السكه شمال بقلم / لولو_محمد ( كامله )

الحلقه ٦٦

(((((((((((((((السكة شمال )))))))))))
#لولو_محمد
الحلقه السادسه و الستون
مرام / تعرفى انا فايتنى كتير اوى الكام يوم اللى فاتو انا بقول اللتفت لمزاكرتى احسن عشان اللحق اعوض
سميحه / احسن برده
مرام تبتسم و تقوم تجيب كتبها و تبص لسميحه سميحه تسيبها و تقوم مرام تسمع جرس الباب تقوم تبص تلاقى صفوت تلبس الاسدال و تطلعله
سميحه / اتفضل هناديهالك ... اهى جت اهى
............................
مرام / اهلا صفوت بيه
صفوت / ايه بيه دى انا كنت فاكرك هتقوليلى يا خالو .. الا يا حجه ممكن كبايتين شاى من ايديكى الحلوين دول الواد مازن بيشكر فيهم جدا
سميحه / من عنيا اتفضل
صفوت يقعد و يشاور لمرام تقعد
مرام / لو حضرتك جاى بخصوص مازن
صفوت / مفيش موضوع غيره اصلا يا مرام بس لو سمحتى انا جاى النهرده اتكلم معاكى كلمتين و ارجوكى تسمعيهم
مرام / اكيد اتفضل
صفوت / مونيكا قبل متسافر حكتلى انك رفضتى مازن بسبب ابوه بصراحه عندك حق انا اصلا لا بطيقه و لا بستحمله من اول مشوفته و لحد النهرده
صفوت يبص لمرام
صفوت /تعرفى يا مرام انتى بتفكرينى باختى الله يرحمها كانت حلوه اوى كدا زيك بس هو كان فى فرق بسيط بينكوا هى كانت رومانسيه اوى جت فيوم و هى فى منتهى السعاده و اتكلمت مع ماما الله يرحمها و بعدين عرفت ان فى حد فحياتها ابراهيم بابا مازن جه و اتكلم معايا لان والدى متوفى والدتى كانت مبسوطه بيه اوى شاب كويس من عيله غنى و هيعيشها فى مستوى كويس احنا الماديات مكنتش تفرق معانا احنا كنا اغنى منه بكتير كل اللى كان يفرق هو سعاده اختى الوحيده المهم  اتجوزوا و عاشوا اجمل شهر عسل فى الدنيا و لما رجعوا هو رجع لشغله و بقت تيجى عندنا لما كان بيسافر وبقت تروح الاتيليه بتاعها و بدات ترسم كل اللحظات الحلوه اللى عاشوها سوا
مرام تبتسم و صفوت يبتسم
صفوت / واحده واحده بدات اللاحظ ان الرسومات بتتغير بدل مكانت بترسم زهور و جناين و عصافير و اطفال كتير بتجرى بعجل بقت ترسم رسومات حزينه زى طفل قاعد لوحده فى الضلمه بيعيط و حاجات من دى افتكرت لما رسمتلى بورتريه حلو اوى عندى فاوضه نومى لما تيجى تانى الفيلا هبقى اوريهولك كانت قلتلى ان الرسام مبيرسمش اللى قدامه زى مهو لازم مشاعره تظهر فى الصوره فبدات اتكلم معاها و ماما كمان اتكلمت معاها كتير بس هى مكنتش بتتكلم خالص غياب ابراهيم بقى بيطول و شركته بتكبر و بقى يغيب بالشهر و الاتنين و التلاته لحد مقررت انها تسافر تعيش معاه و تسيبنا و ده اللى حصل لحد مفيوم رجعت طبعا فرحنا بيها جدا خصوصا انها كانت حامل و محتاجانا نراعيها فطبيعى ترجع بس فوسط الكلام قالتلى انها كانت هناك وحيده جدا بالرغم من السفر طول الوقت و انها بتلف الدنيا لكن كانت وحيده ابراهيم علاطول بيشتغل من اجتماع لاجتماع معدش فاضى للكلام و لا الفسح و بيروح ينام لانه غالبا اكل فى الشغل اى حاجه
مرام / و ايه اللى وصلهم لكدا
صفوت / الجشع .. ابراهيم مكنش بيكتفى باللى عنده ابراهيم كان عنده شركه استيراد و تصدير و احنا كان عندنا اكبر شركه شحن دولى فى مصر و الوطن العربى و لينا فروع فكل انحاء العالم تخيلى بقى المكسب اللى هيرجع لما يكون الشحن لبضايعك اللى بتوردها و تستوردها ببلاش لانها شركتك
