السكه شمال بقلم / لولو_محمد ( كامله )

الحلقه ١٦٨

((((((((((((((السكة شمال )))))))))))
#لولو_محمد
الحلقه 168
مرام / ايوه يا تيته بس انا حساه بيبعد عنى معايا بس مش موجود مازن واحشنى اوى يا تيته
سميحه / خليكى جنبه ساعديه يعدى المرحله دى هو محتاجلك دلوقت اكتر من اى وقت تانى
مرام تهز راسها اه الباب يتفتح و مازن يدخل و جايب فطار
مازن / انا جبت فطار من عند عن مدبولى حد ياكل
مرام / حمد الله عالسلامه
مرام تبتسمله و تاخد منه الكيس و تدخل المطبخ
سميحه / تعال اقعد جنبى هنا يا واد يا عفريت انت دى عمله تعملها فى ستك العجوزه
مازن يبتسم و يروح يقعد جنبها
سميحه / عامل ايه احسن دلوقت و لا لسه مخنوق
...................................
مازن / احسن كتير لما شوفتك يا تيته
سميحه / تعال هنا اما ارقيك
مازن يحط راسه على رجل سميحه
مازن / قال يعنى محسود ههههههههههههههههه على ايه يا حسره          
سميحه / هو ايه اللى على ايه ... اتعدلى كدا اما اشوف ايه حكايتك يا واد انت
مازن يتعدل
سميحه / هو ايه اللى تتحسد على ايه انت مش شايف نعم اللى مغرقاك يابنى صحتك و شكلك و فلوسك كل دى مش نعم شريف و صحبته و مرام و حبها ليك انا يا جزمه مش نعمه فى حياتك اتحسد عليها
مازن يبتسم
سميحه / و ان تعدوا نعمه الله لا تحصوها يا مازن لا تحصوها عندك يا حبيبى اللى تتحسد عليه كل الناس بتحسدك انت عارف ربنا لما بيحب حد بيبتليه عشان يطهره و يخليه يكفر عن سيئاته بيختبر ايمانه و صبره عشان يديله حسنات كتير اوعى ايمانك بربنا يتهز فاى وقت اوعى
مازن يهز راسه اه
سميحه / ايه رايك اخدك النهرده و نتفسح و نغير جو هاخدك و نروح نتغدى فى الحسين فته كوارع و انا اللى عزماك ايه رايك بقى
مازن / هو عرض ميتفوتش بس انا شايف انى لازم انزل الشركه بقى كفايا دلع كدا مينفعش تعب خالو السنين اللى فاتت دى كلها يروح فى الارض عشان انا مش عارف اشغله و لا ايه
سميحه / خلاص روح و انا هعملك انا فته الكوارع هنا و لا اجدعها حسين ايه رايك بقى
مازن / اهو ده الكلام يا تيته و لا بلاش
مرام تدخل شايله صينيه تحطها على الترابيزه و تبص على مازن مبتسم
مرام / طب ايه انا معزومه معاكوا عالاكله الجامده دى و لا ايه
مازن / والله على حسب شغلك مانتى يا هانم هتيجى معايا الشركه و لا انتى الاولى عالدفعه اونطه يعنى مش اطلع منك باى مصلحه و لا ايه
مرام / بس كدا انت تؤمر كلى تحت امرك يا فندم
سميحه / ربنا يهدى سركوا يا ولاد و يقدملكوا الخير و يبعد عنكوا ولاد الحرام
مرام / امين ... يلا بسم الله الطعميه هتبرد
.................................
