السكه شمال بقلم / لولو_محمد ( كامله )

الحلقه ١٤٠

((((((((((السكة شمال )))))))))))
#لولو_محمد
الحلقه 140
شريف / ثوانى هرد تقى ... ايه يا مزه المزاميز اخبار البحر ايه .... امتى ده ... قولى والله ليه ... ههههههههههههههههه معلش هعوضهالك ... والله هعوضهالك ... يابت بحلف بالله ... طب ادينى امك .... طب هشوف كدا ... يارب قولت هشوف ... حاضر ... حاضر ... حاضر... حاضر
صافى تبصله
شريف / مع السلامه ... حاضر والله مش هنسى الله حاضر قولت ... سلام
شريف يقفل التليفون
صافى / فى ايه
شريف / امى يا ستى صعبت عليها و جابت اخواتى و رجعت
صافى / ليه كدا .. عشان كدا كنت بتقول لتقى هتعوضهالها
شريف / اه و طبعا ملتنى لسته طلبات شيبسى على شيكولاته على ساقع تقريبا طلبت محل البقاله كلو
صافى / ربنا يخليك ليهم
شريف / تحبى تيجى تتعشى معانا
.................................................
صافى تبصله باندهاش
شريف / انا بقول يعنى هتعملى ايه لوحدك فى الفيلا كلهم مش هناك فانا بقول يعنى ايه رايك نجيب عشوه حلوه و نروح نسهر معاهم فى البيت على فكره والله كلهم بيحبوكى هناك
صافى / و انا كمان والله حبتهم اوى
شريف / قشطه تعرفى شيماء هتفرح اوى لما تشوفك
شريف يسوق و صافى مبتسمه
........................
فى الفندق عند احمد
الباب يخبط جميله تفتح و هى لابسه البرنص تلاقى شهاب يتفاجئ لما يشوفها
شهاب / استاذه جميله
جميله / شهاب صح ؟؟ اتفضل
شهاب / انا جيت فوقت مش مناسب و لا ايه
جميله / بالعكس انت جاى فمعادك بالظبط تعال ادخل اتفضل
شهاب واقف عالباب احمد يطلع مالحمام لابس برنص و بينشف شعره بفوطه
احمد / تعال يا شهاب واقف عالباب ليه تعال يا راجل بيتك و مطرح ادخل ادخل
شهاب يدخل جميله تقفل الباب و تدخل الحمام احمد يروح يصب كاسيين و يشاور لشهاب يقعد و يديله كاس
احمد / مالك يابنى بتبصلى كانك شوفت عفريت
شهاب / لا ابدا انا بس مستغرب
احمد / ليه كنت فاكرنى هعيش بره باقى عمرى و لا ايه تعرف عنى انى بسيب حقى دانت طيب اوى يا شهاب
شهاب / انت ايه اللى رجعك اقصد اشمعن دلوقت
احمد / جيت لما عرفت اللى جرالك مخلصنيش اللى حصل
شهاب / يا قلبك الطيب يا احمد
احمد / هههههههههههههههههههههه الا قولى عمل فيك ايه فى الفيلا اوعى تفتكر انه سابك عشان الموضوع خلص سابك عشان مرام رجعت الفيلا و انت عارف كويس انه مش عاوز مرام تشوف وشه الحقيقى
شهاب / انت عاوز منى ايه و ليه بعتلى اجى مع مدام جميله ليه مقولتش انك انت اللى عاوزنى
احمد / قولى الاول هتقبل باللى حصلك و تسكت و لا هتربيه
شهاب / هو مين
احمد / انت حقك عند مين
شهاب / زياد
احمد / اوبااااا شوف و انا اللى فاكر ان حقك عند مازن
شهاب / زياد عملى كمين ادانى مفتاح اوضه مرام و بلغ شريف عنى عشان يمسكنى سلمنى تسليم اهالى
احمد / عاوز توجع زياد قدامك تلت حلول و التلاته اصعب من بعض الاول مونى و دى الغلطه فيها فموته يا على ايد زياد او على ايد مازن و انت و نصيبك بقى ساعتها التانيه لبنى و دى اصعب عشان ان مكنش زياد هيمنعك انا همنعك