مرام / حضرتك تقصد انه اتجوزها مصلحه
صفوت يبتسم
صفوت / المهم ست شهور كامله ابراهيم منزلش مصر محضرش ولاده ابنه عشان كان بيفتتح فرع شركته اللى فدبى اللى هو الفرع الرئيسى دلوقت و اللى مخليه مقيم هناك علاطول منزلش يحضر ولاده ابنه يا مرام ماما ادايقت اوى بس اختى كانت بتدافع عنه و دايما تلاقيله حجج فكنا بنسكت مدام هى عاوزه ده المهم فضلت معانا لحد مشدت حيلها و سافرتله و فضلت هناك اربع سنين مبينزلوش لما بتوحشنا احنا بنسافرلها نزورها و نزور مازن اللى كانت بترسمه طول الوقت و تبعتلنا صوره و كنا طايرين بيه
مرام / و بعدين
صفوت / فالوقت ده ابراهيم قرر يوسع شغله و يشارك فريده ابو العزايم اللى هى مراته دلوقت خصوصا بعد مزوجها توفى و سابلها شركه مقاولات فالاول طبعا هى قررت تديرها لوحدها و لما فشلت و كانت خلاص هتعلن افلاسها قررت تشارك ابراهيم المشكله ان ابراهيم مكنش عنده سيوله كافيه فاميره اختى كلمتنى انها عاوزه تسيل جزء من نصيبها فى الشركه عشان تكمل على رصيدها اللى فالبنك و تساعد جوزها فانا وافقت بس بشرط ان كل قرش تدفعه يكتبه باسمها اسهم فى الشركه الجديده و طبعا بعد خناقات و قرف هو وافق و سيلتلها جزء من اسهمها اشتريته انا و اديتها الفلوس اللى محتاجاها و بقت فعلا ليها اسهم كتير تقريبا حوالى اربعه و خمسين فالميه و ده يديها حق الاداره بس هى كانت حامل فالوقت ده و طبعا مش هتقدر حتى تتابع فعملتله توكيل بالاداره و هو مشكورا كان بيدير الشركه و النهرده تعتبر من انجح شركات المقاولات فى الوطن العربى على فكره
مرام / بسم الله ما شاء الله
صفوت / المهم هى كانت فى السابع و ماما شافت انها بتحج فاميره صممت نسافر و سافرنا فعلا بعد مابراهيم وعدنا بكل الوعود اللى ممكن تتخيليها انه هيشيلها فى عنيه و كمان فاضل شهرين عالولاده و الدكتور اكد ده بس تاتى الرياح بما لا تشتهى السفن الطلق جالها فى السابع اتصلت بابراهيم قالها انه جاى فى الطريق فاتصلت بماما طلبت منها تدعيلها و لما قولنالها تتصل بالاسعاف قالت انها كلمت ابراهيم و هو جاى فى الطريق المهم اتصلنا بابراهيم تليفونه كان غير متاح فاتصلنا بيها مبتردش اتصلت بخالتوا و طلبنا منها تروح الاتيليه تطمن على اميره لانها بتولد خالتو وصلت فعلا و ملقتش البواب و طلعت فوق و خبطت محدش فتح فقلنا انه اكيد نقلها المستشفى و بتولد اتصلنا على اميره تانى مبتردش اتصلنا علي الباشا غير متاح المهم بعد اربع ساعات الباشا رد علينا بكل برود انه رايحلها اهو كنا هننتجنن طبعا ايه البرود ده
مرام تبص باستغراب
صفوت / انتى مش مصدقانى الباشا قفل تليفونه عشان بتتصل بيه كل شويه عشان يعرف يركز فى شغله فى الاجتماع المهم اللى عنده خالتو رجعت الشقه تانى بس المرادى لقت البواب و كسروا الشقه لقوا اميره و فحضنها مازن نايمين
مرام / نايمين ؟؟
صفوت / هو افتكرها نايمه فدخل فى حضنها و نام هو كمان بس هى للاسف مكنتش نايمه و لا حاجه الرحم انفجر و البيبى طلع على قلبها و ماتت هى و النونه
مرام / و بعدين
