السكه شمال بقلم / لولو_محمد ( كامله )

الحلقه ٦٤

((((((((السكة شمال )))))))))))))))))))))
#لولو_محمد
الحلقه الرابعه و الستون
سميحه تحط ساندوتش تالت قدام مازن مرام تقوم تدخل المطبخ
سميحه / مالها دى ... بتعملى ايه يا مرام مش هتفطرى
مرام من جوه / ثوانى و جايه
مازن يحط الساندوتش و يقوم يدخل وراها و يخبط على باب المطبخ يلاقيها بتقلى بيض
مازن / ممكن ادخل
مرام / عاوز حاجه اجيبهالك
مازن / لا شكرا افتكرتك زعلتى
...............................
مرام / من ايه
مازن / معرفش
مرام / لا مش زعلانه ... بتحبه عيون و لا ملخبط
مازن / اى حاجه انا باكل كل حاجه
مرام / اممم كل حاجه كل حاجه
مازن / استر يارب
مرام / ههههههههههههههههههه
مازن يبتسم
مرام / فشه كرشه ممبار فسيخ
مازن / لو دى اسوء حاجه عندك فانتى مجربتيش شوربه الضفادع فى باريس
مرام / ييييييعععع انت كلت ضفادع
مازن / لا طبعا بس كنت مصاحب مزه فرنسيه بس كانت قمر حته بت مقولكيش
مرام تربع ايدها
مازن / احم المهم عزمتها على العشا و فوجئت بيها بتطلبها كنت هرجع فوشها بنت المؤرفه
مرام / هههههههههههههههههه احسن تستاهل
مازن / من يومها اى بنت اجنبيه بقيت اعزمها عندى فالبيت و اطبخ انا
مرام / على كدا بتعرف تطبخ
مازن / لا دانا اعجبك اوى
مرام / طب متورينى
مرام تشد مريله المطبخ و تحدفهاله و هى مبتسمه
مازن / عوزانى اطبخلك
مرام / ايه هو حلال للاجانب و حرام على بنت بلدك
مازن / يانهار ابيض يانهار ابيض دانتى تؤمرى بس
مازن يلبس المريله و مرام بتدحك سميحه تدخل
سميحه / بتعملوا ايه يا ولاد كل ده
مرام / مازن هيطبخلنا النهرده
سميحه / نهارك ابيض يا مرام عيب كدا انتى بتعملى ايه
مازن / و فيها ايه مش ده بيتى و بعدين مش مرام بس اللى بتحب تطبخ يعنى و خلينا نشوف طبيخ الرجاله و لا البنات
مرام / بقى كدا
مازن / اها
مرام / ماشى يا شيف يا كبير هتغدينا ايه النهرده
مازن / انا بعمل شيكن بوبكورن يجنن
مرام / فشار بالفراخ ؟
مازن / لا فراخ فشار لو عندك فيليه فراخ و كورن فليكس و بقسماط ملح فلفل توم بودر بصل بودر بابريكا مكرونه اسباكيتى ذبده صلصه اممم بهارات زعتر لو فى حاجه ناقصه ممكن انزل بسرعه اجيبها
مرام / كلو موجود ماعدا الكورن فليكس بس مش محتاج تنزل تجيبه انا هجيبه
مازن / هتنزلى كدا
مرام / لا هجيبه مالبلكونه استنى
مرام تطلع بره و مازن يبص لسميحه
مازن / بتحطوا الكورن فليكس فى البلكونه
سميحه / هههههههههههههههه لا تعال
سميحه تاخد مازن بعد ميقلع المريله و يطلعوا البلكونه مرام بتنزل السبت لعيل صغير ياخد منه فلوس و يطلع يجرى للماركت على اول الشارع و يرجع يحطلها الحاجه تسحب السبت و تاخد منه الكورن فليكس بتاعك
مازن / التكنولوجيا حلوه اوى برده
مرام / هههههههههههههه اتفضل عاوز حاجه تانى
مازن / لا تعالى بقى اما اعلمك
مرام / اتفضل
سميحه / طب مش هتاكلوا طب و البيض اللى لسه قلياه
مرام / هعمله ساندوتشات اتفضل متضيعش وقتى على ما اطلع باقى الحاجه مالفريزر تفك
جرس الباب يضرب مازن يروح يفتح يلاقى شاب ماسك ملف
الشاب / بابا قالى ادى لحضرتك الملف ده
مازن ياخده
مازن / تمام بكره بالكتير هيكلموك باذن الله
الشاب / شكرا
الشاب يمشى و مازن يروح يقعد عالترابيزه و يصور الملف بالموبايل و يبص يلاقى مرام و سميحه بيبصوا عليه
مازن / ايه ؟؟
مرام / انت تعرف على ابن عم عبد الله البقال منين و ايه الورق ده
مازن / انا قولتله يبعتلى السى فى بتاعه عشان اشغله
مرام تبصله و تدخل المطبخ مازن يبص لسميحه
مازن / هو انا عملت حاجه غلط
سميحه / لا
................................
