السكه شمال بقلم / لولو_محمد ( كامله )

الحلقه ١٨٧

((((((((((((السكة شمال ))))))))))
#لولو_محمد
الحلقه 187
شريف / و اعيد البروبوزال المنيل ده قدامهم كلهم و اطلبك يعنى يمكن بطريقه احسن شويه و لا انتى عاوزه يفط فى الشارع و ورد و بلالين و حركات و لا ايه
صافى تمد ايدها لشريف يلبسها الخاتم و يمدلها ايده تلبسه الدبله و صمت و فجاه الكل يزرغط الاتنين يتفزعوا و البنات يتلموا حوالين صافى يتفرجوا عالخاتم
الست / كدا مش فاضل غير اننا نحدد معاد الفرح
شريف / لسه الاول لما نكلم طنط مامه صافى هى اسمها ايه صحيح
صافى / اسمها عائشه
تقى / هو انتى كدا مش هتسافرى تانى خلاص
صافى تبص لشريف و الكل يبص لبعضه
...........................
مرام / لسه قدامكوا اسبوع بحاله مش لازم كل حاجه تحصل بسرعه يعنى فكروا براحتكوا
شريف / الموضوع مش محتاج تفكير هى بدات سكه و بيتهيالى لازم تكملها دا حلمها
صافى / بس لو
شريف / انا متاكد انه هيضيفلك و بعدين مش بعد كل ده
الست / ايوه بس فى حاجات كتير محتاجه تجهيز لحد الفرح
شريف / امال اخوات العروسه راحو فين
تقى / انا اللى هصمملك فستان الفرح
مازن / طب بالنسبه لبدله العريس هاه
شريف / لا ابوس ايدك انا مش هكون ضحيه لتصاميمها الشريره
تقى / اعداء النجاح
شريف / بصوا خلوا كل حاجه لوقتها الاول خلونا نشوف طنط عيشه
صافى / عائشه
شريف / امال انا قولت ايه
صافى / مامى ممكن تعدى اى حاجه غير انك تنطق اسمها غلط تقريبا مكنش فى حاجه بتقفلها من مصر غير عيشه دى اسمها عائشه
شريف / عائشه ...عائشه.. عائشه
مرام / ايوه اقعد اتمرن عليه كتير كدا
شريف / لا خلاص عائشه تمام
مرام / بصوا انا شايفه اننا مش لازم نستعجل خلوا كل حاجه ماشيه زى ماهى صافى ترجع تكمل دراستها و شريف يرتب اموره هنا و يظبط كل حاجه و انا و البنات هنساعدكوا فى اى حاجه برده و على ما صافى ترجع تكون كل حاجه تمام نحدد معاد الفرح و كدا
مازن / دا كلو بعد موافقه طنط عائشه
صافى / مش هتقول حاجه يعنى انا متاكده
مازن /  الاصول اصول برده
صافى / انا بكره هكلمها اصل احنا لينا معاد معين كل يوم هى بتفضى نفسها و انا بفضى نفسى و نتكلم فيه جربت مره اتصل فى وقت تانى اتخضت جدا حرمت اعمل كدا تانى
شريف / لا متعمليش مش عاوزين نخضها
صافى / كنت هنسى شريف ممكن تجيبلى شنطتى من العربيه انا جيبالكوا هدايا تحفه
مرام / ايه ده انتى مروحتيش الفندق
صافى / لا ملحقناش
الست /احسن خلاص هتباتى هنا معانا خشوا يا بنات وضبوا الاوضه جوه
مرام / لا لا لا معلش بكره بعده ماشى لكن النهرده انا محتاجاها ضرورى فى كلام كتير اوى بنا معلش انتوا هتاخدوها العمر كله ان شاء الله سيبوهالى النهرده
صافى / خلاص خلينى النهرده مع مرام
مازن / لقوا بعض يا شيكوا و طيرنا احنا
شريف / و لا يهمك يا مازن قاعده الرجاله متتعوضش برده
مازن / صح انت صح
...................................
