السكه شمال بقلم / لولو_محمد ( كامله )

الحلقه ١٥٧

(((((((السكة شمال ))))))
#لولو_محمد
الحلقه 157
شريف / لا ملوش لازمه اهو حتى لو طلعت فوقت مش مناسب منبقاش احنا الاتنين رخمين
محمود / ههههههههههههههههههه ربنا يستر
شريف / قول يارب
شريف ينزل مالعربيه يروح يفتح باب الاسانسير يلاقى مرام قاعده بتعيط جواه تشوفه تضم رجليها فحضنها و تدارى وشها منه شريف يجرى يقعد جنبها
شريف / مرام انتى كويسه
مرام / انا عمرى مهسامحك ليه تعمل معايا كدا
شريف / انا اسف انا كنت فاكر هتقدرى تعقليه مرام انا .. انا اسف اوى
...........................
مرام تحاول تقوم و تتسند على جدران الاسانسير شريف يمدلها ايدها تزقه و تدوس على نفسها و تمشى و هى بتعرج لحد متطلع مالعماره و شريف وراها بالظبط محمود يشوفها ينزل مالعربيه
محمود / مالك يا مرام فى ايه
مرام / رجلى اتلوت انا كويسه مفيش حاجه
محمود / امال مازن فين
شريف / خدها المستشفى يا محمود خلى حد يبص على رجلها و انا هحصلكوا
محمود / تمام ماشى
مرام تركب فى العربيه و محمود يروح يسوق و يمشوا و شريف واقف يبص فوق مفيش حد البواب يطلع
خليفه / صباح الخير يا شريف بيه
شريف / صباح النور يا حج خليفه
خليفه / حج من بقك لباب السما  المهم هو العمال هيجوا يصلحوا البوابه و السور امتى و لا هتسيبوهم كدا و لا ايه
شريف / قريب قريب ان شاء الله عن اذنك
شريف يركب الاسانسير و يطلع فوق تانى و يفتح باب الشقه بالمفتاح مازن يمسح دموعه و يقف
مازن / انهى حيوان انت
شريف / انت عملت فيها ايه
مازن / هى عامله ايه
شريف / انا سالتك سؤال رد عملت فيها ايه ضربتها زقتها عملت فيها ايه انطق
مازن / اكيد لا طبعا هى رجليها لسه بتوجعها
شريف / انا كنت طالعلك لقيتها قاعده بتعيط فى الاسانسير مش قادره تقف جالك قلب ازاى دى جايه مالعنايه على هنا هانت عليك مترد يا بجم ساكت ليه
صوت شريف يعلا و مازن يزعق فيه هو كمان
مازن / مين اللى جابها مش انت مين اللى كان عارف انا ناوى على ايه مش انت جبتها ليه خرجتها مالمستشفى و جبتهالى ليه
شريف / كنت فاكرك بنى ادم كنت فاكرك بتحس
صمت ثوانى و نبره انكسار فى صوت مازن
مازن / لا مبحسش ارتاحت مبحسش
مازن يسيبه و يروح يقعد عالكرسى
شريف / بتعرج ليه مالها رجلها
مازن / رجلها اتلوت
شريف / سبتها تنزل لوحدها و انت عارف ان رجليها بتوجعها
مازن / خدوها المستشفى
شريف / لا حنين لا حنين اوى يا مازن بيه
شريف يطلع من ميداليته ميداليه صغيره و يرميها تحت رجلين مازن
شريف / دى مفاتيح الشغل الشركه و الخزنه و الشقه هنا
مازن يقوم يقف شريف يبصله و يمشى و يرزع الباب وراه
.........................
فى المستشفى
مرام مسهمه و الدكتوره بتربطلها رجلها برباط ضاغط
الدكتوره / الموضوع بسيط خالص ميستاهلش التوتر اللى انت فيه ده هههههههههههههههههههه
محمود / ربنا يطمنك اصلها عروسه يعنى و كدا مش عاوزينها تعرج فى الفرح
مرام تبص لمحمود
الدكتوره / بجد الف مبروك اهم حاجه الراحه حاولى متدوسيش عليها و تريحيها و ان شاء الله اسبوع بالكتير و فكى الرباط هتلاقيها بقت كويسه ... عن اذنكوا
الدكتوره تمشى محمود يحاول يسند مرام
محمود / احسن دلوقت
مرام تهز راسها
محمود / هو انتى قفشتى مع مازن هو منزلش معاكى ليه حتى متصلش يطمن عليكى و لا حتى شريف اتصل يسال احنا فين هو فى حاجه حصلت
مرام / عاوزه اروح يا محمود لو سمحت ممكن
محمود / طبعا حاضر تعالى
مرام تسند بايدها على دراع محمود و تمشى بالراحه جنبه
...............................
