السكه شمال بقلم / لولو_محمد ( كامله )

الحلقه ١٥٦

(((((((((((((السكة شمال ))))))))))))
#لولو_محمد
الحلقه 156
مازن / متقلقش هسيبلك مكافاه نهايه خدمه كويسه تبدا بيها مشروعك مش هتحتاج تشتغل عند حد تانى
شريف / مكافاه نهايه خدمه ؟؟ فلوس يعنى ؟؟ طب المكافاه دى شامله الصداقه اللى بنا و لا الشغل بس بما انى مجرد موظف عندك يعنى
مازن / بلاش نمشى فى السكه دى ماشى
شريف / طب و مرام هتديها هى كمان مكافاه نهايه الخدمه و لا دى ظروفها ايه
مازن / هديها حقوقها كامله و زياده شويه
شريف / حقوقها ؟؟ انت بتتكلم جد ؟؟ و لا انت مدينك حبوب هلوسه و لا انت وضعك ايه
.......................................
مازن / بص يا شريف انا عارف انك طول الفتره اللى فاتت كنت بالنسبالى اكتر من اخ بس بيتهيالى انى كبير كفايا انى اعرف مصلحتى فين فدلوقت لو سمحت اعمل اللى طلبته منك روح هات زعتر مالفيلا عشان يعيش معايا تمام
شريف / و بعدين
مازن / و بعدين عدى عالحسابات هتلاقى الشيك بتاعك مستنيك انا كلمتهم
شريف / ههههههههههههههههه تمام حاضر عن اذنك انا بقى عشان اللحق اصرف الشيك قبل مالبنك يقفل
شريف يمشى و يرزع الباب وراه و مازن لسه عينه عالباب
..............................
فى المستشفى
مرام قاعده عالسرير و الكل حواليها
مرام / مهو محدش يقنعنى ان مازن مجاش لحد دلوقت منغير سبب قولولى الحقيقه انا جامده دلوقت والله و هقدر استحمل مازن جراله حاجه مازن فين ابوس ايديكوا حد يتكلم
سميحه / والله يا بنتى زى مقولتلك
مرام / مهو طياره اهله طلعت من بدرى جدا هو فين بقى ليه مجاش المفروض كان يجى من المطار جرى على هنا مازن ميقدرش على بعدى فين مازن يا جماعه قولوا الحقيقه خلونى اكون جنبه لو تعبان ودونى اوضته اكون جنبه والله همسك نفسى والله هبقى كويسه ارجوكوا بس خلونى جنبه
شريف يخبط عالباب و يدخل
شريف / اهلا بالقمر عامله ايه دلوقت عاملين ايه يا جماعه
مرام / فين مازن يا شريف مجاش ليه هو كويس قولى الحقيقه عشان خاطرى قولى الحقيقه
شريف / لا مش كويس هو كويس بس مش كويس
مرام / يعنى ايه
شريف / يعنى هو كويس بس نفسيته زى الزفت مش عاوز يشوف حد و لا يتكلم مع حد حابس نفسه فى شقته و بعتنى اجيبك لو انتى كويسه يعنى هو محتاجك اوى دلوقت معدلوش غيرك
سميحه / طب مجاش معاك ليه يا شريف
شريف / مخنوق يا تيته مش قادر يكلم حد و لا حتى يسمع كلمه عزا الله يعينه اللى حصل صعب اوى
مديحه / مهو بصراحه له حق و ايه اهله دول مش قادرين حتى يستنوا كام يوم لما ابنهم يقف على رجليه
شريف / مهواش بيعتبرهم اهله اصلا مازن كل اللى ليه فى الدنيا كان صفوت بيه و هو عند ربنا دلوقت معدش فاضل غير مرام
شريف يبص لمرام تقوم من عالسرير
مرام / انا هاجى معاك
مديحه / يا لهوى تقومى فين انتى لسه تعبانه دول يادوب ناقلينك اوضه عاديه
سميحه / انا هاجى معاكى
شريف / معلش يا حجه خلى مرام لوحدها و انا متاكد انها هتقدر تقنعه يجي معاها الحاره
سميحه تبص لمرام
مرام / انا هبقى كويسه
شريف / انا هبقى معاها متخافيش
محمود / انا هاجى معاك مش هطلعلك هفضل فى العربيه تحت بس يعنى اهو يمكن تحتاجنى
شريف / ماشى انا هروح اخلصلها ورق الخروج و انتى اللبسى و اجهزى تمام
مرام تهز راسها و شريف يطلع مالاوضه
..........................