فى شقه مرام
صافى نايمه عالسرير فى الصاله بتتكلم في التليفون
صافى / هههههههههههه يا سلام
شريف / هو مكنش باين عليا و لا ايه
صافى / يعني ساعات
شريف / ساعات ؟؟
صافى / اه ساعات كنت بحس انك بتلمح و ساعات مكنتش بلاقي رد على تلميحاتى بس تعرف انك لحد دلوقت مقولتليش بحبك
شريف / و مش هقولها
صافى / و دا تقل بقي و لا حاجه تانيه
شريف/ حاجه تانيه
صافى تقوم تقعد
صافى / حاجه ايه دى بقي ان شاء الله
شريف / ههههههههههههه انتى علاطول مستعجله اوى كدا اديني فرصه اخطط لحاجه اعملها صح كفايا البروبوزال اللى هيدخل الموسوعه ده
صافى / ههههههههه اما نشوف بس ممكن اسالك سؤال رخم
شريف / اتفضلي
صافى / اشمعن دلوقت
شريف / اه لا معلش بقي ممكن نبدا القصه من اولها بقي
صافى / ياريت
شريف / بصي يا ستى طبعا انتى من اجمل البنات اللى شوفتهم في حياتي بس اكتر حاجه حلوه فيكي ان جمالك طفولى كدا ملامحك بريئه حتى تصرفاتك و طباعك بصراحه كل حاجه فيكى تتحب و كل يوم كنت بقرب فيه منك اكتر كنت بتعلق بيكى اكتر فى الاول كنت بقول عادى يعنى هى بنت جدعه و كدا بس مع الوقت الموضوع معدش كدا حاولت ابعد كتير و كنت فاكر انك لما هتسافرى الموضوع هيبقى اسهل حاولت كتير انكر او احط حدود لمشاعرى لكن بمجرد مكنتى تكلمينى او حتى تبعتيلى صوره صورتك كنت بنسى كل حاجه بمسح كل الحدود دى باستيكه و اسرح معاكى و انسى نفسى انسى كل حاجه عقلى بيقولهالى الفروق اللى بنا المشاكل اللى عندى كل حاجه كنت برميها ورا ضهرى و استمتع
صافى / كانوا بيتحايلوا عليك هاه ؟؟
شريف / مش بالظبط اصلا انتى لو مسكتى موبايلى مش هتلاقى عليه غير صورك كميه صور رهيبه يعنى بس زى مقولت انا كنت بستهبل على نفسى بحاول اقنعها اننا مجرد اصدقاء و انك عمرك مهتقبلى
صافى / ليه ليه كنت بتحط الفروق دى ليه كنت بتقول انى مش هقبل
شريف / عشان انا شايفك نجمه عاليه اوى يا صافى شايفك حاجه محصلتش معقوله دى تبصلى انا معقول تحبنى معقول تقبل بظروفى و بمشاكلى هتستحمل مسؤلياتى و اخواتى
صافى / ظروفك ظروفك انت ليه بتتكلم كدا انت عندك اكبر نعمه فى الدنيا انت معقول مش شايفها عندك مامتك عايشه معاك حتى لو مريضه بتقدر ترمى نفسك فى حضنها و تشكيلها و لو زعلت هتطبطب عليك عندك اخواتك اللى بيحبوك اكتر من اى حاجه تانيه انا معنديش اخوات يا شريف لان مامى كانت من النوع اللى بتؤمن بمبدا انها تجيب بيبى واحد و تديله كل الاهتمام احسن متجيب اكتر من بيبى و تقسم الاهتمام بينهم
شريف / لا يا صافى انا عارف انهم نعمه و بحمد ربنا عليهم طول الوقت انا بتكلم انهم مسؤليه هما ملهمش غيرى انا اللى براعيهم و باخد بالى منهم انا اللى ملزم بمصاريفهم و لسه جهازهم لحد مسلم كل واحده لجوزها و اطمن عليها هما مش مجرد اخواتى هما كمان بناتى
