(((((((((السكة شمال ))))))))))
#لولو_محمد
الحلقه 154
احمد / تعالى معايا انا رجعت عشان وحشتينى رجعت عشان مقدرتش ابعد عنك انتى عارفه انى بحبك
لبنى / مازن يا هيقتلك يا هتقتله مازن مش هيعدى اللى حصل على خير انت مش قده
احمد / تحبى اقتلهولك دلوقت عشان تتاكدى انى قده و نص
لبنى / سافر و سيبنا فى حالنا عاوز ايه عاوز كام
احمد / عاوزك
لبنى تبص لاحمد بصدمه
احمد / عاوزك و مش عاوز اى حاجه تانيه لا فلوس و لا شركات و لا اى حاجه تفرق معايا انا مش عاوز غيرك
.....................................
لبنى / و انا قدامك
احمد يحضن لبنى و يبوسها
..................................
فى اوضه مازن
مازن يفوق و مرام قاعده جنبه عالسرير بتعيط مازن يقوم يقعد يطمن عليها
مازن / مرام .. بتعيطي ليه مالك
مرام تترمى فى حضنه و تعيط
مرام / الحمد لله انك بخير الحمد لله انت عامل ايه يا حبيبى
مازن / انا كويس انتى كويسه جرالك حاجه
مازن يبص عليها يتاكد انها سليمه
مرام / انا كويسه و بقيت احسن كمان لما اطمنت عليك هو فى ايه ايه اللى حصل ده
مازن / معرفش بس هعرف اكيد هعرف مفيش اخبار عن خالو
مرام / لا معرفش حاجه محدش قالى حاجه
مازن / طب هما فين سايبينا لوحدنا ليه
مرام / الدكتور قال ترتاح هما كلهم بره انا هناديهم بس انت لازم ترتاح اوعدنى
مازن / مالك يا مرام
مرام / عادى لحظه كدا زى بتاعه الفندق و هتروح الخضه بس المرادى كانت شديده اوى او انا اللى تعبت من كتر الحاجات اللى حصلت فى الفتره اللى فاتت بس تعرف خلاص انا بقيت كويسه لما انت فوقت و انا اطمنت عليك خلاص مش مهم انا كدا بقيت زى الفل
مرام تمسح دموعها و ينزل مكانها مازن ياخدها فى حضنه تعيط
مرام / انا خايفه اوى المرادى ربنا نجانا المره الجايه
مازن / مفيش مره جايه اى كان اللى عمل كدا
مرام / مين انت تعرفه مين احمد و لا شهاب و لا مين البلد كلها مجرمين لابسين بدل نضيفه و عاملين فيها ولاد ناس والله انا ما خايفه على نفسى انا بس مش قادره استوعب ان كان ممكن حد يتعور النهرده او انى لا قدر الله... مش قادره اقولها... انى كان ممكن يعنى ... اخسرك
مازن / اهدى يا حبيبتى اهدى خلينا دلوقت نطمن على خالو و انا متاكد ان اللى عمل كدا هيبقى عبره و اى حد هيفكر بس يفكر يقلده بس هيبقى عبره بس انتى تهدى
مرام تهز راسها و تقوم تفتح الباب تلاقيهم بيعيطوا بره الحزن يزيد على وشها
مرام / فى ايه
سميحه تاخدها فى حضنها
سميحه / مفيش يا حبيبتى عاملين ايه مازن فاق و لا لسه
مرام / لا يا تيته فى فى ايه مالكوا فى ايه مالك يا مونى فى ايه حد يرد عليا بتعيطوا ليه
مازن يقوم يقف فضهر مرام
سميحه / قلبى يا بنى انت صحيت حمد الله على سلامتك
محمود / قلقتنا عليك عامل ايه
مونى تترمى فى حضن مازن و تعيط
مازن / انا كويس يا قلبى كويس والله اهدى
مونى / خالو مات يا مازن خالو صفوت مات
الكل يبص لبعضه و مازن مصدوم مرام تقع فى الارض فاقده الوعى الكل يتلم حواليها و مازن اولهم
.............................
