السكه شمال بقلم / لولو_محمد ( كامله )

الحلقه ٦٥

(((((((((((((السكة شمال ))))))))))
#لولو_محمد
الحلقه الخامسه و الستون
مازن / ايه دانا عريس لقطه والله هتلاقى فين غيرى حد يغسلك المواعين
مرام / ياربى عليك يا مازن قولتلك كنت بهزر
مازن / و انا عيل و شبط
مرام / مالاخر كدا انت تقبل ترتبط بواحده ليها ماضى
مازن / لا
مرام / طب اشمعن انا عاوزنى ارتبط بواحد له ماضى
...................................
مازن يحط الفراخ فى الزيت و يرجع يكمل تكوير
مرام / مبتردش يعنى
مازن / ارد اقول ايه
مرام / ليه اقبل بيك و انت كنت مصاحب قبلى شوف بقى كام واحده من ضمنهم مثلا نيفين اللى حذرتنى منك و قالتلى هيرفعك لسابع سما و تلاقى نفسك بتقعى على جدور رقبتك و يقفوا يدحكوا عليكى
مازن / انا مش هتكلم عن نيفين و لا هغلط فيها و لا هدافع عن نفسى حتى بصى يا مرام لو هتدور على ولد خام زى البنات كدا معرفش واحده قبلك فربنا يوفقك تلاقيه لكن للاسف انا عرفت و معييش اله زمن ارجع اغير بيها الماضى و اصلح فيه اللى عملته بس انا معايا النهرده و بكره دول بس اللى اقدر اتكلم فيهم فلو يكفيكى انى اكون ليكى بس و عمرى مخونك و احبك لحد اخر يوم فعمرى فدا اقدر اضمنه و اوعدك بيه
مرام / انت متقدرش تضمنلى بكره مش يمكن تخلف وعدك
مازن / انا عمرى مخلفت وعدى
مرام / انا ايدى وجعتنى مالتلج انت مستحملها ازاى
مرام تروح تفتح الحنفيه و تحط ايدها تحتها
مرام / محمود بيقول انك هتاذينى و هتخلينى اعيط
مازن / انا عمرى مهعمل كدا و الدموع الوحيده اللى هتشوفيها معايا هى دموع الفرحه بصى ... فاكره الفتره اللى كنتى بتشتغلى فيها مع احمد لما انا عملت الحادثه الفتره دى كانت اسوء فتره عدت عليا كنت بموت حرفيا عارف انه عيل ابن كلب مترباش و عارف كل حركاته و عارف انك هبله
مرام / هبله ؟؟
مازن / المهم شريف قالى هتيجى تقولى بحبها انا قولتله انك مش هتوافقى تتجوزينى انا عارف انك مش هتوافقى بس كل الاحداث اللى فاتت دى خلتنى احلم و خصوصا التلت ايام اللى فاتوا انا مش قادر اصدق انهم هيخلصوا تعرفى انا عمرى محسيت بصعوبه انى اقنع واحده بيا مع ان ولا واحده منهم كانت تفرق معايا بس البنت الوحيده اللى اتمنتها معدش فاضل غير انى ابوس رجليها عشان توافق عليا عمرك شوفتى كدا
مرام / هو انا بجد هبله
مازن/ طيبه بهبل فزمن مينفعش فيه اللى زيك
مرام / الفراخ
مازن يلحق يشيل الطاسه من عالنار و مرام تجيب طبق و تحط جواه مناديل و مازن يحط الفراخ فيه و يرجع الطاسه عالنار و يحط الكفته
مرام / دى كفته داوود باشا امال عملى فيها اجنبى و ميت بولز و بتاع
مازن يبصلها و يبتسم
مرام / وسع كدا هو الشيكن بوبكورن ده اللى جديد عاوزه ادوق
مازن يديها واحده تمسكها و تدوقها
مازن / ايه
