السكه شمال بقلم / لولو_محمد ( كامله )

الحلقه ١٠٣

(((((((((((السكة شمال)))
#لولو_محمد
الحلقه المئه و ثلاثه
مازن / انتى مراتى و ملزمه منى فلوسك بتاعتك انا ازودهالك و طول مانا معايا و ربنا كارمنى من فضلك اسمحيلى اصرف عليكى
مرام / انا بجد مخنوقه اوى و اللى خانقنى اكتر انى مش قادره اشرحلك انا بحس نفسى صغيره اوى هو احنا لما نتجوز هتسبنى اطبخ
مازن / طبعا كل يوم تلت وجبات امال هفضل طول عمرى منغير كرش يعنى
مرام تبص الناحيه التانيه و تبتسم
مرام / اقصد هتخلينى اشتغل فالاكل البيتى
مازن / لا
مرام / شوفت مستعر منى مشرفكش
............................
مازن / قطع لسان اللى يقول كدا بس الانسان مينفعش يقف فمكانه طول عمره يعنى ايه المشكله اما تبقى الشيف مرام صاحبه اكبر سلسله مطاعم فمصر و الوطن العربى و تكتبى كتب عن الطبيخ تعرفى انا اللى هصورلك الاكل اللى فالكتاب و نطبعه و ننزله فى السوق بس تعملى حسابك يجوا يقولولك تطلعى فى التليفزيون و تقدمى برامج طبخ و تحلى فعينك قسما بالله تشوفى وشى التانى مش مراتى انا اللى تطلع فى التليفزيون و الرجاله تتصل تعاكسها اقطم رقبتك و رقبته و اقفل القناه
مرام / هههههههههههههههههههههه
مازن / ممكن اخليكى تعملى يوتيوب تشانل و تنزلى اكل ووصفات بس منغير صورتك يعنى
مرام / متنقبنى احسن
مازن / و ماله مش هقول لا بس دا قرارك انتى مقدرش اجبرك عليه
مرام / انت بتتكلم جد و لا بتقول كدا و خلاص
مازن / هو انتى فاكره انى ببقى عادى لما بشوف اى حد بيبصلك او حتى بيسلم عليكى دانا ببقى فرن متحرك اقسم بالله ببقى هموت
مرام تبتسم
مازن / انتى بتاعتى لوحدى
مرام / ادينى الكارد بتاعتى
مازن / ماشى هديهالك و بكره الصبح هروح احطلك فيها مليون جنيه
مرام / هو انت مصر تعصبنى
مازن / اشمعن زياد بيصرف على لبنى و عيلتها كلها و انا مقدرش اصرف على مراتى دا ايه الذل ده انتى واخده منى كل حقوقى و قهرانى قهر ربنا هيحاسبك عليه على فكره حسبى الله و نعم الوكيل فيكى حسبى الله و نعم الوكيل ربنا عالظالم و المفترى يا شيخه
مرام / هههههههههههههههههههه انت بتحسبن عليا يا متخلف انت
مازن / مانتى مفتريه اوى لا و كمان جايه تتخانقى معايا
مرام / انا احرجت لما دخلت الكود مرتين غلط و لقيت لبنى بتقوله لا و كمان بتقولى مش هو اللى عاملك الاولانيه كلهم بنفس الكود و هى تعرف كودك منين يعنى
مازن / عشان انا عامل لزياد واحده و هى بتاخدها كتير
مرام / و دا صح
مازن/ بابا بينشفها عليه اوى و انا مبحبوش نفسه فحاجه و مش قادر يجيبها هو اخويا برده
مرام / ربنا يهديهولك و يخليكوا لبعض
مازن / هتروحى و لا اخطفك شويه اصالحك
مرام / الوقت اتاخر و فى كليه الصبح روحنى احسن
مازن / ماشى مفرقتش نكملها تليفونات
مرام / ربنا يسهل
مازن يبصلها و يتنهد و يسوق
.........................
