السكه شمال بقلم / لولو_محمد ( كامله )

الحلقه ٧٣

((((((((السكة شمال ))))))
#لولو_محمد
الحلقه الثالثه و السبعون
مرام / احم احم ... صباح الخير
مفيش اى رد فعل تلاقى باب اوضه محمود متوارب تخبط مفيش صوت تدخل تلاقى بجامه عالسرير و السرير مبهدل
مرام / ابتدينا
مرام تعدل السرير و تطبق البجامه
مازن / احم احم
.................................
مرام / صباح الخير
مازن / صباح النور نمتى كويس
مرام / اه الحمد لله و انت
مازن يقرب شويه
مازن / يعنى مش اوى المهم كان فى حوار بنا امبارح مكملش
مرام / هاه
مازن / هاه ؟؟
مرام / استنى هجيبلك الكيس اللى فيه هدومك عشان تلحق تلبس
مازن / اها
مرام تروح تفتح الدولاب و تطلع كيس من جنب تحت و تلف تلاقى مازن وراها بالظبط
مرام / ايه ده فى ايه وسع
مازن / و ان موسعتش
مرام / يابنى اتقى شرى انا غشيمه
مازن / مهو مينفعش غزاله صغيره حلوه زيك كدا تدخل عرين اسد زيي كدا و تطلع عادى دا حتى يبقى عيبه
مرام / والله
مازن / الناس تاكل وشى يا مرام
مرام / ههههههههههه بس هو فى مشكله صغيره
مازن / ايه
مرام / دا عرينى انا و هنا انا الاسد وسع بقى بالزوق احسنلك
مازن واقف سادد السكه تيجى يمين يجى يمين تيجى شمال يجى شمال تضربه بالبوكس ففم معدته يقعد فى الارض مرام تقعد جنبه بلهفه
مازن / اااااه
مرام / انا اسفه انا اسفه جت جامده انا اسفه والله قولتلك انى غشيمه و الله اسفه
مازن يبصلها و هو مبتسم بس بيتالم
مازن / جدعه انا مبسوط منك على فكره
مرام / انا قولتلك متهزرش معايا خد الهدوم دى
مرام تيجى تقوم مازن يشدها يقعدها تانى و يمسك ايديها الاتنين بايديه الاتنين
مرام / الله سيب ايدى
مازن / انتى خطيبتى امسك ايدك زى مانا عاوز
مرام / لا يا بابا الكلام ده لما نكتب الكتاب
مازن / نعم همسك ايدك لما نكتب الكتاب امال هبوس امتى
مرام / انت قليل الادب
مازن / قليل الادب عشان هبوس مراتى
مرام / سيب
مازن / لا ههههههههههههه
مرام / سيب هزعلك
شريف يدخل
شريف / احم الفطار
مازن يسيب ايدها مرام تقوم تروح شقتها
شريف / شكلى جيت فوقت مش مناسب
مازن / عادتك و لا هتشتريها
شريف / كنتوا بتعملوا ايه
مازن / بنضرب
شريف / هههههههههههههههههه لا بجد كنتوا بتعملوا ايه
مازن / والله ايدها تقيله بنت اللذينه
شريف / ههههههههههههههههههه احسن
مازن / ليك يوم اوعى اما اللبس
.................................