مرام / سخنه اوى بس حلوه متفرقش كتير عن البانيه غير انها مطرقعه شويه و مقرمشه حبتين بس جميله
مازن / هتحلو كمان عالصلصه و المكرونه
مرام / هنشوف هو فاضل كتير
مازن / جوعتى
مرام / بصراحه اه انت نسيت انى مفطرتش و لا ايه
مازن / الله طب متاكلى مالسندوتشات وراكى اهى
مرام / مانا كدا هشبع و مش هعرف اكل الاكل اللى انت عملته
مازن / خلاص هانت دقيقه و اطلع الكفته مالزيت ارميها فى الصلصه و نغرف و ناكل انا و انتى
مرام / ماشى
مازن / مش عاوزه تقولى حاجه
مرام / زى ايه
مازن / اى حاجه
مرام / امممم عاوزه اقولك انك شاب كويس انا مشوفتش منك حاجه وحشه حتى خناقاتك مع محمود عاديه و صدقنى الف بنت تتمناك و مش هتكسف و اقولك انك لو مكنتش بتاع بنات و سمعتك زى الزفت كنت اتمنيتك
مازن / طب و الدراسه
مرام / انا يهمنى فى الانسان اخلاقه دى رقم واحد عندى
مازن / ولو اتغيرت انا فعلا اتغيرت انا من يوم مقربت منك و انا مش شايف بنت تانيه
مرام / انا مش خايفه من دلوقت انا خايفه لما نتجوز و تزهق منى و تحن لحياتك القديمه و المعجبات انا خايفه اتحول للعبه شبطت فيها لحد مخدتها و بعدين ترميها و تدور على غيرها انا صريحه معاك عشان مينفعش نزوق الحاجات دى
مازن / انا مش هعمل كدا
مرام / ايه يضمنلى
مازن / ايه يضمنلك اى حاجه فى الدنيا مفيش فى الدنيا ضمانات بس فى وعود بس للاسف عشان نصدق الوعود لازم نثق فى اللى بيوعدونا
مرام تبص لمازن يشيل الكفته مالزيت يحطها فى الصلصه و يقيد البوتجاز تحتها تانى
مازن / وسعى اما اروق المطبخ
مرام / لا كفايا عليك كدا انت تعبت اوى النهرده
مازن / فداكى
مرام / انا مش عوزاك تتعصب تانى ماشى
مازن / بابا صح
مرام / ايوه لازم يوافق
مازن / مش هيوافق
مرام / و انا مقدرش اقبل بالوضع ده اكيد هقابله فيوم فمناسبه فحاجه يعنى عالاقل يحضر فرحك يحضر سبوع حفيده تفتكر هيعاملنى ازاى هيبصلى ازاى مازن انا مش هقدر حتى لو غمضت عينى على حوار البنات ده مش هقدر فحوار باباك
مازن / ده اخر كلام عندك
مرام / مازن انا اسفه بس انا بحاول اكون صريحه معاك انا مش عاوزه اغشك
مازن / على العموم كدا مفيش داعى اننا نستنى لبليل
مرام تبصله مازن يبتسم و يمشى و سميحه مذهوله تبص عالمطبخ تلاقى مرام واقفه زعلانه
سميحه / هو ايه اللى حصل يا مرام
مرام / مفيش نصيب يا تيته انا داخله انام
سميحه / لا اله الا الله هو فى ايه مالكوا
مرام تدخل اوضتها و تحط راسها عالسرير و تعيط سميحه تدخل وراها و تحضنها
سميحه / مالك بس يا ضنايا بتعيطى ليه
مرام / معرفش انا معرفش
سميحه / طب اهدى كدا و قومى صليلك ركعتين و باذن الله خير
مرام تبص لسميحه ووشها كله دموع و تقوم تروح الحمام
سميحه / اللهم خير لى و اخترلى فانا لا احسن الاختيار يارب انت عالم بالحال حلها من عندك يارب
.......................................