فى شقه شريف
شريف يدخل على اوضته من غير ميسلم على حد و يرمى نفسه عالسرير بهدومه امه تدخل تجرى وراه
الست / احضرلك لقمه تاكلها يا حبيبى
شريف / عاوز انام
الست / الله يعينك يابنى تمام نام و ارتاح و لما تصحى هسخنلك تاكل عملالك رز معمر و بطاطس بالفراخ
شريف مبيردش تغطيه و تطفى النور و تطلع بره و تقفل الباب تقابل شيماء
شيماء / هو ماله
الست / تعبان يا حبه عينى مانتى شايفه الفتره اللى فاتت كان عامل ازاى من المستشفى دى لدى للمطار للفيلا للشركه هلكوك يا ضنايا
شيماء / لا انا حاسه ان فى حاجه تانيه
الست / بقولك ايه نبهى على اخواتك و خصوصا المقروضه تقى مفيش صوت قدام باب اوضته خلوه يرتاح محدش عارف هيكلموه ينزل امتى تانى
شيماء / من غير وصايه طبعا حاضر
...................................
فى فيلا زياد
لبنى عامله نفسها نايمه و زياد ممدد جنبها فى السرير و عينه عليها
زياد / لو مش جايلك نوم قومى اقعدى معايا شويه
لبنى / مكنتش مصدقه ان الراجل القتم ده هيوحشنى اوى كدا
زياد / على ايه يعنى الله يرحم اما كنتى بتنامى و تقومى تدعى عليه ربنا ياخده
لبنى / يمكن ده اللى محسسنى بالذنب ناحيته
زياد / ايه الهبل ده لا طبعا و انتى مالك يعنى
لبنى / انت بتحبنى بجد يا زياد
زياد ياخد لبنى فى حضنه
زياد / بحبك لدرجه المرض تعرفى يا لبنى انا بحبك من زمان اوى من و احنا عيال فى المدرسه مكنتش برضى اللعب مع نورا عشان مكنتيش بتحبيها
لبنى / بس انا بحب نورا
زياد / امال ليه كنتى بتكبى العصير فشنطتها و تبوظيلها الكتب فى الفسحه
لبنى / انت عارف ان انا اللى كنت بعمل كدا
زياد / طبعا عارف امال انتى ليه عمرك متمسكتى عشان كنت دايما بنضف وراكى
لبنى / انا وحشه اوى
زياد / انتى اجمل بنت على وش الدنيا دى اول مره جيتى و قولتيلى انك معجبه بيا كنت حاسس انى اتولدت من جديد انا عشت سنين طويله ماشى وراكى و بحلم بس تبصيلى مكنش عندى الجراه انى اكلمك احلى بنت فى المدرسه اشيك بنت و ارق بنت الكل هيموت عليكى كنت خايف تحرجينى فعمرى مقولتلك
لبنى / الحب ده حاجه وحشه اوى ياريت مكنش يبقى فى حاجه اسمها حب
زياد / الحب ده احلى حاجه فى الكون الحب ده هو السبب الوحيد اللى بيحركنا بنصحى الصبح عشان بنحب و بنشتغل عشان بنحب حتى القتل فى ناس كتير بتقتل عشان بتحب ياما حروب قامت بسبب الحب كل حاجه فى الدنيا دى بتحصل بسبب الحب منغير حب مفيش حياه نتحول لذونبى بناكل فى بعض
لبنى / طب ماحنا بناكل فى بعض يا زياد كلنا بناكل فى بعض محدش فينا عدل كلنا زباله انا زباله انت عارف انا بكره مرام ليه عشان انا لما بشوفها بشوف نفسى شمال واحده رخيصه و فاشله بشوف نفسى قليله اوى جنبها
زياد / معندهاش اى حاجه تخليكى تغيرى منها
لبنى / عندها كل حاجه عندها مازن اقصد يعنى مازن مش هيخليها محتاجه اى حاجه
زياد / مازن هيطلقها الموضوع انتهى هترجع للفقر اللى كانت فيه و دلوقت هترجع مطلقه و اكيد كمان قلبها اتكسر و مناخيرها كمان و لو لسه مديقاكى قولى و انا انسفها نسف
لبنى / بطل بقى بطل مازن مش هيطلق مرام
زياد / مازن اكدلى حتى كان ناوى يوكل شريف و فعلا كلم المحامى يعمله التوكيل
لبنى / و موكلكش انت ليه
زياد / انا مطلبتش
لبنى / و شريف طلب انت ازاى تسكت على حاجه زى دى ازاى تسمحله يعمل لتوكيل لشريف و ميعملكش بيثق فى شريف اكتر منك
زياد / لبنى اهدى و فيها ايه 
لبنى / فيها ان العيل التافه ده ممكن يحول لنفسه ..
