السكه شمال بقلم / لولو_محمد ( كامله )

الحلقه ٨٦

(((((((السكة شمال )))))))))
#لولو_محمد
الحلقه السادسه و الثمانون
مازن / لما تقوليلى بحبك الاول
مرام / انت بتخم
مازن / النهرده هتبقى مراتى هتقوليها
مرام / لا
مازن / ليه
مرام / عشان مش حساها
مازن / كدابه
مرام / لا مش كدابه
مازن/ سهل الكلام و انتى مش باصه فعنيا خلينا نعيد الحوار تانى لما نكتب الكتاب متاكد ان النتيجه هتختلف
مرام / الثقه المهوله دى جايبها منين
مازن / منك من ثقتك فيا انك هتتجوزينى انك هتكونى ملكى
مرام / مانت كمان هتكون ملكى
مازن / انا ملكك بقالى فتره طويله اوى يا مرام
مرام / انت هتيجى امتى
..................
مازن / وحشتك
مرام / لا
مازن / امال مستعجله على مجيتى ليه
مرام / عشان ودنى وجعتنى مالتليفون و انت مش هتبطل رغى لحد متيجى
مازن / سلامه ودنك
مازن يبعت بوسه فى التليفون
مازن / بوستها اهو خفت
مرام / ههههههههههههههههههههه لا التليفون سرقها
مازن / خلاص لما اجى هبقى اوصلها بنفسى
مرام / اقفل يا مازن و روح ناملك شويه و لا اعمل اى حاجه على متيجى
مازن / و انتى هتعملى ايه
مرام / هقوم احضر الفطار عشان جعانه اوى
مازن / متقليش لحسن الفستان ميخشش فيكى
مرام / انت جايبه محزق و لا ايه
مازن / لما يجى هتشوفيه سلام عشان ودنك
مرام / سلام
مازن يقوم يفتح الدولاب و يطلع منه صندوق كبير و يحطه عالسرير و يروح جنب شريف يصحيه بالراحه
مازن / شريف شريف اصحى
شريف / الله يحرق شريف عاليوم اللى اتولد فيه شريف عاوز انام يا ناس عاوز انام
مازن / اخر حاجه والله هطلبها منك
شريف / المره الكام اللى تقول فيها الكلمه دى هاه
مازن / اخر مره اعمل ده و روح نام فبيتكوا و تعلالنا هناك مع الماذون
شريف / اما نشوف اخرتها خير الباشا عاوز منى ايه
مازن / وصل الصندوق ده لمرام
شريف / و اروح
مازن / و روح
شريف / هقفل موبايلى
مازن / بس متتاخرش بالماذون
شريف / وسع
شريف يقوم يعدل هدومه اللى نام بيها و يلبس الجاكت و ياخد الصندوق
شريف / حاجه تانى
مازن / لا شكرا
شريف يمشى و مازن مبتسم
.................................
