السكه شمال بقلم / لولو_محمد ( كامله )

الحلقه ١٨١

((((((((((((السكة شمال ))))))))))
#لولو_محمد
الحلقه 181
مرام / و مين ياخد باله منك انا مش همشي الا لما تخف خالص خالص
مازن يعمل نفسه دايخ و يرمى نفسه عليها
مازن / اللحقيني الدور زاد عليا
مرام / يخربيت تقلك ما تنشف ياله
مازن يتعدل / حاضر يا معلمى قولت ادلع يعني
مرام / و هو ده دلع ملخت دراعى خش ارتاح و انا هدخل المطبخ اشوف لقمه اعملهالك
مازن / اكل ايه بس انا مش جعان
مازن يجي يحضن مرام تزقه بالراحه
مرام / هههههههه استني بس تيته دايما تقول البرد علاجه الاكل تتغذى تخف متاكلش العيا يتمكن منك انا هعملك دلوقت شويه شوربه
مازن / تسلم ايدك بس والله الموضوع مش مستاهل و بعدين انا اصلا بطنى تعباني مش هقدر اكل دلوقت شويه كدا لما اخد الدوا و يبدا يشتغل نفسى هتتفتح و هاكل و كل حاجه خلاص
مرام / انت دكتور ؟
مازن / يعني انتى اللى دكتوره اوى
......................................
مرام / تيته سميحه على فكره كانت بتشتغل حكيمه زمان يعنى ممرضه او حاجه زى كدا و اتعلمت منها كل حاجه
مازن / يا سيدى يا سيدى اتعلمتى ايه بقى
مرام / اتعلمت ادى حقن و اقيس الضغط كان نفسى ابقى دكتوره و كنت بتمرن و جه عليا وقت نزلت وقفت فى صيدليه عندنا فى الحته قال ايه بتمرن للمستقبل و فالاخر زى مانت شايف ريست على تجاره
مازن / من بختى و نصيبى عشان اشوفك و احبك
مرام / دا بختى انا
مازن / طب ينفع كدا يعنى
مرام / ايه
مازن / تبصيلى بعنيكى كدا و انا عيان كدا اضعف كدا و اقرب كدا
مرام / وسع كدا الله
مازن / ايه بقى
مرام / زياد زمانه جاى
مازن / اهو زياد ده اللى دماغ لوحده انا فعلا مش مصدق اللى هو عمله
مرام / كتر خيره خايف عليك
مازن / يا ستى انا مش معترض بس على الاقل كان كلم شريف هو كان هيتصرف
مرام / ازاى مهو مفيش غيرى معاه المفتاح اصلا و بعدين هو شريف هياخد باله منك قدى و لا هيعمل ايه اكتر من اللى اتعمل
مازن / يا حبيبتى مقصدش والله الفكره كلها ان الموضوع ميستاهلش و انا اصلا لسه قافل معاه من مفيش و يادوب دخلت نمت لحق يجى امتى بس
مرام / مهو جه وخبط و لما انت مفتحتش كلمنى انا جيتلك
مازن / ماشى
مرام / هو انت زعلان منى
مازن / ابدا ايه اللى خلاكى تقولى كدا
مرام / معرفش من ساعه اللى حصل امبارح و احنا تقريبا متكلمناش و دلوقت حساك مدايق انك شوفتنى
مازن / عقلكوا اللى قد عقل النمله ده يا بنتى مفيش حاجه مالكلام ده خالص انا امبارح وصلتك و مكنش ينفع امشى معاكى فى الحاره و انا مبلول و كلمتك اطمنت عليكى و فعلا يادوب روحت خدت دوش و نمت و من شويه بطنى وجعتنى دخلت الحمام و رجعت نمت تانى و صحيت عليكوا دا كل اللى حصل
مرام / بطمن بس
مازن / انا لو زعلان منك مش هعمل حركات العيال دى و اتقمص و اللوى بوزى انا هقولك انى زعلان و اديكى فرصه تصالحينى كمان لانى لو معملتش كدا مش هبقى باقى عليكى انا مبحبش النكد بالعكس انا ولدت فرفوشا متفرفشا