فى الفيلا عند ماهى
ماهى بتكلم لبنى فى التليفون
لبنى / يعنى انتوا سبتوا بعض بجد انتى بتتكلمى جد طب ازاى و امتى
ماهى / البيه كان زعلان من الحوار اياه بتاع نيفين
لبنى / الله طب و سكت ليه و اتقدملك قدام صحابك و اهلك ليه هو لعب عيال هو بيحرجك قدامهم يعنى يقولوا عليكى ايه تتخطبى النهرده و تفسخى بكره هو بيستهبل و لا ايه
ماهى/ براحته سبيه يدلعله يومين
لبنى / ليه هتعملى ايه
ماهى /بكره تشوفى ان مرجع تحت رجلى زى الكلب ميبقاش اسمى ماهينور الشربتلى و بكره تشوفى
لبنى / انا مش مصدقه اللى بسمعه دا على كدا حوار خطوبته ماللى اسمها مرام دى مش اشاعه بقى
ماهى / خطوبته ؟؟
لبنى / ايوه انا محضرتش لانا و لا زياد بس بيقولوا مونى حضرت هى و خالو صفوت
ماهى / بقى مازن يسيبنى انا و يبص لدى
لبنى / مانا برده قولت مستحيل عشان كدا قولت اكلمك يا بنتى دى بتستلف الهدوم اللى عليها داحنا كنا عاملين بارتى مره هنا فى الفيلا وحياه زياد بعتلها فستان من عندى و اسالى زياد
ماهى / للدرجادى
لبنى / ماهى بليز انا مقولتلكيش حاجه بليز اوعى تعمليلى مشاكل بليز انتى عارفه مازن اصلا مش بيطيقنى مش عاوزه يقفش على زياد بسببى بليز يا لبنى بليز
ماهى / لا متقلقيش خالص اقفلى انتى دلوقت اقفلى
لبنى تقفل و ماهى بتفرك تتصل بفريده
ماهى / ازيك يا طنط عامله ايه
فريده / ازيك يا حبيبتى وحشتينى حاولت اكلمك كتير و سالت ممدوح بيه عنك كتير اوى معرفتش اوصلك خالص مش متخيله قد ايه انا فرحانه انك كلمتينى
ماهى / الحقيقه يا طنط لولا الاصول انا مكنتش كلمت حضرتك خالص
فريده / ليه بس يا حبيبتى انا عملتلك حاجه و بعدين يا حبيبتى انا قولت انى هقف جنبك لاخر لحظه و نروح للدكتور و مازن هيصلح غلطته و رجله فوق رقبته
ماهى / خلاص يا طنط اتز تو لايت انا خلصت الموضوع ده لوحدى
فريده / حرام عليكى يا ماهى طب دا ده الحفيد اللى اونكل ابراهيم بيتمناه مالدنيا اخص عليكى يا ماهى هان عليكى يا بنتى
ماهى / حضرتك بتتكلمى فى ايه انا اصلا كنت متصله عشان ابارك لحضرتك على خطوبه مازن
فريده / انتى بتقولى ايه يا ماهى
ماهى / ايه هو حضرتك متعرفيش و لا ايه
فريده / لا معرفش ميمكن اشاعه يا قلبى
ماهى / لا انا اتاكدت بنفسى حتى حضرتك ممكن تسالى مونى هى حضرت
فريده / مستحيل مونى فى لندن مع كامل سافروا من يومين
ماهى / ياريت حضرتك تتاكدى من معلوماتك
فريده / خطب مين
ماهى / بنت معاه فى الكليه اسمها مرام بس بصراحه ليه حق ميقولكوش عليها دى بتستلف الهدوم اللى عليها انا شوفتها لما كنت فمصر مع مازن كانت بترمى نفسها عليه بطريقه غبيه يلا مش مهم كدا احسن للكل
فريده / انا مش عارفه اقول ايه
ماهى / حضرتك متقوليش حاجه انا لازم اقفل سلام
فريده / مع السلامه
ماهى تقفل و تتصل بحد
ماهى / ايوه عاوزه تزكره على اول طياره نازله مصر ....و عاوزه اعرف عنوان واحده اسمها مرام ... لا مش فاكره اسمها مرام ايه هى فدفعه مازن حاول تعرفهالى لو معرفتش كلمنى و انا اعرفلك ... عاوزه عنوانها قبل منزل مصر ....سلام
...........................
