السكه شمال بقلم / لولو_محمد ( كامله )

الحلقه ٤١

(((((((((((السكة شمال )))))))))
#لولو_محمد
الحلقه الواحد و الاربعون
ماهى / انا هلغى الحفله
مازن / ليه مانا هكون خرجت اصلا عادى يعنى
ماهى / ايوه بس الدكتور قال بلاش مجهود
مازن / انا مش عيان ماشى فبلاش تحسسينى انى هموت عادى يعنى يا نور مش كدا
ماهى / انت ادايقت و لا ايه انا بس كنت
مازن / بتبينى انك خايفه عليا فاهم
ماهى / ببين !!!
.................................
مازن / هو شريف لسه مجاش
ماهى / لا بره
مازن / طب ناديله لو سمحتى
ماهى تقوم تفتح الباب شريف يدخل
مازن / لو سمحتى يا نور سبينا شويه لوحدنا
ماهى تبصله و ترفع حاجبها و تخرج و ترزع الباب وراها مازن ينفخ شريف يدحك
مازن / خير طمنى
شريف / دا كشف الناس اللى وافق يدربهم فى الشركه و مكان تدريب كل واحد فيهم طبعا الشباب كلهم اتوزعوا محافظات بحجه ان البنات مش هينفع تسافر محمد و سعد اتبعتوا اسكندريه و دى نسخه من العقد بتاع مرام و على فكره رفضت تمضى تقريبا خافت من بند الشرط الجزائى اللى فالصفحه التانيه و عاملها عربيه مخصوص توديها و تجيبها الشركه هى المفروض مساعده مديره مكتبه
مازن / على الاقل عملت حاجه صح
شريف / والله انا لسه برده شايف انك مدى الموضوع اكبر من حجمه
مازن / لا سيبك بقى من كل ده انا عاوزك تعرفلى كل الشغل اللى احمد ماسكه الفتره دى و اى مشروع ناوى عليه
شريف / طب و صفوت بيه
مازن / ماله خالو
شريف / مانت عارف السكه دى اخرتها ايه
مازن / معلش سبلى انا خالو و اعمل اللى طلبته منك
شريف / ماشى هتعوز منى حاجه تاني
مازن / ماما عامله ايه
شريف / كويسه الحمد لله
مازن / تمام امشى انت و متتاخرش عليا فى اللى طلبته منك
شريف / حاضر
شريف يمشى و ماهى تدخل تقف بعيد و تخبط بجزمتها فى الارض
مازن / تعالى
ماهى/  خلصت الاسرار العسكريه بتاعتكوا
مازن / مبحبش حد يدخل فى شغلى
ماهى / و هو انا حد برده
مازن / المفروض اننا نريح بعض مش نتعب بعض
ماهى / طبعا و انا بقى اللى تعباك مش كدا
مازن / لا انا تعبان بس انتى مش عاوزه تريحينى يا ماهى خدينى يا ستى على قد عقلى و ريحينى لحد مخف و بعدين نبقى نتكلم و نتعاتب و نتخانق و نولع فبعض براحتنا بس دلوقت بجد مش قادر
ماهى / حقك عليا يا حبيبى بجد
مازن / انا عاوز انام بليز
ماهى / اوك خلاص ارتاح
مازن / شكرا
..........................
فى الفندق
على ترابيزه مرام
راجل / ههههههههههههههههههههههههه ايوه زى كل مره نيجى مصر و تضحك علينا بكام عشوه على كام سهره لحد منمضى العقود
احمد / هههههههههه يا راجل دا بدل متشكرنى طب بزمتك فى حد بيدلع زيى كدا
مرام تبص فالساعه
الراجل / لا لو عالدلع فانت استاذ
احمد / تلميذك
مرام تبص عالساعه تانى احمد يكلمها بصوت واطى
احمد / اتاخرتى
مرام / هو لسه كتير
احمد / على فكره العربيه بره انتى ممكن تمشى فاى وقت
مرام / ممكن يعنى
احمد / اكيد
احمد / عن اذنكوا ثوانى خدوا راحتكوا
احمد يقوم و ياخد مرام و يطلعوا بره
مرام / هو كل عشاءات العمل بتبقي كدا
احمد/ كدا ازاى يعنى
مرام / دحك و هزار طب فين الاتفاقات
احمد / الاتفاقات عالورق بتتمضى فالمكاتب بس العلاقات بتتعمل فى السهرات اللى زى دى الناس دى مفيش اهبل منهم زى مقالك كدا بتدحكى عليهم بعشوه و سهره فبكره الصبح هيجوا الشركه مبسوطين يمضوا منغير ولا كلمه
مرام / ماشى
مرام تركب العربيه و العربيه تمشى
..........................