فى عربيه مازن
مازن يفتح الباب لمرام
مرام / ميرسى
مازن يركب و يفتح التابلوه
مرام / على الاقل قول لو سمحتى اوسع رجلى
مازن / سورى
مازن يحط المسدس و يطلع شنطه صغيره فيها ازايز برفيومز صغيره ينقى كام واحده و بعدين ياخد واحده و يحط منها و مرام تقفل عنيها مستمتعه بالريحه مازن يقفل الشنطه و يحطها فى التابلوه و يقفله و يسوق  مرام تفتح التابلوه تانى و تطلع الشنطه و تبص فيها
مرام / ممكن
مازن / اكيد اتفضلى
مرام تبخ بخه صغيره من اول ازازه و تهز راسها لا تبخ مالتانيه و تهز راسها يعنى تبخ مالتالته
مرام / دى اللى كنت حاطت منها عالجاكت اللى ادتهونى فى القسم
مازن يبصلها و يبتسم
مرام / هو انتى بتمشى بيهم كلهم
مازن / هما خمس انواع اللى بحبهم فدى سامبلز كدا بسيبها فى العربيه للطوارئ اللى زى دى
مرام / اه بس دى احلى ماللى انت حاطتها دلوقت
مازن يبصلها و يبتسم و يكمل سواقه
مرام / ايه رايي مش مهم                   
مازن / انتى عارفه انتى مشكلتك ايه
مرام / ايه
مازن / و لا بلاش لحسن تنطى مالعربيه و لا حاجه
مرام / يا سلام للدرجادى اصلا مش عاوزه اعرف
مازن / كدابه عاوزه تعرفى
مرام / انت رزل حد قالك كدا قبل كدا
مازن / انتى بس غالبا بتقوليلى مستفز و مرتين قولتيلى بصل بس الاغلب مستفز علاطول مستفز مستفز مستفز
مرام / مانت فعلا مستفز
مازن / ماشى
مرام / مقولتش مشكلتى ايه
مازن / انك بتكابرى مش عارف ليه بس مش بتقولى اللى فقلبك
مرام / مش صحيح انا بقول كل اللى فقلبى
مازن / اه عالتليفون ممكن او واحنا بعاد و مش باصين لبعض لكن عينى فعينك كدا مش هتقولى غير دبش مستفز رزل نقد نقد اى كلام مازن وحش و كل حاجته وحشه اووووف خلاص قولتها ماسك نفسى من زمان بس خلاص قولتها ارتاحتى
مرام تبصله و تبتسم
مرام / و عرفت دا كلو لوحدك
مازن / بتعملى كدا ليه
مرام / انا مش عارفه انت بتتكلم عن ايه اصلا
مازن / ماشى
مرام / ماشى
مازن يبصلها يلاقيها مبتسمه
مازن / مين فينا اللى مستفز دلوقت
مرام تدحك و تبص الناحيه التانيه
مرام / انا مبقولش عكس اللى جوايا انا مبكابرش
مازن يبصلها
مرام / الاتنين جوايا الكلام الحلو و الكلام الوحش و دى المشكله انا مش شيفاك وحش بس كمان مش شيفاك حلو
مازن / محدش كامل
مرام / عارف بس برده محدش بيتغير
مازن / انا اتغيرت و اتغيرت كتير
مرام / و انا كمان للاسف اوعى تفتكر ان كل اللى مريت بيه من يوم المشروع للنهرده عدى عليا عادى اوعى تفتكر انى عشان بتعامل عادى يبقى من جوايا عادى انا نفسى اتكلم معاك براحتى يمكن عالتليفون بنسى نفسى شويه لكن
مازن / لكن انتى لسه مش واثقه فيا
مرام تبص الناحيه التانيه
مازن / بس ده هيتغير على فكره
مرام تبصله
مازن / لما ادفع مهرك كل ده هيتغير
مرام تبتسم و تبص الناحيه التانيه
مازن / انا حفظت اول حداشر ايه على فكره تحبى اسمع
مرام / وفرها لما تحفظها كلها و اه انا مكنتش بنتقدك او بقول مازن وحش بس فعلا البيرفيوم التانى احلى من ده ايه المشكله فده التانى عجبنى اكتر لدرجه انى لسه فاكره ريحته من ساعتها ايه الصعب فكدا
مازن / اووووه
مرام / انا مبعرفش اتنحنح مبعرفش اتمايص و ادلع انا مبعرفش اعمل ده و اه مبعرفش اقول كلام حلو هو لو طلع منى لوحده طلع مطلعش مش هعرف اطلعه حتى لو حاولت دى انا و مش هعرف اغيرها
مازن / و مين قالك انى عاوزك تتغيرى
مرام تبصله
مازن / انتى عجبانى زى مانتى كدا بالظبط حتى لسانك الطويل ده عاجبنى مع انى منكرش انى كنت هطير مالفرح و معرفتش انام للصبح لما قولتيلى انك غيرتى عليا او لما قولتيلى انك خفتى عليا
مرام تعمل نفسها مش واخده بالها بيقول ايه
مازن / هههههههههههههههههه ماشى على العموم وصلنا
مرام بتبرطم / اخيرا
مازن / سمعتك
مرام تبصله يدحك تبص الناحيه التانيه
.................................