فى شقه محمود
محمود / انت رايح فين يابنى انت لسه تعبان اقعد ارتاح
شريف / والله بقيت كويس مش هفضل فى السرير باقى عمرى يعنى مش والده انا
محمود / لا اله الا الله عالدماغ الناشفه طب اقولك روح على البيت عندك و بلاش تروح الشركه انت مش لسه امبارح قايل هتروح اخر الاسبوع
شريف / يا سيدى انا كويس احلفك بايه عشان تصدق انى كويس و بعدين متقلقش هاخد بالى من نفسى لا هعمل مجهود و لا هاجى على نفسى و بعدين يا اخى مانت هتبقى معايا
محمود / انا هروح اناديلك مازن انا تعبت منك
محمود يروح يفتح الباب يلاقى مرام عالباب الاتنين يتخضوا
مرام / ههههههههههههههه خضيتنى
محمود / كنت لسه جايلكوا ... انتى لابسه و رايحه فين
مرام / جايه معاكوا الشركه
شريف يدخل
شريف / ايه ده انتى جايه بجد ؟؟
مرام / المفروض انا اللى اسالك السؤال ده انت لابس ليه
مازن يدخل
مازن / انت لابس ليه
شريف / انا نازل الشركه
مازن / خش اقلع ياله و تعمل حسابك لو مرتاحتش انا مش هرفدك لا انا هحرمك من اكله فته الكوارع اللى تيته هتعملها عالغدى و هطلبلك فراخ مسلوقه و شوربه انت فاهم
شريف / لا يا عم الرفد ارحم بس مدام مش هروح الشركه بقى يبقى اروح اطمن على امى و البنات
مرام / انا رايي كدا برده
مازن / ماشى تعال هنوصلك فى طريقنا و بالمره نجبلهم شويه فاكهه و لا اى حاجه حلوه تدخل عليهم بيها
محمود / ثوانى هجيب المفتاحي و الموبايل و اجى معاكوا
............................
فى شقه شريف
شريف قاعد و الكل حواليه و امه بتعيط
الست / انا والله كان قلبى حاسس مش انا قولتلكوا السفريه دى وراها حاجه مش انا قولت
شريف / بتعيطى ليه دلوقت مانا قدامك كويس اهو امال لو كنت خليتهم يكلموكى و انا فى المستشفى كنتى هتعملى ايه
الست / كدا يا شريف تبات فى المستشفى لوحدك يا حبيبى تطلع مالمستشفى عالغرب كان ملكش لا بيت و لا اهل تعمل فنفسك و فامك كدا
شريف / خفت اقلقك ادخل عليكى مسندينى تتعبى زياده قولت لما تشوفينى داخل عليكى واقف على حيلى الوضع يختلف بس واضح ان مفيش فايده
الست / و مين اللى عمل فيك كدا و عمل كدا ليه
شريف / حرامى كان عاوز يقلبنى بس الحمد لله مسكوه متقلقيش
الست / يا خويا كنت سبتله اللى هو عوزه حبكت الرجوله بتاعتك دى  اوى ابن ابوك بصحيح
شريف / ههههههههههههههههههه حاضر المره الجايه اللى يطلع عليا فيها حرامى اوعدك هبقى اديله اللى هو عاوزه بس ساعتها بقى متزعليش لما ينادولك بام سوسن
الست / هى بقت كدا بتتمالس عليا و انا اللى سهرانه طول الليل انا و اخواتك ننقيلك فى هديه حلوه
شريف / استر يارب
الست / اخص عليك يا واد
شريف / مانا الجمله دى مش جديده عليا يا ست الحبايب
الست / بت زى القمر مع اختك فى الكليه و صاحبتها كمان ادب و اخلاق و جمال و شاطره كمان و تقديرها عالى امها و ابوها ماتوا و عايشه مع اخوها و مراته ايه رايك بقى
شريف / فى ايه
الست / فى مى
شريف / مى مين يا ست الكل انا واحد مضروب مطوه فى جنبى و محتاج راحه انتى بتتكلمى فى ايه
الست / يا شريف البنات الحلوه مبتقعدش فثانيه شوف فثانيه تلاقيها طارت كداهو
شريف / يبقى مليش نصيب فيها و خيرها فى غيرها ان شاء الله
الست / يعنى هتفضل كدا يعنى قاعد جنبى طول عمرك