فى  شقه محمود
محمود قاعد بيزاكر الباب يخبط و يتفتح و مرام واقفه يقفل الكتاب و يبصلها
مرام / فاضى اتكلم معاك
محمود / افضالك تعالى
مرام تدخل تقعد على كرسى قدامه
محمود / مالك شكلك مدايق فى ايه
مرام / طول عمرى مليش اصدقاء غيرك اه ليا صحاب كتير بس انت كنت دايما اقربهم بس الفتره اللى فاتت
محمود / النهرده بكره بعده هيحصل هيحصل يا مرام مازن مش هيسمح
مرام / انا محتاجه اتكلم مع حد
محمود/ و مازن راح فين
مرام / مازن موجود علاطول موجود و تيته كمان بس كلهم بيقولوا انى اوفر و حساسه لكن انا فى حاجات تعبانى محدش قادر يفهمها و مش عارفه اعمل ايه و لا اروح لمين
محمود / انا هنا
مرام / هتسمعنى يعنى
محمود / و انا ليا مين غيرك اسمعله احكى مازن باشا عمل ايه
مرام / مازن ادانى كريدت كارد و قالى اصرف منها و انى مراته و انى ملزمه منه
محمود / فين المشكله
مرام / يعنى مفيش مشكله
محمود / لا انا نفسى كنت بفكر اعمل كدا مع مروه بفكر احوش مبلغ حتى و لو صغير كل شهر اديهولها او اجيبلها بيه حاجه تنفعها مش عارف انهى الصح
مرام / ايوه بس انا مش عوزاه يصرف عليا
محمود / اتجوزتيه ليه
مرام / انا بشتغل و بصرف على نفسى انا
محمود / فلوسك لنفسك و فلوسه برده لنفسك دا حقك اللبسى و اتفسحى و دلعى نفسك و انبسطى و اصرفى و بعزقى براحتك محدش له عندك حاجه امال هو واخدك بلاش
مرام / يعنى هما معاهم حق انا اوفر
محمود / انتى مراته يا مرام يعنى دا حقك و واجبه
مرام / انت هتعمل ايه فاللى مازن قالهولك
محمود / انهى هرى فيهم
مرام / بطل قله ادب بقى
محمود / يا توتو و مالك اتحمقتى عشانه اوى كدا ليه ياختى اشبعى بيه
مرام / هشبع بطل قمص بقولك حوار الشركه
محمود / انا مش هشتغل عند مازن
مرام / اشتغل معايا خد بالك من حاجتى انت مش بتقول فلوسه بتاعتى ساعدنى محدش يسرقنى انا مش هقدر اتابع
محمود / و انا كرامتى
مرام / معاش و لا كان اللى يجى على كرامتك دا اللى يجى عليك اكله بسنانى
محمود / دا كان زمان لما كنتى بتقفى قدام مازن عشانى
مرام / و لسه بقف قدام الجن عشانك انت بس اللى مش واخد بالك
محمود / يمكن
مرام / محمود عشان خاطرى
محمود / هصلى استخاره و ربنا يعمل اللى فيه الخير
مرام تبتسم
مرام / هقوم بقى انام تصبح على خير
محمود / و انتى من اهله
مرام تمشى و محمود يتنهد و ينفخ
....................................
فى الكليه تانى يوم
مرام و محمود و مازن واقفين
محمود / انت لازم تفهم انى وافقت عشان مرام اتحايلت عليا
مازن / اكيد طبعا
محمود / بس انا ليا شرط
مازن / اؤمر
محمود / سعد هيبقى معايا
مازن / مفيش مشكله تحبو تبدئو من امتى
محمود / اول يوم فالاجازه طبعا انت فاكرنى هضيع على نفسى الامتحانات عشان خاطرك
مازن / كنت فاكرك بتعمل ده عشان مرام
محمود يبص الناحيه التانيه و يسيبه و يمشى مازن يتنهد
مرام / متزعلش منه
مازن / مش منه عليه تعالى نلحق المحاضره
مرام / بخصوص امبارح
مازن / ماله امبارح
مرام / انا اسفه.. معاك حق انا كنت حساسه زياده
مازن / مفيش اى مشكله
مرام / و عشان اصالحك ايه رايك تعزمنى على الغدى فاى حته بعد الكليه انا و انت و بس
مازن / بس كدا ينهار ابيض ينهار ابيض نلحق بس دلوقت المحاضره الخنيقه دى و بعدها هاخدك و افسحك و بعدين نروح نزاكر ايه رايك
مرام / ماشى يلا بينا
.....................