فى الفيلا عند صفوت
مازن يدخل يلاقى مونى و كامل قاعدين اول ممونى تشوفه تقوم تروحله
مونى / هو ده اللى اتفقنا عليه انت مش قولتلى انى هاجى معاك
مازن يبتسم و يسيبها و يطلع فوق تبص على كامل
كامل / شكل فى حاجه حصلت روحى وراه
مونى تهز راسها و تطلع ورا مازن
مونى / فى ايه يا مازن انتوا اتخانقتوا
مازن / مرام شارطه ان بابا يوافق
مونى تبص لمازن و تسكت مازن يفرد ضهره عالسرير و يغمض عنيه
مونى / طب متحاول تكلمه يمكن يوافق
مازن يقوم يقعد و يبصلها
مونى / قوله انك بتحبها بابا مش هيقف قدام سعادتك اكيد يعنى و بعدين هى لبنى يعنى حيلتها ايه و لا هتعمل زى زياد و تقول عشان زياد مش ابنه و كدا
مازن يقوم يقف مونى تمسك ايده
مونى / انا هكلمها هى بتحبنى و هتسمعلى
مازن/ مرام سالتنى سؤال قالتلى لو قابلت باباك فى اى مناسبه هيعاملنى ازاى
مونى / بابا فيه عيوب كتير بس سو وات مين فينا كامل يعنى بس اكيد بيحبنا و بيتمنالنا السعاده
تليفون مونى يرن
مونى / دى ماما ... الو ايوه يا ماما ازيك ... يعنى ايه انا فين .. مين اللى قالك ... ايوه حصل ... وفيها ايه يعنى ... لا مش هاجى انا طيارتى بكره الصبح على لندن ... لا .... سلام
مازن يبصلها
مازن / عرفت انك هنا صح
مونى / اكيد لبنى هانم قالتلها والله العظيم المرادى مهسكتلها
الباب يخبط و كامل يدخل
كامل / مونى لازم نرجع دبى دلوقت
مونى / ليه
كامل / باباكى كلمنى و مدايق جدا ماللى حصل و بيقول انى انا اللى شجعتك تكدبى عليه و كلم والدى و الموضوع كبر لازم نرجه
مازن / بصوا انا هكلم بابا و احل الموضوع انتوا ملكوش دعوه انا هقوله انكوا مكنتوش تعرفوا و انى حطيتكوا قدام الامر الواقع
كامل / مازن انا مش صغير و لا حتى عملت حاجه غلط و على فكره مرام بنت كويسه
مونى / انا هكلم بابا و هقنعه
مازن / متتعبيش نفسك
مونى / بكره تشوف
كامل / انا هروح اللم حاجتى و اعدى عليكى كمان ساعتين تكونى لميتى حاجتك
مونى / اوك
كامل / سلام يا مازن
مازن / سلام
كامل يمشى و مازن يقعد عالسرير
مونى / هتتحل صدقنى انا متاكده ان ربنا هيحلها
مازن يبصلها و ياخدها فى حضنه
مونى / هتتحل صدقنى
...........................