فالبيت عند مرام
محمود / سعد كلمنى و قالى انه رتب شنطته و هيسافر قطر الفجر
سميجه / الله طب و انت
محمود / والله لسه مش عارف من ناحيه ماما طايره بالموضوع ده دا مش بعيد تلاقيها حضرتلى الشنطه خلاص تقوليش تقيل على قلبها و مهتصدق تخلص منى
سميحه / هههههههههههههههههههههههه
محمود / و من ناحيه تانيه مش عاوز اسافر قلبى مش مطاوعنى اسبكوا لوحدكوا افرضى حصل حاجه و لا احتجتوا لحاجه
الباب يتفتح و مرام تدخل
محمود / حمد الله عالسلامه ايه الاخبار
سميحه / شوفت اهى جت فمعادها بالمللى اهو عشان بس متقعدش توترنى كل شويه
مرام تدخل تقعد
سميحه / ها عملتى ايه
مرام / زى قلته بالظبط مفتكرش انى استفدت اى حاجه
محمود / عشان تبقى تسمعى كلامى
سميحه / هو ايه اللى حصل
مرام / دحك و هزار و نكت بايخه لازم ندحك عليها عشان نجاملهم و كلام عن فلوس بالهبل بتترمى فحاجات ملهاش تلاتين لزمه لكن كلمه واحده جد ابدا معلومه عن الشغل اتفاق مفيش بس مستر احمد بيقول انه لازم يعمل معاهم علاقات كويسه و الورق و الحاجات دى بتتمضى فى الشركه
سميحه / طب هقوم اجبلك تتعشى
مرام / لا اتعشيت معاهم
محمود / الاكل كان حلو بقى
مرام / اكل فنادق يعنى يا محمود كويس شغال
سميحه / مالك فيكى ايه
مرام / مش عارفه بس الجو معجبنيش
محمود / خلاص متروحيش
الباب يخبط محمود يقوم يفتح مديحه تدخل
مديحه / متيلا يا محمود عشان تريحلك شويه قبل السفر انا حضرتلك الشنطه
محمود / شوفتى يا تيته مش قولتلك مهتصدق تخلص منى
سميحه / ههههههههههههههههههه
مديحه / الحق عليا لو كنت اعتمد عليك كان زمانك بتصحينى الفجر و تقلب البيت قبل معاد القطر بعشر دقايق و احنا بنعملك الشنطه
محمود / انا اصلا لسه مقررتش ان كنت هسافر و لا لا
مرام / متجرب يا محمود هو انت هتهاجر يعنى ايه الاوفر ده
محمود / والله مهتجيب همها
مرام / تبقى جربت
سميحه / هى مش الشنطه اتوضبت
مديحه / حطيتله كل حاجه حتى قمصانه و بناطيله كلها مكويه و مطبقه
سميحه / خلاص يلا روح ارتاحلك شويه بقى و احنا كمان هندخل ننام
مرام / والله احلى كلمه ننام انا هموت و انام
مديحه / الله مش هتحكيلى عملتى ايه
مرام / الصبح يا عمتى هحكيلك كل حاجه الصبح يلا تصبحى على خير دلوقت
مرام تقوم تدخل جوه
سميحه / اسمع الكلام يا محمود و اسعى و اللى فيه الخير يقدمه ربنا
محمود / ماشى يلا يا تيته تصبحى على خير
سميحه / تصبحوا على خير
محمود و مديحه يمشوا و سميحه تقفل الباب
..................................
