السكه شمال بقلم / لولو_محمد ( كامله )

الحلقه ١٦٧

((((((((((((السكة شمال )))))))))
#لولو_محمد
الحلقه 167
مرام / انا هعمل لنفسى شاى اعملك معايا فى عندنا نسكافيه و قهوه و يانسون و نعناع و شاى و لبن و عندنا كمان عصير مانجه و جوافه و موز لو تحبى اعملك عصير و فى كاكاو كمان قولى بس
لبنى / و لا اى حاجه شكرا
مرام / ثوانى و هاجى
مرام تدخل المطبخ و لبنى تبص يمين و شمال تروح تفتح البلكونه تشوف هدوم مازن منشوره عالحبل تمسكها تلاقيها ناشقه تلمها و تدخل تلاقى مرام واقفه معاها صينيه عليها كاسين و ازازتين حاجه ساقعه
مرام / خلى الشاى بعدين ... انتى لميتى الغسيل هههههه تعالى ...تعالى اقعدى
لبنى تروح تقعد
لبنى / هو مازن و شريف فين هناك عند محمود
مرام / اه شريف هناك لكن مازن نايم جوه
لبنى / مازن نايم هنا جوه ؟!!!!!
............................
مرام / اه عوزاه فى حاجه اصحيهولك
لبنى / اه لا استنى لا سيبيه يرتاح هو عامل ايه
مرام / كويس
لبنى / خالو صفوت بالنسبه لمازن مكنش مجرد خال دا كان عيلته كلها امه و ابوه و ضهره موته كسرنا كلنا كان راجل محصلش عمرى محبيته كنت بكرهه جدا جدا بس زعلت عليه اوى
مرام تبص للبنى باستغراب
لبنى / بكرهه ليه و منين بكرهه و منين زعلت عليه صح
مرام تهز راسها اه
لبنى / بكرهه عشان كان بيعاملنى وحش علاطول كان بيعاملنى وحش حتى و احنا عيال انتى عارفه اننا جروب مع بعض من زمان جدا انا و مازن و نورا و زياد مع بعض من واحنا اطفال كان دايما بيفضل نورا عليا مع ان ظروفنا كانت تقريبا واحده لكن نورا بالنسباله كانت زى مونى كدا و اكتر زيك كدا لدرجه ان ماما اوقات كتير كانت بتفتكر انه بيحب مامتها و انا اوقات كتير مكنتش بفهم ليه بيعاملنى وحش اوى كدا ليه بيبصلى بالطريقه دى ليه بيعاملنى كدا
مرام / اكيد كنتى بتعملى حاجه غلط
لبنى / كتير كل حاجه كنت بعملها كانت غلط عمرى معملت حاجه واحده صح اصلا بس مكلنا بنغلط كلنا بنعك هو احنا ملايكه ليه مخدنيش فى حضنه و ربانى و علمنى الصح من الغلط ليه مفتحليش بيته زى نورا و حاول يساعدنى يوجههنى
مرام / امال زعلتى عليه ليه
لبنى / علشان كنت بحبه اوى هههههههههههههههههههههه
لبنى تدحك و هى بتعيط و تمسح دموعها
لبنى / كان نفسى اوى لو كان بابا كنت بقولهاله كتير على فكره و ساعات كتير كنت بعمل نفسى نايمه عشان يشيلنى و يحطنى على اى سرير نمت فى الجنينه و على حمام السباحه و فى اللوبى و عالسلم اى مكان اشوفه جاى عليا من بعيد اعمل نفسى نايمه
مرام تبتسم
لبنى / و كان بيشيلنى و يحضنى و يحطنى فى اقرب سرير و يغطينى بس عمره ما سمحلى ابات اول ما ماما كانت بتيجى تاخدنى حتى لو انا نايمه كان بيدينى ليها مع ان لو نفس الموقف مع مونى او نورا كان هيقولهم سيبوها للصبح و انا هروحها عادى لكن لبنى لا متباتش هنا
مرام / اشمعن
لبنى / معرفش و مفرقش معايا اعرف اصله مكنش الوحيد اللى بيعاملنى كدا فعادى ... احنا خسرناه يا مرام  
مرام / الله يرحمه
باب الاوضه يتفتح و مازن يخرج و يستغرب لما يشوف لبنى اللى تقوم تقف اول ما تشوفه
مازن / لبنى ؟!!!
