مانتوا بره حياتى فعلا يا مونى كلها ايام و تسافرى انتى و كامل لندن و بابا يرجع دبى و لا روسيا و لا يشوف هيكمل شغل فين و زياد اهو مع لبنى فى دنيتهم و هرجع انا شقتى
مونى / هترجع للى كنت فيه يا مازن هتضيع اللى باقى من عمرك فى الهبل ده مرام سمحتك زمان لكن المرادى مش هتسامحك يا مازن انا مش هسامحك ربنا هتقوله ايه
مازن / اعمل ايه ... قوليلى اعمل ايه انا تعبان
مونى / ارتاح تعبان ترتاح لحد متخف و تقف على رجليك تانى مش تتعب نفسك اكتر انت كدا بتدمر نفسك بتموتها خالص
مازن / ياريت بقى يمكن نرتاح كلنا
مونى / اخص عليك بعد الشر للدرجادى ملناش اى قيمه عندك انت متخيل اننا مش هنزعل عليك انا و مرام و بابا و زياد و كل الناس اللى بتحبك من اول شريف لحد صافى تفتكر مفيناش حتى و لو حد واحد بس هيتقهر عليك اهون عليك توجع قلبى يا مازن للدرجادى مليش خاطر عندك متقولش كدا تانى
مازن يمسح دموعه اللى نزلت منه غصب عنه و يبص الناحيه التانيه مونى تعدل وشه ناحيتها
مونى / انا عارفه ان خالو صفوت فراقه صعب اوى عليك بس صدقنى علاجك الوحيد عند مرام هى الوحيده اللى هتخفف وجعك و تريح قلبك صدقنى مرام بتحبك زى مبتحبها و اكتر بلاش تجرحها عشان خاطرى يا مازن فكر تانى فى اللى هتعمله ده عشان خاطرى عشان خاطر مرام متخليهاش تندم انها حبتك ووثقت فيك و سلمتك قلبها استنى حتى لما تقوم بالسلامه مالمستشفى من هنا لوقتها فكر تانى انا متاكده ان رايك هيتغير
ابراهيم يدخل
ابراهيم / رايه يتغير فى ايه
مونى / مفيش يا بابا
مازن / انا هطلق مرام
ابراهيم / عين العقل والله العظيم عين العقل تعرف هو ده بالظبط اللى انت محتاجه خدت ايه من دخول الاشكال دى حياتك اهو الراجل الطيب المحترم مات تعرف انا عارف هعمل ايه انت خليك مرتاح و انا هخلى زياد يصفى كل شغلنا فى مصر و نسافر البلد دى معدلكش فيها حد اللى كان رابطك فيها خلاص بقى فمكان احسن دلوقت ليك مين تانى هنا و الجنيه اللى هتكسبه هنا هتكسب ضعفه بره بالدولار
مونى / بابا لو سمحت
ابراهيم / بس يا مونى انا اصلا كنت متاكد ان الصدمه دى هتفوقك اصل لو حاجه زى دى مفوقتكش ايه تانى ممكن يفوقك انا هكلم شريف اخليه يخلصلك حوار الطلاق ده بلا قرف
مونى / حرام عليك يا بابا
ابراهيم / حرام عليا ايه مانا هديها حقوقها كامله انت كنت كاتبلها مؤخر كام البت دى
مازن يبصله و الدموع بتنزل من عينيه
ابراهيم / متقلقش انا هراضيها انا هديها اكتر من اللى هى بتحلم بيه متقلقش ارتاح انت دلوقت خليكى جنبه يا مونى متسيبهوش لحد ميقوملنا بالسلامه
ابراهيم يخبط على كتف مازن بفرح و يقوم و يمشى مونى تقعد جنب اخوها و تمسح دموعه
مونى / مازن
مازن يغمض عينيه و يفرد نفسه و يديها ضهره الدموع تنزل من عينيها و تقوم تجرى ورا ابوها
مونى / بابا بابا لو سمحت
ابراهيم / فى ايه يا مونى خير مش قولتلك متسيبيش مازن لوحده
مونى / مرام فى العنايه لو ليا غلاوه عندك لو بتحبنى بجد متعملش اى حاجه دلوقت ارجوك انا عارفه انك مبتحبهاش بس ارجوك متقتلهاش استنى اما تقف على رجليها
زياد / هو فى ايه مالك يا مونى بتعيطى كدا ليه
مونى / مازن تعبان و مش عارف هو بيقول ايه مينفعش ندمرله حياته ارجوك يا زياد قول حاجه
زياد / انا مش فاهم حاجه
ابراهيم / مازن قال انه هيطلق مرام و الموضوع انتهى انا هكلم شريف يخلص الموضوع ده النهرده
مونى / البنت فى العنايه المركزه يا ناس انتوا ايه مبتحسوش البنت مستحملتش تعرف ان خالو مات هتطلقوها كمان ايه للدرجادى مش قادرين تصبروا عليها خلاص دمها بقى رخيص والله يا بابا لو عملت حاجه قبل ممازن يقوم و البنت دى تقوم لتنسى ان ليك بنت خالص سامعنى هموت نفسى
كامل يدخل بيجرى على صوت صريخ مونى و هى منهاره مالعياط
ابراهيم / انتى بتقولى ايه انتى انتى بتكلمينى كاننا قتالين قتله و هنروح ندبحها
كامل / فى ايه
مونى / هتدبحوها لما تطلقوها فى الظروف دى و الوقت ده يبقى بتدبحوها لما تستغلوا ان مازن مش طبيعى و مش فوعيه
ابراهيم / مازن عمره مكان فوعيه زى النهرده
مونى / حرام عليك هتدمره مازن بيحبها مازن هيموت من غيرها
ابراهيم / ادى اللى بناخده مالمسلسلات التركى اللى بيفرجوا عليها العيال انا مش فاضى للكلام الفاضى ده
مونى تسيبهم و تجرى و هى منهاره مالعياط كامل و زياد يجروا وراها
ابراهيم / مونى مونى انتى يا بنت انتى يا بنت يا مونيكا هارمونى انتى يا بنت
................................
