السكه شمال بقلم / لولو_محمد ( كامله )

الحلقه ١٤٧

(((((((((((السكة شمال ))))))))
#لولو_محمد
الحلقه 147
مازن / ليه كنتى بتكابرى ليه مقولتليش انا بحبك يا مازن ليه الكلام الحلو ده مكنش بيطلع منك غير بالعافيه او سهو و كنتى بتجرى تستخبى كانك عملتى جريمه اوى بسرعه تغيرى الموضوع او تنكرى حتى انك قولتيه ليه
مرام / مش انا والله
مازن يقرب منها و يحوط عليها بايده و هى تتكلم بدلع كانها عيله صغيره عامله حاجه غلط و خايفه مالعقاب
مرام / دى حارس البوابه
مازن / اه بتاعه السور بتاعك فاكره انا مالها دى بقى
مرام / هى اللى كانت حبسانى جوه و بتكلمك بس انا ساعات كنت بفلت منها بس والله كانت ترجع علاطول تحبسنى تانى مكنتش بتسمعلى خالص كنت ببقى بقولك كلام و الاقيها هى بتقولك كلام تانى خالص
مازن / ايه البت النوتى دى اخص عليها امال راحت فين بقى
..................................
مرام / اسال نفسك وديتها فين لما دخلت و احتليتنى عماله ادور عليها مالصبح مش لقياها مع انى محتاجاها جدا دلوقت
مازن / عوزاها ليه بس ماحنا ماشيين حلو اوى اهه
مرام / عشان تلمنى شويه قدامك و انت بتبصلى كدا
مازن / لا خليها بعيد عننا دانا مصدقت غارت فداهيه منها لله عذبتنى كتير اوى الا هو احنا كام كام دلوقت
مرام / هاه ..
مازن يقرب اوى من مرام
مازن / بقولك كام كام
مرام / معرفش
مازن / بس انا عارف
مازن يقرب الموبايل يرن المنبه مرام تتعدل و تبعد عنه
مازن / يابن الكلب يا جزمه
مرام / ههههههههههههههه انا هقوم اللبس عشان منتاخرش على تيته
مازن / و اهون عليكى تسبينى متعلق كدا
مرام تبتسم بخجل و تجرى على اوضتها مازن يفرد نفسه عالسرير فمنتهى السعاده و يمسك الموبايل و يعمل انه بيضربه بالبوكس و هو بيدحك و بعدين يفتح الفيس و يكتب بوست
مازن / انك تحب دى حاجه حلوه اوى لكن الاحلى ان حبيبك يحبك قد ايه انا محظوظ بحبك #هانت
مازن يبوس الموبايل و يقوم يلبس
.........................
فى شقه مديحه 
سميحه و مديحه و مروه و محمود و مازن و مامه مروه و باباها قاعدين بيدحكوا مرام تدخل و معاها صينيه عليها كيك و شاى تحطها عالترابيزه و فى شنطه كبيره فى الارض مليانه هدايا مديحه بتطلع و الدهب الجديد اللى شرياه بيشخلل فى ايديها مرام توزع الشاى و تروح تقعد جنب مازن
مديحه / مخلتش حاجه حلوه الا لما جبتهالك شوفى شوفى البرفيوم ده
مروه / حلو اوى تسلم ايدك
مديحه / و طبعا منستكوش جبتلكوا بقى شويه سجاجيد على سبح على مسك مخليناش و لا بقى العبايات الحلوه دى شوفى كدا يا مروه كل مشوف حاجه حلوه كنت اجيبهالك علاطول هو انا عندى اعز منك
مروه / ربنا يخليكى ليا
الست / والله تعبتى نفسك
مديحه / و لا تعب و لا حاجه استنى هو فين يا حجه الخاتم الدهب اللى قولتلك عنيه معاكى