فى مطعم بيتزا
مرام / انت مدوقتش البيتزا بتاعتى بقى
مازن / خطيره مش كدا
مرام / وجع بطن
مازن / ههههههههههههههه
مرام / والله جربت كل حاجه تعرف حتى لما كنت فالمطعم الزفت ده والله وقفت مع الشيف و هو بيعملها و روحت البيت جربت مفيش فايده
مازن / خلاص مش مشكله خليكى انتى فالمحاشى و البشاميل و الحلويات و سيبى البيتزا عليا انا
مرام / بتعرف بجد
مازن /هدوقهالك و احكمى بنفسك
مرام / ماشى
مازن / صحيح تيته عملت معاكى ايه لما حكيتيلها حوار الشقه
مرام / محكتلهاش
مازن / ليه
مرام / معرفش خفت تزعل حاولت والله بس مقدرتش
مازن / بس انا قولتلها
مرام / بتهزر
مازن / اول مرجعنا من هناك لما انتى روحتى لطنط مديحه
مرام / اه و قالتلك ايه
مازن / الكلام المتوقع الناس و كلامهم و اتفقنا على الفرح بشرط التقدير الترم ده
مرام / طب ليه مقالتليش
مازن / يمكن مستنياكى انتى تحكيلها
مرام / مش عارفه طب انت ايه رايك احكيلها و لا خلاص بقى
مازن / احكيلها متكسريش الثقه اللى بينكوا كل يوم بيعدى هى بتسال نفسها هى هتحكى امتى طب فى ايه تانى مخبياه لكن لما بتحكيلها اول باول
مرام / صح معاك حق
مازن يبتسم و ياكل بالشوكه و السكينه
مرام / انت بتعمل ايه
مازن / باكل
مرام / لا البيتزا مبتتاكلش كدا بتتاكل كدا
مرام تمسك مثلث و تقطم منه و الجبنه تمط معاها مازن يحط الشوكه و يمسك المثلث و ياكل زيها
مرام / حسيت بالفرق
مازن / هههههههههههههههههههههههه اكيد
مرام / هو انا ممكن اسال سؤال ميخصنيش
مازن / مفيش حاجه متخصكيش
مرام / هو انت هتدى لمحمود مرتب كام
مازن / هو الموضوع ده مش شغلى يعنى معرفش بس اشمعن هو كلمك فى حاجه
مرام / ابدا والله خالص هو اصلا وافق بالعافيه بس انا الموضوع ده شاغلنى لو اديتله مرتب صغير هيدايق مش عشان الفلوس عشان انت فاهم يعنى هو حساس ناحيتك قد ايه هيقول هو انا بشحت منه و مش بعيد يشتغل فى حته تانيه و فنفس الوقت لو اديته مرتب كبير برده هيدايق و هيقول بيتمنظر عليا و بيشترينى انا عرفاه
مازن / هههههههههههههههههههههههه لا يا قلبى هو هيدايق فعلا بس مش عشان المرتب خالص عشان هو حاسس انه شغال عندى
مرام / ليه دانت حتى الشغل معاك مجزى مش كنت بتقولى مليون و نص فالشهر انت بجد كان ممكن تديهملى
مازن / و تبعدى عن سكه احمد دانا كان ممكن اديكى مرتب سنه قدام مقدم
مرام / مش فاهمه الواحد ليه مطلعش مادى
مازن / ههههههههههههههههههههههههههه
مرام / صحيح انت عملت ايه بالعشره مليون دولار بتوع ماهى تعرف عمتى مديحه كانت هتتشل لما سمعت الرقم
مازن / ههههههههههههه ليه
مرام / والله و لا لما عرفت انى اديتهملك على اللى عملته هههههههههههههههههههههه
مازن / ياريتك كنتى طلبتى اكتر اللى زى دول مبيوجعهمش غير فلوسهم يعنى لو بيته بيتحرق مش هيطلع منه قبل ميتاكد انه انقذ كل جنيه فيه و اه معملتش بيهم حاجه متلقحين فالبنك
مرام / ربنا يهدى
مازن / ربنا ياخدهم
مرام تبصله يبص الناحيه التانيه بضيق تمسك ايده يبصلها 
مرام / انا بحبك
مازن / و انا كمان بحبك اوى
..........................
تانى يوم فى شقه مديحه
مرام لابسه كاش طويل و رابطه شعرها و مردومه تراب و عرق  بتمسح الشقه جرس الباب يضرب
مرام / مين ؟؟
صوت مازن / انا يا مرام مازن
مرام تبص على نفسها
مرام / يادى النيله السوده
مرام تروح جنب الباب و تلبس الاسدال و تفتحله
مازن / انتى فين يا بنتى قلقتينى عليكى
مازن يبص على مرام و يبص وراها
مرام / ايه بنضف انت اللى جاى بدرى ايه مش عاجبك
مازن / انا اتصلت بيكى عشرين مره و اتصلت بتيته لما كنت هتجنن جيت جرى
مرام / نسيته هناك قولت استغل البيت فاضى عشان امسح
مازن / كويس انى اطمنت عليكى
مازن يجى يمشى مرام تمسك ايده
مرام /انا خلاص خلصت اطلع اقعد عالسطوح مع تيته و عمتى هفرش و هاخد دوش سريع و اناديك متمشيش
مازن يبص الناحيه التانيه
مرام / ايه غيرت رايك فيا كنت فاكرنى مزه طول الوقت يعنى و لا ايه عالعموم احنا فيها لو مش عاجبك طلقنى
مازن / يا شيخه اتلهى
مازن يسيبها و يطلع عالسطح و مرام واقفه مدايقه
..............................
