السكه شمال بقلم / لولو_محمد ( كامله )

الحلقه ١٧١

(((((((((((((((((((السكة شمال )))))))))))))))))))))
#لولو_محمد
الحلقه 171
توفيق / باتت عنده كام مره و بات عندها كام مره
الست 1/ ولو  دا الراجل لسه ميت
ست فى الشباك / ياختى يا خبر النهرده بفلوس بكره يبقى بلاش هى الحاجات دى بتستخبى هيبان كلو هيبان
المعلم اسعد يعدى توفيق يوقفه
توفيق / ميا مسا يا سيد المعلمين
اسعد / ازيك يا تيفا عامل ايه
توفيق / عاتب عليك يا سيد المعلمين اخويا لسا مربعنش و نسايبك مولعينها زغاريط هو الميت ايه ملوش حرمه فى الحته دى و لا ايه
اسعد / حقك يا توفيق امسحها فيا
توفيق / لا يا معلم انت اكبر من كدا و جزمتك على راسى بس يعنى خير نفرحلكوا والله
اسعد / اصل النتيجه بانت و العيال نجحت محمود و مرام يعنى
توفيق / الله بجد الف الف مبروك صحيح ان بعض الظن اثم اصل ولاد الحرام عمالين يتكلموا عالست مرام و على نومه مازن باشا عندها كل ليله
.........................
اسعد /  اديك قولتها ولاد حرام هنعمل ايه بالاذن
الست 1/ الف مبروك يا معلم عقبال الفرح
اسعد / الله يبارك فيكى
صبى القهوه / امال فين الحلاوه يا سيد المعلمين
اسعد / بكره باذن الله مازن باشا عامل ليله لله و انا لسه جاى مالسوق و جهزت كام دبيحه و الكل هياكل و يدعيله
ست 3/ والله بندعيله
اسعد يمشى
توفيق / صحيح اطعم الفوم تستحى العين بياريلنا بحتتين لحمه و شويه رز بيشغل بق الناس بالاكل عشان ميتكلموش على الميغه اللى عاملها فوق
الشاب / ياعم متحطش فى دماغك بكره اللقمه تتهضم و الناس بقها يفضى و ترجع تتكلم تانى
توفيق / اصلها حاره معفنه بعيد عنك يلا بينا بلا هم
توفيق و الشاب يمشوا
ست 1/ عيل ابن كلب
ست 3/ بس كلامه جاى عالوجيعه اوى يا فوقيه
فوقيه / هو احنا يعنى منعرفش الحجه سميحه و تربيه الحجه سميحه دا خيرها عالحاره كلها
ست 2/ ياختى مش انتى اللى لسه قايله انها حامل و رايحه جايه معاه مره فبيته و مره فبيتها
فوقيه / مين دى انا اللهى اعدمك ان قولت حاجه  انتى هتلبسينى فى الناس ليه قومى شوفى وراكى ايه خلينى اشوف اكل عيشى قومى قومى صحيح نسوان فاضيه و لتاته بلا هم .... الخضار الخضار الطازه مجنونه يا قوطه
........................................