تانى يوم فى المستشفى
مازن نايم و ماهى نايمه عالسرير التانى تليفون مازن يرن ماهى تصحى تقوم تبص تلاقى مرام ترد بصوت نايم
ماهى / الو
مرام / صباح الخير
ماهى / صباح النور مين
مرام / انا مرام كنت بتصل اطمن على مازن
ماهى / مازن نايم تحبى لما يصحى اقوله حاجه
مازن يصحى
مرام / لا شكرا انا بس كنت بطمن عليه
ماهى / لا كويس متقلقيش انتى نفسك حاجه تانى
مرام / شكرا مع السلامه
ماهى / سلام
ماهى تقفل السكه
مازن / موبايلى ده
ماهى / اه انت ايه اللى صحاك
مازن / مين هاتى كدا
ماهى تديله الموبايل
مازن / مرام ؟؟؟
ماهى / كانت بتطمن عليك حنينه اوى مرام دى يا مازن
مازن يبصلها و يتصل
مازن / ايوه يا مرام ازيك
مرام / صباح الخير انا اسفه لو كنت ازعجتك بس يعنى قولت اطمن عليك عامل ايه دلوقت
مازن / لا ازعاج ايه مفيش ازعاج طبعا ميرسى لسؤالك انا كويس هخرج النهرده اصلا
مرام / طب الحمد لله كويس انى اطمنت عليك لو احتجت حاجه يعنى انت عارف ماشى
مازن / اكيد انتى مش محتاجه حاجه
مرام / لا شكرا يلا هتعوز حاجه انا لازم اقفل
مازن / مع السلامه
مرام / سلام
مازن يقفل و ماهى قاعده قدامه بتبصله
مازن / فى ايه ؟؟؟
ماهى / مفيش انا هدخل التويلت اظبط مكياجى هتعوز حاجه
مازن /لا شكرا خدى راحتك
ماهى / اوك عن اذنك
ماهى تقوم تاخد شنطتها و تدخل الحمام و مازن يفرد ضهره و ينفخ
............................
عربيه الشركه تقف قدام مطعم كبير و السواق ينزل يفتح لمرام الباب
مرام / شكرا
السواق / احمد بيه مستنى حضرتك جوه
مرام تبتسم و تدخل جوه تلاقى احمد قاعد على ترابيزه
احمد / صباح الخير عامله ايه
مرام / الحمد لله تمام ازى حضرتك
احمد / اقعدى افطرى معايا صحيت متاخر ملحقتش افطر فالبيت
مرام / لا انا سبقت حضرتك شكرا
احمد / ايه رايك فى المكان هنا يجنن مش كدا
مرام / فعلا حلو اوى بس معلش هو احنا هنا ليه
احمد / انا هشترى المطعم ده و قولت اخد رايك
مرام / رايى من حيث ايه شكله و مكانه يعنى
احمد / مثلا
مرام / حلو مبروك عليك
احمد / علينا ... مبروك علينا و لا ايه كلام الليل عندك مدهون بذبده و لا ايه
مرام / ايوه بس احنا كنا بنهزر
احمد / خالص انا كنت بتكلم جد جدا الواحد لازم يشتغل الحاجه اللى بيحبها .. الحمد لله شبعت
مرام / الف هنا
احمد / قومى اما افرجك المطبخ
مرام و احمد يقوموا يدخلوا المطبخ مليان ناس شغالين
احمد / ايه مالك مخضوضه كدا ليه كنتى فاكره المطابخ هنا زى مطبخك فى البيت
مرام / لا بس انا مش مستوعبه بصراحه
احمد / احنا اتفقنا لو اكلك عجبنى هفتحلك المطعم و مش هطلب منك منيو محدد اعملى احسن حاجه بتعرفى تعمليها انا عازم الجروب بتاع امبارح عالغدى
مرام ساكته
احمد / ايه هتعملى ايه قدها و لا هتطلعى بق على العموم انا لازم اروح الشركه دلوقت و هاجى معاهم عالساعه تلاته بيتهيالى قدامك وقت كفايا و متقلقيش الناس هنا هيقدمولك كل المساعده اللى محتاجاها و لو عوزتى حاجه كلمينى عالتليفون يلا سلام انا بقى
احمد يبتسم و يمشى و مرام لسه واقفه ساكته مزهوله واحد من الطباخين يناولها افارول تاخده و هى لسه مش مستوعبه تبص وراها تلاقى كل اللى فالمطبخ بيبصولها تبص يمين و شمال تاخد نفس عميق و تبتسم
...........................