زياد / لا لا دا بس توكيل عشان يطلقها مش توكيل عام و لا حاجه و بعدين شريف عمره مهيسرق مازن شريف نضيف و احنا عارفينه من زمان
لبنى / فى الزمن ده متخافش غير ماللى عاملين نفسهم ملايكه
زياد / متخافيش دا توكيل بس عشان يقدر يطقها متخافيش
لبنى / انا مصدعه هقوم اخد دوش يمكن افوق
زياد / دى فكره حلوه جدا قومى كدا و روقى الحزن مش لايق عليكى انتى اللى زيك اتخلقت بس عشان تدلع
لبنى تبصله بحزن و تقوم تدخل الحمام
...............................
فى شقه سميحه
مديحه / يلااااااهوى يعنى ايه بعد كل ده هنقول للناس ايه
محمود / بس يا ماما ايه اللى بتعمليه ده
مديحه / مرام حبيبتى قوليلى لو كنتى قولتيله حاجه كدا و لا كدا قوليلى نلحق نصلح الموضوع قبل ميكبر الناس مش هترحمك انتى روحتى عشتى معاه كتير فى الفيلا هناك محدش هيصدق انك لسه
سميحه / متسكتى بقى يا مديحه فى ايه احنا فى ايه و لا فى ايه
مديحه / ايه ؟؟؟ الحق عليا يا حجه انى خايفه عليها
سميحه / البت هتموت قدامك ارحميها فيها اللى مكفيها اسكتى اسكتى قومى يا مرام جوه قومى يا حبيبتى ارتاحى و انا هسخنلك الاكل تاكليلك لقمه
سميحه تحرك مرام اللى قاعده منغير روح و عنيها مليانه دموع و الحزن ماللى ملامحها تقوم معاها كانها متنومه مغناطيسى و تدخل جوه سميحه تنيمها فى السرير و تقفل الباب و تقلعها طرحتها
سميحه / سيبك انتى من كلام عمتك انتى لسه هتعرفيها النهرده هى طيبه بس هبله مبتعرفش بتقول ايه و بعدين لعلمك بقى مازن هيرجع الواد بيحبك بيموت فيكى مش هيقدر على بعدك و هتشوفى هتلاقيه بيخبط عالباب عشان يصالحك مش هتهونى عليه اسالينى انا
مرام / متعشمنيش يا تيته بامل كداب متخلينيش اعيش فالوهم عشان هو مش هيجى مازن مش هيجى تعرفى يا تيته انا فضلت واقفه قدام الباب كنت متخيله انه هيفتح الباب و يطلع يجرى ورايا يمنعنى مش ههون عليه بس مفتحش مفرقتش معاه سابنى امشى تعرفى مفرحش حتى لما شافنى اصلا بالعكس ادايق تعرفى يا تيته لما كنت فى الاسانسير فضلت مستنياه هو يفتح الباب كان نفسى يفتح الباب كنت بديله وقت يجرى ورايا و بمنعنى امشى تليفونى اهو متصلش حتى يطمن عليا و يشوف رجلى سليمه و لا لا انا تعبانه اوى يا تيته تعبانه و مش قادره اتخيل ان مازن ممكن يسيبنى بالبساطه دى مش بعد كل اللى عشناه سوا مش بعد كل الحاجات اللى مرينا بيها سوا كل وعوده كل كلامه ازاى يعمل كدا ازاى قدر يعمل كدا يا تيته ازاى ازاى
مرام تترمى فى حضن سميحه و تعيط
سميحه / تعبان هو تعبان دلوقت لسه مفاقش من صدمه خاله انتى عارفه هو اللى ليه فى الدنيا من اول مره شوفته و قولتلك دا واد غلبان فاكره تعرفى لو مكنش غلبان كان اترمى فى حضنك و عيط بس هو من غلبه ميعرفش راحته فين ميعرفش انه مش هيقدر يعيش من غيرك هيرجع هتلاقيه بيخبط عالباب و يرجع