فى المستشفى عند مرام
مونى بتدخل تجرى و هى منهاره مالعياط شريف يحس بيها يصحى مفزوع
شريف / فى ايه يا مونى مالك
مونى / مرام عامله ايه دلوقت
شريف / كويسه فهمينى مالك مازن جراله حاجه فى ايه بتعيطى كدا ليه و ازاى تنزلى لوحدك فى وقت زى ده
كامل و زياد يدخلوا بيجروا
شريف / فى ايه يا زياد ايه اللى حصل مازن جراله حاجه حد يرد عليا فى ايه
كامل / مازن كويس و زى الفل مونى بس شدت شويه مع عمى و اتخنقت مالبيت و كدا
شريف يبص لمونى
زياد / يا اخى مبناخدش مالبنات دول غير وجع القلب
مونى / مازن مش فوعيه مازن تعبان و مكسور اى قرار هياخده دلوقت هيندم عليه العمر كله انتوا ليه مش قادرين تفهموا
شريف / قرار ايه ده
زياد / هيطلق مرام و يصفى كل شغله فى مصر و يسافر يعيش حياته بره
شريف / مستحيل مازن روحه فى مصر
زياد / له مين فى مصر يا شريف هاه له مين خاله مات و مرام مرحله و عدت
مونى / مازن بيحب مرام يا زياد بيحبها
كامل / احنا فى مستشفى هيطردونا كدا اهدوا شويه
زياد / دا قرار مازن محدش اجبره عليه
مونى / هو مقالش حاجه انتوا بتستغلوا ضعفه دلوقت بتدمروه حرام عليكوا
شريف / اهدى يا مونى بس افهم هو مازن قال ايه بالظبط
زياد / زى مقولتلك كدا
مونى / لا محصلش انا اللى كنت حاضره و سامعه انا و هو كنا بنتكلم هو مقتنع ان مرام فى خطر و هى جنبه و هيقتلوها زى مقتلوا خالو مازن من حبه فيها عاوز يبعدها عنه و بابا لما سمع كلمه طلاق قرر انه يصفى كل حاجه و ياخد مازن معاه و مازن مش قادر يتكلم مازن تعبان مش قادر لا يتكلم و لا يقاوح و لا حتى يحارب
تليفون شريف يرن
شريف / ابراهيم بيه ... ثوانى ... ايوه يا باشا ... تمام .... تمام ... بس دا هياخد وقت ... تمام ... متقلقش حضرتك ... تمام ... مع السلامه مع السلامه
زياد / خير
شريف / زى مقولتوا عاوز يطلق مرام من مازن و يصفى كل الشغل فى مصر
مونى / ياربى خدنى و ريحنى
شريف / مونى مونى اهدى لو سمحتى اولا بالنسبه لحوار تصفيه الشغل فبيتهيالى لازم الاول نخلص اعلام الوراثه و مازن يستلم ورثه و بعد كدا يبيعه و دا هياخد وقت دا غير ان صفوت بيه كان مصمم ان مازن ميعملش توكيل لحد حتى انا عشان يضمن ان مازن يجى الشركه و يعمل شغله بنفسه فاى ورق لازم مازن يمضى عليه بنفسه و انا كنت باخدهوله و امضيه او هو يجى الشركه يمضى يعنى مازن لازم يعمل كل الاجراءات بنفسه او يوكل حد فلحد ما ده يحصل للاسف مفيش فى ايدى اى حاجه اعملها فالموضوع ده اما بقى حوار الطلاق فالموضوع مش سبهلله دا فى اجراءات مش هيحصل و زى مقولت مازن ملوش وكيل لازم يطلق بنفسه و ادى دقنى لو مازن عرف ينطقها اصلا دا روحه فيها حطيها قدامه انتى بس و شوفى هيحصل ايه
زياد / طب و لو طلقها غيابى يا فالح
شريف / تمام عشان يطلق لازم اهليه و لازم توثيق الطلاق صح و لا لا و هما لسه مدخلوش يعنى لازم مرام تحضر و جلسه صلح و كدا لان دى تعتبر طلاق بائن باين او حاجه كدا يعنى لا فى عده و لا رجوع عقد جديد و مهر جديد
مونى / انت متاكد مالكلام ده و لا بتسكتنى و خلاص
شريف / بيتهيالى يعنى انا مش خبير يعنى مش كل يوم بطلق و لا انا محامى بس ده على قد علمى بس برده نسال فيها مع انى متاكد اننا مش هنوصل للمرحله دى دا بس حماس من ابراهيم بيه هيروح بمجرد ممازن يقوم مالسرير و مرام توحشه 