فى الفيلا عند مازن
فريده / رايح على فين يا حبيبى مش المفروض انى دى اجازتنا سوا 
ابراهيم بيلبس بدلته
ابراهيم / رايح الشركه صفوت عامل اجتماع للمساهمين
فريده / و انت هتروح تعمل ايه
ابراهيم / و هو انا مش من المساهمين و لا ايه
فريده / حبيبى انت مش شايف ان التوقيت ده غريب شويه
ابراهيم / قصدك ايه
فريده / هو هيعمل ايه يعنى فالاجتماع ده غير انه يغيظك باى كلام اهبل
ابراهيم / افرضى عمل اللى فدماغه و كتب كل حاجه باسم البت دى
فريده / ههههههههه خير و بركه جت منه
ابراهيم / انتى بتقولى ايه
فريده / انت عارف مازن كويس هو مش جد هو ملقالهاش سكه غير كدا يومين و هيزهق
ابراهيم / و فلوسى تعبى شقا عمرى
فريده / و من امتى حد خد منك حاجه غصب عنك كلو هيرجعلك انت بس اهدى و فكر كويس قبل متاخد اى قرار
ابراهيم / عوزانى اقعد و اتفرج
فريده / لا انت هتبعت زياد مكانك يحضر و يسمع و يجى يبلغك و انت و لا فدماغك يعمل اللى يعمله فلوسه و هو حر فيها و لما الفلوس تروح لمرام دى بقى يبقى ساعتها نشوف هنرجعها منها ازاى
ابراهيم يبصلها
فريده / صفوت بيشوف فزياد منافس كبير اوى لمازن عشان كدا مش بيحبه خليه يشوفه مكانه احرق دمه بدل ميحرق هو دمك
ابراهيم / زياد ولد صغير و طايش و ممكن اى حد يستفزه
فريده / انت مستهون اوى بزيزو انا اضمنهولك جربه مره واحده بس اديله فرصه و شوف هيرفع راسك و لا لا
ابراهيم يبص الناحيه التانيه
فريده / عشان خاطرى حبيبى عشان خاطرى
ابراهيم يهز راسه موافق
............................
فى الكليه
مازن و مرام قاعدين جنب بعض و مركزين فى المحاضره مازن يرسم قلب فكشكولها بقلم رصاص ترسمله انجيرى فايس Iفكشكوله و تمسح القلب يرسم جنب الفايس بتاعها فايس تانى بيبوسه و يعمل نفسه بركز مرام تشخبطله عليهم و تركز
.........................
فى المستشفى
محمود / يعنى مكنتش تقدر حتى تكلف نفسها مكالمه تليفون تسال عنى
سميحه / يابنى مانت عارف انها فمحاضره
مديحه / و بعدين انت مزعل روحك ليه ماللى يسال يسال و اللى ميسالش هو حر
سميحه / لا يا مديحه حقه يدايق بس انا متاكده انها متقصدش
شريف يدخل
شريف / كتبولك خروج يلا يا بطل
شريف يحاول يسند محمود 
محمود / انا كويس اقدر امشى شكرا يا شريف
شريف / تمام
شريف يروح يشيل الشنطه من مديحه
مديحه / تسلم يا حبيبى
مديحه تروح تسند محمود
محمود / انا كويس يا ماما صدقينى
مديحه / عارفه يا حبيبى عارف
....................
فى الكليه
المحاضره تخلص مرام و مازن يطلعوا
مازن / فى ساعتين عالسيكشن تحبى نروح الكافيتريا
مرام / لو مش عاوز تنجح على الاقل متعطلنيش
مازن / انا اعطلك ؟؟
مرام / امال تسمى اللى كنت بتعمله فى المحاضره ايه
مازن / بهزر معاكى
مرام / يعنى لما تشتتنى و متخلينيش اركز كدا حلو
مازن يسكت
مرام / بص يا مازن انا عارفه انك متقصدش بس بص حواليك كدا شايف كل الناس دى
مازن يبص حواليه
مرام / كل الناس دى هتشمت فيا لو تقديرى قل هيقولوا عشان ارتبطت بمازن كل الناس دى مستنانى افشل عشان يقولوا ان انت السبب هو ده اللى انت عاوزه
مازن / اكيد لا
مرام / دى فرصه ليك و ليا انت ذكى و انا عارفه ده زاكر معايا خلينا نخيب ظنهم كلهم و نجيب تقدير عالى عشان يقولوا مازن و مرام مخابوش لما ارتبطوا
مازن / ماشى
تليفون مرام يرن
مرام / دا خالو ... الو ايوه يا خالو ازيك .... انا ؟؟ ابدا والله حضرتك عارف الظروف ...دلوقت ؟ طب انا عندى سيكشن ... مش هيحضر ؟؟
مرام تبص لمازن يبتسم
مرام / حاضر .. حاضر والله ... هههههههههههههههه حاضر ....سلام
مرام تقفل
مازن / فى ايه
مرام / خالو عاوزنا فى الشركه حالا و بيقولى اجيبك من قفاك
مازن يبتسم
مرام / و بيقولى السيكشن هيتلغى
مازن / هو ادرى هههههههههههههههه
مرام / تعرف هو عاوزنى فى ايه
مازن / بيتهيالى عندى فكره بس خلينا نروح و نشوف
مرام / اوك يلا
مازن / مرام
مرام تبصله
مازن / اتصلى بمحمود اطمنى عليه زمانه خرج مالمستشفى
مرام / يا نهار ابيض دانا سقطته خالص زمانه زعلان منى دلوقت دا بقمصه انت متعرفوش هههههههههه
مرام تتصل بمحمود ميردش تبص لمازن
مرام / هجرب تانى
مرام تتصل تانى ميردش تتصل بحد تانى
مرام / ايوه يا عمتى ازيك اخبار محمود ايه
مديحه / كويس يا حبيبتى انتى عامله ايه
مرام / انا كويسه لسه خارجه مالمحاضره اتصلت بيه مردش عليا
مديحه / هاه .. اه اصله جه تعبان يا عينى خد الدوا و نام
مرام / تمام يا عمتى لما يصحى قوليله انى سالت عنه
مديحه / يوصل يا حبيبتى
مرام / سلام
مرام تقفل السكه و تبص لمازن وتبتسم
مرام / هههههههه مطلعش مقموص طلع نايم
مرام تمشى مع مازن
..............................