لبنى / ازيك
مازن / الحمد لله
مرام / لبنى كانت جايه تطمن على شريف
لبنى / مرام هو انتى ممكن تعمليلنا حاجه نشربها
مرام تبصلها و تبص لمازن و تبتسم و تقوم
مرام / اه طبعا ثوانى عن اذنكوا
مرام تقوم و تبص لمازن اللى بيبصلها و تدخل المطبخ
لبنى / ممكن اتكلم معاك شويه انا محتاجه اتكلم معاك اوى
مازن يروح يقعد على الكرسى و لبنى عالكانبه تقرب
لبنى / عامل ايه
مازن / كويس و انتى
لبنى / لا انا مش كويسه خالص الحقيقه صدقنى كان نفسى اقول اى حاجه غير كدا بس مش قادره
مازن / باين عليكى
لبنى / انا و ماما كنا بنشترى هدوم محجبات اشتريت هدوم كتير اوى اوى
مازن / كويس المهم يكون عن اقتناع مش مرحله و تعدى
لبنى / لا مش هتعدى انا ناوياها بجد انا حاسه ان ده الصح مش هو ده الصح برده
مازن / اكيد
لبنى / امال انا ليه مخنوقه كدا
لبنى تحاول توسع الطرفه من تحت رقبتها و مازن عينه عليها
لبنى / تعرف يا مازن و انا فى الاتيليه بقيس مكنتش عارفه ايه الحلو و ايه الوحش البياعه عاوزه تبيع و خلاص كلو حلو كلو جميل اصلا هى دى موضه المحجبات و ماما بقى رافضه اللى بعمله و مش عاجبها تعرف انا دورت فى النمر عالموبايل لاى حد اى حد اخد رايه او اتكلم معاه لقيت انى مليش حد انا مليش اى حد مليش صحاب مليش اهل مليش حد
مازن / امال زياد فين
لبنى / قولتلك ان انا و زياد سبنا بعض انا مش عاوزه ارجع للعيشه اللى كنت عيشاها دى تانى انا عاوزه ابدا صفحه جديده عاوزه اتغير عاوزه ابقى لبنى تانيه خالص عاوزه ارجع بالزمن و معملش الحاجات اللى بعدتنا عن بعض زمان
لبنى تحط ايدها على ايد مازن يسحب ايده
مازن / هى مرام بتعمل ايه كل ده
مازن يقوم لبنى تقوم تقف 
لبنى / انا اسفه انا اسفه بس ارجوك اسمعنى ارجوك و لو مره واحده اسمعنى انا محتاجه اتكلم انا مليش حد اتكلم معاه مفيش حد يسمعنى ارجوك
مازن / لبنى انتى مقدره احنا فين انتى مقدره الوضع اللى احنا فيه مرام جوه
لبنى / طب بس اسمعنى اسمعنى و همشى علاطول اوعدك مش هعملك مشاكل بس ارجوك
مازن يقعد
لبنى / مازن انا بجد عاوزه اتغير بس انا محدش هيشجعنى محدش هيساعدنى مازن خليك جنبى ساعدنى انا مش هقدر لوحدى
مازن /  و مين كان ساعد نورا تتغير
لبنى / انت انت ساعدتها انت وقفت جنبها و اديتها بدل الفرصه اتنين و تلاته
مازن / الوضع كان مختلف
لبنى / ليه ؟؟ ليه مختلف ؟ ليه عمرك ماديتنى فرصه ليه عمرك محسيت بيا مازن انا بح...