فى الفيلا
شريف و زياد مسندين مازن رابط رجله يقعد على اقرب كرسى و لبنى و ماهى داخلين وراه
لبنى / الحمد لله على سلامتك يا مازن
مازن / شكرا
ماهى / انا هطلع اجيب حاجتك من اوضتك فالاوضه اللى تحت عشان متطلعش السلم 
مازن يهز راسه و ماهى تمشى و لبنى بتبص عليها و ترجع تبص على مازن
لبنى / بس كويس انك قولت هترجع الفيلا مش شقتك اهو تبقى وسطنا و ناخد بالنا منك كويس
مازن / كتر الف خيرك مش عارف هودى جمايلك دى فين انا جعان و قرفت من اكل المستشفى
لبنى / طب بس قولى نفسك تاكل ايه و انا احضرهولك بنفسى
مازن / بنفسك !! ينهار اسود ليه حد قالك عاوز ارجع المستشفى تانى
زياد / ايه يا مازن الحق عليها يعنى
مازن / ايه يا زيزو بهزر معاها مالكوا خلقكوا بقى ديق كدا ليه
ماهى تنزل من فوق ووراها واحده شايله شنطه صغيره ماهى تروح تقعد جنب مازن و الست تروح اوضه فى الجنب
ماهى / انا لميتلك الحاجات المهمه و اى حاجه تانيه نبقى نحتاجها هبقى اجيبهالك
مازن يبوس ايدها
مازن / ربنا ميحرمنى منك ابدا يا قلبى بقولك ايه انا نفسى اكل نجرسكوا ممكن توصى الطباخ يعملهالى
ماهى / بس كدا انت تؤمرني
ماهى تقوم تروح عالمطبخ و لبنى واقفه بتغلى
لبنى / يا سلام و انا مكنتش هعرف اقوله
مازن / مش عاوز اتعبك كفايا عليكى زياد
زياد / و انا و انت ايه
مازن / لا معلش يا زيزو اذا كنت مبطلبش منها و انا عاذب مش هطلب منها و انا عازب هطلب و انا مرتبط ربنا يخلى ماهى بقى هتعملى كل اللى انا عاوزه
ماهى تدخل و مازن يبتسملها
مازن / ساعدنى يا شريف ادخل اوضتى الجديده هموت و افرد ضهرى شويه
شريف / حاضر تعال
شريف يساعد مازن زياد يحاول يساعده
مازن / ملوش لزوم يا زيزو ماهى هتساعدنى
ماهى تجري تساعده و لبنى واقفه مدايقه شريف و مازن و ماهى يمشوا
لبنى / شوفت عشان تبقى تصدقنى
زياد / فى ايه
لبنى / الست ماهى واحده واحده بتسحبه من تحت رجليك وواحده واحده مش هيبقى ليك اى لازمه فى حياته
زياد / متافوريش
لبنى / بكره لما تطردنا من هنا و تقولك دا بيتى و بيت جوزى و ابقوا تعالوا زورونا فى المناسبات متبقاش تعيطلى اوعى انا طالعه انام
لبنى تزق زياد و تطلع فوق
.........................
فى المطعم
مرام بتعمل جناش شيكولاته شيف يدخل يكلمها
الشيف / انتى درستى الطبخ فين يا مرام
مرام / مدرستش دى هوايه عندى بحب الطبخ و البركه فى النت و اليوتيوب بقى
الشيف / انا منكرش انك شاطره و نفسك حلو جدا بس دا ميمنعش انك لازم تنمى الموهبه دى بالدراسه
مرام / بصراحه عمرى مفكرت فى الموضوع ده
الشيف / على العموم لو احتاجتى اى حاجه انا تحت امرك
مرام / ميرسى ... انا كدا خلصت
واحد من اللى شغالين يدخل
الشاب / احمد بيه بره و بيسال على حضرتك
مرام / حاضر هروحله ... حط دى فالتلاجه لو سمحت
مرام تطلع بره
..........................