سميحه  / فى الشنطه الصغيره دى ناولهالها يا محمود معلش
محمود يناول امه شنطه صغيره مديحه تفتحها و تطلع منها علبه و تديها لمروه
مديحه / انا لقيت الدهب هناك حلو قولت ميغلاش على ست العرايس اللبسيه كدا وفرحينى
مروه تفتح العلبه و تلبس الخاتم
مروه / الله دا حلو اوى ربنا يخليكى ليا
مديحه / و انت طبعا منسيتكش جبتلك بقى شويه قمصان على بناطيل على برفانات مانت عريس بقى و لازم تتجهز استنوا استنوا ايه رايك فى البجامه دى
مديحه تطلع بجامه ستان احمر و تديها لمحمود
مديحه / اقسم بالله دفعنا وزن قاد كدا
محمود / ودى تتلبس ازاى دى ... انت جبت بتاعه زى دى
مازن / هههههههههههههه لا
محمود / خدها يا عم انت اللى عليك الدور
مازن / انسى انا ملبسش الحاجات دى انا عندى حساسيه
مديحه / ياخويا بطل دلع و هو العريس بيلبس ايه يوم دخلته غير كدا طب دانا بجامه الحج الله يرحمه لسه عندى جوه والله وزعت كل هدومه الا دى مقدرت افرط فيها
محمود / معشان كدا مات بدرى عشان لبستوه البتاع ده
مروه / والله حلوه على فكره
محمود / انتى شايفه كدا
مروه / اه
محمود / امرى لله تتلبس حاضر و حسبى الله و نعم الوكيل فيك يا فخرى
اسعد / ههههههههههههههههه والله يا حجه الحاره مكان ليها لا طعم و لا ريحه منغيركوا
مديحه / تعيش يا معلم
سميحه / بس الحاره احلوت اوى دانا معرفتهاش
مديحه / البركه فمحمود وقف على ايد العمال لما طلعوها بالطريقه دى يحميه لشبابه يارب
محمود / البركه فى مازن اللى دفع
مازن / البركه فمرام اللى اتمنت
اسعد / باذن الله بكره عاملينلكوا ليله هندبح و ناكل و نوزع فرحه رجوعكوا لينا بالسلامه
سميحه / طول عمرك صاحب واجب يا معلم
مروه / هى فين هداياكى يا مرام اوعى تكونى خبيتيها قبل ماجى
مديحه / لا والله مفتحنا الشنط الا دلوقت هو اصل الحجه جابتلها حاجات كتير فانا قولت كفايه يعنى عشان الوزن و كدا و برده والله دفعنا
اسعد / كلفتى نفسك يا حجه والله
محمود مدايق
مديحه / هو انا عندى اغلى منها دى عروسه الغالى دا دى بكره هى اللى تشيلنى فعيايا دى
الست / ربنا يديكى الصحه و طوله العمر يا ست الكل
مديحه / تعيشى يا غاليه
سميحه / و الله قعدتكوا ميتشبع منها بس انا الطياره و الطريق قطمولى ضهرى هستاذنكوا انا بقى اروح افرد ضهرى
الست / سمحينا يا حجه تقلنا فى القعاد اصل انتوا واحشينا اوى
سميحه / لا ازاى خليكوا انا بس حكم السن انتى عارفه انما انتوا لسه شباب اسهروا اليوم لسه فى اوله
اسعد / لا اوله ايه يلا يا ام مروه
مديحه / يلا ايه والله ازعل دا حتى لسه مشربناش الشاى تسلم ايدك عالكيكه يا مرام
مرام / الف هنا يا عمتى هستاذن انا و مازن عشان نروح مع تيته
مازن / عن اذنكوا
مازن و مرام و سميحه يمشوا و محمود بيبص لامه و يبص الناحيه التانيه و يتنهد
.............................