فى شقه مديحه
محمود قاعد عالسرير ماسك البرواز و مدايق مديحه تدخل شايله صينيه اكل و تقعد جنبه
مدبحه / احلى غدى دا و لا ايه تسلم ايدك يا دوحه ... مالك شايل طاجن ستك كدا ليه
محمود يحط البرواز مكانه و يبص لامه
مديحه / مالك لسه زعلان ان مرام مكلمتكش طب تعرف انها اتصلت عليك و انت نايم ... اه قصدى و انت عامل نفسك نايم ممكن بقى تفهمنى مالك
محمود / مفيش انا كويس
مديحه / على امك ياله فى ايه
جرس الباب يضرب
مديحه / هقوم اشوف مين فكها مفيش حاجه مستاهله
مديحه تقوم و محمود يرفع التيشيرت يبص عالجرح مديحه تدخل تانى و وراها مروه و امها
مديحه / لا ابدا صاحى تعالوا ... شوفت مين جه يطمن عليك
محمود يعدل هدومه بسرعه و يتعدل فى قاعدته
الست / اهلا اهلا بسيد الرجاله كدا تقلقنا عليك
محمود يبتسم
مروه / تتقطع ايدهم اللى اتمدت عليك
مديحه / تسلمى يا ست العرايس
الست / عامل ايه يا حوده
محمود / كويس الحمد لله
مروه / حمد الله على سلامتك
محمود / الله يسلمك
الست / والله احنا كنا عاوزين نيجى امبارح نزورك فى المستشفى و كملنا المعلم بس هو بقى مستحملش جالك علاطول و قالنا انك هتروح النهرده
مديحه / ياختى كلك واجب
الست / احنا عندنا اغلى من محمود طب والله الحاره كلها مليها سيره امبارح الا محمود و اللى عمله محمود
مروه / حسبى الله و نعم الوكيل فيهم
الست / و لا الوليه ام مجدى امبارح دبت و لا يجى تلت خناقات امبارح محدش طايقها و لا طايق عيالها
محمود / ربنا يتوب علينا مالاشكال دى
مروه / امين
مديحه / يا كسوفى انا مقدمتلكوش حاجه
مديحه تقوم
الست / هو احنا غرب يا ست مديحه اقعدى اقعدى
مديحه / دا الشاى اصلا كان عالنار هصبه بس
مديحه تمشى الست تقوم وراها
الست / طب خدى الكيكه اللى مروه عملاها جنبه دى بالبرتقان مقولكيش عملاها لمحمود مخصوص
مروه قاعده تبص على محمود و هو عمال يبص فكل حته تانيه
مروه / بتوجعك ؟؟
محمود / هاه ؟؟
مروه / بتوجعك ؟؟
محمود / شويه بس لا انا باخد مسكن مش بتوجع
مروه / قطع ايديهم
محمود يبتسم و يبص بعيد
مروه / هو انت مدايق من وجودى
محمود / ايه ؟؟ لا طبعا تنورى فاى وقت
مروه / ماما مكنتش عوزانى اجى بس انا صممت كنت عاوزه اطمن عليك
محمود / ربنا يخليكى تسلمى
مروه تبتسم و صمت
محمود / اخبار المزاكره ايه
مروه بابتسامه عريضه / كويسه كويسه الحمد لله
محمود / عاوزك ترفعى راسى انا مراهن عليكى
مروه / لا باذن الله هشرفك
محمود يبتسم و صمت
مروه / اخبار الكليه ايه
محمود / كويس باذن الله هروح بكره
مروه / علاطول كدا انت محتاج ترتاح
محمود / لا انا بقيت كويس
.........................