شهاب يبص الناحيه التانيه و يدحك
احمد / الحل التالت مرام
شهاب / مرام دا على اساس ايه يعنى
احمد / باختصار مرام هى نقطه ضعف مازن الوحيده و لو استخدمناها صح مازن هيتكسر و ساعتها زياد ضهره اللى منفوخ بيه هيفرقع و هيبقى سهل اوى تلاعبه و تذله و تعمل فيه ما بدالك
شهاب / الغريب ان الكلام ده يطلع منك انت
احمد / اوعى تفتكر ان مازن هو اللى قدر عليا انا مشكلتى ان فى كارت مهم مكنتش عامل حسابه عمرى متخيلت ان مازن هيلعب بيه كدا بس خلاص هانت الكارت ده خد وقته و جه وقت ينزل عالارض و يتحرق و ساعتها
شهاب / اسلوبك كانك ملك الغموض و فالاخر بيطلع كل حاجه بتعملها بلح و بتيجى على دماغنا فى الاخر
احمد / ههههههههههههههههههه بص يا شهاب انا مش هستنى ردك عليا دلوقت بس قريب اوى فى خبر هيهز مصر كلها نبقى نكمل كلامنا ساعتها
جميله تطلع مالحمام لابسه و عامله شعرها و مايكاب
جميله / انا جاهزه يا بيبى
احمد / هقوم اللبس حالا ... عن اذنك يا شهاب البيت بيتك
احمد يقوم و جميله تقعد جنب شهاب و تبتسمله يبتسملها بتوتر
............................
فى فيلا زياد
مازن يركن العربيه و ينزل هو و صفوت و مرام تفتح الباب و تنزل و مازن يروح يانجها و صفوت يمشى قدامهم و يدخلوا الفيلا يقابلوا مونى و كامل و انجى و زياد و لبنى و فريده و ابراهيم
فريده / اهلا اهلا صفوت بيه نورتنا اهلا اتفضل... اهلا حبيبه قلبى مرام ازيك ياريت تكونى انبسطتى معاهم فى السخنه
مرام تبتسم
فريده / احنا اول معرفنا انكوا قطعتوا الاجازه نزلنا علاطول مهو مكنش ينفع ننزل قبل كدا تقولوا علينا ايه
مرام / تنوروا فى اى وقت
فريده تاخد مرام و تدخل جوه ناحيه ابراهيم و مازن فضهرها بالظبط اول متوصل ناحيه ابراهيم مازن يطلع قدامها يسلم على ابوه الاول
مازن / ازيك يا بابا حمد الله عالسلامه
ابراهيم / قال يعنى فارق معاك سلامتى
مازن / طبعا فارق ليه كدا
مرام / ازى حضرتك
ابراهيم يبصلها من فوق لتحت
ابراهيم / الحمد لله اتفضلوا
مرام تدخل تقابل مونى و انجى و تحضنهم و تبوسهم و تحيى كامل براسها و تبص للبنى و تبتسملها من تحت الدرس و تعديها و تسلم على زياد براسها زى كامل يبتسملها مازن يحط ايده على ضهرها و يزقها بالراحه ناحيه الكنبه تقعد
فريده / ها يا مرام مفيش اخبار من تيته
مرام / هتيجى ان شاء الله اخر الاسبوع
فريده / تيجى بالسلامه يا حبيبتى اكيد لما توصل للازم تحدديلى معاد اقابلها اسلم عليها
مرام تبتسم و تهز راسها حاضر
ابراهيم / مفيش اخبار عن النتيجه
مازن / لسه والله يا بابا
ابراهيم / بيقولوا انك الاولى على دفعتك
مرام تبتسم
ابراهيم / و ناويه على ايه بقى بعد الجواز اوعى تكونى ناويه تكملى فموضوع الاكل ده
مرام تبص لمازن
صفوت / مرام موهوبه جدا فالاكل حقيقى نفسها حلو جدا
ابراهيم / لما اعرف الناس عالهانم مرات الباشا ابنى اقولهم ايه الطباخه