فى فيلا احمد
لبنى تدخل الخدام يستقبلها
الخدام / احمد بيه فى انتظار حضرتك فوق
لبنى تطلع السلم تلاقى باب متوارب تدخل تلاقى احمد قاعد بيتفرج على فيديو على اللاب و لابس برنص
لبنى / اؤمر نعم
احمد / وحشتينى ها الرجاله جابوكى بسهوله و لا قابلتكوا مشاكل 
لبنى / انت فاكر الحاجات الهبله اللى انت عملتها دى هتخلينى افلت من زياد
احمد / انتى هنا يا لبنى فلتى خلاص ههههههههههههه
لبنى / انا هنا عشان اقولك ان مازن قام ووقف على رجليه فانا لو منك اللحق اللم حاجتى و امشى
احمد / لا حلوه وقف على رجليه دى تصدقى كنت فاكره واقف على ايديه هههههههههههههههه
لبنى / بايخه
احمد / اخص عليكى طب دى حتى جديده لنج بقولك ايه موحشتكيش
لبنى / لا بالعكس انا كل مبفتكر المصيبه اللى عملتها ببقى عاوزه ارجع ببقى مقروفه من نفسى لدرجه انى استحميت بعدها يجى تمانين مره يمكن انضف
احمد / للدرجادى
لبنى / ليك حق مانت كل يوم مع واحده انت فاكرنى ايه
احمد / و احنا عملنا ايه غلط يعنى متخليكى كول بقى و بطلى افوره هو يعنى كان جوزك بجد
لبنى / اه جوزى انا و هو معتبرينها كدا حتى لو مفيش ورق احنا مش محتاجين ورق انا مفيش حد لمسنى غيره
احمد يشاور على نفسه لبنى يبان القرف على وشها
لبنى / وللاسف انت
احمد / هههههههههههههههه كام مره خنتيه فخيالك كام مره كنتى ممكن تخونيه فعلا لولا ان مازن عمره مداكى وش عدل و لا حتى عبرك
لبنى / مازن محترم و راجل عشان كدا حافظ عليا طول الوقت كان بيحاول يحافظ عليا انا اللى وسخت نفسى بزياد ووسختها اكتر بيك
احمد / تمام يبقى ننضفها بقى من زياد و كفايا عليه كدا و لا انتى ايه رايك
لبنى / اسمع يا احمد
احمد / اسمعى انتى يا لبنى ان كان على زياد فانا سهل اوى اخلص منه و ان كان على مازن فتعالى شوفى كدا الفيديو ده لايف بث مباشر حصرى عشانك
لبنى تروح تبص عاللاب تلاقى مازن واقف فى البلكونه و باصص للسما
احمد / يا حرام شكله تعبان اوى ايه رايك نريحه من الهم و الوجع اللى هو فيه ده
لبنى / انت حيوان
احمد / انا بحبك بس فنفس الوقت بكرهه تفتكرى مين فيهم هيغلب عندى حبى ليكى و لا كرهى لمازن
لبنى / دانت قذر اوى
الفيديو يتشال من على مازن و تبان مرام داخله العماره مازن يشوفها يدخل مالبلكونه
احمد / لقاء العشاق
الخدام يخبط و يدخل
الراجل / احمد بيه فى واحد عاوز يقابل حضرتك بيقول اسمه شهاب
احمد يبص للبنى و يسيبها و ينزل و هى تتسحب و تتسنط
شهاب / انت اللى عملت كدا
احمد / ههههههههههههههههههه هو كل مصيبه تحصل فى البلد ابقى انا اللى عملتها و لا ايه
شهاب / متستهبلش انا عارف ان انت السبب فى كل اللى حصل ده
احمد / لخص عشان مش فاضى
شهاب / عملت ايه فى حوار مازن انت وعدتنى هتجيبلى حقى
احمد / يا اخى الراجل خاله لسه ميت و مراته فى العنايه و فرحه باظ دا ربنا جابلك حقك و حق الناس كلها معاك ايه البتر اللى انتوا فيه ده
شهاب / لا مش كفايا اللى عملوه فيا مكنش شويه انا مش عارف اشتغل صفيت شغلى بملاليم و مش عارف حتى اشتغل عند اى حد و لا افتح اى مشروع
احمد / خلاص سافر و سيب البلد افتح فى اى حته تانيه لحد الامور متهدى و ترجع زى مانا عملت بالظبط ميل للريح تعدى عادى يعنى
شهاب / انا عندى خطه تكسر بيها مازن ميقمش بعدها تانى
احمد / اسمع يا شهاب انا الشيطان جنبى ملاك بس انا مش هاخد حقى من واحد مكسور مش رجوله دى