مازن يدخل المطبخ و لبنى روحها هتطلع عليه يلاقى مرام واقفه سانده عالرخامه و الكبيات متلقمه تشوفه تبتسم و تتعدل و تصب المايه عالكوبايات
مازن /بتعملى ايه كل ده
مرام / مستنياكوا تخلصوا كلام
صوت باب الشقه بيتقفل بره مازن ياخد مرام فى حضنه
مازن / انا بحبك اوى بحبك اكتر من اى حاجه تانيه فى الدنيا
مرام / و انا كمان بحبك و بحبك اوى كمان بس قولى بقى فى ايه كانت عوزاك فى ايه
مازن / مشاكل بينها و بين زياد هيحلوها سوا
مرام / و بما انها متخصكش مش هتحكيهالى و انا مش هسالك اى حاجه بس انت متقدرش تدخل بينهم يعنى تحاول تحل الموضوع مدام هى جت لحد عندك
مازن / للاسف لا هما متعودين عالحاجات دى و زى مقولتلك هيحلوها سوا
مرام / تمام
مازن / انتى ليه معملتيش الشاى و طلعتى علاطول يعنى انتى مكنتيش مجبره تتوزعى مكنش عندك فضول تعرفى عوزانى فى ايه
مرام / عندى و ما زال عندى ههههههههههههههه بس انا واثقه فحبيبى و واثقه فيك اوى كمان
مازن يهز راسه و يدخل جوه
………………….
فى اوضه محمود
محمود / انت بتستفزنى و لا عاوز تجننى و لا انت ايه نظامك
شريف / و الله دا التفسير الوحيد اللى عندى عاوز تفضل انت بقى تهرى و تنكت فى نفسك براحتك
محمود / مازن بيخزن مازن بيخزن مازن بيسقط يا شريف مازن ...
شريف / انت كان عندك كام سنه لما والدك اتوفى يا محمود
محمود / كنت صغير يعنى فى ابتدائى تقريبا موعاش عليه اصلا
شريف / بس انا بقى اوعى انا كنت فى الكليه كبير و فاهم يعنى عارف يعنى ايه انك تنام و تقوم تلاقى ضهرك فى الدنيا اتكشف سندك راح انا كنت مكان مازن فى يوم من الايام بنام و اقوم و اكل و اشرب بس لا حاسس و لا عايش مع ان انا كان عندى اللى ياخد باله منى امى و اخواتى والله مش عارف هما اللى كانوا بياخدوا بالهم منى و لا مين اللى كان بياخد باله مالتانى اخواتى البنات كانوا مبيبطلوش عياط امى العيا زاد عليها و انت واقف وسط كل دول عاجز بس لازم تكمل الكليه مش هتوقف محاضرات و سكاشن عشان سعاتك ابوك اتوفى لازم تنزل و تدور على شغل لازم تجيب اكل للبيت لازم تقف على رجليك يمكن ده اللى ساعدنى اعدى المرحله دى
محمود / هو ايه اللى فتح السيره ده اصلا
شريف / انا بقولك عشان تقدر ظروف مازن مازن ملوش فى الدنيا الا خاله ده امه ماتت و هو صغير و ابوه زى مانت عارفه راجل استغفر الله العظيم رماه فى مدرسه داخلى و حلقله خاله اللى رباه و سهر عليه كان دايما يقولى الله يرحمه بقى مازن ده اللى طلعت بيه مالدنيا نفسى يبقى احسن حاجه نفسى اطمن عليه