فى الفندق عند احمد
لبنى نايمه جنب احمد و هو حاضنها
احمد / انتى متعرفيش انا اتخيلت اللحظه دى قد ايه ... انا بحبك يا لبنى بحبك اوى
لبنى / انت وعدتنى لم حاجتك و سافر و مترجعش هنا تانى
احمد / و شغلى
لبنى / انت وعدتنى انت وعدتنى
احمد / اهدى يا قلبى اهدى
لبنى / ازاى عاوزنى اهدى و انا عارفه ان حربك مع مازن مش هتخلصيا هتقتله يا هيقتلك و يخش السجن و فى الحالتين انا مش هستحمل
احمد / هتخلص اوعدك انى عشان خاطرك عشان خاطرك انتى بس هنهيها مهما كلفنى الموضوع ده لو هبوس رجله عشان نصفى اللى بنا هنهيها بس ارجوكى تهدى
لبنى / اوعدنى انك عمرك مهتاذيه اوعدنى ارجوك اوعدنى انت مش بتقول بتحبنى لو بتحبنى لو انا غاليه عندك زى مبتقول ارجع من مكان مجيت و ابعد
احمد /تعالى معايا و انا مستعد منزلش مصر نهائى
لبنى / انت بتقول ايه انا مخطوبه
احمد / يا شيخه مخطوبه لواحد و بتحبى التانى و نايمه فى حضن التالت
لبنى تبصله و تلف نفسها عشان تقوم يمسكها يمنعها
احمد / مازن عمره مهيكون ليكى و زياد انا و انتى عارفين كويس انه زى قلته خيال مقاته انا اللى هسعدك مصلحتك معايا انا
لبنى / انا عارفه مصلحتى كويس متشغلش انت بالك بيا بس
احمد / صحيح يا لبنى عرفتى مكانى منين
لبنى / دا على اساس انك كنت مستخبى اصلا اتصلت بمدير اعمالك اول مسمع اسمى ادانى العنوان
احمد / شوفتى بقى انا بحبك قد ايه و النهرده بعد اللى حصل ده اتاكدت ان انتى كمان بتحبينى
لبنى / اللى حصل بنا كان غلطه و ياريت انا و انت ننساها
لبنى تقوم تاخد هدومها و تجرى عالحمام و احمد يقوم وراها
احمد / مفيش حاجه بتتنسى يا لبنى و لا انا و لا انتى هنقدر ننسى اللى حصل و بكره تجيلى يا لبنى انتى سامعه هتلفى تلفى و ترجعيلى و افتكرى كلامى ده كويس هترجعيلى يا لبنى
...............................
فى المستشفى
كلهم قاعدين قدام العنايه المركزه و شريف واقف جنب مازن و سميحه ماسكه ايديه و بتدعك فيهم و هو مصدوم و الدموع بتنزل من عنيه و الحزن مالى وشه الدكتور يطلع الكل يجرى عليه
الدكتور / الحمد لله الحاله استقرت بس ممنوع الزياره
مازن / انا جوزها
الدكتور / انا كلامى كان واضح الحاله عندها انهيار عصبى و ياريت نبعد عنها اى ضغط او توتر انتوا بتقتلوها بعمايلكوا دى عن اذنكوا
الدكتور يسيبهم و يمشى مازن يحاول يفتح الباب شريف يمنعه
شريف / استنى عليها يا مازن اسمع كلام الدكتور
مازن / انا بس عاوز اشوفها
شريف / هتبقى كويسه بس انت كمان لازم تمسك نفسك اكتر من كدا
مازن / ازاى قولى ازاى
شريف / معرفش بس انت اكيد اقوى من كدا
سميحه تمسك ايد مازن و تشده ناحيه الكرسى يقعد و هو بيعيط تاخده فى حضنها و تطبطب عليه
مازن / انا تعبان اوى يا تيته تعبان بجد
سميحه / حقك عليا يا ضنايا معلش انا عارفه انا عارفه مش سهل عليك ابدا بس انت قدها صدقنى هو فمكان احسن دلوقت هو عند اللى خلقه
مازن / عن اذنكوا
مازن يقوم و يسيب المكان و يمشى
سميحه / روح معاه يابنى خليك جنبه متسيبوش
شريف يجرى ورا مازن
مديحه / انا والله معارفه كل ده كان مستخبيلنا فين بس دى عين يا حجه عين واعره جابتنا كلنا الارض طبعا منهم لله اللى عينهم تندب فيها رصاصه قالوا البت هتتجوز راجل مليان و هيروحوا الفيلا و يسيبوا الحاره جابوا درفها بس انا عارفه دى عين مين دى اكيد عين الوليه الحربايه نجلاء ام
سميحه / محمود
محمود / ايوه يا تيته
سميحه / انت واقف من بدرى يا حبيبى خد امك و روحوا ارتاحوا و الصبح اعملوا لقمه حلوه و هاتوها و انتوا جايين قعدتنا هنا ملهاش لازمه
محمود / طب متروحى انتى يا تيته انتى محتاجه للراحه اكتر
سميحه / و انا هشوف الراحه وولادى بالمنظر ده يلا ربنا يهون قومى امشى يا مديحه ارتاحى
مديحه / ماشى يا حجه اللى تشوفيه يلا يا حوده
محمود يبص لسميحه تشاورله يمشوا
............................