صفوت / قولهم سيده اعمال يا سيدى
ابراهيم / حوار الطبيخ ده تشليه من دماغك خالص دا لو عاوزه تبقى من عيله منتصر
مازن يمسك ايد مرام تبصله
ابراهيم / و اه لما حد يسالك ابوكى كان بيشتغل ايه
مرام ملامحها تتغير ترفع عينها تلاقى لبنى بصالها و مبتسمه تهدى
ابراهيم / ابقى قولى رجل اعمال و مامتك سيده مجتمع
مرام / انا مبعرفش اكدب
ابراهيم / يعنى احنا كدابيين
مرام / انا مقولتش كدا حضرتك انا قولت انى مش هعرف اقول غير ان بابا الله يرحمه كان سباك
ابراهيم / يووووووه انتى قاصده تعرينا بقى
مرام / و شغله ابويا و لا اصلى تعركوا فى ايه ان شاء الله
مازن / يلا يا مرام
مرام / معلش يا مازن ثوانى
مازن / ملوش لزوم انا قولتلك مفيش فايده يلا بينا
ابراهيم / سبها سامعك قوليلى بقى حضرتك ايه اللى ممكن تضيفيه لعيله منتصر
مرام / كتير كتير اوى حضرتك
ابراهيم / سامعك زى ايه مثلا
مرام / حضرتك ليه مصر تقلل منى انا ابويا لا حرامى و لا مجرم ابويا كان راجل شريف عمره مدخل بيته قرش حرام و انا عمرى مهستعر منه ابويا اللى حضرتك بتقل منه ده عند ربنا دلوقت مش بعيد لو كان عايش هو اللى كان يرفض نسبك
ابراهيم / ياريته كان عايش يمكن كنا خلصنا مالقرف ده
مازن / تمام اوى كدا ....يلا يا مرام
مونى تمنع مازن و تروح ناحيه ابوها
مونى / بابا لو سمحت حضرتك كدا بتحرجنا كلنا الحق عليها انها جايه تراضي حضرتك
ابراهيم / هى سحرالكوا فيها ايه دى عشان تحبوها كدا دى لا شكل و لا منظر بزمتكوا بعد المزز اللى كان يعرفهم ابني يتجوز دى
كامل / و ليه لا
الكل يبص لكامل
كامل / مرام بنت محترمه جدا و الف شاب يتمناها كفايا اخلاقها الحلوه
ابراهيم / مدام عجباك كدا جيت خطبت بنتي ليه
كامل / عشان انا بحب مونى زى بالظبط ممازن بيحب مرام
صفوت / انت عاوز ايه يا ابراهيم عاوز فلوس كل فلوسي ملكها عاوز اب تانى اعتبرها بنتى مع انى لانا و لا الاجدع منى كنا هنربيها و نطلعها احسن ماللى هى فيه ده
مونى / يا بابا مازن بيحبها بصله مازن اتغير عشانها مازن لاول مره سعيد حرام عليك تكسر فرحتهم
كامل / اسمع يا مازن انا مستعد اعملك كل اللى انت عاوزه مستعد اتنازلك عن كل ما املك بس تطلق البت دى و تخرجها من حياتنا
مازن / و انا مستعد اتنازلك عن كل ما املك بس عشان مرام تفضل فحياتي مرام هى كل اللى انا عاوزه
ابراهيم يروح يقعد على كرسي بعيد و ينفخ مازن يروح يقعد تحت رجليه
مازن / انا بحبها انا لاول مره بحب لاول مره اكون مبسوط
ابراهيم / اشمعن دى ملقتش الا دى
مازن / مالها دى يعيبها ايه جميله و ذكيه و اخلاق و محترمه و كلو بيحلف بيها و بيحبها
ابراهيم /  انا مبحبهاش
مازن / هههههههههههه هو انا اعترضت لما اخترت طنط فريده زوجه ليه حضرتك بتدخل فى اختيارى
ابراهيم / انا اعرف مصلحتك اكتر منك
مازن / و ايه مصلحتى انى اعيش زى مكنت عايش كل يوم مع واحده و اكون انسان فاشل و تافه و مش فالح لا فدراسه و لا فشغل