فى النادى
انس قاعد بيشرب عصير على ترابيزه نيفين تدخل تقعد و هى مدايقه
نيفين / خير
انس / وحشتينى
نيفين / يا راجل قول كلام غير ده اسمع انا مش فاضيه
انس / مانا عارف الله يعينك تجهيزات الفرح مبتخلصش
نيفين / واضح انى غلطت لما جيت عن اذنك
انس / صحيح يا نوفى انتى جيتى ليه
نيفين تقوم انس يمسك ايدها يقعدها
انس / بهزر معاكى كنت فاكرك هتقولى مثلا وحشتنى و كان نفسى اشوفك
نيفين / انا خلقى ديق و مش فاضيه انجز عاوز ايه انا مستحملاك بالعافيه 
انس / ليه بس كدا طب دا حتى العشره متهونش الا على ولاد الحرام و دول مكنوش ليله و لا اتنين دول سنه و نص كانوا مليانين زكريات حلوه
نيفين / عليك و على زكرياتك الزباله كان يوم اسود لما عرفتك عاوزين منى ايه
انس / مليون جنيه كويس
نيفين / مليون عفريت لما ينطاتوك مليون ايه اجيبهملك منين و اديهملك ليه اصلا
انس / تجيبهم منين ؟؟؟ من حبيب القلب عريس الغفله الدغف اللى هتدحكى عليه و تلبسية العمه ايه كتير على حبيبته مليون جنيه  اما بقي ليه فدا تعويض بسيط عن خروجك من حياتى
نيفين / انت هتستهبل انت نسيت اللى انت عملته معايا انت خرجتنى من حياتك من زمان يا استاذ ياريت بقي تخلى عندك دم و تخرج انت كمان من حياتى و تسبنى اعيش
انس / اخص عليكى يا نوفى و انا لو كنت قادر على بعادنا كنت احتفظت بكل زكرياتنا الحلوه دى سوا
انس يدى لنيفين فلاشه
نيفين / ايه دى
انس / دى نسخه من زكرياتنا هتعجبك اوى مش هتصدقى اللى فيها احلى لحظات حياتنا والله هى دى اللى كانت مهونه عليا فراقك كل مكنتى توحشينى كنت افتحها و اتفرج عليها .... مالك ساكته ليه امممم بصى انا مش مستعجل يومين كويس
نيفين بصاله و مصدومه و تقوم تمشى
انس / متتاخريش عليا يا نوفى ... بالسلامه يا قلبى
انس يقعد يكمل باقى العصير
.........................
فى شقه سميحه
سميحه / انا مرضيتش افتح الشنطه دى هناك عشان الحاجات دى متتنظرش محدش شافها الا مديحه و مش هبقى رخمه هسيبكوا تاخدوا راحتكوا فى الفرجه و هدخل افرد ضهرى جوه
مازن يحاول يفتح الشنطه مرام تمنعه
مرام / تدخلى ايه الشنطه دى مش هتتفتح اصلا انتوا بتهرجوا و لا ايه
مازن / الشنطه دى لو متفتحتش هتطير فيها رقاب
مرام / مهى لو اتفتحت هتطير فيها رقاب اكتر
مازن / قولى وربنا
مرام / وربنا
مازن / هو انا عارف بختى كويس عارفه اسود و منيل بستين نيله
سميحه / ههههههههههههه ليه بس طب هو فى اجمل من بختك اوعى يا بت انا اللى هفتحها
مرام / متهزريش بقى يا تيته الله
مازن / سبيها تفتحها يا بت
سميحه تفتح الشنطه علب مرصوصه فوق بعض فوق بعض تطلع ازايز مسك و سبح و سجاجيد و عبيان و جلاليب و فى شويه برفانات فى الاخر 
سميحه / دى عشانك هى اكيد مش حلوه اوى زى البرفان اللى بيدوخ مرام ده بس دى ريحتها حلوه اوى عجبتنى لما شمتها قولت دى للغالى حبيب قلب ستو
مازن / تسلمى يا احلى تيته فى الدنيا