فى الفيلا عند زياد
لبنى تدخل الفيلا تقابل زياد
زياد / كنتى فين
لبنى / انا مخنوقه و مش قادره اتكلم ماشى لو سمحت سبنى اطلع انام
زياد / انا قلقت عليكى عربيتك سبيتيها قدام المستشفى و موبايلك مقفول و كلمت مامتك و كل صحباتك مكنتيش عندهم انا كنت هتجنن يكون جرالك حاجه انتى كمان
لبنى / ياريت ... ياريت كان جرالى حاجه و مت و خلصت ياريت
زياد / ليه كدا يا لبنى
لبنى / بقولك تعبانه مخنوقه هموت سبنى اطلع اترمى فى السرير انت ايه
زياد / انا اسف انا بس
لبنى تزق زياد و تطلع الاوضه و تقعد بهدومها تحت الدوش و تعيط
................................
فى مسجد المسشفى
مازن ساجد و شريف قاعد وراه عينه عليه يجيله تليفون يطلع بره
شريف / الو خير طمنى
راجل / الانفجار حصل بسبب طلقه قنص فى تنك البنزين و لقينا السلاح فعلا بس للاسف معليهوش اى بصمات
شريف / زى متوقعت طب و الكاميرات
الراجل / ملثم ملوش ملامح جه و معاه كيس بلاستيك فتحه و ركب السلاح غطاه و فضل مستنى و فجاه ضرب الطلقه و غطى السلاح تانى و ركب تاكس و مشى
شريف / تاكس ؟؟
الراجل / ايوه اما بقى السلاح التانى الشوت جن برده مكنش عليه بصمات
شريف / و سواقين الاسعاف اللى جابوا صفوت بيه المستشفى
الراجل / بياناتهم كلها مزوره بس قدرنا نتعرف عليهم من صورهم فى كاميرات المستشفى الاتنين مسجلين خطر و عليهم احكام و التحريات شغاله و باذن الله هنوصلهم
شريف / و التريلا اللى عملت الحادثه
الراجل / منغير نمر للاسف
شريف / يعنى ايه الامل الوحيد اللى لينا اننا نلاقى مسجلين الخطر دول طب و التاكس اللى ركب فيه القناص
الراجل / جارى التحرى عنه و باذن الله هنعرف منه نزل الراجل فين مع انى مفتكرش ان ده هيوصلنا لحاجه
شريف / انا متشكر اوى يا سليمان تعبتك معلش
الراجل / تعب ايه دا مازن صاحبى و صفوت بيه جمايله مغرقانى طمنى انتى عليه هو عامل ايه مازن يعنى
شريف / حالته لا تسر عدو و لا حبيب الله يعينه
الراجل / باذن الله فتره و تعدى
شريف / باذن الله عن اذنك
شريف يقفل و يدخل يلاقى مازن نايم عالارض مكان مكان ساجد يجرى عليه و يهزه مازن يفتح عينه
شريف / مازن مازن
مازن / انا كويس انا بس عاوز انام
شريف / هنا ؟؟
مازن / سبنى يا شريف سبنى مكانى متحركنيش