فى الشركه
مرام تدخل مكتب شريف مازن و مرام بيتفرجوا على فيديو عاللاب
مرام / الله انتوا هنا و انا قالبه عليكوا الدنيا
مازن / خير كانتى رنى عالموبايل
مرام / بعينكوا قولت اظبطكوا متلبسين احسن
شريف / هههههههههههههه ايوه كدا اصحى ليغفلك
مازن / اتلم ياله
مرام / بتعملوا ايه
شريف / هنا اهو اهو تعال بص
مازن يرجع جنب شريف و يبص و مرام جنبه
شريف / بص هنا زياد فى ايده تلت ملفات
مازن / ايوه مانا مالصبح بقولك اخد تلت ملفات امبارح و قال هيتسلى فيهم فى البيت
شريف / و لا واحد منهم احمر يا مازن و لا واحد احمر
مازن يبصله
مرام / هو فى ايه
شريف / مفيش
شريف يمد ايده فى البسكت و ياخد الملف و يمشى
مرام / هو فى ايه يا مازن
مازن / انا عارفله بقى النهرده الصبح زياد ادانى ملف و قالى انه مهم و اننا لازم نظبط العطا عشان يا ترسى على بابا يا عليا و منخسرش صفقه زى دى فدخله شريف قولتله شوف الملف بما انه فاهم اكتر منى شريف بقى ركبه مليون عفريت النهرده و ساب الشغل كله و مسك فى الملف الملف ده مش بتاعنا المناقصه دى احنا مدرسنهاش مينفعش تقدم زياد ماخدش الملف من عندنا لدرجه انه فرغ كاميره المراقبه و فضل يراجعها مخصوص عشان زى مانتى شايفه كدا
مرام / ثانيه عشان مش فاهمه شريف بيقول ان الملف ده مش من ملفات الشركه اصلا صح
مازن / اه
مرام / طب بص اكيد الملف ده مجاش من فراغ صح اكيد فى حد درس الملف و عمله حد دخله عالكومبيوتر حد كتبه حد عبى الارقام اللى فيه اكيد فى تيم اشتغل عليه صح
مازن / اكيد يعنى
مرام / فين التيم ده مين المسؤل عن المشروع ده احنا اتكلمنا مع ناس كتير جدا امبارح حد فيهم كان بيتكلم عن المشروع ده
مازن يبصلها
مرام / زياد اخد تلت ملفات و رجع واحد و الواحد ده مش بتاعنا طب فين الملفات بتاعتنا و هو جاب الملف ده منين شريف له حق يسال
مازن يطلع التليفون
مازن / ايوه يا زيزو ازيك فينك
زياد / فى الفيلا قاعد مع انس شويه عامل مشاكل للركب بعد مشال الماده يا سيدى
مازن / ياعم هى اول مره
زياد / بقوله كدا وربنا هو اللى مش عاوز يسمعنى المهم انت خير
مازن / الملفات اللى انت اخدتها امبارح عملت فيها ايه
زياد / معايا مجتليش فرصه ابص فيها ليه
مازن / اصل الملف اللى انت اديتهونى مش واحد منهم
زياد / يا راجل قول والله لكون بدلت الملفات استنى اما ابص .... اه الملفات بتاعتك هنا اهي معايا تلت ملفات هنا ليك هطبق عليهم النهرده و اعديهم عليك الصبح
مازن /ايوه بس انت اخدت تلت ملفات بس امال الملف اللى انت اديتهونى الصبح ده جبته منين
زياد / قول والله انا اخدت تلاته بس امال اللى اديتهولك ده جه منين ... مصيبه ليكون الملف ده اتلخبط اصل انا برده واخد ملفات من الشركه عندنا اتسلى فيها من فلاحتى اوى راميين الشغل كلو عليا
مازن / الملف مكتوب باسم شركتى يا زياد يبقى اتلخبط ازاى
زياد / مش عارف بص انا هجيب الملفات التلاته و اجيلك نشوف الموضوع ده سوا اكيد فى حاجه غلط
مازن / و انا مستنيك سلام
مازن يقفل
مرام / قالك ايه
مازن / بيقول ان الملفات التلاته عنده هناك و مش عارف الملف ده جه منين
مرام / مش شايف انها غريبه اوى دى
مازن / انا هروح اشوف شريف راح فين
مرام تهز راسها و مازن يمشى
...............................