محمود / طب و بعدين الحال ده هيستمر لحد امتى هنفضل قاعدين كدا لحد مالشركه تقع بجد
شريف / لا لحد ميخلصوا لم الاسهم و بعد كدا هنرجع الشركه تانى و نتابع الشغل
محمود / و مازن
شريف / ماله مازن متسيب مازن فى حاله يابنى
محمود / الله مش فلوسه و لازم ياخد باله منها
شريف / امال انت دورك ايه مرتبك اللى بتاخده كل اول شهر ده بتاخده ليه
محمود يبص الناحيه التانيه
شريف / يابنى انت ليه محسسنى ان مازن هو اللى كان ممشى الليله مازن كان اخره يمضى عالورق اللى بنقوله يمضى عليه يعنى حتى لو مازن فاق لروحه و مسك الشركه مش هيعرف يروح و لا يجى و هياخد وقت برده على ميفهم الليله امال انت فاكر ايه
محمود / و العمل
شريف / متشلش هم على اخر الاسبوع هنزل الشركه و امشى كل الحاجات اللى واقفه و ناجل اى شغل جديد فتره كدا لحد منقدر نوقف الشركه تانى و نسلم كل الشغل القديم و بعدها يحلها حلال
محمود / اللى تشوفه بقى ... بقولك ايه فى حوار كدا جوايا بس مش هينفع اتكلم فيه مع حد
شريف / خير
محمود / قاعده مازن هنا بص انا و انت و الحبايب فاهمين بس مروه قالتلى يعنى بدل مكان يجيب كنبه سرير هنا كان الاولى ياخدها بيته هى مكنتش فاهمه انت عارف بس هى اتكلمت معايا و فهمتها غيرها يعنى انت فاهم احنا مش فى الزمالك هنا
شريف / ميولعوا راجل و مراته يقعدوا مكان ميقعدوا
محمود / ياعم الكلام ده مش هنا هنا حتى لو مكتوب كتابهم كانهم فى حكم المخطوبين مدام محصلش فرح انسى
شريف / يا سلام طب ماحنا عملنا الفرح و رقصنا و غنينا و الحاره كلها تشهد
محمود / بقول ايه و انت بتقول ايه
شريف / بص هو مش ممكن يتعمل زفه عربيات و العريس و العروسه يروحوا و تنفض الليله
محمود / بيحصل بس بتروح على بيت جوزها مش تجيب جوزها و تقعد فى بيتها
شريف / ايوه ميقعدوا مكان ميقعدوا هما احرار
محمود / خلاص يا شريف انسى انسى
شريف / انا فاهمك بس لانا و لا انت لينا راى فى الموضوع هو و هى يصطفوا و بعدين ما هى يعنى تيته مش عارفه الصح مالغلط و احنا هنعرفه لو كانوا اللى بيعملوه غلط مكنتش تيته سمحت بيه
محمود / يا عم انا متكلمتش و لا قولت حاجه انا بس بتكلم عالناس الناس مش بتسكت
شريف / يبقى تكبر دماغك و قفل عالسيره دى بقى انا صدعت
محمود / هقوم اعملنا شاى
...............................