فى شقه مرام
مرام قاعده فى اوضتها بتفتح الصندوق يطلع فستان تايبست اوفوايت مطرز بالدهبى بكم و معاه كاب عالضهر منفصل مطرز عالكتاف و بروش من قدام عشان يفتح و يقفل
مرام / زوقك غريب
مرام تقوم تقيسه تلاقى الفستان يادوب على مقاسها بالظبط و مكسم عليها
مرام / على اساس انى هطلع كدا قدام الناس يعنى دا اكيد عبيط اصلا
سميحه تفتح الباب
سميحه / مرام انا هروح لعمتك عشان ... بسم الله تبارك الله ايه الجمال ده
مرام / حلو
سميحه / طالعه زى حوريه البحر دا اللى مازن بعته
مرام / اه بس ديق اوى مش كدا حاسه كانه متفصل على جسمى
سميحه / ههههههههههههههه فدى معاكى حق دا ميطلعش بيه بره اوضه النوم بس امال ايه ده
مرام / مش عارفه استنى كدا
مرام تلبس الكاب
سميحه / ههههههههههههههههه طب والله حلو و مغطى
مرام / حساه اوفر اوى
سميحه تبص فى الصندوق تلاقى طرحه دهبى و تاج رقيق جرس الباب يضرب
سميحه /دى تلاقيها عمتك بتستعجلنى عشان نلحق نعمل الاكل 
سميحه تقوم تفتح تلاقى صافى
صافى / هاى مرام موجوده
سميحه / اه يا بنتى جوه اقولها مين
صافى / انا صافى انا و هى نعرف بعض مازن طلب منى اجى
مرام تطلع مالاوضه
مرام / اهلا صافى
صافى تلفها
صافى / كلاسى زوق مازن ده صح
مرام / اه حساه اوفر شويه
صافى / هو اوفر شويه على مناسبه فى البيت بس مدام مازن اختاره يبقى ناوى على حاجه هههههههههههه بصى هو اتصل بيا و قالى اجيلك اساعدك عاوزك عروسه
سميحه / طب يا بنات انا هسيبكوا بقى و اروح اشوف اللى ورايا قبل الناس ما تيجى
مرام / اوك يا تيته ... تعالى يا صافى جوه
مرام تقفل الباب ورا سميحه و تدخل هى و صافى شايله شنطه عالاوضه
مرام /  هو انتى تعرفيه من زمان
صافى/ تلت او اربع سنين
مرام / و روحتى بقى ساعدتى كام واحده قبلى
صافى / ولا واحده انا اصلا مبروحش بيوت بس عشان خاطر مازن انتى اكسبشن بصى بقى الاول احنا هنعمل شعرك لفوق و هنزل خصل كدا على وشك من هنا و هنا مع شويه ورد خلينى اشوف معايا ايه
مرام / انا هبقى بالحجاب
صافى / بجد
مرام تطلع الطرحه مالبوكس
صافى / تمام بصى احنا هنعمل بفه قدام هنا و ننزل خصله
مرام / لا يا صافى بصى خليكى فالمكياج بس
صافى / ايه ده دا فرحك ليله فى العمر بس انا مش فاهمه انتوا ليه عاملينه عالديق كدا ليه مازن ماخدش قاعه كبيره مش كان احسن
مرام / هههههههههههههههه اصله مش فرح بصى هو المفروض يعنى انه هيجى يقعد مع اهلى لو اتفقوا هنكتب الكتاب كدا يعنى
صافى / اها فهمت بصى يا ستى انا هعملك مايكاب خفيف كدا ناتشيورال زى المره اللى فاتت هيليق عليكى بما اننا فالبيت يعنى و طرحه عاديه صح
مرام / حلو الاول تشربى ايه
صافى / اشرب ايه فى ايه انا لازم اخلص بسرعه قبل مازن ميجى
مرام / يعنى مش هتحضرى دانا ازعل
صافى / اقولك ايه بس انا بحاول محتكش بشلته بجد ايوووو
مرام / انا معرفش اصلا انهم جايين
صافى / بصراحه الله يعينك انتى بتتعاملى معاهم ازاى
مرام تبتسم و تسكت
صافى / بس الحق يتقال مازن مختلف عنهم خالص انما هما دول مرضى يا بنتى لو عاوزه نصيحتى ابعدى عنهم على قد متقدرى
مرام / بحاول بس انتى بتتكلمى كانك عن تجربه يعنى
صافى/ هى تجربه واحده لا كتير لما بيحطوا حد فى دماغهم الله يعينه بقى
مرام / تحبى تحكى
صافى / ههههههههههههههههههه النهرده فرح خلينا ننبسط احسن و لا ايه
مرام / اوك بس بشرط
صافى / ايه
مرام / تخليكى معايا انا عشان خاطرى و عشان خاطر مازن
صافى / انا و لبنى فمكان واحد يعنى
مرام / صدقينى مش اسوء منى انا و هى فمكان واحد بس انتى ضيفتى انا و فبيتى انا
صافى / اوك عشان خاطرك انتى بس دلوقت بقى تسلميلى نفسك و انا هطلعك و لا حوريات الجنه
مرام تبتسم
...........................