فى مكتب واحد من الموظفين
شريف بيدى الملف لواحد
شريف / انا عاوز المناقصه دى تكون على مكتبى بكره ان شالله الشركه كلها تطبق فيها مش شغلى
مازن يدخل
مازن / شريف عاوزك
شريف يروح ورا مازن
مازن / انا كلمت زياد
شريف / و قالك ايه بقى ان شاء الله
مازن / قالى انه ميعرفش دا حصل ازاى و هيجيب الملفات و يجى نشوف اللى حصل
شريف / كويس يعنى قدامه على الاقل ساعه ساعه و نص يدور على حجه يقولها على الله يلاقى حاجه مقنعه
مازن / شريف
شريف / اه اسف اسف زياد بيه فوق مستوى الشبهات
مازن / هيعمل كدا ليه
شريف / و انا اش عرفنى متساله هو اصلا زياد كان بيعمل ايه هنا انت صاحب الشركه و مرام مراتك و محمود و سعد موظفين فيها زياد بقى بيعمل فيها ايه انا ساكت من ساعه وفاه خالو على دخوله و خروجه عشان خاطرك بس متنساش ان الشغل فيه اسرار يا مازن و المعلومه بفلوس يا تطلعك لفوق يتخسف بيك الارض
مازن / زياد مش هيعمل كدا
شريف / معاك زياد كان طول الوقت عاوز مفتاح الخزنه ليه بقى
مازن / معرفش كان قالى باين عشان حصر التركه و اعلام الوراثه و الحاجات دى
شريف / و الحوار ده وقف على زياد يعمله مفيش محاميين مفيش حد غير زياد يعمله مش كدا
مازن / انت بتحاول توصل لايه
شريف / انا واضح انت اللى مش عاوز تشوف
مازن / ميمكن اتلخبط مع ملفات تانيه 
شريف / بتحصل الحاجات دى اكيد بتحصل مهو لما يبقى واحد شغال فى شركتين اكيد الملفات هتروح بين الاتنين ملف من عندنا يروح هناك ملف من عندهم يجى هنا
مازن / انت عندك حق مكنش المفروض اصلا الملفات تطلع من الشركه
شريف / دى نقطه كويسه و الاحلى منها بقى ان مكنش ينفع زياد اصلا يعرف حاجه عن شغل الشركه
مازن / مش هتبطل انت صح
شريف / هو مش موظف هنا هو موظف فى شركه منافسه حتى لو كانت شركه ابوك حتى لو كان ليك اسهم فيها بس احنا الاتنين بنقدم على نفس الشغل و بنافس بعض
مازن /مكدا كدا العائد فى جيبى من هنا او هنا
شريف / حلو اوى احنا نقفل دى بقى و نوفر مرتبات بالهبل و نركز فى واحده دا حتى صاحب باللين كداب
مازن / للاسف معاك حق
شريف / الحمد لله مازن تفتكر لو مكنتش انا جيت انت كنت هتمضى عالمناقصه دى و تبعت الملف ده منغير ميندرس
مازن يبصله
شريف / تفتكر كنت ممكن تخسر قد ايه بملف زى ده حتى لو زياد مش قاصد بس للاسف الغلط عندنا بفلوس و دى غلطه زياد ... لا الحقيقه غلطتك انت
مازن / معاك حق
شريف / تمام
مازن / زياد هيجيب الملفات اللى خدها
شريف / ملوش داعى لان الملفات دى كلها نسخ فانه ياخدها او يرجعها مش هيوقف الشغل هنا الفكره كلها ان اى كان اللى فى الملفات دى معدش سر اتمنى انها متكونش عطاءات ناويين نقدم عليها دا الموضوع كله
مازن / معاك حق
شريف / بص انا هكمل النهرده متنكدش على نفسك خد مرام و روحوا غيروا جوا انبسطوا احتفلوا انت اول مره تقدر يابنى يعنى يوم متقدر تتكدر
مازن/ منحوس بقى
شريف / فى الاول و الاخر دى فلوسك انا بس بتكلم عشان انت بالنسبالى اكتر من اخ و مصلحتك تهمنى فوق اى حاجه تانيه و صدقنى يا مازن الموضوع مش حوار زياد بالتحديد الموضوع بس عالموقف مش اكتر
مازن / تمام تعال بقى نكمل اللى ورانا عشان نطلع كلنا نحتفل بالنجاح اللى ملحقناش نفرح بيه ده
شريف / يلا
.............................