شريف يقعد فى جنب و عينه لسه على مازن اللى نايم فى الارض يجيله تليفون تانى يقوم يطلع بره
شريف / ازيك
صافى / فى ايه يا شريف ايه اللى حصل صفحكوا كلها اسودت و الكل بيقول البقاء لله و جت سليمه فى ايه صحيح اللى سمعته ده خالو مات
شريف / البقاء لله يا صافى
صافى / مش قادره اصدق و مرام و مازن ايه اللى حصل عاملين ايه دا حنتهم كانت النهرده هو فى ايه يا شريف انا مش فاهمه حاجه بجد
شريف / الموضوع كبير يا صافى حد ابن كلب عمل عمله متتحكيش فجاه لقينا الدنيا كلها مقلوبه ضرب مرام و مازن و صفوت بيه فتلت اماكن الحمد لله مرام و مازن سلام بس طبعا نفسيتهم زى الزفت
صافى / طبعا يا قلبى اذا كنت انا نفسيتى اتازمت لما عرفت مين اللى عمل كدا
شريف / لسه منعرفش و محدش فينا فايق يعرف حاجه اصلا مرام فى العنايه المركزه و مازن تقريبا منهار
صافى / طبعا ... انا حجزت تزكره
شريف / لا يا صافى اوعى ارجوكى
صافى / ازاى عاوزنى اسيبكوا فى الوضع ده
شريف / احنا مش عارفين فى ايه انا حتى اخواتى البيت عندنا كلمتهم و منعتهم يخرجوا مالبيت او يفتحوا لاى حد و بعت سيكيوريتى مالشركه عالباب عندهم
صافى / للدرجادى
شريف / انا عارف ان ان شاء الله الموضوع هيكون خلص على كدا بس الاحتياط واجب
صافى / معاك حق طب هتعملوا ايه
شريف / بيقولوا هنستلم الجثه النهرده هيبقى فى دفنه و عزا و انتى عارفه
صافى / ربنا معاكوا انا والله من ساعه مسمعت الخبر و انا عماله اقرا قران و ادعيله
شريف / كتر خيرك
صافى / انت عامل ايه كويس صوتك حزين اوى افتح الكاميره خلينى اشوفك اطمن عليك
شريف / انا كويس بس مش هفتح الكاميره مش دلوقت احنا فى المستشفى و الناس رايحه جايه
صافى / عشان خاطرى بليز بليز
شريف يفتح الكاميره صافى تبتسم بحزن شريف يقفلها تانى
صافى / خد بالك من نفسك و من مازن انا عارفه قد ايه خالو صفوت كان غالى عندك
شريف / كان بمثابه ابويا الله يرحمه
صافى / هو فمكان احسن دلوقت ان شاء الله
شريف / يارب .. انتى عامله ايه الدراسه و حاجتك
صافى / استقريت الحمد لله بس لسه مدخلناش فى الجد
شريف / تمام بصى انا هدخل جنب مازن هبقى اكلمك بعدين تمام
صافى / اوك تمام سلملى عليه كتير
شريف تمام
شريف يدخل يفرد ضهره جنب مازن و يبص عليه نايم يغمض عينه هو كمان و ينام
...............................