فى الشقه عند مديحه
سميحه / انتى كلمتى المعلم عالدبيحه
مديحه / اه محمود اتكلم معاه و قاله يشوفلنا دبيحه حلوه نعملها و ناكل الناس بمناسبه خطوبته على مروه
سميحه / ليه كدا يا مديحه دا اللى اتفقنا عليه مش قولنا بمناسبه سلامته
مديحه / الله امال يعنى هيخطب البت كوتيمى
سميحه / لا يا مديحه هنعمله ليله كبيره هو احنا عندنا كام محمود و مش هتكون اقل من ليله مرام كمان
مديحه / و لزمتها ايه المصاريف
سميحه / عملتى ايه فى اللى قولتلك عليه
مديحه / شغاله من ساعه مقولتيلى على يدك اهو
جرس الباب يضرب
مديحه / تلاقيه الواد محمود جايب الطلبات
مديحه تفتح تلاقى شاب
شاب / لو سمحت كنا عاوزين نعلق النور فى البلكونه
مديحه / نور ايه
الشاب / بتاع الفراشه
مديحه تبص لسميحه و تخلى الشاب يدخل البلكونه و يطلعوا وراه يلاقوا الشارع بيتفرش و فى مجموعه شباب كتير واقفين بيظبطوا كل حاجه و بيبنوا مسرح و نور
سميحه / هو فى ايه يابنى
الشاب / مازن بيه بعتنا عشان نجهز لكتب الكتاب
مديحه / هههههههههههههههه و ماله حد يلاقى دلع و ميدلعش
مروه تدخل
مروه / صباح الخير يا ماما
مديحه / اهلا اهلا بست العرايس
مروه / استاذنت ماما اجى اساعدك يمكن تكونى محتاجه لحاجه و بتقول لحضرتك انها هتخلص الغدى و تيجى تساعدكوا
سميحه / يا حبيبتى ملوش لزوم تتعبى نفسك انتى و لا ماما اقولك روحى اقعدى مع مرام و صحبتها
مروه / اوك عم اذنكوا
مديحه / ولاد اصول اوى
سميحه / ربنا يهنيهم ببعض
...........................
فى الحاره
محمود داخل و شايل حاجات كتير اوى يلاقى شغل بيتعمل فى الحاره اسعد يناديلو
اسعد / اهلا بالاستاذ فينك مالصبح
محمود / كنت بشترى شويه حاجات للبيت خير يا معلم هو فى ايه
اسعد / ههههههههههههه انت اللى بتسال دانا كنت فاكرك بتشترى طلبات لليله عالعموم متقلقش مازن كلمنى و قالى ابلغكوا متتعبوش نفسكوا هو مجهز كل حاجه
محمود / انا مش فاهم حاجه
اسعد / الله هو مش النهرده كتب كتاب مازن و مرام
محمود / عن اذنك يا معلم
محمود ياخد الحاجه و يطلع يخبط فبتاع الفراشه و هو نازل يعديه و يطلع يدخل شقته يلاقى سميحه بتتكلم فى التليفون
سميحه / طب و الاكل اللى عملناه .... خلاص ماشى ... بتجهز جوه هى و صاحبتها اللى جت ... صافى اه .... تيجى بالسلامه مع السلامه
سميحه تقفل و تبص لمحمود و هى مبتسمه
سميحه / حمد الله عالسلامه اتاخرت كدا ليه
محمود / هو فى ايه هو انا هفضل اخر من يعلم كدا كتير و لا هو المشكله فيا و لا ايه الموضوع
سميحه / والله يابنى انا خلاص فوضت امرى فيهم لله كل حاجه امر واقع و مفاجاه خلاص اللى تشفوه اصلا الموضوع من اوله سبحان الله بيمشى منغير لا تدابير و لا توافيق
محمود / كدا و ماله ربنا يهنيهم ادخل دول فين
سميحه / دخلهم لامك جوه خليها تعينهم فى الفريزر خلاص ملوش لزوم مازن هيبعت اكل جاهز للضيوف
محمود / و مين الضيوف دول كمان
سميحه / و الله معرف مانا بقولك بقيت محطش فدماغى انا هروح اشوف هلبس ايه زمانهم جايين بقولك ايه اللبس البدله بتاعتك الحلوه دى عشان ياخدولك صورتين مع عروستك
.............................