فى شقه محمود
مديحه تدخل تصحى محمود
مديحه / جرا ايه يا واد دى رابع مره اصحيك انت هتنام للضهر و لا ايه متقوم كدا تشوف وراك ايه بدل محالنا واقف كدا
محمود يقوم يقعد
محمود / قومت قومت
مديحه / يابنى الكسل وحش و محدش بينفع حد
محمود / ماشى خلاص قومت عاوزه ايه تانى بقى مانا قومت الله
مديحه / الفطار عالسفره بره قوم افطر و انا هروح ابص على ستك و اشوف هنعمل ايه النهرده
محمود / و يا ترى ستى بقى هتبقى هنا و لا هتروح فحته زى امبارح
مديحه / عمرك مهتتغير عمرك مهتكبر تعرف وانت صغير كنت تشبط و تعيط على الحاجات الحلوه الهبله اللى كلها اللوان صناعيه و تسيب اللى تفيدك خليك كدا تشترى اللى بايعينك و تبيع اللى شارينك
محمود يبص الناحيه التانيه مديحه تروح تقعد عنده
مديحه / المعلم اسعد عنده محل جزاره و زريبه دا غير ارضهم اللى فالبلد و المواشى اللى فيها و بيت ملك من بابه و محلتوش غير تلت بنات و هيموت عليك لمروه بنته و البت ريداك و يتمنولك الرضا ترضا
محمود / عوزانى اتجوز واحده عشان فلوسها عشان يجى عليا اليوم اللى تعايرنى فيه
مديحه / و انت يعنى شويه بكره تبقى دكتور فى الكليه و الكل يعملك الف حساب و تركب عربيه بالشئ الفلانى و مش بعيد تبقى احسن من مازن ده مليون مره
محمود / انا احسن منه منغير حاجه
مديحه / عارفه بس انت لازم تفتح مخك زى مرام اشمعن هى تاخد اللى يعليها لفوق و انت تفضل واقف مكانك خد اللى شرياك خد اللى ترفعك لفوق و تسندك
محمود / انا رايح الحمام عن اذنك
مديحه / انا مش عاوزه غير مصلحتك
محمود / و انا مصلحتى مع مرام
مديحه / يادى مرام هى مش شيفاك غير اخ انت ليه مش قادر تفهم ده انا نفسى عمرى متخيلت انك ممكن تكون بتبصلها اكتر من اخت
محمود يبصلها و يطلع بره
................................