عالسطح
سميحه و مديحه قاعدين قدام فرن بيعملوا فطير مشلتت مازن يدخل عليهم
سميحه / اهلا اهلا هاتلك كرسى و اقعد حماتك بتموت فيك احلى فطير مشلتت سخن بالسمنه البلدى لاحلى مازن فى الدنيا
مازن يبتسم و يجيب كرسى و يقعد
مديحه / هنادى على مرام تجيبلك حته جبنه قديمه و شويه عسل هتاكل صوابعك وراهم
مازن / مرام مش فاضيه بتنضف تحت
مديحه / كل ده دانا قولت هتخلص و تطلع تساعدنا
مازن باين على وشه الضيق و كاتم جواه
سميحه / مالك يا حبيبى فى حاجه
مازن / هاه ؟؟ لا يا تيته مفيش
سميحه / امال مالك
مازن / مفيش اصلى اتصلت كتير عليكى و على مرام لما محدش رد اتخضيت و جيت جرى اطمن عليكوا تلاقينى لسه مفوقتش مالخضه بس معلش
سميحه / يسلملى قلبك الطيب معلش انشغلنا
مازن / و لا يهمك يا تيته المهم اطمنت عليكوا
سميحه / تسلم يا حبيبى و تعيش
سميحه تقطه حته فطيره
سميحه / دوق دى من ايدى تتاكل حاف و هى سخنه كدا
مازن ياخد منها و يدوقها
مازن / تسلم ايدك يا تيته
مازن يقوم يروح يقف ناحيه السور و يبص على المنطقه و البيوت القديمه و الشعبى وواضح عليه انه مدايق مديحه تشاور لسميحه هو فى ايه سميحه تشاورلها معرفش و يكملوا شغل
..........................
بعد شويه كتير فى شقه مرام
مازن قاعد عالكنبه و قدامه صينيه فيها فطير و عسل ابيض و عسل اسود و جبنه بيضا و جبنه قديمه و باصصلها و مبياكلش و سميحه قاعده عالكرسى جنبه و مديحه واقفه عالباب و مرام لابسه اسدال و واقفه جنبها ماسكه الباب
مديحه / انا هاخد الفطيرتين دول و اروح عند الست ام مروه زمان العيال وصلوا
سميحه / سلميلى عليها
مديحه / يوصل يلا انا بالاذن
مديحه تمشى و مرام تقفل الباب و تروح تقعد جنب مازن
سميحه / بسمالله يا ولاد
مازن ميمدش ايده و لا يتكلم
سميحه/ انتو عارفين الاكل ده ناقصه ايه شويه طماطم برشه كمون هقوم اجيب
مرام / هقوم انا
سميحه / لا خليكى انتى
سميحه تشاور براسها على مازن مرام تهز راسها بالراحه حاضر
سميحه تقوم تدخل المطبخ
مرام / مالك
مازن / مفيش
مرام / انا كنت فاكره ان دى حركات بنات اقعد اقولك مالك و تقولى مفيش و لو كنتى بتحبينى كنتى فهمتى و الكلام ده مالك بقى فى ايه
مازن يبصلها
مرام / للدرجادى شكلى و انا بنضف قفلك منى
مازن / اه قفلنى لما تبقى بتخدمى فى البيوت
مرام / انا مبخدمش فى البيوت انا بنضف بيتى
مازن / يا سلام يعنى الباشا ياخد خطيبته يفسحها و مراتى انا تمسح شقته
مرام / الباشا ده يبقى اخويا و دى شقتى عمتى ست كبيره و ضهرها بيوجعها لا تقدر على شيل سجاجيد و لا توطيه ايه المشكله فده و هما اصلا مطلبوش منى حاجه انا عرفت ان محمود خرج من بدرى و عمتى كانت بتخبز مع تيته قولت استغل ان البيت فاضى و انضفه قبل الامتحانات
مازن باصص الناحيه التانيه و بيهز رجله بغل
مرام / انت ليه مدايق اوى كدا مهو الباشا ده هو اللى بيجيبلنا الطلبات كلها على قلبه و رايح جاى يقضى فمصالحنا و قبل معرفك كان ممكن ينزل فعز البرد و السقعه و المطر على رجليه يجيبلى حاجه محتاجاها الباشا ده خد مطوه فجنبه و هو بيدافع عنى فاكر و لا نسيت
مازن يبصلها