شهاب / انت شايف كدا
احمد / هدى اللعب يا شعاب كل حاجه و ليها وقتها
شهاب / انت خايف منه عارف انه دلوقت اسد جريح و ممكن ينهشك
احمد / نورت يا شهاب والله كان نفسى اقعد معاك اكتر من كدا بس انت عارف مشاغلى كتير بقولك ابعتلى السى فى بتاعك عندى كدا يمكن الاقيلك شغله و لا حاجه
شهاب / هى بقت كدا ماشى
شهاب يمشى و لبنى تنزل من فوق 
لبنى / هو ده وعدك ليا بتتفقوا عليه عاوزين تعملوا فيه ايه اكتر من كدا تعرف انا هروح و اقوله على كل حاجه و هجيب عليها واطيها انت سامعنى هنسفك من على وش الدنيا
احمد / هو ده اللى فهمتيه مالحوار اللى حصل انى اتفقت مع شهاب مخدتيش بالك انى رجعت فى اتفاقى عشان وعدتك مش هاذيه عشان حبى ليكى اقوى مليون مره من انتقامى من مازن
لبنى / انت كداب كل ده تمثيل بتلعب عليا انا عارفه انك بتحاول تستغلنى
احمد / تمام و العرض كالاتى تفضلى معايا هحميه
لبنى / انا مش هقدر اعمل اللى انت عاوزه ده مش هقدر
احمد / تفتكرى لو طلبت من مرام نفس الطلب هتعمل ايه
لبنى / هتديك بالجزمه
احمد / امممم ايه رايك نجرب يا لبنى نشوف لو مرام مكانك و لازم تساوم على نفسها قدام حياه مازن تفتكرى هتختار مين
لبنى / متتنفخش اوى كدا لتفرقع مازن مش هيعيشك لليوم ده و انا و انت و الزمن طويل يا احمد و لعلمك مازن هيطلق مرام و غالبا الخبر وصلها و عشان كدا سابت المستشفى و راحتله جرى خليك باصص للشاشه هتلاقيها نازله بعد شويه من عنده معيطه عن اذنك
لبنى تسيبه و تمشى و هو بيغلى
..................................................
فى شقه مازن
مازن واقف ورا الباب و عينه عليه جرس الباب يضرب مازن يفتح يلاقى مرام اول متشوفه تترمى فى حضنه و هو مش عاوز يحضنها
مرام / الحمد لله انى اطمنت عليك ازاى تعمل فيا كدا ازاى تسبنى لوحدى كل ده و قافل موبايلك انا افتكرت جرالك حاجه مهو مستحيل تسبنى فى المستشفى لوحدى طب مجتش ليه مكنتش عاوز تطمن عليا ...مازن ..مبتردش عليا ليه
مرام تبعد عن مازن و تبصله واقف صنم
مازن / ايه اللى جابك
مرام / ايه اللى جابنى ؟؟ مازن انا خلتهم يكتبولى خروج اول معرفت انك محتاجنى كنت متوقع ايه تانى غير كدا
مازن / مين اللى قالك انى محتاجلك
مرام / شريف
مازن يبص الناحيه التانيه و يهز راسه ايوه
مرام / فى ايه مالك مازن فى ايه
مازن / مكنش المفروض تسيبى المستشفى الا لما صحتك تتحسن مكنش المفروض يعمل كدا انتى تعبانه و هنا مش مكانك
مرام / بقيت كويسه لما شوفتك و اطمنت عليك مازن انا كنت هتجنن لما سمحوا الزياره و ملقتكش كنت بموت كلهم حلفوا انك كويس بس انا مقدرتش اصدقهم انت متسبنيش فى المستشفى و تمشى انت متعملش كدا
مازن / كان المفروض تصدقيهم و توفرى علينا الموقف ده
مرام / مش فاهمه
مازن / انا اصلا ليا حساب تانى مع شريف
مرام / مازن هو فى ايه هو انت مش مبسوط انك شوفتنى
مازن / انا تعبان فى حد يروحك و لا اطلبلك عربيه
مرام / يروحنى فين عربيه ايه اللى تطلبهالى و بعدين انت يعنى هترتاح من غيرى يا مازن
مازن / متضغطيش عليا لو سمحتى
مرام / هو فى ايه انت بتكلمنى كدا ليه و ايه اللى انت بتقوله ده مضغطش عليك فى ايه فى ايه مالك
مازن / مرام انتى كان معاكى حق لما كنا فى السخنه و طلبتى الطلاق كان معاكى حق
مرام تتصدم و تحاول تلم نفسها و تتكلم بهدوء
مرام / لما قولتلى انه على جثتك يحصل فاكر قولتلى انك عمرك مهتسيبنى