فى العزا
ابراهيم واقف و جنبه مازن جنبه زياد شريف قاعد فى جنب مع محمود و المعلم اسعد و الكل باين عليه الحزن
اسعد / كان راجل طيب و ابن حلال
محمود / الله يعينه مازن كانه فدنيا تانيه
اسعد / حقه مش خاله يا محمود
شريف / لا مش خاله دا ابوه دا كل عيلته كل اللى ليه فى الدنيا
اسعد / ربنا يخليله مرام بقى يسندوا بعض و يعدوا المرحله دى على خير
احمد يدخل العزا يسلم على ابراهيم و يسلم على مازن مازن مش منتبه ليه و بيسلم و خلاص
احمد / اول معرفت الخبر جيت علاطول مهما كان اللى بنا دا كان زى ابويا و اكتر الله يرحمه و يصبرك لو احتجت اى حاجه يا مازن اى حاجه انا مغيرتش رقمى
مازن يرفع عينه و يبص على احمد و كانه مش مستوعب
احمد / عن اذنك
احمد يسلم على زياد زياد يضغط على ايده جامد احمد يطبطب عليه و يسحب ايده و يروح يقعد بعيد و عين شريف و محمود عليه
محمود / دا جاى هنا يعمل ايه ده
شريف / يقتل القتيل و يمشى فجنازته
محمود يبص لشريف و يبص لاحمد و يرجع يبص لشريف و يجى يقوم شريف يمنعه
شريف / رايح فين
محمود / هقتله و اشرب من دمه
شريف / اقعد متبقاش اهبل مفيش معانا دليل ضده بس قلبى بيقولى كدا قلبى بيقولى ان هو اللى عمل كدا مين غيره له مصلحه فده مين غيره مقهور اوى من صفوت بيه يعمل فيه كدا
محمود / مين غيره واطى اوى و ابن كلب كدا
صوت دربكه محمود و شريف يبصوا يلاقوا مازن واقع فى الارض و الكل ملموم حواليه يجروا عليه
............................
قدام باب العنايه
سميحه قاعده بتقرا قران تدخل ام مجدى و اميره و اتنين ستات
ام مجدى / البقاء لله ياختى
اميره / اول معرفنا والله سبنا كل حاجه و رجعنا ربنا يجعلها اخر الاحزان
ام مجدى / مرام عامله ايه يا حجه
سميحه / عشتى ياختى انتى و هى عشتوا مرام !!! مرام فى العنايه جوه مستحملتش يا قلبى كل اللى حصل
ام مجدى / الحاره مقلوبه ياختى اللى حصل ده لا عمرنا شفناه و لا عرفنا عنه غير فى الافلام الاجنبى
اميره / بس والله يا حجه مجدى حلفلى مليون يمين انه لا له يد و لا كان عنده علم باللى حصل اقسم بالله حتى قالى ان السلاح اللى لقوه مستورد و بالشئ الفلانى
سميحه/ عارفه يا بنتى ربنا يهدى الجميع
ام مجدى / الرجاله عندنا راحوا العزا بس انا منعت الواد توفيق يروح يعنى خفت يشد مع مازن بيه انتى عارفه اللى بينهم
سميحه / خير معملتى
اميره / احنا مرضيناش نروح العزا و قولنا نيجى نطمن عليكى انتى هنا اولى بالله عليكى متقهرى نفسك كل تاخيره و فيها خيره و بكره يتعملها اكبر فرح و تلبس احلى فستان
سميحه / هى بس تقوم بالسلامه تقوم بس و كل حاجه تانيه تدبر
ام مجدى / ان شاء الله خير يا حجه متقلقيش باذن الله خير
سميحه / يارب
.....................................
فى فيلا زياد
مازن نايم و مركب محلول فى اوضته و ابوه قاعد جنبه هو و لبنى و فريده و مونى على باب الاوضه كامل و شريف و زياد و محمود واقفين
ابراهيم / كدا توقع قلبى ايه فاكرنى جبل هقدر استحمل كل ده
مازن / انتوا سايبين مرام لوحدها و ملموممين حواليا انا كويس دوخت بس من قله الاكل
لبنى / هعملك حاجه تاكلها حالا
لبنى تقوم تمشى و الكل عينه عليها
مونى / قوم بالسلامه بلاش دلع انا كنت هموت مالخضه عليك
مازن يبتسملها و يرجع يبص لمحمود و شريف
مازن / هو انا هتحايل عليكوا يعنى اقوم اروحلها انا
شريف / لا خليك مرتاح احنا هنروح بس لو فى اى حاجه