فى فيلا زياد
انس / و انت هتروحله بجد
زياد / طبعا انا لو مروحتش هلبسها رسمى
انس / طب الملفات اللى معاك دى هتعمل فيها ايه
زياد / و لا اى حاجه بالعكس انا لازم اضمن ان العطاءات دى ترسى على مازن باى شكل
انس / يعنى حتى الشغل ده طار هو كمان دا كدا موت و خراب ديار
زياد / معلش لكل جواد كبوه خيرها فى غيرها
انس / طب هتقوله ايه
زياد / هعمل عبيط كالعاده
انس / طب هتقول ايه لمنصور السباعى
زياد / هقوله ايه فى ايه هقوله ملقتش شركه تعملك المشروع بتاعه بنص التمن عادى يعنى هو انا ساحر اجيبله منين انا شركه مستعده تخسر عشان سواد عنيه
انس / سواد عنيه بس دا سواد عنيه و تمانيه مليون جنيه يا زيزو بس تعرف انا قولتلك قولتلك لبسها لجوز امك
زياد / انت عبيط انت عارف كويس العنين مفتحه عليا هناك قد ايه و اى غلطه بجون رقبتى انا اللى هتطير فيها لكن مازن حمار و مبيفهمش اى حاجه فى الشغل و لامم حواليه شويه عيال زيه و لو عكت عادى فلوسه و هو حر و محدش بيتعلم ببلاش مهو اول مره ينزل الشغل يعنى فهمت بقى انا ليه كنت عاوز مازن اللى يشيل
انس / اهو شريف وقفلك فيها
زياد / اى حد غير شريف كنت عرفت اتعامل معاه بس شريف حاجه تانيه اخونا التالت اللى مجابتوش ولاده منك لله يا دهبى انت اللى حدفت علينا البلوه دى
انس/ مبيجيش من وراه خير ابدا
زياد / ابدا
.........................................
فى الشركه عند مازن
مرام قاعده بتتفرج عاللاب مازن يدخل
مازن / الله انتى لسه هنا بتعملى ايه عندك
مرام / ببص عالكاميرات ... هو مكتبك فيه كاميره
مازن / لا مفيهوش هههههههههههههههههه و لا هنا فيه
مازن يغمزلها و يقرب منها
مرام / اتلم حد يدخل متنساش ان ده مكتب شريف
مازن / اتلميت
مرام / ليه مش كل المكاتب فيها كاميرات
مازن / مفيش كاميرات فى المكاتب اصلا فى فالاماكن المهمه زى اى مكان فى خزنه و عشان كدا فى فمكتب خالو واحده وفى فى الكوريدورات و عند مدخل الشركه و كدا يعنى
مرام / بس مش تفتكر لو فى الموظف فى فوق راسه كاميره مش هيشتغل احسن
مازن / والله لو وقفتى شخصيا فوق راسه و معندوش ضمير هيلاقى طريقه برضه
مرام / معاك حق طبعا قولى صالحت شريف
مازن / انا هتجنن يا مرام شريف معاه حق فى كل كلمه بس زياد هيعمل كدا ليه
مرام / معرفش يعنى اصلا مدام شركه باباك مقدمه عليها مصلحته ايه ان انت كمان تقدم يعنى
مازن / دى نقطه مهمه اوى برده
مرام / بص يا مازن انا لو منك اخد بالى اوى الفتره الجايه مش من زياد و بس من كل حاجه مينفعش تمضى على اى ورقه الا لما تقراها كويس و مينفعش تدخل اى مشروع الا لما تدرسه كويس
مازن / معاكى حق
مرام / لازم تفوق لنفسك الكل مستنيلك غلطه لازم تثبت للكل انك قدها و متشمتش حد فيك فاهمنى
مازن / اكيد طبعا يا قلبى فاهمك
مرام / و بعدين متزعلش منى فى اللى هقوله هو يعنى زياد ده فالح اوى
مازن / هههههههههههههههه
مرام / لا بجد اذا كنت انا و محمود اللى هو امواس الدفعه فى حاجات كتير اوى واقعه مننا و لولا قعدنا مع الناس امبارح لو كنا وقفنا على راسنا مكناش فهمناها زياد اللى مدبلر و بينجح بالغش و الرشوه فاهمها
مازن / انتى قولتيها الناس شرحولك الناس دول بقى قاعدين مع زياد ليل نهار يعنى زى متقولى كدا زياد بيزاكر العملى و مبيفتحش النظرى عكسك انتى ملكيش خبره فى السوق فهمتى
مرام / فهمت
.........................................