مرام / فوقى بقى يا تيته حرام عليكى فوقى الوحيد اللى هيخبط عالباب هو المحضر اللى جايبلى ورقه طلاقى مازن مش هيجى يا تيته مش هيجى مازن هيصفى كل حاجه له هنا و هيسافر مش هيبقى فى مازن تانى مش هيبقى موجود لو احتجتله مش هلاقيه لما يوحشنى مش هلاقيه متكدبيش عليا انا مش صغيره مازن مش هيرجع مش هيرجع يا تيته
سميحه / بس خلاص يا قلبى خلاص اهدى
مرام / مازن سابنى بعد كل ده سابنى
سميحه / طب اهدى اهدى يا حبيبتى اهدى كل حاجه هتتصلح
مرام / هو كان كل حاجه يا تيته هو كل حاجه و هو سابنى خلاص
سميحه / بس انا لسه معاكى انا جنبك و مش هسيبك انا محتاجاكى اوعى تسبينى انا مش هستحمل يجرالك حاجه لما كنتى فى المستشفى انا كنت بموت لو كان جرالك حاجه مكنتش هعيش لحظه بعدك
مرام / بعد الشر عنك يا تيته
سميحه / لا مش شر عشتى من غيرك فى الدنيا دى هى اللى شر دموعك اللى بتنزل من عنيكى دى هى اللى شر قهرتك دى و انا مفيش فى ايدى حاجه اعملها هى اللى شر الموت جنبها الخير بعينه ... لا استنى انا فى فى ايدى حاجه اعملها حاجات انا مش هسكت مش هسمحله انا هكلمه و ان مردش هروحله
مرام / لا يا تيته بالله عليكى متعملى كدا لو ليا خاطر عندك متعمليش كدا متذلينيش اكتر من كدا بالله عليكى اوعدينى اوعدينى انك عمرك مهتعملى كدا اوعدينى
سميحه / بس انتى
مرام / انا هبقى كويسه اوعدك هبقى كويسه بس ارجوكى ابوس ايدك متعمليش كدا متكلميهوش و لا تروحيله ارجوكى خلى لينا و لو شويه كرامه نقدر نعيش بيها بعد كدا عشان خاطرى
سميحه تعيط و تمسح دموعها و تروح تمسح دموع مرام
سميحه / هعملك لقمه تاكليها انتى تعبانه و لسه خارجه مالمستشفى انتى لازم تقومى على رجلك فى اسرع وقت احنا مبنتكسرش يا مرام سامعه مبنتكسرش
مرام تهز راسها فى حزن سميحه تقوم تروح ناحيه الباب و تبصلها و تبتسم بحزن و تفتح الباب و تطلع بره تلاقى محمود لسه قاعد و مديحه مشيت تقفل الباب تانى
محمود / اكيد ابوه اجبره اكيد ضغطو عليه بحاجه مهو مش بعد كل ده
سميحه تطبطب على محمود و تدخل المطبخ يدخل وراها
محمود / انا كنت هبوس الايادى و الرجول انه يخرج من حياتنا بس مش دلوقت دول كان زمانهم متجوزين و بيتفسحوا فى اى حته دلوقت ايه اللى جد
سميحه/ روح ارتاح يا محمود انت بقالك كتير الفتره اللى فاتت مهلوك روح ارتاح
محمود / و انهى راحه دى بس اللى هشوفها دى يا تيته انا مش فاهم حاجه
سميحه / كلو فالاول و الاخر نصيب و كلو بايد ربنا و ربنا هيعمل اللى فيه الخير خليك واثق فده دلوقت روح ارتاح و لا شوف وراك ايه اعمله و احنا لو عزنا حاجه هنكلمك و ابقى راضى امك بكلمتين عشان متزعلش منى و لا انا هبقى اراضيها بعدين لما افوق
محمود يهز راسه و يمشى و سميحه تسند عالرخامه و هى على اخرها مش قادره تقف
.............................