مرام / ههههههههههههههههههه طب يا فرفوش اتفضل ادخل ارتاح بقى لحد معمل ام الفرخه دى اللى واقفين نحكى عنها مالصبح مداهيه لبعد كل ده يطلع معندكش فراخ
مازن / لا فى متقلقيش هتلاقى كل حاجه جوه اتفضلى انتى خدى راحتك عارفه السكه و لا اجى اوصلك
مرام / خفه
مرام تدخل المطبخ جرس الباب يضرب مازن يروح يفتح يلاقى زياد يديله كيسه
زياد / العلاج
مازن / شكرا
زياد يمشى
مازن / استنى هنا انت رايح فين
زياد / هروح انام بقى اطمنت عليك الحمد لله عاوز ايه تانى
مازن / هعوز سلامتك بس انت كان ايه اللى جابك اصلا
زياد / ياعم زن لبنى لما سمعتنى بقول انك عيان فضلت تقولى اخوك يا زياد ملوش حد و قاعد لوحده يا زياد حط نفسك مكانه يا زياد هتصل بشريف و يبقى صاحبه اجدع من اخوه يا زياد لبست و نزلت و طلعت فى الاخر مقلب اهو بعد مقلبنا الدنيا يلا حصل خير
مازن / ههههههههههههههههه معلش تاعبينك احنا
زياد / قدرى بقى هعمل ايه
مازن / طب ادخل
زياد /  فرصه تانيه انا بنام على نفسى والله يلا سلام
زياد يمشى و مازن يقفل الباب و يدخل المطبخ يلاقى مرام واقفه بتصب مايه سخنه فى المج و تقلبه و تروح تديهوله
مرام / شويه يانسون لحد مالشوربه تخلص 
مازن / عاوز انام
مرام / خلاص اشربه و نام و انا لما الشوربه تخلص هصحيك
مازن / يهون عليكى انام لوحدى و انا عيان
مرام / لا ميهونش مانا هبقى اجى انام جنبك
مازن / حتى تجربى السرير الجديد ليكون بيزيق و لا حاجه
مرام / متمشى بقى يا مازن اخلص
مازن / كم انتى قاسيه يا امراءه
مرام / ايوه قاسيه جدا و لو اليانسون ده متشربش لاخر قطره هجيب الخرزانه و اوريك القسوه اللى على حق
مازن يبصلها بطرف عينه و يرفع حاجبه
مازن / الله يرحمك يا خالو كان دايما يقول مفيش راجل عاقل ميخافش من مراته
مرام / اسمع كلامه بقى و يلا خلص الكبايه دى
مازن / ربنا عالمفترى
مازن ياخد المج و يمشى و مرام تدحك و ترجع تبص عالمايه اللى عالنار
....................
فى شقه مديحه
مديحه/ و انت سبتها هناك حتى بعد ما مروه كلمتك و فهمتك اللى حصل
محمود / معرفتش اقولها ايه خصوصا لما طلع من الاوضه
مديحه / اعمل فيك ايه اعمل فيك ايه
سميحه / متعمليش حاجه المهم اننا اطمنا عليهم
مديحه / يا حجه الناس بدات تتكلم عالبت و كل واحد بلسان
سميحه / و بيجوا قدام مازن و بيتخرسوا و يبوسوا ايديه و رجليه و لا مبيحصلش
مديحه / بيحصل يا حجه بيحصل
سميحه / الناس مورهاش الا الكلام و لما اتصلوا امبارح مش انا قولتلك مترديش قولتلك شافوهم ماشيين و بيطقسوا قال يعنى لما حد فينا بيتعب بيطلعوا جنيه من جيوبهم و يجيبوله علاج حاره ما يعلم بيها الا ربنا الله يرحم زمان و حوارى زمان كان اللى يعيى ده تلاقى الخير ملا بيته تلاقى الجيرن بيبعتوا اكل و الضيوف بيسيبوا فلوس و لا يجيبوا فاكهه للعيان يتقوت بيهم و يقوموا بالواجب و يمشوا مش زى دلوقت تلاقيك راقد مش عارف تاخد نفسك و الناس قاعدين عمالين يتسايروا و يتكلموا و ينموا على خلق الله و لا كانك عيان و محتاج راحه و جبتوا تمن المستشفى منين و العمليه دى مش عارف ايه اللهم احفظنا الحمد لله على كل حال انا داخله انام و الصباح رباح عن اذنكوا