فى كافيه
زياد قاعد مع انس و هانيا و سوزى لبنى تدخل هانيا و سوزى يبصوا لبعض
زياد / اهلا ازيك يا قلبى تعالى اقعدى
لبنى تبتسم زياد يعدل للبنى الكرسى
انس / ايه يا بنتى ده دانا معرفتكيش
لبنى / مش كدا احلى برضه
هانيا / بصى هو انتى اكيد حلوه فكل حاجه بس الحركه دى اخر حاجه كنت اتوقع تعمليها
لبنى / ليه بقى يعنى
سوزى / يعنى مش استايلك خالص و بعدين هتودى هدومك القديمه كلها فين دا فيهم حاجات متلبستش غير مره
لبنى / والله مش هكدب لو قولتلك ان فيهم حاجات متلبستش اصلا ههههههههههههههههههههه
هانيا / مش حرام عليكى يعنى دا غيرك مش لاقى حسى باخواتك يا بنتى دانا بيطلع عينى عشان اجيب طقم
لبنى / لو عاوزاهم تعالى خديهم انتى عارفه انى مش هستخسرهم فيكى
سوزى / طول عمرك حنينه يا لولا بس بقولك ايه بجد بقى انتى مستحمله البتاعه دى ازاى فى الجو ده
لبنى / مش هقولك هفطس جواها بجد بس بيقولوا فتره و هاخد عليها
هانيا / و شعرك
لبنى / ماله شعرى
هانيا / مبياثرش عليه
لبنى / مفتكرش مكلنا شفنا شعر مرام
هانيا / بس مرام محجبه من زمان و اكيد بتعرف تهتم بشعرها تحت الحجاب لكن انتى اكيد متعرفيش هو هيبقى محتاج ايه
زياد / و تهتم بيه ليه امال البيوتى سنترز اتعملت ليه هما يهتمولها بيه
سوزى / من حق الكبير يدلع طبعا
زياد / فككوا بقى من كل ده فرح مونى فى اخر واحد
انس / انا معزوم و لا زى الخطوبه
زياد / لا متخافش معزوم كلكوا معزومين
هانيا / فى دبى
زياد / ايوه يعنى اسبوع فول بورد فى دبى يا ستى
سوزى / اى لوف يو جايز
هانيا / مفيش اخبار عن مازن فرحه هيبقى امتى و لا ايه النظام
لبنى / مفتكرش انه هيحتاج فرح اصلا بيتهيالى خلاص كدا
زياد / انتى بتقولى ايه دا كان بيقول الفرح مهم جدا عشان مرام
هانيا / فعلا دا الكل كان بيتكلم عن الفرح بيقولوا كان هيبقى فرح اسطورى
انس / دا كفايا الدعوات
لبنى / انا بقول اللى شوفته مازن لم هدومه و راح عاش مع مرام فى بيتها
انس / نعم فى الحاره
لبنى / دا اللى حصل انا برده اتصدمت زيك كدا
زياد / و انتى ايه اللى وداكى الحاره
لبنى / كنت بطمن على شريف
انس / ماله شريف
زياد / و تطمنى على شريف ليه مش احنا زورناه فى المستشفى و خلصنا
لبنى / عادى يعنى و فيها ايه
انس / يا جدعان ماله شريف
لبنى / حد اداله بالمطوه فى جنبه بس هو كويس
هانيا / سورى بس فى حاجه واقعه منى ايه علاقه انك تطمنى على شريف بان مازن بايت عند مرام
لبنى / شريف بايت عند محمود
انس / ايه العك ده
لبنى / اللى شوفته قولته يا جماعه
زياد / خلاص خلاص نغير السيره دى لو سمحتوا
زياد يبص على لبنى و هو رافع حاجبه تبصله يبتسم و يدارى
..........................................
فى شقه مرام
مرام تصحى من النوم فى الصاله تلاقى مازن قاعد على طرف السرير و الموبايل فى ايده تقوم على ركبها تحضنه من ضهره يبصلها
مرام / مالك ايه اللى مصحيك دلوقت
مازن / اتصلت بخالو
مرام تسيب مازن و تقعد جنبه و تبصله و هو باصص قدامه
مازن / كنت بفكر فى الزفت الدهبى حاسس ان اللى زياد عمله فيه اى كان مش كفايا و لازم يتربى بس مش عارف اعمل ايه لقتنى بتصل بخاله اساله
مرام تحضن مازن اوى
مازن / اتصلت بيه تلت مرات غير متاح و بعدين افتكرت انه مش هيرد افتكرت انه معدش موجود انه مات
الدموع تنزل من عين مرام
مازن / معدش عندى اللى اساله اعمل ايه او اتصرف ازاى بقيت مع نفسى خلاص
مازن يبص لمرام يلاقيها بتعيط
مازن / بتعيطى ليه
مرام / مفيش
مرام تمسح دموعها و تحاول تبتسم
مازن / الحمد لله انك جنبى مش عارف من غيرك كنت عملت ايه
مرام / ربنا يخليك ليا
مازن / انا هنزل اتمشى شويه مخنوق و عاوز اغير جو
مرام / دلوقت ؟؟ دا الفجر قرب ياذن
مازن يهز راسه و يقوم و مرام عينها عليه و مش عارفه تعمل ايه
..................................