فى الحاره بالليل
مازن يركن العربيه و ينزل و مرام تنزل يستناها يمسك ايدها و يدخلوا الحاره الناس لما تشوفهم يزغرطوا و يسلموا على مازن و يباركوله و هو مخضوض و مش فاهم يبص لمرام بتدحك و كتماها
راجل  / الف مبروك يا مازن بيه الف الف مبروك دا الحاره كلها فرحتلك والله
مازن / شكرا
الراجل / اتفضل اشرب حاجه لازم نحتفل بيك الليله
محمود / مره تانيه يا رجاله الراجل راجع تعبان
راجل 2/ الله يعينه والله بندعيله كلنا بندعيله
مازن / وصلت وصلت هستاذنكوا بس
مازن متبت اوى فى ايد مرام يشدها بالراحه ناحيه البيت و محمود وراهم يقابل توفيق ساند عالعماره
توفيق / مبروك يا بهوات
مازن / الله يبارك فيك عن اذنك
توفيق / صحيح يا جدعان محدش بيكبر عالعلام
مازن يطنش و يدخل مرام البيت و يطلع معاها فوق
مرام / ايه مش هتدخل
مازن / احنا اتفقنا على ايه
مرام / تمام
محمود يطلع
محمود / فى ايه
مازن / مفيش تصبحوا على خير
مازن يجى ينزل
محمود / انت رايح فين انا لسه قافل البوابه
مازن / هقفلها ورايا متقلقش انت يلا اشوفكوا الصبح سلام
مازن ينزل
محمود / هو فى ايه
مرام / هيروح هيعمل ايه يعنى ايه هيقعد هنا العمر كلو يعنى
مرام تبص لمحمود بحزن و تدخل و تقفل الباب يدخل هو كمان
...........................
فى اوضه لبنى
زياد / الحيوان خليفه قاله بعت و غير الكالون و حتى مدانيش نسخه بيقول الوضع اختلف مرام دلوقت بقى معاها نسخه و بتروح تفرش حاجتها و مش هتبقى ظريفه لو لقت حد فى شقته
لبنى تبص لزياد
زياد / بيقولى تنقى الشقه اللى تعجبها بس بعيد عن العماره مشاكل بيت العيله و السلايف دى احنا فى غنا عنها
لبنى / كتر خيره مطلبتش منه حاجه اصلا
زياد / انتى اللى حطيتى نفسك فى الموقف ده
لبنى تبص لزياد
زياد / اصل الناس بتوع زمان دول بيقولوا حكم صحيح من خرج من دراه اتقل مقداره و هنا بيتك يا قلبى ده دارك
لبنى / خلاص فهمت فهمت
زياد / قوليلى بقى هتفضلى حابسه نفسك فى اوضتك كدا ايه
لبنى / انا مش هسافر
زياد / ليه
لبنى / كدا مليش نفس اسافر خصوصا مع ماما خصوصا دلوقت
زياد / براحتك اعملى اللى يريحك بصى ايه رايك تروحى تقضى كام يوم مع ماما على فكره بتتصل تطمن عليكى كل يوم و خايفه تكلمك تفتكرى انها بتضغط عليكى نرجع لبعض
لبنى تهز راسها
زياد / انا هسيبك ترتاحى و هروح انام النهرده كان يوم طويل جدا و صعب بجد خلاص هلكت من كتر التعب عن اذنك
زياد يحاول يبوس راس لبنى من فوق الحجاب تسحب راسها بعيد يبتسم و يمشى و يقفل الباب وراه تفك الطرحه من على راسها و تحدفها و تنفخ
لبنى / تقعد فى اى حته بعيد هاه بشحت منك انا  ماشى يا مازن ماشى
......................................