فى المطبخ
مازن يدخل المطبخ يلاقى مرام بتغسل مواعين الفطار و الحاجات اللى طلبها محطوطه عالرخامه يفتح الفريزر و يطلع كيس مفروم تبصله
مازن / ممكن ؟؟
مرام / اكيد
مازن / هو انتى سبتينا و مشيتى ليه
مرام / بخلص اللى ورايا
مازن / الحقيقه
مرام / هى دى الحقيقه
مازن / امال مناخيرك يتطول ليه يا بينوكيو
مرام تبصله يبتسملها
مازن / انا بعرف لما بتكدبى قولى
مرام / اولا انا مبكدبش انا فعلا بخلص اللى ورايا ثانيا انا ... بص .. هو ... انسى انسى
مازن / هو الموضوع كبير اوى كدا
مرام / لا مش كبير هو انت هتساعده عشان اوافق ؟؟
مازن / لا هو شاب كويس و معاه شهادات كويسه اصلا ازاى واحد زى ده شغال فسايبر
مرام / احلف
مازن / والله مبعمل ده عشانك و بعدين مانا ياما ساعدت ناس يشتغلوا لو مش عندنا يبقى عند حد من معارفنا المهم انهم يكونوا يستحقوا و فى ناس بتشتغل فى فروع المجموعه بره مصر و لو عوزنى اثبتلك اثبتلك
مرام / لا مصدقاك انا بس
مازن / انتى بس ايه
مرام / معرفش انسى انسى
مازن يشد سكينه و البوتشر و يحط الصدور الفيليه عليها
مرام / لسه مفكش
مازن يقطعها مكعبات
مرام / ايه ده انت هتعمل ايه
مازن ياخد طبق و يرب فيه بيض و يحط عليه شويه لبن و البصل و التوم البودر و الملح و الفلفل و البهارات و الزعتر و البابريكا و يقلبهم و بعدين يفتح درج التانى التالت
مرام / بتدور على ايه اساعدك
مازن / مش محتاج مساعده منك
مازن يجى يفتح الدرج مرام تقفله
مرام / بتدور على ايه فمطبخى انا اكيد عارفه مطبخى احسن منك
مازن / يعنى مينفعش حد غريب يدخل مطبخك و يتعامل منغير مساعدتك
مرام / لا ينفع طبعا بس انا لو ساعدتك الموضوع هيكون اسهل
مازن / طب متساعدينى
مرام / مانا بساعدك اهو
مازن / لا ساعدينى افهم ايه اللى مدايقك عشان اقدر اساعدك
مرام / انا مفيش حاجه مديقانى
مازن / كدابه
مرام / انت ليه خنيق اوى كدا
مازن يفتح الدرج يلاقى اكياس التلاجه ياخد واحد و يحط فيه الكورن فليكس و يضرب عليه بشاكوش اللحمه لما يكسره و يحطه فطبق و يخلط عليه البقسماط و يزق مرام
مرام / الله
مازن يفتح يطلع حله كبيره و يملاها ميه و يحطها عالنار
مرام / انت بتعمل ايه
مازن / قولتلك مش محتاج مساعده
مرام / ماشى انا سايبهولك اعجن فيه براحتك
مرام تيجى تطلع مالمطبخ مازن سادد السكه
مرام / وسع
مازن / متعدى
مرام / هضربك
مازن / لو تقدرى
مرام / هترجع تعيط
مازن يبتسم
مرام / اوووف انا مدايقه ان الناس اتعشمت فيك و دلوقت هتلاقى كل شويه حد عاوز منك حاجه بس انت مش هتدوم انا قيلالك انى هرفض انا هرفضك
مازن / هتوافقى
مرام / جايب الثقه دى كلها منين انا و انت مش مناسبين لبعض مفيناش اى حاجه مشتركه
مازن / احنا الاتنين بنحب نطبخ
مرام / ناس كتير بتحب تطبخ دا مش قصدى اصلا انا اقصد ان ... اوف انت ليه مش قادر تفهم انت لولا الخناقه بتاعه الحاره انت اصلا عمرك مكنت
مازن / عمرى مكنت اتجرات عارف بس دا ميمنعش انى كنت بحبك و مازلت و اه فى كمان حاجه مشتركه بنا احنا الاتنين عقلنا بس اللى بيمشينا بس معاكى انا لاغيه و لاول مره احس انى سعيد انا ببقى مبسوط و انا جنبك حتى لو بتهزاينى و تتخانقى معايا و تتخلقى عليا ببقى مبسوط ببقى مش عاوز الوقت يعدى مرام فيها ايه لو الناس اتعشمت فيا انا مش هخذلهم و انا مش بعمل ده عشان اعجبك انا بعمل ده عشان ده انا