ابراهيم / اديك قولتها واحده بالمواصفات اللى انت قولتها تقبل واحد بمواصفاتك اللى انت قولتها دى ليه الا اذا كانت طمعانه فيه
مازن / مرام موافقتش الا لما غيرتنى مرام عملت منى الراجل اللى حضرتك كنت علاطول بتحلم بيه كل الناس دى عرفت اهميه مرام فحياتي انا منغيرها اموت يا بابا
ابراهيم / اولع بيها بس خليك فاكر انى حتى لو مثلت قدام الناس انى موافق انا عمرى عمرى مهقبل بيها لا زوجه ليك و لا ام لاحفادى دى تربي احفاد ابراهيم منتصر ازاى دى
مازن / هتربيهم زى مهى اتربت هتطلع منهم رجاله محترمه و بنات تشرف و ترفع الراس
امانى تدخل
امانى / العشا جاهز فريده هانم
فريده / اتفضلوا يا جماعه
الكل يروح و صفوت يبتسم لمرام تبتسم بحزن  فريده تروحلها
فريده / متزعليش احنا كنا فين مع الوقت كل حاجه هتتصلح و انتى شاطره و هتعرفي تكسبيه
مرام تهز راسها ايوه مازن يمسك ايدها و يقعدها جنبه تلاقي سفره مليانه كابوريا و جمبرى و سمك و استكوزه و كاليماري و رز تبص عليهم و تقعد جنب مازن قدامها طبق فاضي جواه طبق تانى فاضي و شوك و معالق مرصوصين يمين و شمال الطبق تبص عليهم فردوا الفوط و كل واحد بدء يغرف لنفسه ياكل و هى ساكته فجاه مازن يشيل طبقها و يحط مكانه طبق شوربه سيفود و يبتسملها و ياخد طبقها يملاه و يحطه قدامه و هى تفضل تبص عليهم و هما بياكلوا عشان تاكل زيهم و لبني متبعاها
لبني / مبتاكليش ليه يا مرام
ابراهيم / تلاقيها مبتعرفش تاكل الحاجات دى طبيعي ماول مره تشوفها نضفلها يا مازن
مازن يبص لابوه بضيق
مازن / اكيد هنضفلها و هاكلها بايدى كمان و انا يعنى عندى اغلى منها دوقى دى يا قلبى من ايدى كدا
مازن يملا المعلقه نص ماليه و يحطها على بق مرام تفتحه بالراحه ياكلها و لبنى قدامها استاكوزه تحاول تفتحها و عينها على مازن تتعور
لبنى / اااه
مازن / نضفلها يا زياد
زياد / عنك يا قلبى
مازن / سلامتك يا لبنى
لبنى تبص لمازن بحزن و مرام معلقه الاكل فبقها مبتتبلعش تاخد معلقتها و تاخد شويه شوربه تبلعها و تدارى حزنها منهم
...................................
فى شقه شريف
شريف يفتح الباب
شريف / انا جيت
بنت صغيره فاعدادى تيجى جرى بالبجامه تشوف صافى تفرمل و تتكسف و تدخل جوه تانى تجرى
صوت تقى من جوه / اللحقوا شريف جايب صافى معاه شريف جايب صافى معاه
صافى / هى ادايقت من وجودى و لا ايه
فجاه كلهم يطلعوا تلت بنات شيماء و تقى و اخته التالته و مامته و يسلموا على صافى
شريف / جبنالكوا احلى عشا على الله يطمر
تقى / جبت الحلويات
شريف / جبت ياختى اتفضلى
شيماء / ازيك يا صافى
صافى / ازيك انتى عامله ايه
شيماء / الحمد لله ايه هتسافرى امتى
صافى / على اول الاسبوع الجاى
شيماء / بالسلامه ان شاء الله عن اذنكوا هجيب اطباق .. افرشى السفره يا تقى
تقى بتقلب فى الاكياس و عامله كحكه شريف يرفع حاجبه و يقوملها يرزعها بهزار على قفاها
تقى / ياخى ورمت بقى انت ايه
الوسطانيه / دا مرض يا بنتى بعيد عنك معلش