شريف / اه هفضل جنبك طول عمرى ايه مش امى و لا ايه ... لا ... متقوليش انا مش ابنك ...لقيتونى و انا صغير قدام المعبد اليهودى و قررتوا تعطفوا عليا .... لا ... لا
الست تضربه و هو يدحك
الست / عليك و على هزارك سئيل ... يا باى
شريف / هههههههههههههههههههه مقبوله منك يا ست الكل
الست / قولى يا شريف انت البت اريج دى لسه فى دماغك بتحنلها يعنى
شريف / ليه بتقولى كدا يا ست الكل و ايه اللى فتح السيره دى اريج دى كانت صفحه فى حياتى و اتقفلت خلاص و مفيش اى حاجه فى الدنيا هتفتحها تانى
الست / ربنا يطمن قلبك يا حبيبى امال فى ايه قولى
شريف / يا ست الكل مفيش حاجه انا بس مش واكل معايا الجواز بالطريقه دى الحقيقه مش واكل معايا الجواز خالص دلوقت
الست / يعنى انت اقل من مازن بقى يعنى الفلتان اللى كان كل يوم مع واحده يتجوز و ابنى النسمه النسمه يقعدلى
شريف / اهو قركوا دا اللى جاب للمسكين الكافيه كان زمانه فى شهر العسل دلوقت ذنبه فى رقبتكوا يا جبابره ذنبه فى رقبتكوا
الست / اخرس يا واد
شريف / تحت امرك يا ست الكل
الست / طب ايه رايك فى صافى
شريف / صافى مين صافى ايه هو فى ايه ايه هى مى لحقت خدت استماره سته و لا ايه
الست / الله مش هى مش عجباك
شريف / و انا كنت شفتها عشان تعجبنى و لا متعجبنيش
الست / يادى النيله يعنى انت عاوز تشوفها
شريف / لا
الست / ارقع بالصوت و يقولوا الوليه اتجننت
شريف / هههههههههههههههههههه ليه بس يا ست الكل انا عملت ايه
الست / قول معملتش ايه .. يا شيماء بت يا شيماء
شيماء تدخل
الست / انا تعبت اقعدى مع اخوكى و خلصيلى الحوار ده اما اقوم اعمل الغدى جتها نيله اللى عاوزه خلف
شريف / كنتى بتعيطى من شويه لما قولتلك انى اتعورت هاه هاه ماشى حقك حقك يا ست الكل حقك
شيماء / ههههههههههههههههههههههههههه
...............
فى الشركه
مازن يدخل ماسك في ايد مرام وراه بخطوه ووراهم محمود بنت تقابلهم
البنت / صباح الخير يا مازن بيه البقاء لله
مازن / و نعم بالله انا عاوز نسخه من جميع الملفات اللى الشركه بتنفذها على مكتبي فى خلال ساعه بالكتير و اجتماع لكل المديرين المسؤلين عن المشاريع دى النهرده الساعه خمسه يقدموا تقرير شامل عن المشاريع و الشغل اللى تم فيها و عاوز كمان صوره من جميع المشارع اللى الشركه مقدمه فيها و اللى كانت بتدرسها عشان تقدم فيها كلو النهرده سامعه
البنت / تحت امرك يا فندم
مازن يدخل مكتب صفوت
محمود / انت متاكد اننا هنقدر نخلص كل ده النهرده
مازن / اتصل بسعد شوفه وصل الشركه و لا لسه
محمود / تمام حاضر
محمود يطلع بره مازن يروح يقعد على كنبه و عينه على المكتب مرام تروح تقعد جنبه و تمسك ايده يبصلها
مازن / تفتكرى هقدر املا مكانه
مرام / لا محتاج تزيد يجى خمستاشر عشرين كيلو كدا
مازن يدحك و يبص الناحيه التانيه
مرام / متقلقش انا معاك ديتها كام حله محشي على كام صينيه مكرونه بشاميل و هتبقي زى الفل
مازن / كنت بقعد ادايقه بالموضوع ده
مرام / بتهزر
مازن / على فكره خالو0 فسنى كان فورمه عنى كمان هو اللى انشغل بالشغل و قعده المكتب عشان كدا العضلات اتحولت لدهون لكن لو عالوزن غالبا ممكن ميكنش في فرق اصلا
مرام / عمرى مهنسي اول مره جيت هنا و قابلته محدش صدق ان ده خالك فاكر قلنالك  اخوك الكبير  يوميها طلب منى اساعدك قالى هحققلك اى حلم تتمنيه