مازن / كنت غلطان
مرام / كنت غلطان ؟؟
مازن / انا هوكل اى حد يخلص اجراءات الطلاق و حقوقك هتاخديها كامله
مرام / حقوقى ؟؟
مازن / المؤخر و النفقه و اى حاجه انتى عيزاها
مرام / انتى بتقولى انا الكلام ده ؟؟ انت فاكر لما باباك عرض عليك كل فلوسه قولتله خد كل فلوسى و سبنا مع بعض كنت مستعد يبقى محلتكش مليم و تبقى معايا دلوقت عاوز تدينى فلوس عشان نسيب بعض طب ازاى و ليه
مازن / دا لمصلحتنا احنا الاتنين
مرام / انت طلبتنى اجى هنا عشان تقولى الكلام ده عشان تقولى انك هتوكل حد يطلقنى مكانك عشان تقولى متخافيش هتاخدى قرشين
مرام دموعها تنزل تمسحها على طول و تكتمها و مازن متابعها و بيعانى انه يمسك نفسه عنها
مرام / هتقدر تعيش من غيرى صورى اللى جوه هنا هتقدر تقطعها رد ساكت ليه
مازن / انا هبيع الشقه دى اصلا لو عوزاها ممكن اديهالك تعيشى فيها انتى و تيته و تسيبوا الحاره المعفنه بتاعتكوا دى
مرام / دانت مش هتبيعنى انا بس دانت هتبيع شقتك كمان شقه مامتك
مازن / انا هصفى كل اللى ليا هنا معدليش حاجه فى مصر اعد عشانها
مرام / معدلكش حاجه فمصر معدلكش حاجه خالص طب هتروح فين
مازن / اى حته اوروبا امريكا روسيا كندا هلف الدنيا هعيش شبابى المهم انى مش هرجع مصر تانى
مرام تدحك بحزن و الدموع فى عنيها و بتقاومها بكبرياء
مرام / هههههههههههه فاكر لما خدوا الملف بتاعى و مسحو بياناتى فاكر لما جيتلك و قولتلك مصر وحشه و مش عاوزه اقعد فيها و مبتحبينش هههههههههههه فاكر لما قولتلى مصر عملت كل ده دلوقت انت اللى زعلان من مصر حقك طبعا تزعل من مصر مانت معدلكش فيها حد ملكش فيها حد خالص
دمعه تنزل من عين مرام تمسحها بسرعه و تبص يمين و شمال مازن يروح يبص ناحيه البلكونه و يديها ضهره عشان ميشوفهاش بتعيط
مرام / على العموم كويس انى اطمنت عليك الحمد لله طلعت كويس و بالنسبه لحقوقى فتقدر تحتفظ بيها هتحتاجها ...و انت بتعيش شبابك من غيرى .... اصل انا حقى منك خدته من زمان ...لما جيت عندنا حارتى المعفنه ... فاكرها ... لما جيت انت و خالو الله يرحمه ... فاكر .... لما دفعت مهرى ...فمتقلقش انا مش هعمل اى مشاكل مع اللى انت هتوكله يطلقنى مكانك.. صحيح انت هتوكل مين بدالك يطلقنى هاه ؟؟ يعنى ماحنا مع بعض اهو و انا قولتلك مش هعمل مشاكل ... على فكره انا معايا بطاقتى لو تحب نروح انا و انت دلوقت و لا توكل و لا تتعب نفسك ... هما بيحتاجوا ايه فى الطلاق عشان انا معرفش فى الحاجات دى هاه ؟؟ انا بكلمك على فكره
مرام واقفه تبص على مازن مفيش اى رد فعل دموعها تنزل و تمسحها فى ساعتها و تروح تشده من دراعه يبصلها
مرام / بقولك بكلمك
مازن / امشى يا مرام
مرام / بص فى عينى و انت بتكلمنى هتوكل حد غيرك يطلقنى ليه مش هتقدر تقولها فوشى ليه رد عليا بكلمك
مازن / روحى يا مرام
مرام / انت عارفنى كويس انا عمرى مطاطيت و لا اتزللت لحد بس انت مش حد لو انت هتقدر تعيش من غيرى انا مش هقدر بتعمل معايا كدا ليه بتعمل فيا كدا ليه مازن
مازن / هو شريف واقف مستنيكى تحت
مرام / رد عليا بكلمك بتعمل كدا ليه ضغطوا عليك قولى ادينى سبب لما حتى اروح لتيته و تسالنى اطلقتوا ليه اعرف ارد لما الايام تعدى و انت بعيد عنى و توحشنى اعرف ارد
الدموع تنزل من عين مرام و مازن مش باصصلها تمسح دموعها
مرام / تمام .. انا همشى بقى زمان تيته قلقانه عليك هطمنها هقولها انك كويس مش انت كويس يا مازن