الست / منوره يا صافى يا حبيبتى ايه المفاجاه الحلوه دى
صافى / دا نور حضرتك يا طنط
شيماء تطلع مالمطبخ شايله اطباق تشوف كتب تقى مبهدله السفره
شيماء / مش قولتلك رتبى السفره يا تقى الله
صافى تقوم تجرى تساعد شيماء و يرصوا السفره سوا الست تقوم تقعد جنب شريف و تخبط بايدها على رجله يبصلها يلاقيها مبتسمه تغمزله ناحيه صافى
شريف / فى ايه
الست / زى القمر و مفيش فايدها لا دبله و لا حاجه
شريف / انسى يا ست الكل مفيش اللى بالك خالص ماشى
الست / ليه بس يا شريف هتلاقى احلى من كدا فين طب دا دى تجيبلك عيال ملونين ماللى يفتحوا النفس
شريف / ههههههههههههههههههههه يا ست الكل ارحمينى
الست / يواد اعقل متطيرهاش من ايدك هى صحيح مسلوعه حبتين بس اهو بكره تطخن و بعدين
الوسطانيه / انتوا بتتودودوا فى ايه هاه
الست / قومى يا بت هاتى المايه و الكبايات من جوه و ساعدى اخواتك بلا شغل مرقعه و كلام فاضى انجرى يلا
الوسطانيه / هههههههههههههههههه لغوشى لغوشى
شريف / يلا يا جزمه هههههههههههههههههه
شريف يبص على صافى يلاقيها بصاله و مبتسمه يبتسم
شيماء / يلا الاكل جاهز
شريف / اخيرا الواحد كان هيقع مالجوع
تقى / قال يعنى مش دى سابع مره تاكل فيها النهرده
الست / اتلمى يا بت هتعدى على اخوكى و لا ايه دا بيشقى
تقى / لا و اعد ايه الف هنا طبعا
الست / اقعدى يا صافى اقعدى يا حبيبتى اقعدى طب والله لو كان قالى انك جايه معاه لكنت عملتلك احلى اكل بايدى دى
صافى / تسلم ايدك يا طنط كانك تعبتى نفسك بالظبط
الست / ياخواتى عالادب يا ناس هو فى كدا يا ربى جمال و اخلاق و ادب
صافى / ميرسى
الست / انا عارفه ياختى الرجاله عنيها فيها ايه
صافى / كلو نصيب
الست / هما الحلوين كدا يا حبيبتى اهى عندك اختك ...
شريف / احنا هنقضيها رغى مش هناكل و لا ايه الاكل هيبرد و مش هيبقاله طعم ... الله فين الساقع و الشيبسى .. بت يا تقى
تقى / يوووه كل حاجه تقى تقى هقوم اجيبه حاضر .. على الله بس ارجع ملاقيكش نسفت الاكل
شريف / سمعتك يا جزمه و هقوملك دلوقت
تقى ترجع بالكيس تديه لشريف و تروح تقعد مكانها جنب صافى
تقى / انا هاكل بسرعه عشان فى فيلم اجنبى حلو اوى لتوم كروز عالتليفزيون و انا عاوزه اتفرج عليه و لا اقولكوا انا هعملى سندوتشين عاوزه اللحقه من اوله
الست / اقعدى كلى زى الناس و بعدين هنقوم نتفرج عليه كلنا .. مش انتى بتحبى توم كروز برده يا صافى
صافى / اه بحبه يا طنط
الست / ياختى و هو توم كروز ده يجى حاجه فرجاله بلدنا طب دا مصر فيها رجاله طول بعرض يملوا العين بصحيح
شريف / بتحب تتفرج عليه مش بتحبه تتجوزه
الست / انا كان قصدى على نور الشريف فريد شوقى رشدى اباظه
شريف / الله يرحمهم دلوقت فى السقا و عز و ظافر عابدين و مجموعه من الفنانيين عاوزين ناكل عشان والله جعانين
تقى تسقف
تقى / الله الله عالكلام المتين و احنا عالاكل مجتمعين و لشيكو اخويا مستمعين الله
صافى تدحك على اخرها
الست / ياختى عسله
...............................