فى شقه مرام
مروه / الله حلوه اوى .... ممكن تعمليلى زيها
مرام تبص لنفسها فى المرايا
صافى / اكيد بس مش هتلبسى الاول
مروه / هروح اللبس و اجى هوا
مروه تجرى
صافى / عسوله اوى
مرام / تسلم ايدك يا صافى بجد فنانه
صافى / انتى اصلا حلوه و مش محتاجه حاجه
مرام تبتسم بخجل سميحه تدخل
سميحه / بسم الله تبارك الله ايه الجمال ده حبيبه قلبى
سميحه تدمع
مرام / فى ايه يا تيته امال لو كانت دخله بقى هو فى ايه بره صحيح
سميحه / انتى يعنى مش عارفه مازن قالب الدنيا تحت
مرام / هو جه
سميحه / لا بس بعت ناس كتير اوى و قالبين الحاره
صافى / على فكره الشله كلها معزومه الكرو كله جاى هو انا ممكن ادخل الحمام اللبس انا بقى
مرام / و ليه تدخلى الحمام متخليكى هنا خدى راحتك و انا هطلع بره لما تخلصى ناديلى
صافى / ميرسى
مرام و سميحه يطلعوا و يقفلوا الباب
سميحه / انا هدخل اقفل المطبخ عشان ميبقاش ورايا حاجه و انتى اقعدى هنا كدا يا احلى قمرايا فى الدنيا
مرام تقعد بالفستان و محمود بيطلع مالاوضه بتاعته بيحاول يظبط الجرافاته و هو فمنتهى العصبيه يبص بعينه يلاقى مرام سرحانه فى الموبايل يروح عندها و يتنح فيها تقوم تقف و تبتسم
محمود / انتى حلوه اوى
مرام / بجد عجبك
محمود يقرب اكتر مرام تعدله الجرافاته و هو مسهم فيها
مرام / خلصت
محمود ينتبه و يبص على جرافاتته معدوله
محمود / اه شكرا
مرام / الجو ده كلو جديد عليا مش عارفه افرح و لا اتخض و لا ايه
محمود يبتسم
مرام / تفتكر حفظ
محمود / اتمنى عشان كل ده ميروحش عالارض و لا هيصعب عليكى الليله تبوظ و تعديهاله
مرام / ليه بتقول كدا
محمود / يعنى فكرى فيها فستانك و مكياجك و الناس و الليله دى كلها و ميعرفش يسمع فى الاخر هتعملى ايه
مروه تدخل لابسه فستان سواريه احمر مطرز دهبى و طرحه دهبى و شبكتها
مروه / السلام عليكم
محمود / ازيك
مروه / الحمد لله حلوه البدله اوى عليك
محمود / و انتى كمان حلوه فى الفستان
مرام / متنزل تكلم المعلم تكتبوا الكتاب انتوا كمان
محمود / هاه ؟؟
مروه / امال صافى فين
الباب يتفتح و صافى تطلع لابسه فستان فيروزى اوفشولدر
محمود / انا اسف عن اذنكوا
محمود يمشى
صافى / هو فى ايه
مرام / هههههههههه تلاقيه افتكر انك طلعتى منغير حجاب و لا حاجه
مروه / هو انتى هتلبسى الفستان ده منغير بدى
صافى / ههههههههههههههههه ايه وحش
مروه / انا بقول نطلب البوليس من دلوقت يامن المكان دول هياكلوكى يا بنتى هو احنا فالتجمع هنا و لا فشرم
مرام / مروه
صافى / هههههههههههههه سبيها انا واخده على رده الفعل دى المهم بقى دلوقت انى ازوقك و اطلعك احلى عروسه انتى كمان
مرام / اللى كان واقف هنا ده عريسها عاوزينه يتجنن عليها
صافى / بس كدا داحنا هنهبله تعالى
مرام و صافى و مروه يدخلوا صافى بتشتغل فى مروه و مرام بتلعب فى الموبايل
مرام / معقول ياربى عليك
مروه / فى ايه
مرام / مازن كتب على جروب الدفعه ان النهرده كتب الكتاب و الدعوه عامه
صافى / لا دا العادى من مازن اصلا هو تقريبا نزل فى كل حته بقولك الكل جاى و الكل بيجهز من الصبح انا اصلا هخلص مروه و ابتدى فشعرى و المايكب بتاعى
مرام / ربنا يستر بقى
.................................