مرام / و اهلك
مازن / اهلى موافقين عليكى و حضروا
مرام / باباك
مازن يزعق
مازن / انا مليش اب
مازن يحاول يهدى
مازن / انا اسف
مازن يطلع مالمطبخ و يدخل الحمام و يقفل عليه الباب سميحه تدخل
سميحه / فى ايه
جرس الباب يضرب
مرام / مفيش حاجه هروح افتح
مرام تفتح تلاقى محمود
محمود / صباح الخير
مرام /صباح النور تعال ادخل
محمود / نازل للمعلم اسعد فكنت بشوف لو محتاجين حاجه عشان الشغل
مرام / لا كل حاجه هنا شكرا لو عوزت هبقى اكلمك
مازن يطلع مالحمام محمود يبصله
مازن / ازيك
محمود / الحمد لله .. ازيك يا تيته
سميحه / متدخل
محمود / معلش عشان متاخر سلام
محمود يمشى مرام تقفل الباب و تبص تلاقى مازن دخل المطبخ تبص لسميحه اللى تقعد عالكنبه تروح ورا مازن المطبخ تلاقى مازن بيكسر الاسباكيتى و يحطها فى الميه
مرام / هتحكيلى
مازن/ انا حكيتلك كل حاجه قبل كدا انا خالى اللى ربانى بابا بقى مكنش فاضيلى مكنش فاضى غير للفلوس و بس تعرفى لما عملت الحادثه و انتى و تيته و محمود اللى مبيطقنيش جالى ابويا اخره اتصل بالتليفون بس مش عشان يطمن عليا عشان يهزقنى قد ايه انا مستهتر و المره الجايه مش هطلع منها عايش
مرام / بس
مازن / حتى حوار ماهينور ده انا مبحبهاش مبطيقهاش بس بابا مشارك باباها و هى الوريثه الوحيده لكل فلوس ابوها فلازم مازن يلبسها عشان ابويا يكسب فلوسها المهم قولت اعدى الموضوع لحد مالشغل يخلص و بعدين كل واحد يروح لحاله تعرفى عملت ايه راحت قالتلهم انها حامل منى شوفتى بجاحه اكتر من كدا
مرام تتخض
مازن / مش دى المشكله المشكله ان ابويا كان بيحاول يغطى عالموضوع عشان الليله تكمل عشان مصلحته هو تتم و صدقينى دا اقل حوار ممكن احكيهولك الاب هو اللى بيربى و ده يبقى خالى و هو موافق عليكى تفتكرى اصلا خطيب مونى كان هيعجب بابا لو مكنش غنى
مرام / يعنى باباك مش موافق عليا عشان انا مش غنيه
مازن / انا مخدتش رايه اصلا و مش هاخده
مرام / مينفعش نرتبط من وراه مينفعش يجى يوم و اقابله مازن دى مش الاصول
مازن / طظ فى الاصول طظ فى كل حاجه انا مش زيك و ان كان فيا ميزه واحده فهتكون دى انى برمى الناس ورا ضهرى
مرام / بيتهيالى لازم تكلم تيته فى الموضوع ده
مازن / تيته عارفه انا حكيلها ... ماشى بصى هترفضينى حقك الجواز مش بالعافيه انا لسه فاضلى وقت هنقضيه سوا غيرتى رايك كان بها مغيرتيهوش و فضلى باصه بقى عالتفاهات دى
مرام / مش تفاهات الجواز مش اتنين حبوا بعض و بس دا عيلتين بيندمجوا
مازن / اهو ده التخلف بعينه الجواز هو اتنين و بس اتنين بيتقفل عليهم باب واحد و يعيشوا سوا اهلى و اهلك دول مش ابطال الحكايه دول كلهم كومبارس انا و انتى لو مش قابلين بعض و عيلتنا سمنه على عسل مش هنقدر نكمل لكن لو انا و انتى عاوزين بعض مهما كانت الظروف هنحارب سوا و نعديها و انا عن نفسى مستعد اعمل المستحيل عشانك بس المشكله فيكى انتى بقى عندك استعداد تعملى ايه عشانى
مرام / المكرونه هتعجن
مازن يبصلها و يروح يصفى المكرونه و يغسلها و يحط ذبده و ملح و فلفل فالحله و اول متسيح يرجع يحط عليها المكرونه و يقلبها
مرام / انت بتعمل ايه
مازن / مكرونه بيضا
مرام / ممكن ادوق
مازن يوسع تجيب شوكه و تدوق
مرام / طعمها حلو هتعملها وايت صوص