فى شقه شريف
الست / و انتى اش عرفك انها مش هتعجبه
رؤى / عشان شريف مش هيتجوز بالطريقه دى
الست / و خدنا ايه من طريقته التانيه .. ست اريج و اللى جالنا من ورا الست اريج ... مال لو كانت حلوه شويه كانت عملت فينا ايه
شيماء / والله انا بقول اننا نستنى يرجع و نقوله علي مى عجبته كان بها معجبتوش خلاص اهو ادينا حاولنا
الست / والله عين العقل مش طريقه و طريقاتى
رؤى / يا جدعان هو انا الوحيده اللى شايفه الكيميا بين ابيه و بين صافى
الست / صافى ... طب والله قمر حته بت بسكوته كدا تخافى تلمسيها تتفرفت فى ايدك مش زيكوا قراشانات
رؤى / ههههههههههههههههه طب ليه الغلط دا طيب
الست / بس هى اللى زى صافى دى تشيل بيت و لا حتى هتقدر على عيشتنا
شيماء / الله مش كانت احسن مننا من شويه لحقتى تقلبى عليها
الست / انا بس بتكلم يعنى بسال بس بتعرف تطبخ و لا هيقضوها دليفرى و لا هيعيشوا ازاى
شيماء / انتوا بتتكلموا كانها وافقت اصلا
رؤى / و هو شيكو يتعيب يعنى و لا ايه هى تطول
شيماء / ابيه ملوش زى بس هى لفت الدنيا و عايشه دلوقت فى لندن و بتشتغل موديل و استايلها مختلف خالص عن ابيه انا اساسا مش قادره استوعب هما ازاى بقوا اصحاب اصلا
رؤى / مفيش حاجه اسمها صحبيه بين راجل و ست دى بيبقى اسمها استهبال بعيد عنك
شيماء / والله معرفش بس اللى اعرفه ان ابيه مبيلعبش ببنات الناس
الست / خلاص خلاص انا جتلى فكره .... احنا نستنى شريف يرجع و نكلمه عن مى عجبته كان بها يبقى حوار صافى ده منتهى معجبتوش يبقى نكلمه عن صافى
شيماء / و لو رفض الاتنين
الست / يبقى اللى ياكل على درسه ينفع نفسه هو انا هقطع نفسى مش كفايا عليا انتى و اخواتك قومى بصى عالكيكه لتتحرق خلينا نخش ننام اما نشوف اخرتها فام الاجازه دى اللى كل يوم نطبق فيها للصبح دى
شيماء / ههههههههههههههههههههه حاضر حاضر
.......................................