كامل / متقلقش انا هفضل جنبه
شريف يحط ايده على كتف كامل و ياخد محمود و يمشوا و ثوانى و زياد يحصلهم و ينزل المطبخ يلاقى لبنى بتكلم امانى
لبنى / انتى لسه واقفه متتحركى الله
زياد / لبنى .. عاوزك ثوانى
لبنى تروح تقف جنب زياد
زياد / عرفتى ان احمد رجع
لبنى / اه عرفت
زياد / عرفتى امتى
لبنى / و مين معرفش يلا ربنا ياخده و يخصلنا منه
زياد / تفتكرى هو اللى وراها
لبنى / معرفش
زياد / مالك انتى مش مظبوطه معايا بقالك كام يوم فى ايه
لبنى / فى ان فى واحد مننا اتقتل يا زياد و مازن كان ممكن يروح فيها و زى مانت شايف راقد فوق و مركب محاليل فى ان فى حد اتجرا و رفع سلاحه علينا فى انى خايفه يا زياد خايفه
زياد ياخدها فى حضنه تعيط
زياد / متخافيش طول مانا جنبك متخافيش
لبنى / مهو مازن كان جنبك محميتوش ليه
زياد / مازن مش صغير عشان يحتاج حد يحميه و بعدين مازن كويس الحمد لله دلوقت امانى تخلص الاكل و تاخديهوله ياكله و يقوم يقف زى الفل و كمان شهر و لا اتنين هتلاقيه نسى كل ده و اتجوز حبيبه القلب مرام و لا فرق معاه حاجه
لبنى / يقوم بالسلامه و بعدين يحلها حلال
زياد / اه يا قهرتى يانا كنت خلاص كلها كام يوم و اقدملك مهرك
لبنى / هو انت ناوى على ايه بالظبط بجد
زياد / و لا حاجه مش ناوى على حاجه
لبنى / كل مره تقولى كدا كانك مش واثق فيا و الحقيقه بقى انى فعلا بدات احس انك معندكش خطه و بتقول كدا و خلاص اى كلام عايش فدور الراجل الغامض بسلامته و انت اصلا و لا حاجه اقولك جو البيت دا كلو خنقنى انا رايحه عند ماما اريح اعصابى
زياد / تمام تعالى اوصلك
لبنى / لا انا عارفه السكه لوحدى عن اذنك
لبنى تسيبه و تمشى
زياد / بكره تعرفى يا لبنى انى مش بتاع كلام بكره تشوفى بعنيكى
زياد يمسك موبايله و يكلم حد
زياد / خليك وراها
...................................
فى المستشفى
شريف يدخل و وراه محمود يلاقوا سميحه لسه قاعده بتقرا قران
شريف / ازيك يا تيته فى اخبار
سميحه / كويسه الحمد لله بس لسه الدكاتره مانعين عنها الزياره و حاطينها تحت الملاحظه و كل شويه يدوها فحقن و ادويه تنيمها مازن فين هو كويس
محمود / اغمى عليه فى العزا و نقلناه البيت
سميحه / يا ضنايا يابنى و سبتوه هان عليكوا اخوكوا تسيبوه
شريف / مهواش لوحده يا تيته معاه اهله كلهم زياد و مونى و كامل و حتى ابراهيم بيه و مدام فريده
محمود / و بعدين هو كويس هو اللى طلب مننا نيجى و قال مينفعش نسيب مرام لوحدها و هو اصلا مكنش فى حاجه دا داخ من قله الاكل
شريف / و بصراحه يا تيته احنا كمان خايفين عليكى اوى انتى كمان لازم ترتاحى
سميحه / انا مرتاحه يا ولاد صدقونى
محمود / يا تيته انتى من امتى و انتى قاعده عالكرسى ده اخر حاجه دخلت بطنك كانت ايه
شريف / بصى يا تيته اوعدك انى مش هتحرك من هنا بس عشان خاطرى عشان خاطر مازن و مرام لو لينا ذره غلاوه عندك روحى كلى لقمه و ارتاحى ساعه و لا اتنين و تعالى تانى
سميحه / عاوزنى اسيب بنتى لوحدها جوه و امشى انت عاوزنى ارتاح و بنتى فى العنايه
محمود / يا تيته مانتى لو مرتحتيش هتخشى جنبها بعد الشر يعنى و هى محتاجاكى على رجليكى دلوقت ان كانت هى و لا مازن
..................................
أنت تقرأ
السكه شمال بقلم / لولو_محمد ( كامله )
Romanceشاب ثرى متعدد العلاقات يقع فى حب فتاه ملتزمه فقيره و يرفض محيطه هذه العلاقه و يحاولون التفريق بينهما