مازن / لا هحط عليها من الريد صوص بتاع الميت بولز
مرام / و دى بقى بتتعمل ازاى هى كمان
مازن ياخد مكعبات الفراخ و يحطها فى البيض و بعدين يحطها فى البقسماط و يرج الكيس كويس
مازن / خدى رجى بدل مانتى واقفه زى قلتك كدا
مرام تبتسم و تاخد الكيس و تفضل ترجه مازن يفتح فى المطبخ لحد ميلاقى الخلاط يحطه و يروح يفتح التلاجه و يطلع طماطم يغسلها و يعمل عصير
مرام / كدا كفايا ؟؟
مازن / رجى كمان خلى كلو يتلخبط كويس
مرام / ماشى بتعمل ايه بقى
مازن يطلع حله صغيره و يحطها عالبوتجاز و يحط فيها الطماطم و شويه زيت و توم و بصل بودر و بهارات و ملح و فلفل
مرام / دى الصلصه
مازن اه بس مش هنسويها اوى نص سوا كدا و لما اللحمه تفك شويه هنكمل
مرام / اوك ماشى
مازن / طبعا لو الحاجه فاكه كان زمانى خلصت
مرام / الجو حر النهرده هتفك بسرعه متقلقش
مازن / لا مش حر المطبخ اللى مكتوم ... ايه الكركبه دى
مازن يلم كل المواعين و يحطها فى الحوض و يبدا يغسلها
مرام / انت بتعمل ايه
مازن / المطبخ المكركب بيعصبنى
مرام / انت بتغسل المواعين
مازن / مش فاهم فين المشكله
مرام / لا مفيش خالص هههههههههههههههههه انا ممكن اتجوزك بس عشان الحركه دى ههههههههههههههههههه
مازن / للدرجادى
مرام / انا مبكرهش فحياتى الا غسيل المواعين اصلا فاكيد لو لقيت حد يغسلهالى
مازن / طب روحى شوفى كدا عند الجيران طبقين تلاته كمان اخلصهملك و انا واقف
مرام / هههههههههههههههههههههههههههه
مازن / والله لو كنت اعرف كنت قضيت التلت ايام دول بغسل فى مواعين
مرام / هههههههههههههه انا بهزر معاك وسع انا هكمل
مازن / ورحمه امى ابدا محد غاسل المواعين غيرى
مرام / هتغرق نفسك وسع
مازن / لا
سميحه تدخل
سميحه / انتوا بتعملوا ايه يا ولاد يادى الخيبه كدا يا مرام
مرام / والله بقوله يوسع مش راضى
مازن / بتقول هتتجوز واحد يغسلها المواعين
مرام تزغده
مازن / انا اللى صممت والله يا تيته
سميحه / بطلو لعب بقى و اطلعوا بره المطبخ يلا اتفضلوا
مازن / طب هخلص والله اهو خلاص
سميحه / لا يلا بره
مازن / نص ساعه بس عشان خاطر مرام هتعيط مرام هتعيط
مرام تبصله
مازن / طب انا هعيط
سميحه / اسمعلكوا حس
سميحه تطلع بره و مرام تبص لمازن
مازن / يلا نقلى الفراخ بقى
مرام تجيب مقله و تحطها و تملاها زيت
مازن / اللحمه لسه مفكتش اوى بس ممكن استخدمها كدا مازن يحط بصل و توم بودر و ملح و فلفل عاللحمه و يدعكها بايده جامد لحد متفك
مرام / هو انت بتحط بصل و توم بودر على كل حاجه
مازن / لا الاكله دى بس
مرام / اوك هتعمل ايه بقى
مازن / هكور اللحمه دى كور صغيره قد اللمونه و اقليها فالزيت و احطها فى الصلصه
مرام / ممكن اساعدك بقى
مازن / اكيد اتفضلى
مرام و مازن يكوروا سوا فى صمت
مازن / بتفكرى فى ايه
مرام / مبفكرش
مازن / طب انا كنت بفكر بقى بما انى طلعت بغسل المواعين تخلى كتب الكتاب و الدخله فى اجازه اخر السنه ايه رايك
مرام / ايييييه
مازن / ايه دانا عريس لقطه والله هتلاقى فين غيرى حد يغسلك المواعين
مرام / ياربى عليك يا مازن قولتلك كنت بهزر
مازن / و انا عيل و شبط
مرام / مالاخر كدا انت تقبل ترتبط بواحده ليها ماضى
مازن / لا
مرام / طب اشمعن انا عاوزنى ارتبط بواحد له ماضى
...................................