صافى / و دى اكتر حاجه حبيبتها فيك .... شوفت يا جزمه ادينى قولتها انا الاول عليك و على تخطيطك
شريف / ههههههههههههههههههه
صافى / انت بتدحك تعصبنى و تدحك
شريف / عيونى انا مقدرش تعرفى انتى ايه اكتر حاجه حبيتها فيكى
صافى / ايه
شريف / كل حاجه ... حرفيا كل حاجه فيكى بحبها دمك الخفيف و جدعنتك و رومانسيتك و جنانك و طفولتك و دلعك و كل حاجه فيكى بعشق كل تفصيله فيكى و خصوصا علاقتك باهلى و حبك ليهم و حبهم ليكى انا عمرى مشوفتهم بيحبوا حد كدا
مرام تطلع مالمطبخ
مرام / انا لو استنيتكوا تخلصوا هنام فى المطبخ و ادى اللى جت تبات معايا
صافى / خلاص يا شريف كفايا عليك كدا يلا روح نام شويه
شريف / احنا اسفين يا ست مرام يلا سلام
صافى تقفل
صافى / بيقولك اسفين
مرام / حصل خير يلا خطاب جداد و حقكوا تدلعوا
صافى / قال يعنى انتى فى المطبخ مكنتيش بتتكلمى فى التليفون
مرام /و فصل شحن اعمل ايه
صافى / و لا حاجه اقعدى بقي احكيلى كل حاجه حصلت و انا مسافره
مرام / هحكيلك
................................
فى الفيلا عند زياد
لبنى قاعده بتلعب فى الموبايل 
لبنى / ايه ده هى صافى رجعت امتى
زياد / رجعت ؟؟
لبنى / انت مش متابع الفيس و لا ايه منزله صورها مع شريف و صور ليها مع مرام و مازن فى بيت شريف
زياد / مكنتش متوقعها تنزل دلوقت خالص
لبنى / و لا انا تفتكر نزلت اجازه و لا نزلت علاطول
زياد / يا خبر بفلوس بكره يبقى ببلاش
لبنى / استنى استنى ايه ده .. بص بص
زياد / هما اتخطبوا
لبنى / هههههههههههههه مش قولتلك
زياد / و هى ملقتش الا ده والله كتير عليه
لبنى / صحيح المخده متشيلش اتنين حلوين
زياد / طب متيجى نطلع نشوف بتشيل و لا لا 
لبنى / بطل بقى
زياد / بجد خلاص تعبت عاوز انام
لبنى / خلاص يلا
لبنى و زياد يطلعوا فوق
...........................
تانى يوم الصبح فى شقه على
ماجده / لو فى اى حاجه كلمينى تمام
نورا / انا مش هتاخر اصلا هروح اشوف الورق و اجى علاطول
ماجده / معاكى فلوس
نورا / معايا شكرا
ماجده تبتسم اسراء تطلع جرى من جوه
اسراء / انتى لسه واقفه يلا هنتاخر كدا
ماجده / لا اله الا الله
اسراء / هو احنا مهاجرين دا حياله رايحين الكليه سلام
اسراء تقفل الباب و تنزل هى و نورا يقابلوا سعيد عالسلم
سعيد / صباح الخير
اسراء / صباح النور
سعيد / على فين كدا
اسراء / هيكون فين يعنى عالكليه طبعا
سعيد / كويس فى طريقى تعالوا هوصلكوا
نورا / ملوش لزوم مش عاوزين نتعبك
اسراء / تعب ايه دا سعيد مش حد غريب يعنى
نورا / افرضى مامتك عرفت تقول ايه
سعيد / مش هتقول حاجه طبعا هو انا غريب و بعدين اكيد انا امان اكتر من التاكسيات و المكروباصات انتى شاكلك منزلتيش مصر بقالك كتير تعرفى اننا رقم اتنين فى التحرش على مستوى العالم
اسراء / احنا كدا هنتاخر يلا بقي
اسراء تشد نورا و يروحوا يركبوا مع سعيد
........................