صفوت / ركبنا اول طياره رجعنا مصر و لما اتخانقت معاه رد عليا بكل برود انه كان فاكر ان الولاده هتاخد وقت طويل زى ولاده مازن و انها كان المفروض لما لقته قفل التليفون كانت تتصرف او تتصل بخالتها او حتى البواب و ان ده قضاء ربنا و قال ايه هو مش معترض و بعدين انتوا زعلانين مانا كمان خسرت بنتى و كلام اهبل ميساويش تلاته جنيه
مرام / و مازن عمل ايه لما عرف ان والدته ماتت
صفوت / هو مكنش فاهم يعنى ايه ماتت لسه كان صغير و الوقت ده كان زياد و نورا معاه طول الوقت بيلعبوا و احنا الحقيقه وفرناله كل حاجه ممكن تسعده و تشغله عشان نلهيه عن الموضوع
مرام / و بعدين
صفوت / جه يوم عشان نشوف ورثها المفروض ان ابراهيم يورث الربع بس كان المقلب اللى برد نارنا كلنا انها كانت كاتبه لمازن كل ما تملك بيع و شرا و الاكتر انها كانت كاتبه فى الوصيه ان انا اكون الواصى عليه مش ابراهيم و عرفنا السبب بعد كدا فى المزكرات بتاعتها اللى للاسف مازن لقاها فى الاتيليه لما قرر يعيش فيه و هى انها عرفت ان ابراهيم كان بيخونها مع فريده بس سكتت عشان مازن و اللى فبطنها و طبعا مكناش مستغربين ده خصوصا انهم اتجوزوا بعد وفاه اميره باربع شهور بالظبط و ربنا كرمهم بمونى بعد سبع شهور بالظبط
مرام / و مازن عمل ايه لما عرف الحقيقه
صفوت / مكنش يفرق اصلا علاقته بابوه كانت كدا كدا بايظه بالنسبه لمازن انا ابوه انا كل حاجه فحياته ابراهيم مجرد شبح مش اكتر و غالبا شبح اسود منغص عليه حياته هو اه زى اى اب نفسه يشوف ابنه احسن حد فى الدنيا بس منغير ميبذل اى مجهود معندوش استعداد انه يتعب فى ابنه تعرفى حتى مونيكا نفس المعامله بس مونيكا مامتها موجوده و اخواتها ادوها كل الحنان اللى ممكن تحتاجه لكن مازن ملقاش غيرى طبعا بعد ما والدتى اتوفت بعد جواز ابراهيم بكام شهر و ساعتها ابراهيم اخد منى مازن بحجه انه محتاج واحده ست ترعاه و مازن كان سعيد جدا لانه هيقدر يلعب مع زياد طول الوقت و مفيش كام شهر و مونى شرفت و قررت اسال عنها و عن مازن اللى عرفت بالصدفه انه اتحط فمدرسه داخلى لان فريده هانم مش قادره ترعاه الرعايه اللى تليق بيه
مرام / و زياد
صفوت / لا زياد ابنها على قلبها زى العسل المهم انا اخدت مازن و ربيته قولتله فريده هانم من حقها ترتاح و انا مازن مش هيتعبنى و اعتبرنى مدرسه داخلى و كان فى شويه مشاكل فى الاول بس اخدته فى الاخر و متجوزتش عشتله عمرى كله عشت اكبره يوم بعد يوم خليته يلعب كل الرياضات اللى تخطر على بالك و اللى كان بيتفوق فيها كنت بساعده و اشجعه عشان يوصل لمستويات اعلى بقيت بشتغل اكتر و اكتر عشان لما يكبر يلاقى عنده عز ملوش اول من اخر جبتله كل اللى نفسه فيه لبس و عربيات و سفرته الدنيا كلها لف العالم و اتعلم لغات كتير و اتعرف على ناس اكتر عمرى مقولتله لا و لا حتى كنت بستحمل زعله مين ابوه يا مرام انا و لا اللى مسالش عنه يوم مين ابوه
مرام / حضرتك