مديحه / تصبحى على خير يا حجه
سميحه / و انتى من اهله يا مديحه
سميحه تمشى و مديحه تقفل الباب وراها
محمود / انتى اتخانقتى مع خالتى ام مروه
مديحه / ياخويا و لا اتخانقنا و لا حاجه الوليه بتقولى قال ايه انتوا نايمين و سايبين البيت للى داخل و اللى خارج و ازاى مرام تخرج لوحدها فوقت زى ده و ان الموضوع ده فوشنا اكمنك يعنى راجل البيت قولتلها عندك و اقطمنى بنتنا ست البنات البت خرجت مع اخوها و بعلمنا و تحت عنينا و اللى يقول كلمه عليها ندب صوابعنا فى عنيه قامت الوليه جرت ناعم و قال ايه مش هى اللى بتقول دا نسوان الحاره اللى نازلين لت و عجن اما دى حاره قطعت و قطعت سيرتهم يا اخى نفسى افهم جنس جبله اللى جبوهم ايه دانا شوفت كتير و قاليل مشوفتش قد الحاره دى الا ما شافو مننا حاجه وحشه الا مفى مره جينا على حد انما ابدا واجب و عملنا زيارات و زورنا هدايا و اشترينا اكل و اكلنا حتى الحاره نضفناها و عمالنالهم قيمه دا حتى الحاره معدش فيها عواطلى واحد بسبب الجوازه دى و فالاخر عمالين يجيبوا فى سيرتنا
محمود/ انا ليا كلام تانى الصبح مع سلامه فوجود المعلم اسعد و رجاله الحته عالقهوه اما اشوف انا الحوار ده
مديحه / احنا سكتنالهم كتير و انا لو منك اجيب شريف و مازن بيعملولهم حساب و خلى شريف يلبس البدله السمره بتاعته دى بتعمل معاهم احلى شغل والله
محمود / انتى بتقولى ايه ياما
مديحه / بقول نحط النقط عالحروف و نجيب ناهيه الموضوع ده الكلام كتر فيه و الواد توفيق ابن الصرمه نازل صيد فى المايه العكره من تحت لتحت دا شد مع المعلم اسعد بس هما خافو يقولولك كان بيتكلم عنك و عن البت مروه
محمود / بيقول ايه ابن الكلب ده
مديحه / مابيقولشى استهدى بالله و افهم كان بيتكلم مع المعلم انه سايب بنته تيجى عندنا البيت و انت مبيت عندك صحابك ايام مشريف كان بايت هنا فالمعلم مسك فيه
محمود / الواد ده جاب اخره معايا
مديحه / الواد ده قتل اخوه و مخدش فيه يوم هتستعصى انت عليه استهدى بالله و سيبه للى قده لم رجاله الحاره بكره زى مقولت و هات مازن و شريف و الواد سلامه و هى يعنى مرام مش مراته و سمعتها تخصه خليه يتنحرر و يخرسهم ان مكنش بفلوسه يبقى بنفوذه و بعدين هو مش معتز باشا ظابط النقطه صاحبه و حبيبه اكيد هيوجب معاه
محمود / يقوم بس بالسلامه و يحلها حلال
مديحه / دعياله اقسم بالله علاطول بدعيله يسترها معاه دنيا و اخره زى مهو جدع معاك يوقفله الناس الحلوه اللى زيك
محمود / تصبحى على خير انا داخل انام
مديحه / و انت من اهله يا حبيبى و انت من اهله
..............................