مرام / الباشا ده يبقى اخويا و الشقه اللى هناك دى انا عشت فيها قد معشت فدى بالظبط و يمكن اكتر انت لما جيت تتقدملى ضيفناكوا فيها و لما جيت تكتب الكتاب كتبناه فيها انا اللى كنت مسحاها برده و لما ممشيتو انا اللى نضفتها
مازن / الكلام ده قبل متبقى مراتى
مرام / و ايه اللى جد مش هنضف بيتى يعنى عشان مراتك المفروض ان مراتك تقعد فمكان كله تراب عشان سعاده البيه مدايق انه شاف مراته عرقانه و متربه اتقفل من ناحيتها
مازن / لا يا ماما انا مش تافه اوى كدا انا ادايقت عشان مقدرتش اشوفك متبهدله لا و كمان بعد كل ده تطلعى تكملى معاهم فوق و تقولك اتاخرتى ليه يا مرام دانا ضهرى اتقطم
مرام / ايوه و فيها ايه انا صغيره و فيا صحه هى لما كنت انا صغيره كانت بتاخد بالها منى و كانت بتمسح هنا مع تيته ايه يعنى لما كبرت اما اخد بالى منها و اريحها دانا حتى مبقاش بنت اصول لو عملت غير كدا
مازن / على الاقل تشكر
مرام / مفيش بنا الكلام ده
مازن / و يا ترى بقى بعد متتجوزى هتيجى تمسحيلهم برده
مرام / بعد الجواز يحلها حلال يمكن ساعتها هو كمان يكون اتجوز و مروه تشيل البيت و اكيد يعنى ساعتها هنبقى نيجى زيارات مش حاجه يعنى
مازن / و ياترى لو طلبنا من مروه انها تيجى تمسح و تنضف هنا لما انتى تتجوزى هتوافق اهلها هيوافقوا
مرام / اولا لما نتجوز تيته هتيجى تعيش معانا و دى هتتقفل فمش هنحتاج حد ينضفها ثانيا مروه مش ملزمه ناحيتنا باى حاجه
مازن/ و انتى ملزمه ناحيتهم بايه هى كانت امك
مرام / ايوه امى انا معرفليش ام غيرها
مازن / امال بتقوليلها يا عمتى ليه
مرام / عشان بخاف امى تزعل
مرام عنيها تتملى دموع
مرام / بخاف تحس ان فى حد خد مكانها عشان مفيش مخلوق ممكن ياخد مكانها انا مش فكرالها حاجه بس
الدموع تنزل من مرام و فجاه تسيب المكان و تدخل جوه و ترزع الباب سميحه تطلع من المطبخ تقعد و تحط طبق الطماطم و تاكل فهدوء مازن يبصلها و يقوم يفتح باب الشقه و بعدين يقف متخشب و يبص وراه على باب اوضه مرام و على سميحه بتاكل فمنتهى الهدوء و مش بتبص عليه يقفل الباب و يروح يدخل اوضه مرام و يقفل الباب سميحه تبص عالباب و تتنهد
............................
فى اوضه مرام
مرام نايمه عالسرير لابسه الكاش الفيروزى و مديه ضهرها للباب تسمع صوت قفل باب الشقه تعيط  مازن يفتح الباب و يدخل
مرام / تعبانه يا تيته عاوزه انام لو سمحتى سبينى لوحدى
مازن يقفل الباب
مازن / انا اسف
مرام تتفزع و تمد ايدها تجيب الاسدال و تلبسه مازن يدحك و يروح يقعد جنبها
مازن / انا كنت فاكره ضاع فالغسيل الحمد لله اطمنت عليه
مرام تبتسم مازن يمسح دموعها بايده
مازن / انا اسف
مرام / محصلش حاجه
مازن / لا حصل بس والله ادايقت عشان مش عاوزك تتعبى عاوزك مرتاحه و مبسوطه عاوزك تعيشى احسن عيشه مش عشان اى حاجه
مرام / انا مرتاحه و مبسوطه انا دى حياتى وواخده عليها و عمرى مشتكيت
مازن / بتيجى على نفسك اوى ماى واحده تيجى تنضف هتاخد كام يعنى
مرام / اه قول بقى كدا عاوزنى اجيبلك خدامه عشان عينك تزوغ عليها
مازن / هههههههههههههههههههه بس استنضفى هاه هاتيلى وحده حلوه
مرام تضربه فكتفه
مازن / انتى مستقويه نفسك انا لو اديتك واحده من دى هرقدك
مرام / متقدرش
................................