مازن يفتحها و يرش منها
مرام / الله دى حلوه اوى فعلا
مازن / ربنا يخليكى لينا يا تيته نخش فى المفيد بقى
سميحه تطلع لمرام شويه برفانات و مكياجات
سميحه / البنت اللى بتبيع شرحتلى كل واحد من دول بيعمل ايه جبتلك من كل حاجه انتى مش اقل من غيرك 
مازن / حلوين اوى نخش عالمفيد بقى لو سمحتى
سميحه تكمل تطليع العلب مازن ينزل على ركبه و يطلع معاها اسرع لحد ميوصل لارضيه الشنطه يحط ايده على قلبه و مرام تدحك
سميحه / انت زعلت اكمنى مجبتلكش بجامه زى بتاعه محمود ولا ايه دانا قولت انت الحاجات دى مش سكتك خالص هو انت بتتجوز عشان تلبس و لا عشان تقلع
مرام تغطى وشها بايديها و مازن يروح يقعد تحت رجل سميحه و يبوس ايدها
مازن / ايوه انا معاكى جدا فالموضوع ده و احييكى على قرارك الحكيم بس فين الحاجات بتاعه مرام
سميحه / ااااااااااااااااااه مش تقوم مالصبح عالشنطه اللى عالسرير جوه
مازن يقوم جرى و مرام تحاول تمنعه يفلت منها و يدخل
مرام / شكرا يا تيته شكرا اوى
سميحه تشد مرام تقعدها جنبها
سميحه / وشك نور انتوا الاتنين متغيرين هتحكى و لا ادخل اجيب الشنطه من جوه
مرام / احكى ايه بس يا تيته
صوت مازن / يا حبيبتى يا تيته
مرام تبص فى الارض و تغطى ايدها فوشها
سميحه / مش عاوزه تخشى تبصى عالحاجات اللى جوه
مرام / لا كتر خيرك بعدين بقى لما يبقى يطلع من جوه
سميحه / دا لو طلع بقى
مرام / هههههههههههههههه انا عمرى مكنت اعرف انك كدا بصراحه انتى و مازن حله و لقت غطاها مشوفتش كدا
سميحه / دا هو ده غطاكى يا هبله الواد اللى جوه داهو
مرام / ايوه يا تيته بس مش كدا يعنى
صوت مازن / اموت انا
مرام / انتى جايبه ايه جوه
سميحه / متخشى تشوفى ياختى حد حاشك اما صحيح دلع ميرئ
مازن يطلع يمسك ايد مرام و يشدها و هى تقاومه
مازن / تعالى بس كدا
مرام / اجى فين اوعى كدا
مازن / تعالى يا بت الله هوريكى حاجه
مرام / مش عاوزه اشوف انا
مازن / يووووه عن اذنك يا تيته بقى
مازن يوطى يشيل مرام
سميحه / خد راحتك
مازن يحدف لسميحه بوسه و ياخد مرام جوه
مرام / نزلنى يا مجنون ... والله مخصماكى يا تيته ... نزلنى يا جزمه
مازن ينزل مرام جوه الاوضه تلاقى الهدوم مفروشه عالسرير تلمها بسرعه و تعبيها فى الشنطه
مازن / ليه كدا يا رخمه
مرام / هزرنا كتير بقى عيب كدا
مازن / كم انتى قاسيه يا امراءه على فكره بقى تيته بتحبنى اكتر منك
مرام / فدى معاك حق بقيت بحس بكدا فعلا بتحبك اكتر منى مكفكش تسرق قلبى سرقت قلبها هى كمان
مازن / انا كنت اقصد انها بتحبنى اكتر مانتى بتحبينى
مرام / مفيش شوف مفيش مخلوق فى الدنيا دى لا حبك و لا بيحبك و لا هيحبك قدى حتى مش اكتر منى و حط الجمله دى حلقه فى ودنك دى
مرام تمسك ودن مازن و تشدها
مرام / و دلوقت عدينى اطلع بره
مازن / يخربيت غشوميتك انا عارف مش طالعه لتيته ليه
مرام تبتسم و تعدى و مازن وراها بيدعك فودانه يقعدوا عالكنبه
مازن / طالعه لمين البت دى لتيته