مازن / يوميها شديت معاه ازاى يطلب منك كدا بس اكتشفت انها كانت فكره عبقريه منه و فضلت اتنطت لحد موصلتلها
مرام / لما شوفتك محتاس في المكتبه صعبت عليا اوى و اتحايلت على محمود يساعدك
مازن / استاهل يا مرام ؟لو رجع بيكي الزمن هتساعديني تاني هتديني فرصه تاني انى ادخل حياتك و اقرب منك
مرام / تصدقني لو قولتلك انى معنديش اي مانع اعيد كل اللحظات اللى مرت علينا بحلوها بمرها عشان في الاخر ابقي بتاعتك بتاعتك انت و بس
مازن / عمرك ما هتندمى ؟
مرام / ندمت خلاص ندمت على كل لحظه عدت من عمرى و انت مش فيها على كل ثانيه ضيعتها بحاول ابعدك عنى تعرف لو فعلا يرجع بيا الزمن عند اول مره اتقابلنا هعمل ايه
مازن / ايه
مرام / هاخدك من ايدك جرى عالماذون و نكتب الكتاب عشان اترمى فحضنك و نستغل كل الوقت اللى فات ده صح
مازن / لو عملتى ده يوم المشروع هاجى معاكى و انا مغمض لكن لو يوم العربيه بقي فدى هيبقي فيها كلام لانى مكنتش بحبك وقتها للاسف
مرام / تحبنى ... غصب عنك تحبنى هو بمزاجك و لا ايه
مازن / ههههههههههههه انا عارف قله ادب و سفاقه
مرام / ههههههههههههه
الباب يتفتح و زياد يدخل
زياد / صباح الهمه و النشاط ايه يا عم ده
مازن يقوم يحضن زياد و يقعد
زياد / ازيك يا مرام
مرام / تمام ازيك
زياد / ادخل الشركه الاقي الكل بيجرى يمين و شمال اسال يقولولى انك هنا لا و داخل جامد انت ايوه بقي هو ده سليل عيله منتصر
مازن / زفني يا زيزو زفني كمان
زياد / عقبال مزفك بجد و لا ايه يا عروسه ايه النظام لبني قالتلى انك نقلت محل اقامتك هناك فى ايه مالك
مازن / شريف كان تعبان و محتاجين حد ياخد باله منه لحد ميروح مرضاش يقول لاهله انت عارف مامته تعبانه و ممكن متستحملش
زياد / اه الف سلامه عليه هو عامل ايه دلوقت
مازن / روح الحمد لله
زياد / يعنى هترجع بيتك و لا ناوى على ايه الفيلا فضيت عليا و بقت كئيبه اوى من ساعه حوار حجاب لبنى دى بركاتك يا مريومه
مازن / و مرام مالها بالموضوع دا قرار لبنى و هى حره فيه المهم بس تقدر تكمل
زياد / لا من النحيادى اطمن اسبوع و لا اتنين بالكتير
مرام / ليه بتقول كدا يا زياد دا بدل متشجعها
زياد / طبعا بشجعها و روحت اشتريت لها الطرح بايدى و فتحتلها الكرد بتاعتها عشان تشترى كل الهدوم اللى محتاجاها و مش بس كدا بعدت عنها و سبتها ترجع تعيش مع مامتها تانى لحد مفتره حداد خالو تخلص و نكتب الكتاب و ترجعلى و حجزتلها كمان ففرنسا فسحه محصلتش عشان تغير جو
مرام / هى مش فرنسا باين بتمنع الحجاب
مازن / مش فكل حته
محمود يدخل و معاد سعد
محمود / سعد يا مازن
زياد / ازيك يا حوده نجيب حاجه حلوه بقى بمناسبه الجمع السعيد ده
مازن / هنجيب داحنا هنجيب غدى و عشا كمان احنا بايتين هنا النهرده
زياد / يا راجل دا الكلام اللى بيتقال تحت جد بقى انت جاى و ناويها بقى
مازن / اتاخرت كتير اوى يا زياد كان المفروض اجى من بدرى من بدرى اوى كمان
زياد / يا سيدى مش هتفرق المهم انك وصلت بالسلامه
البنت تدخل و شايله ملفات كتير ووراها واحد شايل ملفات تانيه يحطوها عالترابيزه قدام مازن
البنت / تؤمر باى حاجه تانيه يا مازن بيه
مازن / قهوه ... قهوه شباب ...خمسه قهوه مظبوط
البنت تبتسم و تطلع بره و كل واحد يسحب ملف يبص فيه
...................................