صفوت / مازن عمره مهيصغر ابوه قدامك كدا و لا هيصغر حد مازن فيه حاجات كتير وحشه و مش بعفى نفسى من مسؤليتها بس برده فيه حاجات كتير حلوه حاجات متتخيليش انها لسه موجوده اصلا فالبنيادمين بصى يا مرام انا مش بقول كدا عشان هو ابنى لا بس مازن ابنى ده جوهره لا عمرك هتلاقى زيه و لا فى مخلوق هيحبك و يسعدك زيه و ان زعلك ان فكر بس انا اللى هقفله لانى دلوقت بوعدك انك مش هتشوفى مع مازن يوم وحش
مرام تبتسم
صفوت / انا اصلا مش هسمحلك تسبيه انا مصدقت انه لقى اخيرا نصه التانى اللى تعقله و تصلح اللى انا معرفتش اصلحه و صدقينى لو قولتلك ان مفيش بنت فى الدنيا كنت اتمناها لمازن قدك
مرام تبص فى الارض بخجل
صفوت / انا مش هضغط عليكى بس ارجوكى متخليش انسان جشع و انانى زى ابراهيم يقف فى طريق سعادتنا كلنا يا مرام
مرام تهز راسها
صفوت / انا عارف ان عندك كليه الصبح عشان كدا مش هطول عليكى يلا نامى و ارتاحى و عاوز اسمع اخبار حلوه
مرام / باذن الله
صفوت / عن اذنك
مرام / الله طب و الشاى ... الشاى يا تيته
سميحه تطلع من جوه بالشاى
سميحه / سامحنى يا صفوت بيه انا قولت يعنى اسيبكوا تتكلموا
صفوت / خير معملتى يا امى بس احنا مش محتاجين شاى احنا محتاجين شربات و باذن الله هنشربه قريب عن اذنكوا
صفوت يمشى
سميحه / هاه
مرام / مش عارفه
سميحه / ربنا يهدى بالك يا بنتى
تليفون مرام يرن
مرام / الو ايوه يا منى ازيك
منى / ازيك يا مرام انا خلصت المحاضرات اللى فاتتك
مرام / بجد طب ابعتيها
منى / اوك هبعتلك الاوديو عالواتس
مرام / اوك تمام هفتح النت اهو
منى / سلام
مرام تقفل
سميحه / فى ايه
مرام / دى منى معايا فى الكليه بتسجل المحاضرات صوت فانا طلبت منها بعد متجهزهم تبعتهملى
سميحه / حلو برده
مرام / اكيد مع الورق المكتوب هيفرق كتير
سميحه / ربنا يقدم اللى فيه الخير هاخد انا بقى الشاى ده اشربه مع عمتك
مرام تبتسم و سميحه تمشى
مرام / هو ايه اللى مفيش مساحه يووووه
مرام تفتح الجاليرى تمسح منه تلاقى الفيديو اللى مازن كان باعتهولها بصور الحفله تفتحه و تتفرج عليه على اغنيه اجمل نساء الدنيا صور ليها فالحفله و غيرها و معمول بطريقه جميله و فوكس على وشها و دحكتها و صور كتير ليها و هى مش واخده بالها من زوايا مختلفه و هى بتدحك و وهى سرحانه تندمج و هى بتتفرج عليه و تبتسم لحد ميخلص و بعدين تقعد تفكر و هى سرحانه مبتسمه
.........................
فى الفيلا عند مونى
فريده / اهدى بس يا ابراهيم الموضوع مش مستاهل
ابراهيم / انا مش بلوم عليها هى فى الاول و الاخر عيله و سهل اوى اخوها يستعطفها بكلمتين حنيه لكن انت انا استامنتك على بنتى تقوم تدحك عليا و تستغفلنى
كامل / هى مطلبتش منى حاجه غلط هو مش مازن ده اخوها برده و لا ايه
ابراهيم / انت عارف انه بيعمل حاجه غلط و الا كان قالى
كامل / الحب عمره مكان غلط
ابراهيم / انت كمان بترد عليا
كامل / انا اسف بس حضرتك ليه متحامل على مازن اوى كدا
ابراهيم / لان مازن خاطب و بعدين مين الهانم اللى خطبها دى و ليه مقالش لابوه مدام هو جد كدا انت تعرف مازن قولى تعرفه
كامل / اعرف ان مونى بتحبه و بتفرح لفرحه و كمان مونى بتشكر فى البنت جدا
ابراهيم / و انتى تعرفيها منين يا ست هانم شوفتيها فين قبل كدا
مونى / مشوفتهاش بس مازن كان علاطول بيحكيلى عنها بنت كويسه اوى و طيبه و جميله و من عيله محترمه