فى شقه شريف
باب اوضه شريف يخبط و شيماء تفتح الباب بالراحه و تدخل تلاقيه نايم تطبطب عليه
شيماء / شريف ... شريف
شريف يفتح و يبصلها
شيماء / صافى عالتليفون اتصلت بيا لما لقت موبايلك مقفول اقولها ايه
شريف ياخد منها التليفون و يشاورلها تطلع بره
شريف / الو
صافى / كدا يا شريف هو ده اللى وصيتك عليه كلكوا موبايلاتكوا مقفوله مش عارفه اوصل لا ليك و لا لمازن و لا لمرام و سايبينى قاعده هنا بتجنن
شريف / انتى عامله ايه
صافى / سيبك منى طمنى عليكوا عاملين ايه انت عامل ايه صوتك ماله فى ايه
شريف / انا كويس انا لسه صاحى مالنوم بس
صافى / متكدبش عليا يا شريف فى ايه مرام جرالها حاجه انت قولتلى انها اتحسنت و هتتنقل اوضه عاديه فى ايه متجننيش بقى
شريف / فاكره الحاله اللى جت لمرام فى السخنه لما كانت عاوزه تطلق
صافى / اه ايه جتلها تانى و لا ايه
شريف / لا المرادى جت لمازن
صافى / هههههههههههههه لا قول كلام غير دا مازن عاوز يسيب مرام ؟؟ لا والله حلوه النكته دى
شريف / الموضوع بجد مش هزار المشكله انى افتكرت لما تكون مرام قدامه هيفكه مالهبل ده و ياخدها فى حضنه و نقيم الافراح و الليالى الملاح
صافى / لا متقولش
شريف / انا خلتهم يكتبولها خروج مالمستشفى و خدتهاله بايدى يا صافى بتقولى عمرها مهتسامحنى
صافى / للدرجادى ؟؟ ازاى مازن يعمل كدا دا اكيد اتجنن
شريف / هيصفى كل شغله فى مصر بيقولى قال ايه هيسبلى مبلغ مكافاه الخدمه ابدء بيه حياتى ادتله مفاتيح الشغل و قولتله يخليهوله
صافى / انا اكيد مش مستغربه ان مازن يدخل فى حاله اكتئاب شديده بعد خالو صفوت الله يرحمه بس بعد مخرجك انت و مرام من حياته اتبقاله مين هيعدى المرحله دى ازاى دا بيقضى على نفسه رسمى
شريف / اعمله ايه يعنى انا اصلا مش طايقه تصدقى و تؤمنى بايه
صافى / لا اله الا الله
شريف / انا قاعد هنا هتجنن على مرام اعرف حصلها ايه و مليش عين اكلمها و خايف افتح موبايلى يقولولى حصلها حاجه اشيل ذنبها العمر كله
صافى / طب معاك رقم تيته او محمود او اى حد اكلمه اطمن عليها انا تليفونها مقفول و بعد كلامك ده قلقت عليها اوى
شريف / معايا ارقامهم كلهم
صافى / طب ابعتهولى اكلمها
شريف / تمام هفتح موبايلى عليه التمر و هبعتلك واتس
صافى / تمام سلام
شريف يقفل و يروح يجيب موبايله و يفتح الموبايل بتاعه اول ميفتح يرن يكنسل و يدور فى النمر يرن تانى يرد
شريف / خير
راجل / عندى ليك اخبار معرفش تهمك و لا لا
شريف / بخصوص ايه .. استنى انا اصلا سبت ....
راجل / بخصوص احمد الدهبى
شريف / قول
راجل / النهرده اشترى شركه من واحده اسمها جميله عبد العزيز عماره
شريف / الله يرحقه مش هنخلص منه طبعا حقه بعد موت صفوت بيه له حق يرجع السوق
راجل / الموضوع مش بس كدا الشركه دى حضرتك انا كنت بخلص تراخيصها بنفسى بناء على اوامر صفوت باشا الله يرحمه
شريف / نعم ؟؟
راجل / حضرتك صفوت بيه هو اللى كان بيشرف على الشركه دى بنفسه و كان موصينى اخلصلها الورق كله
شريف / ازاى يعنى
الراجل / انا معرفش بس زى مقولت لحضرتك كدا
شريف / بقولك ايه تقب و تغطس عاوز اعرف احمد الزفت ده وصل مصر امتى و ازاى و نزل فين و مين زاره و عمل ايه و علاقته باللى اسمها جميله دى ايه و علاقه جميله دى بصفوت باشا انا عاوز قرار الموضوع ده النهرده انت فاهم
الراجل / تمام حضرتك
شريف / سلام
شريف يقفل و هو مدايق يجيله نوتيفيكاشن يبص فى الموبايل و ينفخ و يتصل بحد
شريف / ازيك
محمود / الحمد لله هو فى ايه يا شريف هو اللى بيحصل ده بجد