فى المقابر
مازن واقف بيقرا الفاتحه فى مكان كله رخام و لمض نيون
مازن / عامل ايه كلهم بيقولوا انك فى مكان احسن من هنا هنيالك يا عم من يومك مرزق بس مكنتش اعرف انك هيجى عليك يوم و تستندل معايا ... طول عمرك بتفضلنى علي نفسك اشمعن فى دى ... اشمعن المرادى روحت و سبتنى ... سبتنى فى الدنيا الوحشه دى مع الوحوش دول لوحدى .. سيبك منى انا كويس طمنى بس على ماما عامله ايه .. اوعى تكون زعلانه منى عشان مكنتش بزورها كتير و كدا ... قولها انى اسف انا هبقى ازورها بس انا كنت دايما ببعتلها السلام معاك لما كنت بتزورها اوعى تكون كنت بتنسى توصله ... انا والله بقرالها الفاتحه كتير و اطلع لله كتير على روحها و بدعيلها ... والله علاطول بدعيلها ... بيوصلها صح ؟... و بدعيلك انت كمان .. الا اخبار الحور العين ايه يا خالو هاه حلوين بقى زى مبيقولوا كدا و لا ايه هايص انت هاه ... فراقك كسرنى اثر فيا اوى طول السنين اللى فاتت دى مكنش عندى غيرك و كنت بقول معنديش اللى اخسره مكنتش اعرف انى لما هخسرك هتعب اوى كدا كانى عمرى متخيلت انى ممكن اصحى فيوم الاقيك مش جنبى ... عمرى متخيلت انك هتسبنى ... انا اسف على فكره ... اسف على كل الحاجات اللى عملتها دايقتك منى ... اسف انى مستغلتش كل ثانيه فاتت من حياتى بعيد عنك مقضيتهاش معاك اسف على كل مره كان قدامى فرصه اترمى فى حضنك و معملتهاش ... اسف على كل مره افتكرت نفسى راجل و سبتك و روحت شقتى لوحدى مع شويه رمم ميستاهلوش انى اسيبك عشانهم .. اسف انى مكنتش الابن اللى يرفع راسك ... انا بحبك اوى بحبك بجد و مش قادر على فراقك ده
تليفون مازن يرن يمسح دموعه و يبص فى الموبايل يلاقى مرام يرد
مازن / ايوه يا مرام
مرام / انت فين يا مازن اتاخرت كدا ليه
مازن / مفيش يا مرام قولتلك هتمشى شويه 
مرام / طب انت احسن يعنى فادك
مازن / ابدا ... تعبان اوى مخنوق
مرام / طب خنقه بخنقه بقى اتخنق جنبى و لا انت عاجبك قلقى عليك كدا مش عارفه اروح فين و لا اجى منين
مازن / عيل صغير انا يعنى عشان تقلقى عليا كدا قولتلك هتمشى شويه و ارجع
مرام / لا يا سيدى مانتش عيل راجل و سيد الرجاله بس انا مبعرفش انام و لا ارتاح الا وراجلى فى البيت ايه اجرمت
مازن / ههههههههه لا يا ستى ما اجرمتيش و لا حاجه انا هروح حاضر
مرام / خد بالك من نفسك تمام
مازن / حاضر مسافه السكه و اجى
مازن يقفل و يحط الموبايل فى جيبه
مازن / انا مش عاوز اسيبك بس فنفس الوقت مش عاوز اكرر غلطتى تانى مش عاوز اضيع اللى باقيلى معدش فاضلى غيرها ...مرام ... هى اللى بقيالى ... بس اوعدك هاجى تانى .. سلام
مازن يقرا الفاتحه و يمشى
............................
فى الشقه عند مرام
سميحه / مش طمنك مالك بقى قاعده كدا ليه
مرام / حالته مديقانى اوى يا تيته مش ده مازن اللى اعرفه دا واحد تانى كانه اتبدل
سميحه / الحزن بيعمل اكتر من كدا يا بنتى و بعدين اللى حصل مكنش شويه الله يعينه
مرام / ايوه يا تيته بس انا حساه بيبعد عنى معايا بس مش موجود مازن واحشنى اوى يا تيته
سميحه / خليكى جنبه ساعديه يعدى المرحله دى هو محتاجلك دلوقت اكتر من اى وقت تانى
مرام تهز راسها اه الباب يتفتح و مازن يدخل و جايب فطار
مازن / انا جبت فطار من عند عن مدبولى حد ياكل
مرام / حمد الله عالسلامه
مرام تبتسمله و تاخد منه الكيس و تدخل المطبخ
سميحه / تعال اقعد جنبى هنا يا واد يا عفريت انت دى عمله تعملها فى ستك العجوزه
مازن يبتسم و يروح يقعد جنبها
سميحه / عامل ايه احسن دلوقت و لا لسه مخنوق
...................................