مازن / يووووه بقى خلاص يا مرام امشى
مرام تبص لمازن بقهره و تجرى ناحيه الباب رجلها تتنى تقع فى الارض مازن يجرى عليها بلهفه ميقدرش يقاومها
مازن / انتى كويسه
مرام / اه كويسه متشغلش بالك رجلى اتلوت بس
مازن يحاول يمسك رجلها تسحبها منه و تحاول تقوم تقع تانى يسندها و ايده حوالين ضهرها و عينه فى عينيها
مازن / انتى كويسه
مرام / هبقى لما امشى من هنا عن اذنك
مرام تبعد ايد مازن من حواليها و تحاول تدوس على رجلها و تقف لوحدها توجعها مازن يشيلها تتشعلق فى رقبته و تبص فى عنيه
مرام / مدام لسه بتحبنى كدا و ملهوف عليا عاوز تطلقنى ليه مش خوفك عليا ده اسمه حب برده و لا انت بتسميه ايه
مازن يفضل واقف ثوانى باصص فى عنين مرام اللى مليانه دموع و رجاء
..........................
فى العربيه تحت
شريف كل شويه يبص فى الساعه و يبص على فوق و باين عليه التوتر
محمود / ايه يابنى مبقالهاش عشر دقايق فوق على بعض فى ايه مالك اهدى
شريف / مش عارف مش مرتاح حاسس انى عملت حاجه غلط
محمود / ليه يعنى فى ايه
شريف / مازن مش طبيعى مبيتصرفش بشكل طبيعى موت خاله اثر فيه دمره مش عارف مرام هتقدر تتعمل معاه و لا لا
محمود / قصدك انه ممكن ياذيها
شريف / لا لا مازن بيحبها عمره مهياذيها بس ممكن يقولها كلام يدايقها مثلا حاجه كدا
محمود / اطلع يعنى ابص عليها و لا اعمل ايه
شريف / بص خلينا هنا عشر دقايق كمان لو منزلتش و لا حد كلمنا نطلعلهم تمام
محمود / تمام
محمود و شريف كل شويه يبصوا على فوق
..............................
فى فيلا زياد
لبنى تدخل تقابل زياد
زياد / كنتى فين
لبنى / متسال البهايم اللى ممشيهم ورايا فى ايه يا زياد انت بتراقبنى
زياد / دول لحمايتك انا خايف عليكى
لبنى / متصعش عليا يا زياد
زياد / شريف حط حراسه على باب بيته لامه و اخواته و انا مش عوزانى احط على جوهره زيك حراسه
لبنى / طب مقولتليش ليه ان فى حراسه ليا
زياد / عشان ميخنوقيكيش تتصرفى بحريه تعيشى حياتك لا تتوترى و لا تتقيدى
لبنى / كتر خيرك يا زياد عن اذنك هطلع اغير هدومى
زياد / لبنى
لبنى / نعم
زياد / لو مازن طلق مرام الخطه هتتغير خالص لازم نقنعه يغير رايه مع انى شايف ان دى فرصه متتعوضش نخلص منها بعيد عننا و نهدى اللعب شويه لحد مينساها و يرجع لحياته القديمه و بعد كدا نتسلى عليها براحتنا ايه رايك
لبنى / مازن مش هيطلق مرام و ان طلقها مش هيرجع لحياته القديمه مازن بيحبها كان هيتجنن عليها فى المستشفى مازن بيحب مرام اكتر من اى حاجه تانيه فى دنيته و لو عاوز رايى على قد مانا كارهه البت دى و نفسى اشرب من دمها على قد مانا خايفه من رد فعل مازن و اللى هيعمله فينا لما ناذيها قولى يا زياد فكرت فى رده فعله فى خطتك و لا هتسبنى فوش المدفع و تطلع تجرى
زياد / تعرفى عنى كدا
لبنى / انا معدتش عارفه نفسى يا زياد عشان اعرفك انا تعبانه و تايهه و مخنوقه انا معرفش ايه اللى جرالى مش قادره اتحكم فى اعصابى و لا فنفسى بعمل حاجات غريبه و بفكر فى حاجات غريبه انا مش انا
لبنى تعيط زياد ياخدها فى حضنه
لبنى / انا مش وحشه يا زياد انا مش وحشه
زياد / قطع لسان اللى يقول عنك كلمه يا قلبى اهدى بس ايه اللى حصل لدا كله
لبنى / معرفش معرفش
لبنى تزق زياد و تطلع فوق و هى بتعيط و هو عينه عليها ثوانى و يطلع وراها
...............................