فى شقه مرام
مديحه بتلبس شال على كتافها
مديحه / ههههههههههههههههه والله تعبتى نفسك عالاخر مكنلوش لزوم خالص والله تقيل و حلو
صافى / و دى عشانك يا محمود انت و مروه هديه صغيره لشقتكوا ان شاء الله
صافى تدى لمحمود بونبونيره سلفر
محمود / حلوه اوى تعبتى نفسك
صافى / تعبكوا راحه
مروه / و انتوا بقى هتتجوزوا امتى ان شاء الله
صافى / والله لسه كل حاجه جت فجاه و مش مترتبه بس متقلقيش اكيد هتكونى اول المعازيم
مروه / و هتعملى بقى زى مرام فرح كبير اوى كدا و نلبس كلنا نفس الفساتين
صافى / عادى يعنى فرح على قدنا انا مليش قرايب فى مصر هما صحابنا بس و انتوا و اهل شريف بقى و جيرانه كدا يعنى
مديحه / و هتعيشوا فين بقى
صافى / مش عارفه
سميحه / يا جماعه كفايا اساله البت يادوب اتخطبت امبارح
مروه / يعنى هى اتخطبت منغير متتفقوا عالتفاصيل دى كلها
صافى / ايوه عادى و فيها ايه
مروه / و اهلك وافقوا عادى كدا
صافى / انا لسه مقولتش لماما هقولها لما نتكلم
مروه / ينهار ابيض انتى بتهزرى يا صافى تتخطبى منغير اذن اهلك
مرام / الموضوع ده عادى فى تركيا هو بيتقدملها الاول و بعدين بيتكلموا مع اهليهم
مروه / ايوه مانا عارفه بشوفها فى المسلسلات كتير بس معلش اصلى سقطت حوار انك تركيه ده خالص يا صافى قوليلى بقى تركيا حلوه كدا زى مصر و لا احلى
صافى / حلوه طبعا و فيها اماكن كتير جميل و مساجد و اثار اسلاميه و شوارع قديمه و بزارات و كل حاجه زى مصر بالظبط بس انا بحب مصر اكتر راحه نفسيه يعنى
مروه / محمود وعدنى لو ربنا كرمنا هياخدنى هناك صح يا محمود
محمود / قولى يارب ... كان نفسى اقعد معاكوا اكتر من كدا بس للاسف لازم اروح الشركه عن اذنكوا
محمود يقوم و مروه تقوم توصله و مديحه تمسك البونبونيره تقلب فيها
مديحه / دى فضه حقيقى
صافى / يتهنوا بيها يارب ايه مش هتقومى تلبسى بقى عشان منتاخرش
مرام / حالا ثوانى
مرام تقوم و مروه ترجع تقعد مع صافى
مروه / انتوا رايحين فين
صافى / هروح الاول ابص عالورشه اشوف اخبار الشغل هناك ايه و بعدين نطلع عالاتيليه ابص بصه بما انى فمصر و بعدين هنقابل البنات نتغدى بره و نقضى اليوم
مروه / اه طيب
سميحه / يعنى مش هتتغدى معايا
صافى / ان شاء الله هنتعشى سوا
سميحه / وعد
صافى / يارب اعمل ايه بس انا عمرى مكنت متخيله انى محبوبه اوى كدا الكل بيتخانقوا عليا و انا مش عارفه ارضى مين
مروه / معلش بقى استحملى
صافى / على قلبى زى العسل
مروه / عن اذنكوا هقوم اعمل شاى
مديحه / والله كنت لسه هقولك تقومى تعلقى عالشاى
...............................