ابراهيم / ايوه من عيله تقدرى تقوليلى ايه هى عيلتها ابوها مين امها مين بيشتغلوا ايه بنت مين هى عشان تناسب عيله منتصر ردى عليا
مونى / يا بابا دى الاولى على دفعتها و شاطره و مؤدبه و كل الناس بتحبها و هى بصراحه تتحب جدا
ابراهيم / انتى مش هتكبرى بقى يا مونيكا ايه هتفضلى طفله كدا طول عمرك
مونى / يا بابا
ابراهيم / اولا انتى تعرفى عن اخوكى انه بتاع حب تلاقيه معرفش يتصاحب عليها قرر يتجوزها يومين يسلى بيها نفسه
مونى / لا يا بابا مازن ميعملش كدا
ابراهيم / مازن مين اللى ميعملش كدا مازن ميعملش غير كدا واد صايع و فاشل و مش فالح فاى حاجه غير فى الجرى ورا البنات و تصوير الفيديوهات و الفيس و التويتر و كل تفاهه هو مش فالح غير فالفشل و التفاهه
مونى / مازن مش كدا
ابراهيم / اطلعى على اوضتك
مونى تبصله
ابراهيم / سمعتينى
مونى تبص لكامل و تطلع اوضتها
ابراهيم / نسب يشرف مش كدا يا كامل انا خلاص مش عارف اعمل ايه فالولد ده دا مستحيل يكون ابنى طبعا خاله كان موجود
كامل / ايوه حضرتك
ابراهيم / طبعا بيكيدنى بيعصى ابنى عليا ماشى يا صفوت الكلب ماشى
كامل / اونكل ابراهيم لو سمحتلى
ابراهيم / اوعى تفتكر انى زعلان منك انت لا انت ابنى اللى مخلفتوش انت حبيبى يا كامل انا بس مكنتش عاوز الكلب اللى اسمه مازن يشركك معاه فى الجريمه اللى هيعملها فى البنت دى انا عارف ابنى و عمايله كويس خلفه تكسف خلفه تعر هيحرجنا كلنا زى ماحرجنا كلنا مع ماهينور و اهلها و بكره تشوف يا كامل بكره تشوف و تعرف انى بتكلم صح
كامل يبص فى الارض
فريده / ابراهيم حبيبى اعصابك مش كدا
ابراهيم / انا تعبت يا فريده تعبت
فريده / اهدى و ارتاح و انت يا كامل يا حبيبى روح و نام و ارتاح و بكره الصبح تيجى تفطر معانا يكون عمك هدى و تتراضوا قبل متسافروا
كامل يهز راسه و يمشى فى صمت
ابراهيم / ماشى يا مازن ماشى
..............................
فى شقه مازن
مازن بيصلى الفجر تليفونه يرن ميردش و اول ميخلص صلاه يقوم يبص يلاقى مرام يتحمس اوى و يجرى عالسرير و هو بيتصل بيها
مرام / صباح الخير صحيتك
مازن / لا انا كنت صاحى
مرام / امال مردتش ليه مخاصمنى
مازن / ابدا كنت بصلى
مرام / كويس يا ترى بقى دعيتلى
مازن / كتير اوى
مرام / بايه
مازن / دعيت ربنا يحنن قلبك عليا
مرام / هههههههههه شكله استجاب
مازن / بجد
مرام / بصراحه افتقدتك جامد اوى
مازن / معقول
مرام / اه كان فى مواعين كتير اوى فالمطبخ
مازن / ههههههههههههههههههههه
مرام / على فكره انا شوفت الفيديو
مازن / فيديو ايه
مرام / بتاع صور الحفله انا مكنتش شوفته
مازن / معقول
مرام / لا مكنتش شوفته انت فاكر يوميها محمود عمل مشكله و بعدين اتلخمت و نسيته خالص لحد محتجت امسح حاجات من عالموبايل فشوفته النهرده
مازن / شكله عجبك
مرام / اوى حلو اوى انا عمرى مشوفت نفسى حلوه كدا
مازن / انتى احلى من كدا
مرام / شكرا
مازن / على فكره عندى غيره
مرام / بجد
مازن / اه كتير
مرام / هتبقى تخلينى اشوفهم
مازن / لو اعرف ان ده اللى هيحنن قلبك عليا كنت بعتهوملك من يوميها
مرام / ههههههههههه بصراحه لا مش ده مش ده بس
مازن / امال
مرام / بغض النظر عن المواعين ....