شريف / ايه اللى بيحصل بالظبط
محمود / مازن هيطلق مرام فعلا
شريف / هى عامله ايه
محمود / يابنى فهمنى هتطلق فعلا
شريف / معرفش انا زيي زيك بالظبط بقولك ايه طمنى على مرام
محمود / معرفش روحنا المستشفى ربطت رجلها مزق بسيط الحمد لله بس لما روحنا و قالت حوار الطلاق ده الدنيا اتقلبت و تيتا وزعتنا و من ساعتها نور الشقه عندهم مقفول و مفيش حس جوه خالص
شريف / لا اله الا الله طب متروح يابنى تخبط عليهم و تطمن البت كانت فى العنايه و الحجه انت عارف يعنى صحتها و حكم السن ساكت ليه
محمود / مش عارف بقولك مش هتيجى الشركه الدنيا كلها واقفه و محدش عارف يتصف ازاى و مازن قافل موبايله و اللى يغيظ سى زياد ده جه و حط رجل على رجل و قعد فى مكتب صفوت بيه الله يرحمه و عمال يشخط و ينطر شمال و يمين
شريف / معرفش انا سبت الشغل
محمود / بتهزر صح
شريف / بص انا شديت مع مازن جامد و بجد مش طايق نفسى و لا طايقه
محمود / لا اله الا الله ليه كدا بس هو ايه اللى جراله ... اقولك على حاجه ... انا اللى كنت طول الوقت بقول لمرام خرجى مازن من حياتك و هيجرحك و مش هيجى من وراه خير و عملت البدع عشان اخلص منه بس عمرى متخيلت انى ازعل ماللى حصل اوى كدا
شريف / حقك طبعا اكيد اللى حصل مكنش سهل عليها و اكيد زعلها مش سهل عليك يعنى دى عشره سنين اذا كنت انا اللى اعرفها من مفيش متاثر ماللى حصل بقولك ايه اقفل عشان صافى وايتنج هتتجنن هى كمان عليها هرد عليها اطمنها
محمود / تمام سلام
شريف يقفل و يرد
شريف / الصبر يا بنتى بجيبلك الاخبار ايه مفيش صبر
صافى / طب سورى خلاص طمنى
شريف / كويسه الحمد لله قافله على نفسها بس ان شاء الله خير
صافى / كلمه تانى يا شريف روحله و قوله مرام تعبانه اوى صدقنى هيروحلها جرى
شريف / انتى بتقولى ايه يا صافى
صافى / اسمع كلامى قوله مرام رجعت العنايه تانى قوله اى حاجه قوله اغم عليها و نقلوها المستشفى صدقنى هيجرى عليها
شريف / لا مش هعمل كدا انا مش هدخل تانى كفايا اوى اللى حصلها من تحت راسى كفايا نظرتها ليا و هى بتقولى مش هسامحك
صافى / خلاص متعملش انا اللى هعمل سلام
شريف / صافى صافى الو الو يووووووه
شريف ينفخ و يقوم يطلع من اوضته
........................
فى شقه مرام
سميحه تفتح الباب على مرام و تايد النور و شايله صينيه عليها اكل و كبايه لبن مرام تتكلفت اكتر بالغطا و تلم نفسها و تدى لسميحه ضهرها  عشان متشوفهاش بتعيط
سميحه / قومى يا حبيبتى كلى لقمه ... طب خدى كبايه اللبن دى بس عشان رجلك تخف
مرام / عاوزه انام
سميحه / يا مرام انتى تعبانه اللى بتعمليه ده غلط عليكى قومى يا ضنايا ...طب هسيبها جنبك يمكن تحبى تاكلى و هروح اقعد مع عمتك شويه الستات متجمعين عندها مالصبح عاوزين يطمنوا عليكوا و قالولهم اننا نايمين هروحلهم عشان ميجولناش تانى بكره نخلص منهم مع انى عارفه اننا مش هنخلص مالهم ده
مرام / يارب بقى 
سميحه / طب خلاص خلاص نامى
سميحه توطى تبوس راسها و تقفل الباب مرام تقوم تسند على رجلها السليمه و تطفى النور و ترجع تحت الغطا تانى و تكمل عياط
....................................
فى شقه مازن
زياد يفتح الباب و يدخل يلاقى مازن نايم عالسرير يايد النور مازن يغطى راسه بالمخده
زياد / قوم يابنى ايه الجو اللى انت فيه ده قوم كدا اغسل وشك و احلق دقنك دى قوم مش هتصدق كميه العروض اللى جت لما بس قولنا ان المجموعه معروضه للبيع الناس هتقطع بعض
مازن / اطلع بره يا زياد انا مش فايقلك اطلع بره
..............................