فى شقه مازن
مرام تغرف الشوربه و تحط الفرخه فى طبق تصب كبايه عصير من التلاجه و ترص عالصينيه و تاخدها و تروح اوضه مازن تحطهم عالكومدينو جنبه تلاقيه قاعد بيلعب فى الموبايل
مازن / انا شربت كبايه اليانسون يا ابله الناظره ايه هى سياسه المدرسه دى ثواب و عقاب و لا عقاب بس
مرام / لا ثواب و عقاب متقلقش حقك محفوظ بحوشهملك جنب اخواتهم
مازن / انا ليا عندك كتير اوى يا مرمورتى ايه نظامك
مرام / متستعجلش خلى بالك طويل
مازن / اطول من كدا ماشى خلينى انا الكبير
مرام / انا هدخل اشطب المطبخ على متخلص الاكل ده
مازن / انتى اسوء من عيله شريف على فكره قال و انا اللى كنت بالس عليه لما بيهرب من البيت لما بيعيا
مرام / يا سلام و هو خوفنا عليكوا و حبنا فيكوا بقى حاجه تهربوا منها على العموم الباب مفتوح يا سى مازن اهرب
مازن / اهرب من قلبى و اروح على فين ليالينا الحلوه فكل مكان مليانه شوق و امل تيرارا
مرام / هههههههههههههههه يا مزاجو
مازن / مراتى حبيبتى قاعده معايا فبيتنا و اوضه نومنا و على سريرنا و بتاكلنى بايديها الحلوه دى فبقى
مرام تاخد حته فرخه تحطها فى بقه يعضها تدحك
مرام / هههههههههه لا داحنا الخدمه عندنا خمس نجوم
مازن يتعدل فى قعدته
مرام / عندنا الاقامه فول بورد بريكفاست دينر اند لانش
مازن / الله اكبر
مرام / و مش بس كدا يا فندم داحنا عندنا خدمه دلعنى شكرا مقدمه لسيادتكم برعايه قلبى يا ناس
مازن / ايوه انا بحب الخدمه دى جدا
مرام / الخدمه دى بتضمن لحضرتك انى اكلك البريكفاست دينر اند لانش بايدى
مازن / كتير والله
مرام / مع الكثير من الكلام المعسول و التسبيل يا فندم
مرام تبربش بعنيها بهبل مازن يضربها على قفاها بهزار و يدحكوا
مازن / فصلتينى يا شيخه ههههههههههههههههههههه
مرام / ههههههههههههههههه ايه يا فندم ده الله ما ينفعش كدا حضرتك والله
مازن / بلا يا فندم بلا بتنجان بقى و انا اللى كنت خلاص طلعت معاكى رزعتينى ايه ده هاه ايه ده
مازن يقلدها و يبربش زيها تدحك
مرام / هههههههههههههه لا على فكره معملتش كدا ايه الاوفر ده
مازن / والله مبتعرفيش تسبلى متسبليش كفايا تبصيلى
مرام / معلش اصلى لسه جديده سبتلك انت التسبيل يا بروفيشنال
مازن / اعلمك
مرام / علمنى
مازن / اول حاجه تبصى فى عين اللى قدامك كدا
مازن يركز فى عنيها و هى مبتسمه و بتحاول تدارى
مازن / ثانيا تتاملى فى العيون و فى جمالهم 
مرام تحول مازن يديها كف تانى بهزار ينيمها عالسرير و هى مهلوكه دحك
مرام / ههههههههههههههههههههه
مازن / لا انتوا الخدمه بتاعتكوا دى مش عجبانى
مرام نايمه عالسرير على جنبها و باصه لمازن تحط ايدها فوسطها
مرام / على العموم تقدر تسيب شكوتك فى خدمه العملا و باذن الله هنعبرك
مازن / لا دانتوا متعرفونيش بقى دانا اجيب عليها وطيها
مازن يقوم يقعد على ركبه و يقعد يزغزغ فى مرام و هى بتدحك
مرام / ههههههههههه لا انت بتخم هههههههههههههه بس بقى هههههههههههههههههه خلاص حرمت حرمت ههههههههههههه بطل بقى بجد
مازن يرجع مكانه و مرام نايمه على ضهرها بتنهج من الدحك
مازن / كل يوم من دا
مرام /  كم انت قاسى يا رجل
مازن ينام جنبها تدخل فى حضنه
مرام / ينفع كدا
مازن / هو بصراحه ماينفعش بس اهو على ما تفرج بقى نعمل ايه
مرام / امال ايه اللى ينفع