فى عربيه مازن
مازن سايق و مرام قاعده ورا باصه مالشباك
مازن / خير معملت يا خالو اننا مشينا بعد الاكل علاطول اصلا اليوم ده كان سخيف بما فيه الكفايه و الحمد لله انه خلص
صفوت / يا اخى ابوك ده حالفلى مليون يمين انه هيعدى اليوم على خير و برده حركاته الواطيه دى بس الحمد لله انها جت على قد كدا و انتى يا مرام بصراحه عجبتينى عرفتى تمسكى نفسك و مخلتيش حد يمسك عليكى غلطه
مرام متردش مازن يبص عليها مالمرايه يلاقيها باصه للشباك
مازن / تعرف يا خالو انا نفسى هفانى اوى على ايسكريم
صفوت / طب و ايه اللى مانعك وصلنى و اخطف عروستك و كملوا سهرتكوا احنا لسه بدرى هو انتوا هتناموا بدرى كدا و لا ايه
مازن / ايه رايك يا مرام .. مرام مرام
مرام تبصله
مازن / نروح ناكل ايسكريم انا و انتى بعد منوصل خالو ايه رايك
مرام / انا شبعانه شكرا و بعدين صافى لوحدها مالصبح فى الفيلا و زمانها زهقت ميصحش يعنى
مازن / اه صح دانا سقطتها خالص صافى دى .. اما اكلم شريف اشوفه عمل ايه فى حوار كدا مهم كنت طالبه منه
مازن يحط الهاند فرى فودانه و يكلم شريف
مازن / ايه يا بنى فينك ... يا راجل ... قول والله ههههههههههههههههههههه ... ينهار ابيض طب والله جدع ... لا خدوا راحتكوا انا هاخد مرام و نروح ناكل ايسكريم ... ميشبطوا يا عم هاتهم والله ..... ههههههههههههههههههههه البت دى عسل قولها تلبس ... ههههههههههههههههه خلاص هوصل خالو و اعدى عليكوا انا و مرام ... سلام يا حبيب قلبى سلام ههههههههههههه
مازن يشد الهاند فرى من ودنه
مازن / صافى بتتعشى مع شريف و اهله فى بتهم رجعوا النهرده من المصييف و تقى كانت راميه ودنها و اول معرفت اننا رايحين قالتله نفسها فى ايسكريم قولتلهم يلبسوا نروح سوا نغير جو البت تقى دى زى العسل لمضه بشكل بس انا متاكد انك هتحبيها مانتى شوفتيها فى الفرح
مازن يبص على مرام فى المرايه يلاقيها مبتسمه بكسره نفس يتنهد و يكمل سواقه
..............................
فى الفندق
الباب يخبط جميله تفتح تلاقى توفيق
جميله / تيفا صح
توفيق / عشانك ابقى اى حاجه سعاتك اؤمرى 
جميله / هههههههههههههههه زى مقالى عنك بالظبط ادخل ادخل
توفيق يدخل يلاقى جناح فخم يبص يمين و شمال
جميله / تحب تشرب حاجه
توفيق / اى حاجه من ايديكى الحلوه دى اللى منعدمهاش
جميله / ههههههههههههههههه ثوانى حاضر
جميله تروح ناحيه البار و تصب كاس و توفيق قاعد مش على بعضه عينه عليها باب الاوضه يتفتح و احمد يدخل
جميله / اتاخرت ليه يا حبيبى دا توفيق هنا مستنيك
احمد / اهلا يا تيفا
توفيق يقوم يقف
توفيق / احمد باشا اهلا وسهلا اهلا وسهلا
احمد / لا دانت ما شاء الله احسن بكتير مما كنت متخيل ايوه كدا انا بحب رجالتى تكون علاطول صحتهم حلوه
جميله تدى لتوفيق الكاس و تقرب اوى
جميله / اتفضل
تيفا / من يد منعدمها
جميله تروح تقعد على ايد كرسى احمد
احمد / اخبار الشغل معاك ايه يا تيفا
توفيق / لسه خارج من رقده و سى زفت ده مديقها علينا عالاخر يا باشا
احمد يطلع من جيبه رزمه فلوس و يرميها لتوفيق
احمد / و لا يهمك خد شبرق نفسك تعويض عن رقدتك و لما يخلصوا تعال خد غيرهم و انا بديك الشغل الجديد بتاعك
...............................................