فى الفيلا
مازن بيلعب بالموبايل
ماهى / يوووه انت مزهقتش ماللعبه دى
مازن / لا لسه لما هزهق هبقى اشوف لعبه
ماهى / يا سلام
مازن / عاوزه ايه يا نور
ماهى / ايه يا مازن يعنى لما خلاص بقيت معايا و لوحدنا سايبنى و ماسك الموبايل
مازن / اعمل ايه فالنحس مكسور يا قلبى مكسور و تعبان زى مانتى شايفه شوفتى رجلى فيها واوا ازاى
ماهى / تصدق ان انا غلطانه انى بتكلم معاك
ماهى تتقمص و تروح تقعد بعيد
مازن / ههههههههههههههههههههه لا مهو انا لو قادر اقوم اقعد جنبك هناك عشان اصالحك مكنتيش هتزعلى مالاول
ماهى تبصله
مازن / بقولك ايه متروحى تجبيلى اى حاجه حلوه من ايديكى الحلوه دى
ماهى / حاضر عشان تعرف الفرق اللى بينى و بينك بس
مازن / نور عينى يا ناس
ماهى تطلع بره و اول متقفل الباب يمسك المخده و يحدفها وراها و ينفخ
مازن / ادعى عليك يا بابا و لا اولع فنفسى و لا اعمل ايه بالظبط اووووف
..............................
فى المطعم
مرام / بجد انتوا متعرفوش انا فرحانه بالكلام ده قد ايه
احمد / بكره الصبح تعملى حسابك انك تيجى الشركه عشان تمضى العقد الجديد و انسى مكتبى خالص انتى مكانك مكنش هناك مالاول انتى مكانك هنا
مرام / انا مش عارفه اقول لحضرتك ايه
راجل / تعرفى انا هكون زبون مقيم عندك هنا فكل مره انزل فيها مصر لازم ازورك بس تعمليلى اكله حلوه زى دى من ايديكى الحلوين
مرام / باذن الله
احمد / كانت فكرانى بهزر
الراجل / ههههههههههههه انا اتعاملت مع احمد ووالده الدكتور عصام الذهبى الكلمه عقد
مرام تبتسم
احمد / انا هستاذنكوا اسرق الشيف ثوانى على جنب
احمد ياخد مرام مكتب و يقفل الباب
احمد / انا فخور بيكى لدرجه متتخيلهاش
مرام / انا مش مصدقه نفسى حاسه انى بحلم انا مش عارفه اقول ايه
احمد / لا صدقى و لعلمك انتى لسه مشوفتيش حاجه دى بس البدايه مدام عندك طموح يبقى اكيد هتوصلى
مرام / انا مش عارفه اشكرك ازاى
احمد / متقلقيش هتشكرينى بس مش دلوقت
مرام تبتسم
احمد/ انا هخلى المحامى يظبط العقود و متخافيش هخليكى تروحى البيت بدرى عشان تيته متقلقش
مرام / تيته ينهار ابيض انا مقولتلهاش لحد دلوقت دى هتطير مالفرحه لما تعرف
احمد / و مستنيه ايه يلا اجرى عالبيت
مرام / بجد ؟؟؟
احمد / ههههههههههههههههه انتى عسل اوى يا مرام عامله زى الاطفال بالظبط
مرام وشها يحمر
احمد / هههههههههههههههههههههه امشى يا مرام امشى
مرام / انا متشكره اوى شكرا بجد مش عارفه اقولك ايه شكرا
مرام تمشى و احمد يطلع الموبايل و يفر فالنمر
احمد / سمعت انك خرجت مالمستشفى قولت اطمن عليك
مازن / لخص و هات مالاخر عاوز انام و مش رايقلك خالص
................................