فى الشارع عند مرام
مازن خارج مالبيت و بيقفل البوابه
اسعد / الله على فين يا مازن بيه
مازن / بيه ايه يا معلم كدا ازعل منك احنا فى بينا الحاجات دى
اسعد / ههههههههههههههه لا مفيش قولى بقى على فين العزم اوعى تكون زعلت من اهل حتتك هما بس العشم واخدهم حبتين و فرحولك خصوصا لما شافو البهايم و هى داخله الزريبه عشان بكره ان شاء الله دا الزغاريط كانت جايبه اخر الحته
مازن يبتسم
اسعد / احنا عارفين ان خالك لسه متوفى قريب بس الغلابه مبيصدقوا حته لحمى يعضوا فيها
مازن / اهم حاجه الغلابه يا معلم خليهم ياكلوا و يدعوله احسن من مليون حاجه تانيه
اسعد / عين العقل يابنى والله عين العقل صحيح مبروك النجاح عقبال الدكتوراه
مازن / ههههههههههههههه انا اخرج منها بس و غلاوتك مهعتبها تانى
اسعد / هههههههههههههههههههههه كلهم قالو كدا و اول مخرجوا قالوا كانت اجمل ايام حياتنا
مازن / لا يا معلم الوضع معايا مختلف انا اجمل ايام حياتى لسه جايه
اسعد / ربنا يملاهالك بركه و يسعدك زى مانت بتسعد الغلابه متيجى نلعب دورين طاوله اقطعك زى كل مره
مازن / خليها بكره بجد تعبان جدا و عاوز انام
اسعد / خلاص يا مازن بكره بس اوعى تنسى
مازن / لا متقلقش مانا اكيد هيجى يوم و اخد بتارى يعنى
اسعد / كان غيرك اشطر
مازن / هههههههههههه سلام يا معلم
مازن يشاور لاسعد و يمشى توفيق عالقهوه
توفيق / الله هو لحق يشبع و لا ايه
راجل كبير / عيب يا توفيق الكلام ده دى اعراض ناس و دى بنت حتتك و دا جوزها
توفيق / جوزها يبقى ياخدها بيته و لا مؤاخذه مش فاتحينها بانسيون احنا
راجل تانى / الحجه سميحه لو سمعت الكلام ده هتزعل و دى ست خيرها عالحته كلها
توفيق / و هو من بعد خير الباشا خير اكل و اكلكوا وظايف و عين عيالكوا حتى الشارع نضف و اتسفلت و بسم الله ما شاء الله الحاره بعد مكانت معفنه بقت و لا شوارع اوروبا بس على حساب ايه يا رجاله
اسعد يدخل
اسعد / لم لسانك ياله ده بدل مقطعهولك
توفيق / انا محدش بياكلنى عشان يكسر عينى يا معلم و بعدين كلمه الحق بتزعل بس لازم تتسمع اللى بيحصل فى بيت الحجه سميحه ده و خروج و دخول الرجاله عليهم ده عيبه فى حقنا و حقك انت قبلينا يا معلم
اسعد / انت بتقول ايه ياض انت متخلينيش اعملها معاك والله اعلقك على باب المحل و اخلى العيال تزفك
توفيق / الله انت مش مناسبهم و مديهم بنتك و داخله خارجه عليهم مجابوش راجل غريب بيتوه فوسطيهم طب مازن و قولنا كاتب كتاب و جبنا شويه مايه و بلعناها صاحبه بقى بات هنا بمناسبه ايه
اسعد / اللهم طولك يا روح
اسعد يجى يمسك فى توفيق راجل كبير يمنعه
الراجل الكبير / اعصبك يا معلم ....الله يرحم اما كنت بتقف عالناصيه تدايق فى الخلق و تعاكس فى الرايحه و الجايه دلوقت هتعلمنا العيب
توفيق / وقتها كنتوا رجاله و بتقفولى لكن الباشا بياكلنا يبقى نحشر اللقمه فى زورنا و نتكتم
اسعد / كلمه كمان و قسما بالله
توفيق / و لا تحلف و لا تعصب روحك انا اللى فزورى رجعته و سايبهالكوا و ماشى اياكش تولع بيكوا بلا قرف
اسعد / قرف اما يشيلك زرعه نجسه ... اتفووووو
....................................