مازن / هههههههههههههه
مرام / خالو صفوت كان هنا و اتكلمنا كتير الحقيقه هو اللى اتكلم و انا مكنتش عارفه ارد
مازن / قالك ايه
مرام / قالى انك واد جوهره و مينفعش اضيعها من ايدى
مازن / اه والله فعلا
مرام / ايه الغرور ده
مازن / ههههههههههههههههههه الله بحلى البضاعه
مرام / مازن انت بتحبنى بجد
مازن / ورحمه ماما اللى عمرى محلفت بيها كدب ما قولتها غير ليكى و اسالى اى حد ماللى يعرفونى قوليلهم مازن قالى بحبك شوفى هيقولك ايه
مرام / توعدنى انك عمرك مهتجرحنى و لا تخلينى اندم
مازن / اوعدك
مرام / طب هو انا لو طلبت مهر تدايق
مازن / ابدا اطلبى اللى انتى عوزاه
مرام / حتى لو مهرى كان غالى
مازن / حتى لو كان نجمه مالسما
مرام / ابتدينا النخع اهو
مازن / نخع !!!
مرام / هتجيبلى نجمه مالسما ازاى يعنى يا بريلو عصرك و اوانك
مازن / بريلو لا هو اه انا بتكلم اربع لغات و امهم بس اللغه دى جديده شويه عليا
مرام / هههههههههههههههههههههههههههه
مازن / احلى صبح ده و لا ايه بخصوص النجمه اه انا اقدر اجيبلك نجمه بمنتهى البساطه هروح لناسا و اشترى منهم نجمه و اكتبها باسمك و هتبقى النجمه دى فكل حته فى العالم اسمها مرام نور الدين
مرام / انت بتتكلم جد و لا بتشتغلنى
مازن / جد والله انتى متعرفيش الموضوع ده
مرام / لا
مازن / خلاص بكره اشتريلك نجمه
مرام / ههههههههه لا شكرا خلى النجوم انا عاوزه حاجه تانيه عندى اغلى مالنجوم
مازن / خير اؤمرى
مرام / انا عوزاك تسمع لتيته سوره النساء تحفظها و تفهمها
مازن ساكت
مرام / ايه مهرى غالى عليك مش هتقدر تدفعه كتير عليا
مازن / لا بس اشمعن
مرام / عشان السوره دى بتتكلم عن النساء و دورهم و حقوقهم زى مربنا قال فلما تبقى حافظها و فاهمها هبقى متاكده انك هتصونى و كمان انا عاوزه اكسب ثواب معاك فى حفظ السوره دى بص خد وقتك بس ده مهرى لما تدفعه انا هتجوزك سنه اتنين عشره
مازن / سنه اتنين ايه لا هحفظها
مرام / بفهم
مازن / حاضر
مرام / هتروح الكليه الصبخ
مازن / اه هروح
مرام / هشوفك هناك على فكره عنتلك منابك الاكل كان جميل اوى تسلم ايدك
مازن / الف هنا هعدى عليكى اخدك
مرام / ملوش لازمه متتعبش نفسك مانت اكيد مش هتيجى تاخدنى كل يوم يعنى
مازن / و فيها ايه
مرام / مش عاوزه اتعبك و كمان يعنى مش عاوزه اخد عالعربيه تقوم متوفيش مهرى اتبهدل بقى فى المواصلات
مازن / دمك خفيف اوى سم
مرام / ههههههههههههههههههههه يلا روح بقى ريحلك حبه
مازن / هو انتى لازم تقفلى
مرام / لا الحقيقه لا موراييش حاجه زاكرت و نمت و خلصت كل اللى ورايا كنت هقعد اللعب عالموبايل لحد معاد لبسى
مازن / طب والله مهتلاقى تسليه احسن مالرغى معايا
مرام / ههههههههههههههههه هترغى فى ايه
مازن / هحكيلك حاجات كتير اوى
مرام / عن ايه
مازن / عنى و قد ايه وحشتينى و قد ايه الكام ساعه دول عدوا عليا صاعبين اوى و قد ايه كنت ساجد لربنا بدعيله انك تغيرى رايك تعرفى انى عمرى مدعيت بحاجه
مرام / خالص
مازن / لا اصلى عندى كل حاجه الحمد لله كنت بشكره بس عمرى مطلبت طول عمرى عارف انى اكتر انسان محظوظ على وش الارض بس النهرده اتاكدت
مرام / اشمعن
مازن / لسببين الاول انك معايا التانى ان اول مره ادعى ربنا يستجيب
صمت
مازن / سكتى ليه
مرام / بسمعك
مازن / بحبك اوى يا مرام
مرام / شكرا
مازن / شكرا !!!
مرام / امال ارد اقول ايه
مازن / ماشى هعلمك و اكسب فيكى ثواب دى لما اقولهالك تردى و تقولى و انا بموووووت فيك
مرام / هههههههههههههههههههههههه يعنى اى حد يقولى بحبك اقوله و انا بموت فيك
.................................