مازن / اللى ينفع حاجات كتير اوى ماتنفعش
مرام / هههههههههههههههههه انت بتقول ايه
مازن / متاخديش فى بالك تلاقي الدوا بدا يشتغل و بدات اهيس
مرام / لا بجد بتقول ايه
مازن / هكون بقول ايه يعنى نايم فى اوضتى و فسريرى و فحضنى مراتى حبيبتى اجمل بنوته فى الدنيا و مقضينها زغزغه
مرام / هانت
مازن يقوم يقعد مرام تقوم تقعد هى كمان و تعدل نفسها
مرام / عشان كدا ادايقت لما محمود مشى و انا ممشيتش معاه
مازن / انا مدايقتش انا بس استغربت دا بيتك و تيجى فى اى وقت و لو عليا تبقى هنا علاطول و متبعديش عنى ثانيه واحده و حطى الجمله دى فى دماغك تمام
مرام / انا بسال بس
مازن يبصلها و ياخدها فى حضنه
مازن / دا العيا طلع حلو اوى يا ولاد
مرام / هههههههههههههههههههه بعد الشر عنك ان شالله الناس الوحشين
مازن / بت انتى هتبقى كدا بعد الجواز و الخلفه و الكحرته متجيش بعد كدا تتلخمى فى العيال و اتركن انا عالرف ازعل و اجيب ناس تزعل
مرام / والله لو هتفضل تحبنى و تدلعنى بعد متكحرت من العيال و عمايلهم فيا هفضل احبك و ادلعك حتى لو بقيت اصلع و بكرش حتى
مازن / مين ده انا انسى يا ماما مفيش الكلام ده انا اخرى يوم ميضربنى السلك شعرتين بيض اعفن حلاق يصبغهملى
مرام / هتصبغ شعرك
مازن / و ايه المشكله؟؟ بلاش هحنهم يا ستى
مرام / طيب
مازن / و مالك بتقوليها كدا يعنى
مرام / مفيش
مازن / مرام ... حوبى ... اتعدلى يا ماما بدل موريكى الورش التانى
مرام / لا و على ايه انا اصلى يعنى
مازن / ايوه
مرام / اصلى
مازن / هتطلع اهى
مرام / اصلى
مازن / طب اول حرف و انا هكمل
مرام / اصلى بحب الشعر الابيض فى الرجاله اوى
مازن / بتتكلمى جد
مرام / لا بحسه وقار و هيبه كدا يعنى رمز للرجوله و النضج اهو مزاجى كدا
مازن يقف قدام المرايه و يفر فى شعره على شعر ابيض
مازن / طب دا نعمل فيه ايه دا مفيش و لا شعره بيضا
مرام / ههههههههههههههههههه يا سيدى مستعجل على ايه مسيره الايام تبيضه
مازن / قرى و اعترفى بتحبى ايه تانى
مرام / مش هقولك الا لما تخلص اكلك انا هقوم اشطب المطبخ هزرنا كتير حبه جد يلا متخليش ابله الناظره تزعل
مازن / ههههههههههههههههههه كلو الا ابله الناظره
مرام تبتسم و تمشى
.....................................
فى الفيلا
لبنى / انت هتفضل قاعد عندك مش هتنام
زياد / و انتى ايه اللى مصحيكى
لبنى / حاولت انام كتير معرفتش نزلت اشوف لو فى جديد
زياد / تؤ مفيش تفتكرى هتعمل ايه
لبنى / معرفش مرام للاسف مبقدرش اتوقعها دايما رد فعلها غريب و مش منطقى
زياد / بس اكيد مش هتسكت يعنى مش معقول هتطلع من المولد بلا حمص
لبنى / اكيد مازن هيفهمها انه مش هيسيبها معدمه اكيد هتفهم انه هيعمل كدا عشان باباه يرضى عنها
زياد / والله حتى لو اتنازله عن كل جنيه مهيرضى عنها برضه هى المساله بقت عند خصوصا بعد ماللى اسمها سماح دى هزقته بشياكه
لبنى / هههههههههههههه ياريت طنط فريده كانت سجلت الموقف ده
زياد / ست قادره
لبنى / مع ان ميبانش عليهم خالص
زياد / مهم دول اللى تخافى منهم اللى ميبانش عليهم دول
لبنى / تعال ننام يا خبر بفلوس بكره الصبح يبقى ببلاش قوم متسبنيش انام لوحدى
زياد / ينهار ابيض دانا اطلع و اطلع و اطلع كمان اتفضلى سمو الاميره
لبنى تبتسم و تطلع و زياد يطلع وراها
.................................