فى الشقه عند سميحه
مديحه / انا قولتلها مفيش الكلام ده لما تتخرج ايه هو الواد هيستنى ست سنين ليه ان شاء الله اخرها سنتين و تتجوز فى اجازه اخر السنه بتاعه تالته ثانوى
سميحه / يا بنتى من هنا لوقتها الظروف بتتغير مستعجله عالكلام ده ليه
مديحه / الله عشان يلحقوا يجهزوا نفسهم و يجهزوا البت ميجوش يقولولى اتزنقنا و متزنقناش
سميحه / ربنا يهديكى لنفسك يا مديحه هيقعدوا سنتين كاملين يجهزوا فى البت ليه هيجيبولها ايه
مديحه / الله بقى يا حجه هو انا اللى هقولك العروسه بتجيب ايه
سميحه / لا مقصدش بس يعنى سنتين اصلا فتره طويله و كمان المعلم اسعد ربنا يزيده يعنى مرتاح و مش هيغلب فى جهاز بنته يعنى
مديحه / يا حجه انا مبتكلمش عن الفلوس انا عينى مليانه الحمد لله انا بتكلم عن الوقت يقولولك امتحانات و مزاكره و ثانويه عامه و البت مش فاضيه تلف و البت عاوزه تنقى و الحاجات دى يعنى
سميحه / ااااااااااه لا فى دى عندك حق
مديحه / شوفتى بقى علاطول ظالمينى كدا
سميحه / حقك علينا
مديحه / متاخذينيش يا حجه هو مازن هيفضل هنا و لا هيمشى زى شريف كدا
سميحه / والله معرف و اكيد مش هساله فى الاول و الاخر دا بيته يقعد قد ميقعد و يمشى وقت مايمشى
مديحه / يا حجه والله ما قاصدى بس الناس بتتكلم
سميحه / نفضيلهم الناس موراهمش الا الكلام
مديحه / يا حجه مش كل شويه اقولك احنا محلتناش الا سمعتنا
سميحه / يا عينى يا مديحه لسه بدرى اوى عالكلام ده يا حبيبتى لا متسكتيش على نفسك قومى اللبسى نروح للدكتور
مديحه / دكتور دكتور ايه يا حجه كفا الله الشر انتى هتفولى عليا و لا ايه
سميحه / الله انتى مش نسيتى ان مرام كتبت الكتاب و علينا الجواب و مازن دلوقت جوزها على سنه الله و رسوله سمعه ايه بقى اللى بتتكلمى عنها
مديحه / يا حجه الكلام ده مش هنا كتب الكتاب هنا يعنى بدل مكانت المسافه بينهم طوبتين تبقى طوبه لكن ميبقاش خبط لزق يعنى امال بعد الفرح يعملوا ايه
سميحه / والله يا مديحه انا معارفه اقولك ايه اصلى عارفه دماغك و عزراكى و عزره الناس بس برده عزراه الواد معدلوش غيرنا فى البلد دى يا مديحه الواد امبارح حالته كانت تصعب عالكافر كبد امه يابنى اقولك ايه بس يحصل اللى يحصل المهم عندى الواد الناس مش هتنفعنى لما يعمل فى نفسه حاجه و لا يجراله حاجه
مديحه / تفى من بقك يا حجه بعد الشر عنه و عن السامعين
سميحه / اديكى قولتيها
مديحه / انا بقول يا حجه تتكلمى مع مرام و تعقليها قوليلها نعملها زفه عربيات و تروح بيت جوزها ملهاش لازمه يعنى الفرح و الزفه و الفشخره الكدابه دى و بفلوس الفرح ياخدها و يسافروا فى اى حته
سميحه / يارب يا تهديها يا تصبرنى انا تعبت يا مديحه يا ست الستات ارحمينى الواد خاله لسه مربعنش و ياخد مراته و يسافر شهر عسل انتى عاوزه الناس تاكل وشه ووشنا
مديحه / مهم كدا كدا واكلين يبقى نستر البت احسن
سميحه / قومى يا مديحه بصى عالحله غليت و لا لسه قومى بدل محطك انتى نفسك فى قلب الحله قومى
مديحه / الله يا حجه بالراحه مش باخد و بدى معاكى فى الكلام
سميحه / قومى يا مديحه
مديحه / قومت قومت
..............................
فى الشركه
مرام / كفايا يا محمود دا تالت فنجان قهوه تشربه
محمود / اعمل ايه الصداع هيفرتكنى
زياد / اجيبلك اسبرين
مرام / انت فطرت اصلا على كل القهوه دى
سعد / فطار ايه الساعه داخله على اربعه انا هموت مالجوع الصراحه و مكسوف اتكلم و كلكوا ساكتين يعنى
مازن / و ساكت ليه يا سعد بقولك يا محمود اطلبلنا غدى
محمود / عاوزين تاكلوا ايه
مازن / مش عارف اى حاجه نمشيها بيتزا ؟؟
مرام / بس متكترش احنا هنتغدى فى البيت
مازن / ماشى بيتزا يا حوده
محمود / لينا بس و لا
مازن / زى مكان خالو بيعمل يا محمود اطلب للكل
محمود /تمام
زياد / والله خالك ده الله يرحمه بقى هو الموظفين دول موظفين دول بهوات معاد الانصراف يعدى يبعت يجيب غدى للاوفر تايم يعنى اوفر تايم و كمان غدى
مازن / الله يرحمه كان دايما يقولك الموظف المرتاح بينتج و القرفان بيطلسق
محمود / اول واحد علمنى ان الاداره اهم من اى حاجه تانيه و فعلا كان مدير ناجح
زياد / و انت جربت غيره يعنى يا حوده عشان تحكم
محمود / كتير جربت كتير يا زيزو اصل انا بشتغل من يوم موعيت عالدنيا اشتغلت كاشير و مندوب مبيعات و حسابات و حاجات كتير اوى كل اجازه ليا كنت بشتغل حاجه شكل فى مكان شكل يعنى بجيب مصاريفى
زياد / اهو ده نوعيه الشباب اللى بحبها الراجل العصامى اللى بجد شابو يا حوده حقيقى شابو
محمود يبص لزياد من فوق لتحت و يقوم و هو مبتسم
................................