سميحه / طالعه لامها كانت طوره فروحها كدا برده والله يابنى جوزها كان بيصعب عليا يلا ربنا يرحمهم بقى
مازن / ربنا يرحمهم
سميحه / تعال هنا يا واد
مازن / قلب الواد
سميحه / عجبك زوقى فى حاجه تانيه كانت فبالك الحق اجيبها
مرام تيجى تقوم مازن يشدها تقعد تغطى وشها بايديها
مازن / لا انتى كتر خيرك لحد كدا سيبى الباقى عليا انا
سميحه / كترتلك مالقصير  الاحمرات اصله بيليق على مرام اوى
مازن / اوى يا تيته بيليق عليها اوى
سميحه تمسك ودنه و تشدها و مرام تحاول تحوش
سميحه / و انت شوفت الاحمر عليها فين ياواد انت انطق
مرام / مانا عندى طرحه حمره يا تيته الله
مازن / طب والله حرام اللى بيحصل فيا ده ايه الافترا ده كلكوا عليا كدا الا مفى كلمه حلوه و لا نظره حلوه و لا اى حاجه
مازن يزغد مرام بالراحه بالكوع تبصله و تدحك
سميحه / شوف الواد اصلى بنت امبارح هيخيل عليا حركاتكوا دى دانتوا الاتنين وشكوا منور و اللمعه هتبظ من عنيكوا يلا ربنا يسعدكوا هعوز اكتر من كدا ايه تلاقيك انت كان هاين عليك مرجعش عشان متبعدش عنها بس عالعموم متقلقش هانت هرجعهالك تانى علاطول
مازن / اخص عليكى يا تيته تعرفى عنى كدا برده دانا كنت بعد الثوانى عشان ترجعى
سميحه / لا يا شيخ
مازن / مانتى لو مرجعتيش مفيش فرح
سميحه / لا حقك طبعا
مازن / المهم بقى عاوزين ننجز الموضوع ده عشان حبيبك جاب جاز اقسم بالله
سميحه / ياخويا العطله من عندك انا عبايتى اللى هحضر بيها جاهزه
مازن / على بركه الله
تليفون مازن يرن اسم نيفين يظهر مازن يبان على وشه الضيق
مرام / مين
مازن يكنسل و يبتسم لمرام ثوانى و تجيله رساله
مازن / ثوانى
مازن ياخد التليفون و يطلع البلكونه
مازن / الو
نيفين / ازيك يا مازن انا اسفه اوى انى بتصل بيك انا عارفه انك مشغول فى الفرح بتاعك بس انا فمشكله كبيره و مفيش غيرك يقدر يساعدنى
مازن / فهمت من رسالتك خير فى ايه
نيفين / انا لازم اشوفك مش هينفع فى التليفون ارجوك يا مازن اوعدك انى عمرى مهطلب منك اى حاجه تانى
مازن / طب ممكن تهدى و تفهمينى فى ايه
نيفين / انا هستناك فى الكافيه اللى كنا بنقعد فيه علاطول
مازن / تمام ماشى مسافه السكه و اكون عندك
مازن يقفل و يلف يلاقى مرام واقفه وراه
مرام / مين ؟؟
مازن / نيفين ... واضح ان فى حاجه هشوفها عاوزه ايه و ابقى اكلمك ماشى ؟
مرام / حاجه ايه دى
مازن / معرفش بس انا متعودتش حد يلجالى و اتخلى عنه
مرام / فاهمه .. تمام هستناك تكلمنى ماشى مش هنام ؟؟
مازن / مش هتاخر
مازن يدخل جوه و يروح ناحيه الباب و يبص على مرام متبعاه و باين عليها انها زعلانه يشاورلها باى و يمشى تروح تقعد جنب سميحه
سميحه / فى ايه ؟؟
مرام / مش عارفه بس ان شاء الله خير
سميحه / طب انا هدخل افرد ضهرى شويه لحسن ضهرى بدا ينقح عليا
سميحه تقوم و مرام تقعد و باين عليها انها مش مرتاحه
...................................