فى شقه مازن
مرام تقفل حنفيه المطبخ و تجيب الفوطه و تنشف الرخامه و تروقها و تعلقها مكانها و تطلع تبص فى الصاله تروقها
مرام / فى حد يرمى هدومه كدا .. طب والله خساره القميص ده
مرام تجيب القميص و تطبقه و هى داخله تشوف الملف
مرام / و طبعا ورق الشغل بيترمى فى كل حته عادى كدا .. قمه فى الاهمال
مرام تمسك الملف و تبص فيه و تقلب فى الورق مازن يطلع من جوه
مازن / ايه يا بنتى بتعملى ايه كل ده ... ايه ده ؟؟
مرام تديله الملف و تدخل الاوضه مازن يبص فيه و يبص على مرام يسيب الملف مكانه و يدخل وراها يلاقيها بتنضف مكان مكان بياكل
مرام / تعمل حسابك بعد كدا تنضف مكانك انا الهرجله بتعصبنى و لا انت ناوى تتعبنى من اولها اسمع انا وافقت عليك عشان اتفقنا تساعدنى فى المواعين مش هتريحنى فى حاجه تتعبنى فى حاجه تانيه تمام
مازن يحضنها اوى تبتسم
مرام / فى ايه
مازن / لما كنت بره بابا قالى يا اتنازله عن كل حاجه يا يتنازلى عن كل حاجه و انا رفضت
مرام / اللى بينك و بين باباك انتوا احرار فيه انا مسالتكش و مش هسالك و مش هعاتبك مازن دى فلوسك و انت حر فيها
مازن / بس ان مكنتش هديله كل حاجه انا كنت هديكى نصيبى من ورث خالى هو اصلا كان ناوى يكتبهولك
مرام / حبيبى كل ده ميفرقش معايا مازن اقعد
مازن يقعد و مرام تقعد جنبه عالسرير
مرام / بص فلوسك كتير شويه ميفرقش معايا انا متولدتش راكبه فرارى و لا بلبس سينيه يعنى انا واخده على شعبطه المواصلات و الفول و الطعميه و لعلمك انا شاطره فى التفصيل و كنت فثانوى بفصل لنفسى كمان
مازن / هو فى حاجه مبتعرفيش تعمليها عشان ابقى عامل حسابى
مرام / فى مبعرفش اكون قليله الاصل انا لما كتبت كتابى عليك كتب كتابى على واحد يتقى ربنا فيا مقولتش عاوزى مهرى فلوس قولته عاوزه قران عشان ربنا يسترها معانا فلوسك بتاعتك تديها لابوك تخليها باسمك توزعها عالفقره ترجعلك
مازن / بس دا حقك و حق عيالك فى المستقبل امان لمستقبلهم
مرام / الامان فى الله و بعد كدا فيك انت الفلوس مبتعوضش الاهل مبتعوضش حنان الزوج و لا الاب تيته مره قالتلى اللى يحط الفلوس فوق راسه يوطى و اللى يحطها تحت رجليه يعلا عشان كدا مش فارق معايا
مازن / يعنى مدايقتيش لما شوفتى الورق انا والله اول مره اشوفه معرفش جه هنا ازاى اساسا الموضوع كله كان كلام لما كنت مع بابا فى دبى هو اصله شبط فى الجمله اللى قولتهاله لما كنا فى العزومه
مرام / عارفه انا عارفه كل حاجه و الحقيقه ادايقت بس مش عشان الفلوس ادايقت انه لسه كارهنى و شايفنى مش مناسبه مع انى والله ممكن اكون احسن من ناس كتير معاهم فلوس
مازن / انتى احسن من الدنيا كلها
مرام / عاوز تدى لابوك الفلوس كلها اديهاله كلها سنه و اتعين و يبقالى مرتب كويس و انت كمان هتتخرج و سهل تشتغل و شقه تيته موجوده نتجوز فيها و انا و انت مش محتاجين لحد
مازن / انتى بتقولى ايه يا مرام
مرام / بقولك متشلش هم ان كان عاوز الفلوس ياخدها
مازن / بس دى مش حقه دى حقى و حق عيالى
مرام / هتخسر ابوك عشان شويه فلوس
مازن / و هو انا لو اديتهاله مش هبقى بخسره مش هيبقى باعنى
مرام / اعمل اللى انت شايفه صح و اللى يريحك و اى كان قرارك انا معاك فيه المره قبل الحلوه
مازن / انا مش هكتبله اى حاجه دا شقى خالى الله يرحمه ياخده ليه عشان يقبل بجوازنا اضمن منين انه بعد مياخده هيقبل
مرام / مازن
مازن / انا مش هديله اى حاجه عاوزنى ابن ليه اهلا وسهلا مش عاوزنى هو الخسران انا مش على اخر الزمن هروح اشتريلى اب بالفلوس لو هعمل كدا يبقى على الاقل اشترى اب على مزاجى انا كمان اب فيه المواصفات اللى اتمنتها
مرام / زى ايه
مازن / زى خالى الله يرحمه
.............................