كامل / والله كلام زى الفل بس انت ناسى حاجه مهمه جدا اننا هنسافر النهرده بالليل كلنا
مونى تبص لزياد و تبص لكامل
زياد / لا مفتكرش هينفع تسافروا دلوقت
كامل / احنا كنا ناويين ننزل اجازه اسبوع بس لما عرفنا حوار فرح مازن مدينا الاجازه و انا و هى كل حياتنا واقفه و انا ورايا مليون حاجه لازم تتعمل هناك انا عارف ان مينفعش اسافر فوقت زى ده بس
زياد / لا طبعا مينفعش و انت معاك حق و كمان مونى حياتها فعلا هتفضل واقفه لحد امتى
مونى / اصلا مفتكرش بابا ممكن يسافر
شريف / الحقيقه لا هيسافر لما كلمنى فى التليفون قالى انه هيبقى يتابع معايا الموضوع من هناك و عشان كدا وكلنى اخلصهوله هنا
مونى / انتوا بتهزروا انتوا ازاى عوزينى اسيب مازن لوحده فى الظروف دى
زياد / مش هيبقى لوحده يا مونى مازن مش هيبقى لوحده انا هبقى معاه شريف كمان معانا اكيد مش هنسيبه يعنى 
شريف / على فكره سفركوا مش وحش دى فرصه كويسه ان مازن يفكر تانى فى قراره لوحده بعيد عن اى حد ممكن يضغط عليه سفر ابراهيم بيه فرصه كويسه جدا لمازن انه يفوق لنفسه
كامل / وجهه نظر فعلا
مونى / ايوه بس انا مش هقدر اسيبه
كامل / و دراستك يا مونى و شغلى هنعمل ايه انتى عارفه ظروفى
مونى بتبص لكامل
شريف / انا هبقى جنبه اوعدك انى مش هسيبه الا و انا مطمن مليون فى الميه انه زى الفل و هبقى اطمنك عليه اول باول
زياد / اخبار مرام ايه صحيح
شريف / بيقولوا احسن بس لسه فالعنايه ادعيلها
زياد / بدعيلها والله
شريف يبتسم و يبص الناحيه التانيه
...........................
فى شقه مازن
مازن يدخل يقعد عالكنبه و شريف داخل وراه
شريف / انا بس عاوز افهم انت ليه مفضلتش هناك هتقعد هنا لوحدك
مازن / لا هتروح تجيبلى زعتر مالفيلا
شريف / زعتر ؟؟ هنا ؟؟
مازن / ايوه هعيش انا و زعتر هنا فى ايه عندك مشكله
شريف / مازن انت ناوى على ايه
مازن / مش ناوى على حاجه هنام هفضل نايم لحد مربنا ياخدنى خلاص
شريف / طب و مرام
مازن / مالها
شريف / هتسيبها مرميه فى المستشفى كدا عادى مش هتروح تسال عليها
مازن / انت مش بتقول كويسه
شريف / ايوه بقت احسن بس عماله تسال عنك و احنا اعزارنا بدات تخلص العزا و اهله مسافرين و بيودعهم فى ايه يا مازن مالك
مازن / قولها اى حاجه لحد متروح
شريف / و بعدين
مازن / و لا قبلين كل واحد فينا يروح لحاله
شريف / انت بتهزر صح انت بجد هتطلقها هتقدر تعمل كدا
مازن / اه
شريف / و فعلا هتصفى كل حاجه هنا و تهاجر
مازن / ايوه هسافر و مش هرجع هنا تانى
شريف / طب و انا
مازن / متقلقش هسيبلك مكافاه نهايه خدمه كويسه تبدا بيها مشروعك مش هتحتاج تشتغل عند حد تانى
شريف / مكافاه نهايه خدمه ؟؟ فلوس يعنى ؟؟ طب المكافاه دى شامله الصداقه اللى بنا و لا الشغل بس بما انى مجرد موظف عندك يعنى
مازن / بلاش نمشى فى السكه دى ماشى
شريف / طب و مرام هتديها هى كمان مكافاه نهايه الخدمه و لا دى ظروفها ايه
مازن / هديها حقوقها كامله و زياده شويه
شريف / حقوقها ؟؟ انت بتتكلم جد ؟؟ و لا انت مدينك حبوب هلوسه و لا انت وضعك ايه
.......................................