فى الحاره عالناصيه كل حاجه جاهزه كميه عربيات تركن تسد الحاره و ينزل مازن لابس بدله سودا و جرافات دهبى و يعدل شعره  و صفوت و شريف و اخواته و مامته و ناس كتير اوى
صفوت / جاهز
مازن / ناو اور نيفر يلا بينا
الكل يتحرك ورا مازن و الكل بيحضن مازن و يبوسه و يزراغطوا لحد ممازن بمعاناه اخيرا يوصل للبيت و يطلع يدخل يقابل محمود لابس البدله وواقف فوشه يسلم عليه ببرود يبتسمله و يدخل يسلم على سميحه و صفوت وراه
سميحه / اهلا اهلا نورتونا اتفضلوا
المعلم اسعد يدخل
مازن / ازيك يا تيته
شريف يدخل ووراه اخواته
مازن / امال مرام فين
مديحه / جوه فاوضتها مع البنات
شريف / اخواتى يا تيته
سميحه / اهلا اهلا اهلا
شريف / ماما
سميحه / دلوقت عرفت اخواتك طالعين حلوين لمين
الست / الف الف مبروك
مديحه / انا بقول الرجاله تيجى عندنا فى الشقه هناك و نسيب البنات هنا مع بعض لحد منخلص كل حاجه
اسعد / اتفضلوا عشان الزحمه اتفضلوا
الكل يمشى و مازن واقف قدام سميحه
مازن / هى فين
سميحه / جوه جاهز
مازن / ايوه
سميحه / طب يلا
سميحه تاخد مازن و يروحوا هناك
...........................
فى اوضه مرام
صافى قاعده عماله تحط رتوش اخيره فوشوش كل البنات و الشقه مليانه بنات على اخرها اريج تدخل مرام تتفاجئ هى و اخوات شريف
اريج / ازيك يا مرام تانى مره متعزمنيش بس برده جيت
مرام / اهلا
اريج / ازيكوا
اخوات شريف يبصوا الناحيه التانيه و مروه و الباقيين يسلموا عليه و صوت رغى كلو بيتكلم مع كلو مرام تروح تقف فى جنب شيماء تروح جنبها
شيماء / متوتره
مرام تبتسم
شيماء / اخويا بيقولى انه حافظ كويس و انه سمعهاله
مرام تهز راسها بابتسامه
شيماء / عجبنى مهرك هطلبه من عريسى انا كمان شريف بيقول ان ده اغلى مهر شافه فحياته
مرام تبتسم
شيماء / انا فرحنالك اوى
مرام / عقبالك
لبنى تدخل
لبنى/ قالولى البنات هنا هاى
صمت و تجهم ثوانى و تبادل نظرات من فوق لتحت متبادله بين صافى و مرام و لبنى
مرام / نورتى اتفضلى
لبنى / مبروك
مرام / الله يبارك فيكى عقبالك
لبنى / حلو فستانك زهير مراد ؟؟
مرام / معرفش
لبنى / اكيد متعرفيش حلو الجو عجبنى تجديد برده القاعات الفخمه و الحاجات الكلاسى بقت ممله اوى
مرام / نورتى
لبنى / عارفه
صوت زغاريط من الشقه التانيه البنات كلهم يجروا على مرام و هى مبتسمه اوى و سميحه تيجى هى و مديحه
سميحه / مبروك يا مرام
.................................