فى شقه مرام
مرام واقفه تغسل المواعين جرس الباب يضرب تجرى بسرعه تفتح تلاقى واحده ست
الست / ازيك يا مرام يا حبيبتى عامله ايه
مرام / الحمد لله ازيك يا طنط اتفضلى
الست / هو انا جايه فوقت مش مناسب و لا ايه
مرام / ابدا ابدا اتفضلى حضرتك عاوزه تيته هى عند عمتى ثوانى اناديهالك
الست / متحرمش منها و لا من ريحتها بس انا كنت جيالك انتى
مرام / طب هتفضلى عالباب اتفضلى اقعدى خير يا طنط اؤمرينى
الست / ميؤمرش عليكى ظالم يا ست البنات بصراحه انا محرجه منك اوى
مرام / ليه بس
الست / انا والله لولا عارفه انك بت جدعه و عمرك مرفضتى لحد طلب انا مكنت جيت و لا حطيت نفسى فالموقف ده ابدا
مرام / والله لو اقدر مش هتاخر بس قوليلى بقى ايه الموضوع المحرج اوى ده هتتكسفى من بنتك
الست / الواد ماجد ابنى كان عاوز يفتح مشروع طباعه و سال على اسعار المكن و عرف التفاصيل كلها و المحل موجود بتاع ابوه الله يرحمه مش فاضل غير التمويل قولتله بدل مبيع حتتين الصيغه اللى كنت هخطبله بيهم هقدمله على قرض بضمان البيت و فى ولاد حلال دلونى على ناس بيدوا قرض بفوايد اقل بس بيمضونا على شيكات كتير اوى و النهرده لقيته راجع من عالقهوه بيكلمنى عن سى الاستاذ مازن خطيبك و انه كان بيتكلم مع عم عبد الله عشان يوظفله ابنه فقولت فرجت طب ماللى يخليه يوظف على ميساعد ماجد
مرام / ايوه يعنى انا اقدر اعمل ايه
الست / الله يا مرام هو مش انتى خطيبته حبيبته و ليكى دلال عليه كلمتين حلوين منك تقنعيه يشارك ماجد و يموله مشروعه و باذن الله ماجد مش هيقصر رقبته و هيشرفه دا واد ابن حلال هو بس محتاج فرصه
مرام / ايوه بس
الست / بالله عليكى يا مرام تكلميه انا عارفه انه مش هيرفضلك طلب
مرام / هو حضرتك عوزانى اطلب منه يمول مشروع ماجد صح
الست / و دا يعنى هيجى حاجه جنب الشركات بتاعته دول شويه فكه
مرام / والله مش عارفه اقول لحضرتك ايه
الست / متقوليش حاجه بس بالله عليكى متنسى تكلميه فى موضوع ماجد فساعه صفا كدا طب والله العظيم انا بدعيلك
مرام / ربنا يخليكى
الست / هستاذن انا بقى لحسن سايبه المحل لوحده
مرام / اتفضلى
مرام تفتح الباب تلاقى سميحه بتفتح الباب و بتكلم ست
سميحه / الله اتارى البيت منور اهلا بالست ام الباشمهندس
الست / ههههههههههههه ازيك يا حجه
سميحه / والله و ليكى وحشه اتفضلى اتفضلى
الست / يزيد فضلك مره تانيه اصلى سايبه المحل لوحده
سميحه / كل مره بتقولى كدا و مبتجيش
الست / لا هاجى و باذن الله هنشرب شربات مش شاى
سميحه / باذن الله تنورى فاى وقت
الست تنزل عالسلم الست التانيه تبص لمرام
الست 2 / هى الست دى كانت عاوزه منك ايه يا مرام
مرام / عادى مفيش انتوا واقفين عالسلم ليه
الست 2/ لا دا كان حوار كدا و باذن الله الست سميحه هتقوم بالواجب
سميحه / ان شاء الله
الست 2/ بالاذن انا بقى و الف مبروك يا عروستنا يا حلوه
الست 2 تمشى و مرام تروح عند مديحه مع سميحه
مديحه / حاره ناقصه هو فى كدا فى الدنيا
سميحه / عشمانين فينا خير
مديحه / يعنى هو ينفع اللى بيعملوه ده البت معداش على قرايه فتحتها تلت ايام و هاتك يا طلبات يا طلبات فى ايه مال الطلق بتاعهم حامى كدا ليه طب على الاقل يخلوا عندهم دم يستنوا اما تكتب الكتاب و لا تدخل و تبت قدمها
سميحه / خلاص يا مديحه صحيح يا مرام هى الحجه ام ماجد كانت عاوزه ايه
مرام / مش هتصدقى
سميحه / لا بعد اللى شوفته النهرده هصدق اى حاجه ايه عوزاه يشغل ابنها هو كمان
مرام / ياريت دى عوزانى اطلب منه يموله مشروعه
مديخه / بنت الكلب الواطيه طب والله لوريها
سميحه / خلاص يا مديحه
مديحه / انا مشوفتش بجاحه كدا فحياتى الجدع يقول علينا ايه يا ناس
مرام / مش هيقول حاجه لان الموضوع انتهى اصلا
مديحه / يا كبدى يا بنتى ليه ايه اللى حصل
مرام / مفيش نصيب عن اذنكوا
مرام تمشى
مديحه / هو فى ايه يا حجه
سميحه / على يدك كدا هى على الجمله دى و تعيط
مديحه / كان مستخبيلنا فين دا بس ياربى دى اكيد محسوده طبعا عنيهم اللى تدب فيها رصاصه دى استكتروا عليها عريس زى ده استكتروا علينا العز ولاد الفقريه مصيبه تاخدهم
سميحه تبص لمديحه و تتنهد
.................................