فى الكليه عن نورا
نورا / على فكره انت مش مجبر تيجى معايا انا عارفه الكليه دى اكتر من بيتنا
سعيد / اصل كريم كان قالى انك من امريكا يعنى
نورا / انا سافرت السنه اللى فاتت لكن انا فى الاصل مصريه من اب و ام مصريين و دى كليتى و حفظاها شبر شبر فمتقلقش عليا و متعطلش نفسك اكيد وراك مليون حاجه تانيه تعملها و شكرا اوى لحد كدا تعبتك معايا
سعيد / تعب ايه بس طب دا ياريت كل التعب زى تعبك ده
نورا / عن اذنك
سعيد / بقولك ايه
نورا / نعم
سعيد / ممكن تدينى رقمك يعنى .. ابقى اكلمك اطمن عليكى يعنى اروحك او لو احتجتى اى حاجه
نورا / مفتكرش له لزوم انا بعرف اتصرف لوحدى و شكرا عن اذنك بقى عشان انا كدا اتاخرت
نورا تسيبه و تمشى و هو واقف متابعها و عينه عليها
سعيد / صاروخ امريكانى
........................
فى الشركه
محمود بيتكلم فى التليفون
محمود / و هو ده بقى اللى مدايقك اوى كدا
مروه / لو مكانى مش هتدايق يعنى
محمود / بصراحه لا
مروه / يا سلام يعنى هما اخوات شريف احسن منى تخرج معاهم و انا لا
محمود / بصى يا مروه لو هى مثلا اخدت امل و لا اى حد من الحاره و انتى لا تتكلمى لكن دول اخوات شريف و خطيبته و خدوا مرام معاهم انتى هتروحى وسطيهم تعملى ايه
مروه / الله هو انا مش صحبتهم يعنى
محمود / لا مش صحبتهم انتى صحبه مرام بس لكن اخوات شريف اكيد علاقتك بيهم مش قويه اوى يعنى للدرجادى
مروه / خلاص خلاص مش مهم
محمود / بصى خلاص انتى قاعده فى البيت و المزاكره و الدروس ايه رايك
مروه / اخر الاسبوع اخرجك صح
محمود / لا لما اخلص الشركه اتصل بيكى و اخدك نتعشى بره قولتى ايه
مروه / وعد
محمود / والله وعد
مروه / خلاص ماشى هقول لماما
محمود / فكيها بقى
مروه / انا قولتلك انى مش زعلانه اصلا هو موقف دايقنى و خلاص
محمود / ماشى يلا سلام هكلمك لما اخلص
مروه / سلام
محمود يقفل سعد يدخل
سعد / انت عرفت ان شريف خطب امبارح بيوزعوا شيكولاته
محمود / اه عرفت عقبالك انت اللى فاضل
سعد / اه ياعم و ام الشركه الفقر دى مفيهاش حد ينفع خالص كلهم اكبر منى
محمود / و هى لازم تكون بتشتغل فى الشركه يعنى
سعد / ياعم والله ابدا انا بس الاقى اى حاجه و انا اشبط فيها علاطول بس الاقى بس اى حاجه اى حاجه
محمود / ههههههههههههههههههههههه 
شريف يدخل معاه علبه شيكولاته
شريف / شكولاته يا محمود
محمود / الف مبروك يا برنس فرحتلك والله
شريف / ايه مش هتتقمص زى اخينا و تقول معزمتنيش و بتاع
محمود / لا يا عم انا عارف انها كانت عالاقد و تتعوض بقى فى الليله الكبيره
شريف / عقبالك و عقبالك انت كمان يا سعد
سعد يمد ايده و ياخد شيكولاتايه كمان
سعد / امين يا شيكو امين
..............................