  فى شقه محمود
محمود / والله يا ماما قتلتينى فى حد يعمل كدا
مديحه / مقولتلك سميحه جيبالهم شئ و شويات و حتى كلمته من هناك قالها متجبش لاهله هدايا هو هيجيب من هنا عشان عارف زوقهم
محمود / يعنى و انتى عماله تطلعى فهدايا لمروه مهنش عليكى تدى ان شالله جلبيه لمرام تحس انك امها حتى و افتكرتيها اى حاجه ان شالله عود سواك البت فضلت قاعده و انتى عماله تفرقى
مديحه / مرام مبيفرقش معاها الحاجات دى و بعدين هى الهلاهيل اللى جبتها تملا عنيها و لا حتى ينفع تلبسها فى الفيلا اللى هتعيش فيها دانت غلبان اوى
محمود / و لا كانى بقول حاجه ماشى يا ماما خلاص اللى حصل حصل
مديحه / اسكت يا وله اما ستك جايبه شويه قمصان نوم تهبل وعدتنى تدى لمروه منهم تلاقيها بس اتحرجت تطلعهم و انتوا قاعدين
محمود / تصبحى على خير يا امى بكره يوم طويل دبح و جزارين و طباخين انتى عارفه
محمود يقوم يبوس راس امه و يدخل ينام
مديحه / و انت من اهله يا قلب امك
محمود يبتسم و يدخل اوضته و يقفل الباب و مديحه قاعده بتحرك الدهب فى ايديها و تتفرج عليه
........................
فى الكافيه
مازن يدخل يقابل نيفين
نيفين / انا متشكره انك جيت
مازن / فى ايه خير قلقتينى
نيفين / انا مش عارفه هو عاوز منى ايه مكفاهوش كل اللى عمله معايا لسه عاوز يستندل اكتر من كدا ليه مش عاوزنى اعيش بقى و اشوف حياتى عاوز منى ايه
مازن / انا مش فاهم حاجه لو سمحتى تهدى و تشرحيلى مالاول فى ايه
نيفين / انا فرحى الخميس و لقيت انس بيكلمنى و بيهددنى لو مديتوش مليون جنيه هيفضحنى اجبله مليون جنيه منين انا
مازن / انس عمل كدا
نيفين / هو مكفاهوش كل اللى حصل عاوز يدمر اللى باقى من حياتى انا معملتش فيه اى حاجه وحشه ليه بيعمل فيا كدا ليه مش عاوز يسيبنى اعيش
مازن / طب اهدى انا هكلمه و احل الموضوع
نيفين / انا خلاص فرحى قرب خلاص بقى انسونى سيبونى اعيش مش كفايا كل اللى جرالى مش كفايا حياتى اللى ادمرت كل احلامى اللى اترمت فى الارض كل واحد فيكوا مكمل حياتوا مستكترين عليا ان يبقى عندى حياه
مازن / قولت خلاص اهدى انا هكلمه
نيفين تعيط مازن يشاور للجارسون
مازن / واحد لمون وواحد قهوه لو سمحت
نيفين تمسح دموعها و تبصله يمسك التليفون و يتصل بحد
مازن / اهدى و اعتبرى الموضوع منتهى انا هحله تمام اشربى اللمون و روحى و انسى كل ده و اوعدك ان انس مش هيتعرضلك و لا اى حد فينا هيقربلك و لا هيكلمك و لا هتسمعى مننا اى حاجه تانى تمام ... اوعدك .. تمام
نيفين تهز راسها ايوه
مازن / ايوه يا زفت انت فين ...
........................
فى فيلا صفوت
مازن / انا كل يوم بتصدم فيك اكتر انت ازاى تعمل كدا
انس / انت بتدافع عنها ليه انت لسه مصدق انها غلبانه و بريئه دى استاذه و رئيسه قسم البت شاغلت كفيل ابوها لحد موقعته و راحت للدكتور اللى سقطها و خلته يرجعها بنت تانى عشان تعرف تسبك  الدور عالدغف اللى هتتجوزه
مازن / و دا يديك الحق تبتزها يعنى و بعدين انت ازاى تعمل حاجه زى دى بتصورها بتصور نفسك انت لحمك رخيص عندك اوى كدا اهو وقع فى ايدى هتعمل ايه بقى
انس / انت بتهددنى و لا ايه مانت كدا هتفضحها برده
...................................