فى شقه مازن
مازن لسه واقف شايل مرام و عنيهم فعنين بعض مرام تحط راسها على كتفه و تحضنه تحس بايديه اللى شيلاها بتبت فيها اكتر
مرام / فاكر لما جينا هنا و فرجتنى الاوضه وقفنا فى نفس المكان هنا و شلتنى كدا برضه
مرام تبص على مازن ياخدها و يقعدها فى اقرب كرسى و يدخل جوه و عينها عليه يطلع معاه مرهم و يقعد يبص على رجلها
مازن / دا كويس هيسكن الوجع لحد مشريف ياخد المستشفى تكشفى عليها بس غالبا مفيهاش حاجه
مرام / كويس انهم اخترعوا مراهم تسكن الوجع بتاع الرجلين عقبال ميخترعوا حاجه للقلوب
مازن يقوم يقف
مازن / انتى بتعملى كدا ليه هتستفيدى ايه يعنى بتوجعى قلبك عالفاضى ارجعى لحياتك و عيشيها زى مكنتى عايشه كان ناقصك ايه شويه فلوس هديهالك
مرام تبصله بقهره و صدمه و تبص على رجلها و تدارى دموعها
مرام / حلو المرهم ده فعلا انا حاسه انى بقيت احسن عن اذنك
مرام تقوم و تتسند عالكرسى مازن متابعها بلهفه يروح يمسك ايدها و يسندها
مازن / اديله خمس دقايق كمان هيريحك
مرام / كتر خيرك انا ادرى بنفسى انا كويسه متقلقش انت نفسك خالص انا بعرف اسند نفسى كويس
مازن / طب استنى هنادى شريف
مرام / هتنادى صاحبك يسندلك مراتك؟؟ ... اااااه سورى نسيت احنا خلاص هنطلق ... يا سيدى متشغلش بالك انت وسع بس
مرام تبص على ايد مازن ماسكه فيها و تبص على عنيه مركزه فعنيها و الحزن ماليها
مرام / طب قولى بس ليه
مازن يبص الناحيه التانيه
مرام / مازن لو مكنش ده حصل انا و انت كنا هنبقى متجوزين و مقفول علينا باب انا و انت كنا هنبقى
مرام تسكت و تبص لمازن و تزق ايده بعيد عنها
مرام / معاك حق المرهم ضيع الوجع عن اذنك
مرام تمشى و هى بتعرج و الوجع واضح عليها و مبتبصش وراها و مازن عينه عليها و كل شويه يحاول يروح ناحيتها يمسك نفسه و يفضل مكانه لحد متقفل الباب وراها دموعه تنزل
مازن / متمشيش ارجوكى استنى متسبينيش انا محتاجلك اوى انا بحبك اوى
مازن يقعد مكان مكانت قاعده و يفضل يعيط بحرقه
.....................
فى العربيه تحت
شريف / بيتهيالى كفايا كدا انا هطلع ابص عليهم اشوف بيعملوا ايه كل ده
محمود / اجى معاك
شريف / لا ملوش لازمه اهو حتى لو طلعت فوقت مش مناسب منبقاش احنا الاتنين رخمين
محمود / ههههههههههههههههههه ربنا يستر
شريف / قول يارب
شريف ينزل مالعربيه يروح يفتح باب الاسانسير يلاقى مرام قاعده بتعيط جواه تشوفه تضم رجليها فحضنها و تدارى وشها منه شريف يجرى يقعد جنبها
شريف / مرام انتى كويسه
مرام / انا عمرى مهسامحك ليه تعمل معايا كدا
شريف / انا اسف انا كنت فاكر هتقدرى تعقليه مرام انا .. انا اسف اوى
...........................