فى شقه توفيق
توفيق يفتح الباب يلاقى امه بتصلى تشوفه تقطع الصلاه و تقوم تقعد على اقرب كرسى
الست / ايه اللى جابك
توفيق / فى ايه ياما دا بيتنا
الست / والله توك ما افتكرت ان ليك بيت ان ليك ام ان ليك اخ هان عليك اخوك هان عليك عياله هنت انا عليك تقهرنى كدا
توفيق / جرا ايه ياما ليه الكلام ده انتى اكتر واحده عارفه ان مكنش قاصدى
الست / ايه هنكدب الكدبه و نصدقها و لا ايه دانت غازه بدل المره اتنين و تلاته قتلته و مستنتش حتى تطمن عليه قتلته و جريت كانه ... كانه
توفيق / يا ست الكل مهو اللى مكنش عاوز يسمع كان هيموتنى كنت بدافع عن نفسى مكلو كان قدامك
الست / اه كلو كان قدامى و ياريت انت بقى تفتكر ان كلو كان قدامى و انى شوفت كل حاجه شوفتك و انت بتنهش فى لحم اخوك ياما قولتلك نقى اى بت اى بت و سيب مرات اخوك فى حالها
توفيق / و نقيت و ايه اللى حصل
الست / روحت و طلبتهالك و رفضت و اتخطبت و اتجوزت انساها بقى انساها
توفيق / مش توفيق الحو اللى بت تقوله لا
الست / خدت بالى بس يا خساره سكت و قولت موقعش بين الاخوات موقعش بين الاخوات موقعش بين الاخوات اهو الاخوات موتوا بعض
توفيق / وطى صوتك ياما انتى هتفضحينا
الست / عيال اخوك قاطعين بيا اوى العيال مبيفصلوش عياط يا قلبى اعمل ايه اقولهم ايه
توفيق / البركه فيكى يا ست الكل انتى تربيهم و انا هصرف عليهم و هنعيشهم فى عيشه احسن من اللى كانوا عايشينها مع ابوهم و امهم مليون مره انا دلوقت راجل كسيب بجيب بدل الجنيه بتاع مجدى اخويا الله يرحمه ميه و بعدين احسبيها هتلاقيكى عملتى الصح
الست / قول والله عملت الصح !!!
توفيق / اه عملتى الصح لو كنتى قولتى الحقيقه كانوا عدمونى و ساعتها كنتى بدل متخسرى واحد هتخسرى الاتنين و بنت الكلب اللى اسمها اميره دى مكنتش هتستحمل الفقر كانت هتجرى على بيت اهلها و لا تتجوز و ساعتها حتى العيال اللى صعبانين عليكى جوه دول هتتحرمى منهم و تعيشى بطولك لا حد يديكى لقمه و لا حد يسال فيكى
الست / مانا عارفه انت لسه هتقولى امال انا عملت كدا ليه بس سبحان الله العيال فى حضنى و ابنى سليم قدامى زى الشحط اهو و برده مش مرتاحه
توفيق / و مين مرتاح دى دار شقاء ياما مش دار راحه الراحه فى الاخره بعيد عنك و عن السامعين
الست / اخره و احنا يعنى اخرتنا ايه مهى سوده زى خلقتك
توفيق / استغفر الله العظيم خلاص يا ست الكل نعمل لاخرتنا انا هنزل دلوقت على اقرب شركه سياحه احجزلك على اول رحله عمره تروحى تزورى بيت ربنا و تدعيلى ربنا يهدينى و يغفرلى و اهو نبقى عملنا حاجه لاخرتنا ايه رايك يام توفيق فى ابنك بقى شوفتى بقى انتى غاليه عندى قد ايه
الست / شوفت يا خويا شوفت
...................................