فى كافيه 
صافى / والله ما معايا غير الطقم ده و بتاع امبارح و بجامه و شكرا الشنطه مخدتش اكتر من كدا مع الهدايا مش حوار شوبينج يعنى انا فعلا كنت محتاجه طقمين كمان خصوصا انى معنديش هناك هدوم شتوى كفايا و مش عاوزه اقولكوا الاسعار هناك عامله ازاى فى حاجات انا عارفه انها متستاهلش اصلا
مرام / مش قصدنا والله بس هى شقتك يعنى مفيهاش هدوم كنا عدينا جبتى براحتك و مليتى شنطتك
صافى / زمانها مقفوله و مش متهويه و بما انى كنت ناويه انزل فى فندق مقولتش للبواب يفتحها و ينضفها و انا صدرى مبيتحملش هفضل بقى طول الاجازه اليتميه دى اكح على ايه بقى ادينى جبت كام طقم مالاتيليه و خلاص
رؤى / انتى سايبه مفتاح الشقه مع البواب
صافى / ايوه بيحتاجه يعنى و احنا بنسافر كتير و متعودين على كدا من زمان
رؤى / افرضى عمل حاجه فى الشقه و لا استغلها باى شكل
صافى / هو معانا من سنين و بعدين هنا فى مصر فى طبع كدا اللى هو سلاح ذو حدين اى حاجه بتحصل تلاقى الكل يتصل بيكى و يقولك متعرفيش بقى بيحزروكى و لا مصدقوا لقوا غلطه للتانى المهم الفتنه واخده حدها معانا اوى
شيماء / فدى معاكى حق و مش بس فحوار تبع البواب الجيران مع بعض يعنى لو واحده عرفت حاجه عن جارتها متهداش ابدا الا لما تقولها لكل اللى رايح و اللى جاى و يبقى هاين عليها تطبعها على يافطه كبيره و تحطها فى وسط البلد
تقى / دى اصلا مش فتنه دى نميمه
صافى / مش موضوع فتنه و لا نميمه قد مهو فراغ الناس فاضيه
شيماء / لا مش فراغ الناس وراها حاجات كتير تعملها بس هما بيسيبوها و يقعدوا يقطعوا فى فروه بعض الناس بقت نفوسها وحشه و بيتصيدوا الاخطاء لبعض و مش بس كدا دول كمان كل واحد بيحط التاتش بتاعه لما الموضوع بيكبر و ممكن كمان ملامحه تتغير يبقى موقف تافه و مش مقصود على ميتنقل من دى لدى يتحول لمشكله كبيره
رؤى / الناس مبتحسش بخطوره الكلام اللى بتقوله مدام ميخصهاش و يا سلام بقى لو الكلام ده عن حد بينى و بينه مشكله يبقى العجل وقع سنوا السكينه
صافى / للاسف معاكوا حق بتحصل مالك يا مرام ساكته ليه
مرام / مفيش بسمعكوا
مرام تمد ايدها تشرب بق عصير و باين انها مدايقه تبص حواليها و تدارى و تبصلهم و هى مبتسمه
..............................
فى الشركه
مازن / خير تعمل شر تلقى صحيح
شريف / ههههههههههههههههههه يا عم متسيبهم هى يعنى جت عالكام ساعه اللى بيقضوهم سوا و لحقت توحشك
مازن / تعرف تخليك فى حالك
شريف / خلتنى
مازن / مفيش اخبار صحيح الساعه خمسه المفروض بتكلمها دلوقت
شريف / لا قالت لما هتقفل معاها هتكلمنى و ادينى قاعد مستنى
مازن / خير ان شاء الله تصدق اتوترت
شريف / هههههههههههههههههه امال انا اعمل ايه
مازن / الله يعينك بس ان شاء الله خير يعنى
شريف / باذن الله
تليفون شريف يرن مازن و شريف يتوتروا زياده و يقفوا و شريف يرد
شريف / الو ... ازيك طمنينى
صافى / انا كلمت مامى
شريف / و قالتلك ايه
صافى / انا مش عارفه اقولك ايه بس انت عارف ان كل شئ قسمه و نصيب صح
............................