فى المحل عند اسعد
محمود / انا خلصت يا معلم تؤمرنى باى حاجه تانى
اسعد / تسلم يا استذه تعبتك النهرده
محمود / و لا تعب و لا حاجه
اسعد / الا صحيح يا حوده
محمود / خير يا معلم
اسعد / بعد بكره باذن الله عيد ميلاد مروه بنتى و كنت عاوزك توصيلى مرام تعملها تورتايه حلوه زى كل سنه
محمود / هبلغها حاضر
اسعد / بس بالله عليك يا محمود لو مش هترضى تعملهالها تقولى عشان اللحق اشتريلها واحده حلوه انت عارف مروه بنتى غاليه عندى قد ايه و انا نفسى افرحها البت غلبانه و بترضى باقل حاجه
محمود / ربنا يباركلك فيها يا حج عقبال متفرح بيها
اسعد / من بقك لباب السما يا حوده من بقك لباب السما عدل
محمود / عن اذنك يا معلم
اسعد / اتفضل
محمود يمشى
...................................
فى شقه مرام
سميحه تدخل لمرام الاوضه تلاقيها قاعده مهمومه و حاطه ايدها على خدها
سميحه / مالك شايله طاجن ستك ليه
مرام / هقول ايه للناس دى كلها
سميحه / قوليلهم مفيش نصيب
مرام تبصلها
سميحه / الله لا يكلف الله نفسا الا وسعها انتى صليتى استخاره و مرتاحتيش هتعملى ايه يعنى
مرام / طب مانا برده مش مرتاحه
سميحه / امرك غريب يعنى انتى عاوزه ايه دلوقت مش انتى اللى قولتى مفيش نصيب .... لتكونى حبتيه
مرام / ايه ده يا تيته لا طبعا
سميحه / و ايه المشكله الواد حلو و ابن ناس و دمه زى العسل و بصراحه يتحب اذا كنت انا ذات نفسى بحبه
مرام / هههههههههههههههه لا يا تيته الموضوع مش كدا
سميحه / امال الموضوع ايه
مرام / معرفش بس هو مش حب انا ملحقتش اصلا انا كل ذكرياتى مع مازن خناقات
سميحه / و انتوا كنتوا بتسهروا للصبح تتخانقوا فى التليفون اليومين اللى فاتوا
مرام / اه ... ساعات يعنى
سميحه تبتسم
مرام / تعرفى انا فايتنى كتير اوى الكام يوم اللى فاتو انا بقول اللتفت لمزاكرتى احسن عشان اللحق اعوض
سميحه / احسن برده
مرام تبتسم و تقوم تجيب كتبها و تبص لسميحه سميحه تسيبها و تقوم مرام تسمع جرس الباب تقوم تبص تلاقى صفوت تلبس الاسدال و تطلعله
سميحه / اتفضل هناديهالك ... اهى جت اهى
............................